1. Малы туннэ тросэз Библилы уг оско?

 ТУННЭ тросэз кинлы оскыны ик уг тодо. Адямиослы секыт оскыны, кивалтӥсьёс, тодосчиос, ужбергатӥсьёс соос сярысь сюлмасько шуыса. Религиозной кивалтӥсьёс верало ке но, Библияя уло шуыса, адямиослэн малпамзыя, черклы но оскон быриз ини. Соин ик паймонэз ӧвӧл, адямиос Библилы уг оско шуыса.

2. Псалтирез 118:160 лыдэ басьтоно ке, малы ми юн оскыны кулэ?

² Иеговалэн ужась-тыршисьёсыз луыса, ми юн оскиськомы: Иегова — «зэмлыклэн Инмарез» но со милемлы котьку но самой умойзэ гинэ сӥзе (Пс. 30:6; Ис. 48:17). Ми оскиськомы солы, мар гожтэмын Библиын, малы ке шуоно «[Инмарлэн] кылызлэн инъетэз — зэмлык». (Лыдӟе Псалтирез 118:160.) Ми соглаш одӥг тодосчилэн вераменыз: «Ваньмыз, мае вераз Инмар,— зэмлык. Солэн кылъёсыз котьку но быдэсмо. Инмарлэн ужась-тыршисьёсыз оско солэн кылъёсызлы, малы ке шуоно солы аслыз но оско».

3. Мае ми эскеромы та статьяын?

³ Нош кызьы мукетъёсызлы юрттоно, ми кадь ик, Инмарлэн Кылызлы оскыны? Ойдолэ эскеромы куинь мугъёсты, малы Библилы оскыны луэ. Ми адӟомы: Библиын гожтэм кылъёс воштӥськемын ӧвӧл, Библиысь азьпалзэ  ивортонъёс котьку быдэсмо но солэн визь-кенешъёсыз адямиослэсь улонзэс воштыны быгато.

4. Малы куд-огъёсызлы Библиын гожтэм кылъёслы оскыны секыт?

⁴ Иегова ог 40 оскымон пиосмуртъёслэсь мылкыдзэс ӝутӥз гожтыны книгаосты, кудъёсыз Библие пыртэмын вал. Но нырысь гожтэм одӥг свиток но ми дырозь ӧз вуы. Ваньмыз, мар милям вань,— со копиосысь гожтэм копиос. Соин ик куд-огъёсызлэн таӵе юанзы кылдэ: «Зэм ик-а со, мар туннэ гожтэмын Библиын, отын нырысь ик гожтэмын вал?» Мар милемлы валаны юрттоз, Библиын гожтэм кылъёс ӧз воштӥське шуыса?

5. Кызьы лэсьтӥзы Еврей Гожтэмъёслэсь копиоссэс? (Учке вылбамысь суредэз.)

⁵ Библиын гожтэм кылъёс медам воштӥське шуыса, Иегова аслэсьтыз калыксэ косӥз Священной Гожтэмлэсь копиоссэ лэсьтыны. Инмар израиль эксэйёсты куриз асьсэлы Моисейлэсь законзэ гожъяны. Озьы ик со левитъёсты пуктӥз, соос та законлы калыкез мед дышетозы шуыса (К. Зак. 17:18; 31:24—26; Неем. 8:7). Вавилон пленысь потэм бере юри дышетскем адямиос Еврей Гожтэмъёслэсь копиоссэс лэсьтыны кутскизы (Езд. 7:6, ВД, сноска). Соин ик Библилэн та люкетэзлэн туж трос копиосыз лэсьтэмын вал. Та адямиос туж тыршыса ужазы. Берлогес, нокыӵе янгыш лэсьтэмын медам луы шуыса, соос гожтэм кылъёсты гинэ ӧз лыдъялэ, озьы ик гожтэм букваосты но лыдъязы. Озьы ке но, адямиослэн тырбыдэстэм луэменызы сэрен, пичи янгышъёс пыризы. Но копиос туж трос лэсьтэмын вал бере, та янгышъёсты шедьтыны капчи вал. Кызьы?

6. Кызьы Библилэн копиосысьтыз янгышъёссэ шедьтыны луэ?

⁶ Туэ тодосчиос туж умой быгато Библилэн копиосысьтыз янгышъёссэ шедьтыны. Кызьы? Шуом, 100 адямиосты куризы одӥг текстэз гожтыны. Соос пӧлысь одӥгез янгыш лэсьтӥз. Кызьы сое шедьтоно? Солэсь гожтэмзэ мукет адямиослэн гожтэмъёсынызы ӵошатыса. Ӵапак озьы ик тодосчиос но Библилэсь копиоссэ ог-огенызы ӵошато но адӟо, кыӵе янгышъёс лэсьтэмын вал яке мар гожтытэк кельтэмын вал.

