1, 2. а) Мае ми шӧдӥськомы, куке малпаськиськомы Иисуслэн улонэз но ужан-тыршонэз сярысь? б) Мае ми эскеромы та статьяын?

 КУКЕ матысь адямимы кулэ, ми солэсь туж мӧзмиськомы. Нырысь милям сюлэммы ик чигиське, куке малпаськиськомы, макем зол со курадӟиз кулон азяз. Нош дыр ортчыса, сюлэммы буйга. Ми шумпотыса тодамы вайиськомы, кызьы со милемыз малы ке но дышетӥз, кылын но ужен юнматӥз яке кызьы ми ӵош серекъямы.

² Ӵапак озьы ик милям сюлэммы вӧсь луэ, куке лыдӟиськомы Иисуслэн курадӟемез но кулэмез сярысь. Ӝытан вакытэ ми тыршиськомы тросгес малпаськыны, макем дуно луэ солэн мозмытӥсь курбонэз (1 Кор. 11:24, 25). Но ми шумпотӥськомы, куке тодамы вайиськомы ваньзэ, мар вераз но лэсьтӥз Иисус, музъем вылын улыкуз. Озьы ик милям мылкыдмы ик ӝутске, куке малпаськиськомы со сярысь, мар каре Иисус али но мар кароз вуонояз. Та сярысь но милемыз яратэмез сярысь малпаськон милесьтым мылкыдмес ӝутэ тау каронмес уж вылын возьматыны. Тае ми та статьяын эскеромы.

3. Малы ми дун тырон понна тау кариськомы?

³ Куке ми Иисуслэн улонэз но кулонэз сярысь малпаськиськомы, милям сюлэммы тау каронэн пачылме. Музъем вылын ужакуз-тыршыкуз, Иисус адямиослы вераз бакель каронъёс сярысь, кудъёссэ Инмарлэн Эксэйлыкез ваёз.  Ми туж дунъяськомы Эксэйлык сярысь зэмлыкъёсты. Ми тау кариськомы дун тырон понна, малы ке шуоно солы луыса Иеговаен но Иисусэн эшъяськыны быгатӥськомы. Соос, кинъёс Иисуслы оско, быгатозы пырак улыны но адӟыны матысь адямиоссэс, кудъёсыз улӟытэмын луозы (Иоанн 5:28, 29; Рим. 6:23). Та бакель каронъёс понна Инмарлы но Христослы ми номыр сётыны ум быгатӥське (Рим. 5:8, 20, 21). Но та дуно кузьым понна ми соослы тау кареммес возьматыны быгатӥськомы. Кызьы?

4. Кызьы Магдалина Мария тау каремзэ возьматӥз со понна, мар кариз солы Иисус? (Учке суредэз.)

⁴ Эскеромы Магдалина Мариялэсь учырзэ. Та кышномуртэз сизьым периос курадӟытыса возизы. Со ӧз но оскы, дыр, кин ке сое периослэсь мозмытыны быгатоз шуыса. Соин ик пуктэ син азяды, макем со Иисуслы тау кариз, куке со сое мозмытӥз. Тау карон Мариялэсь мылкыдзэ ӝутӥз Христослэн дышетскисез луыны но аслэсьтыз дырзэ, кужымзэ но ваньбурзэ сётыны, Иисуслы юрттон понна (Лука 8:1—3). Мария туж дунъяз сое, мар кариз со понна Иисус. Со ӧз но малпа, луоз, мар эшшо кароз на солы Иисус вуонояз. Иисус аслэсьтыз улонзэ адямиос понна сётыны кулэ вал, «котькудӥз но Солы оскись мурт медаз быры, солэн быронтэм улонэз мед луоз шуыса» (Иоанн 3:16). Тау карон Мариялэсь мылкыдзэ ӝутӥз Иисуслы оскымон луыны. Куке Иисус юбо бордын курадӟиз, Мария соин артэ вал, озьы ик сое но мукетъёссэ юнматыса улӥз (Иоанн 19:25). Иисус кулэм бере Мария но кык мукет кышномуртъёс шайгуэз доры лыктӥзы но мугорзэ зыран понна ческыт зыно вӧйёс вайизы (Марк 16:1, 2). Оскымон луэмез понна Иегова Марияез бакель кариз. Со улӟытэм Иисусэз адӟиз но соин вераськиз. Тросэзлы дышетскисьёслы сыӵе дан сётэмын ӧй вал (Иоанн 20:11—18).