7. Макем тыршыса гожъязы Библилэсь копиоссэ?

⁷ Библилэсь копиоссэ туж тыршыса гожъязы. Тани одӥг пример. Самой вуж рукопись, кудаз быдэс Еврей Гожтэмъёс гожтэмын,— со Ленинградской кодекс. Лыдъяло, со асьме вакытэ 1008-тӥ яке 1009-тӥ арын гожтэмын вал шуыса. Но алигес шедьтэмын вал рукописьёс яке рукописьёслэн люкетъёссы, кудъёсыз Ленинградской кодекслэсь ог 1 000 арлы азьлогес гожтэмын вал. Кин ке но малпалоз, дыр, Ленинградской кодекс, сю аръёс ӵоже выльысь но выльысь гожъяса, туж воштӥськемын ини шуыса. Но со озьы ӧвӧл. Куке тодосчиос ӵошатӥзы вуж рукописьёсты соосыныз, кудъёсыз берлогес гожтэмын вал, соос адӟизы, пичи янгышъёс лэсьтэмын вал ке но, малпанъёс воштӥськемын ӧй вал шуыса.

8. Маин пӧртэм луо Христиан Грек Гожтэмъёслэн копиоссы но мукет вашкала книгаослэн копиоссы?

⁸ Еврей Гожтэмъёслэсь копиоссэс лэсьтӥсьёс сямен, нырысетӥ христианъёс но туж тыршыса гожъязы Грек Гожтэмъёсысь 27 книгаослэсь копиоссэс. Та копиосты  соос уже кутӥзы пумиськонъёсын но тодытон ужын. Одӥг тодосчи ӵошатӥз Грек Гожтэмъёслэсь копиоссэс но мукет вашкала книгаослэсь копиоссэс. Со вера: «[Грек Гожтэмъёслэн копиоссы] тросгес... но ӵем дыръя отын номыриз ышемын ӧвӧл». Одӥг книгаын вераське: «Куке ми лыдӟиськомы [Грек Гожтэмъёслэсь] туала умой берыктэмзэс, ми лыдӟиськомы сое ик, мар отын нырысь гожтэмын вал» (Anatomy of the New Testament).

9. Исаиялэсь 40:8 лыдэ басьтоно ке, малы Библилы оскыны луэ?

⁹ Сюрс аръёс ӵоже Библилэсь копиоссэ туж тыршыса гожъязы, соин ик туннэ солы, мар гожтэмын Библиын, оскыны луэ b. Ачиз Иегова тыршиз, адямиослы гожтэм Кылыз медаз воштӥськы шуыса. (Лыдӟе Исаиялэсь 40:8.) Но кин ке но вераны быгатоз: «Библия ӧз воштӥськы ке но, уг луы вераны, со Инмарлэсь шуыса». Соин ик ойдолэ эскеромы мукет малпанъёсты, кудъёсыз возьмато, Библия — со Инмарлэсь книга шуыса.

10. Вералэ одӥгзэ быдэсмем азьпалзэ ивортонэз, кудӥз возьматэ, 2 Пётрлэн 1:21 кылъёс зэм луо шуыса. (Учке суредъёсты.)

¹⁰ Библиын гожтэмын трос азьпалзэ ивортонъёс, кудъёсыз быдэсмизы ини. Соос пӧлысь куд-огъёсыз быдэсмизы, соосты гожтэм бере трос сю аръёс ортчыса гинэ. Тае история но возьматэ. Ми талы ум паймиське, малы ке шуоно Библиысь азьпалзэ ивортонъёсты ачиз Иегова Инмар вераз. (Лыдӟе 2 Пётрлэсь 1:21.) Ойдолэ эскеромы вашкала Вавилон карлэн куашканэз сярысь азьпалзэ ивортонэз. Асьме вакытлэсь азьло VIII даурын Исаия пророк вераз, кужмо Вавилон кар киултэмын луоз шуыса. Озьы ик со вераз, сое Кир нимо пиосмурт киултоз шуыса, но пыр-поч валэктӥз, кызьы кар киултэмын луоз (Ис. 44:27—45:2). Со сяна, Исаия шуиз,  дыр ортчыса, Вавилон куашкатэмын луоз но отын нокин уз улы шуыса (Ис. 13:19, 20). Озьы ик луиз. Асьме вакытлэсь азьло 539-тӥ арын Вавилон карез мидян но перс калыкъёс киултӥзы. Али та бадӟым кар интыын куашкам бервылъёс гинэ. (Учке «Библиын азьло ик верамын вал, Вавилон киултэмын луоз шуыса» видеороликез, кудзэ шедьтыны луэ «Пумтэм вапумъёс ӵоже шумпотыса улэ!» книгаысь, 3-тӥ урокысь, 5-тӥ пунктысь.)

11. Вералэ, кызьы туннэ быдэсме азьпалзэ ивортон, кудӥз гожтэмын Данииллэн 2:41—43.

¹¹ Библиысь азьпалзэ ивортонъёс азьвыл гинэ ӧз быдэсмелэ. Соос пӧлысь куд-огъёсыз син азямы ик быдэсмо. Кылсярысь, Англо-Американской дунневыл держава сярысь Данииллэн азьпалзэ ивортонэз. (Лыдӟе Данииллэсь 2:41—43.) Отын пыр-поч вераськиз, та держава корт кадь юн луоз, но со дыре ик горд сюй кадь пырдӥсь луоз шуыса. Кызьы Великобритания но Огазеяськем Штатъёс юн луэмзэс возьмато? Соос туж трос лэсьтӥзы кыказ но дунневыл ожъёсын вормон басьтон понна. Со сяна, соослэн али но ожмаськон кужымзы туж бадӟым. Озьы ке но та дунневыл державалэсь кужымзэ лябӟыто аслаз шаеръёсаз улӥсьёс, кудъёсыз правооссэс утьыны тыршо но бугыръяськонъёсты ӝуто. Одӥг политолог вераз: «Туннэ быдэс дунне вылын Огазеяськем Штатъёсын гинэ демократия туж юн, нош со дыре ик люкиськемын но рос-прос ужаны уг быгаты». Нош мар вераны луоз Великобритания сярысь — та дунневыл державалэн мукет люкетэз сярысь? Берло аръёсы отын чылкак пӧртэм сямен малпасько со сярысь, кулэ-а солы Европаысь шаеръёсын ӵош ужаны. Таӵе люкылӥськонъёсын сэрен Англо-Американской дунневыл держава вань кужымзэ поныса кивалтыны уг быгаты.

12. Кыӵе оскон сёто милемлы Библиысь азьпалзэ ивортонъёс?

¹² Быдэсмем азьпалзэ ивортонъёс осконмес юнмато, вуоно улон сярысь но Инмарлэн кылсётонъёсыз быдэсмозы шуыса. Милям псаломъёсты гожъясьлэн кадь ик шӧдонъёсмы. Со Иеговалы вераз: «Тон дорысь утиськонэз витьыса, лулы катьтэмме; верам кылыдлы оскиськыса улӥсько» (Пс. 118:81). Библия пыр Иегова милемлы «азьпал улон но оскиськон» сётэ (Иер. 29:11). Адямиослы оскиськем интые, ми Иеговалы оскиськомы. Инмарлэн Кылызлы осконмес юнматон понна, ойдолэ азьланяз но Библиысь азьпалзэ ивортонъёсты сак эскеромы.

13. Малы милям Библилы оскеммы луэ? (Псалтирь 118:66, 138).

¹³ Милям луэ Библилы оскеммы, малы ке шуоно солэн визь-кенешъёсыз бадӟым пайда ваё. (Лыдӟе Псалтирез 118:66, 138.) Кылсярысь, кузпалъёс, кудъёсыз люкиськыны дась вал ини, али шумпотыса огкылысь уло. Сыӵе христиан семьяосын нылпиос шӧдо, соос сярысь сюлмасько но соосты ярато шуыса (Еф. 5:22—29).

14. Вералэ учырез, кудӥз возьматэ, кызьы Библиысь зэмлык адямиослэсь улонзэс воштыны быгатэ.

¹⁴ Библиысь визь-кенешъёс секыт йыружъёсты лэсьтӥсьёслэсь но улонзэс быдэсак воштыны быгато. Тани Джек c агайлэн учырез. Со туж лек вал. Со пытсэтын  пукиз но возьмаз, ку сое казнить карозы. Пытсэтын пукисьёс пӧлысь со одӥгез тужгес но кышкыт адями вал. Но огпол со адӟиз, кызьы Библиез дышетон ортчытӥське. Агайёслэн асьсэды лякытэн воземзы солэн сюлмаз ик пыриз. Солэн но Библиез дышетэмез потӥз. Джек Инмарлэн Кылысьтыз зэмлыкъя улыны кутскиз. Солэн ужъёсыз но, сямъёсыз но воштӥськыны кутскизы. Дыр ортчыса, Джек пылатӥськымтэ ивортӥсь луиз, нош берлогес пылатӥськиз. Со ӟырдыт мылкыдын Инмарлэн Эксэйлыкез сярысь пытсэтын мукет пукисьёслы тодытӥз. Ньыль адямиосын Библиез дышетӥз. Куке казнить карон нуналыз вуиз, Джек чылкак мукет адями вал ини. Одӥгез адвокатэз шуиз: «Ӵошатоно ке, кыӵе Джек вал 20 ар талэсь азьло, али со чылкак мукет ини. Иеговалэн Адӟись-Ивортӥсьёсызлэн дышетонъёссы сое быдэсак воштӥзы». Джек агаез казнить каризы ке но, солэн учырез возьматэ, милям Инмарлэн Кылызлы оскеммы луэ но со адямиослэсь улонзэс воштыны быгатэ шуыса (Ис. 11:6—9).

15. Иеговалэн ужась-тыршисьёсыз Библиысь зэмлыкъя уло бере, маин соос пӧртэм луо мукет адямиослэсь?

¹⁵ Иеговалэн ужась-тыршисьёсыз Библиысь зэмлыкъя уло бере, соос пӧлын люкиськылонъёс ӧвӧл (Иоанн 13:35; 1 Кор. 1:10). Тупаса но огкылысь улэмзы тужгес но адӟиське, куке та дуннеысь адямиослы тупаса улыны люкетэ политика, кыӵе калыкысь потэмзы, узыр яке куанер луэмзы. Иеговалэн калыкезлэн огкылысь улэмез Жан нимо агайлэн сюлмаз ик пыриз. Со будӥз Африкаысь одӥг шаерын. Куке отын граждан ож кутскиз, со армие мынӥз. Нош собере мукет шаере кошкиз. Отын со Иеговалэн Адӟись-Ивортӥсьёсыныз тодматскиз. Тани мар со вера: «Мон тодӥ, зэмос христианъёс политикае уг пырисько но соосты номыр уг люкы шуыса. Соосты яратон огазея. Азьвыл мон улӥ, шаерме утён понна. Нош Библиысь зэмлыкез  тодэме бере мон Иегова понна улӥсько». Жан быдэсак воштӥськиз. Азьвыл со дась вал мукет калыкысь адямиосты виылыны. Нош табере со котькинлы ӟеч иворез тодытэ. Таӵе учыръёс возьмато, Библия вань адямиослы юрттыны быгатэ шуыса. Татысь адӟиське: Инмарлэн Кылызлы быдэсак оскыны луэ.

16. Малы туж кулэ Инмарлэн Кылызлы осконмес юнматыны?

¹⁶ Та дунне уродгес но уродгес луэ. Соин ик Инмарлэн Кылызлы оскыны милемлы эшшо но секытгес луоз. Адямиос милемлы вераны быгато, зэмлык Библиын ӧвӧл, озьы ик оскиськымон но визьмо ляльчиез Иегова ӧз пукты шуыса. Ми юн оскиськомы ке, Иеговалэн Кылыз ноку уг пӧя шуыса, милесьтым осконмес номыр лябӟытыны уз быгаты. Милям юн мылкыдмы луоз «пумозяз, пумтэм вапумъёс ӵоже» Иеговалэн законъёсызлэсь кылзӥськыны (Пс. 118:112). Ми ум возьдаське мукетъёсызлы зэмлык сярысь вераны но соослэсь мылкыдзэс ӝутыны соя улыны (Пс. 118:46). Ми быгатомы, шумпотонмес ыштытэк, котькыӵе шуг-секытъёсты чиданы, озьы ик уйылон-уллянъёсты но (Кол. 1:11; Пс. 118:143, 157).

17. Мар сярысь тодамы возьыны юрттоз 2023-тӥ арлы кылбур?

¹⁷ Ми Иеговаез туж тау кариськомы, со милемлы зэмлыкез усьтӥз шуыса! Та зэмлык юрттэ милемлы каньыл сюлмын улыны но валэктэ, кызьы улоно дуннеын, кудаз огыр-бугыр улон вӧлме. Зэмлык милемлы оскон сётэ Инмарлэн Эксэйлыкезлэн кивалтэмез улсын улыны. 2023-тӥ арлы кылбур юрттоз милемлы оскыны, Инмарлэн Кылызлэн инъетэз — зэмлык шуыса! (Пс. 118:160).