5. Кызьы ми тау кареммес возьматыны быгатӥськомы Иеговалы но Иисуслы?

 ⁵ Кызьы ми Иеговалы но Иисуслы тау кареммес возьматыны быгатӥськомы ваньмыз понна, мае соос милемлы лэсьто? Со понна, дырмес, кужыммес но коньдонмес жалятэк, Инмарлы ужано-тыршоно. Кылсярысь, ми быгатӥськомы юрттыны Инмарлы йыбыртъян юртъёсты пуктыны но тупатъяны.

6. Малы вераны луоз, дун тырон — со котькуд адямилы сётэм кузьым шуыса?

⁶ Куке ми малпаськиськомы, макем зол ярато милемыз Иегова но Иисус, ми но соосты яратыны кутскиськомы (1 Иоанн 4:10, 19). Милям яратонмы эшшо но юнма, куке валаськомы, Иисус котькуд адями понна кулӥз шуыса. Тае умой валаз апостол Павел. Тани кызьы со возьматӥз аслэсьтыз тау каронзэ Галатъёслы гожтэтаз: «Улӥсько Инмар Пилы осконэн, Кудӥз монэ яратӥз но Ассэ мон понна курбонлы сётӥз» (Гал. 2:20). Мозмытӥсь курбонлы луыса Иегова милемыз ас дораз вайиз, соин ик ми соин эшъяськыны быгатӥськомы (Иоанн 6:44). Милемын эшъяськон понна, Иегова милесьтым мае ке умойзэ адӟиз но ми понна туж бадӟым дун тыриз. Та малпан милесьтым сюлэммес ик шумпоттэ, нош Иеговаез но Иисусэз яратонмы эшшо но юнгес луэ. Юалэ асьтэлэсь: «Мар карыны мылкыдме ӝутэ та яратон?»

7. Учке суредэз. Кызьы ми возьматыны быгатӥськомы, Иеговаез но Иисусэз яратӥськомы шуыса? (2 Коринфъёслы 5:14, 15; 6:1, 2).

⁷ Иеговаез но Иисусэз яратон мылкыдмес ӝутэ мукетъёссэ яратыны. (Лыдӟе 2 Коринфъёслы 5:14, 15; 6:1, 2.) Но кызьы адямиос адӟозы милесьтым яратонмес? Со понна Инмарлэн Эксэйлыкез сярысь иворез  ӟырдыт мылкыдын верано. Ми вань адямиосын вераськиськомы. Ми ум учкиське, кыӵе калыкысь соос потэмын, узыресь-а соос яке куанересь-а, дышетскемын-а яке ӧвӧл-а. Озьы ми Иеговалэсь эриксэ быдэсъяськомы, кудӥзлэн «вань адямиосты утиськытэмез, зэмлыкез тодытэмез потэ» (1 Тим. 2:4).

8. Кызьы ми яратонмес возьматыны быгатӥськомы вын-агайёсмылы но сузэр-апайёсмылы?

⁸ Озьы ик Инмарез но Иисусэз яратон мылкыдмес ӝутэ вын-агайёсмес но сузэр-апайёсмес яратыны (1 Иоанн 4:21). Милям тодэммы потэ, кызьы соос уло. Соос шуг-секытъёсын пумисько ке, ми соослы юрттыны тыршиськомы. Матысь адямизэс ышто ке, ми соосты буйгатӥськомы. Висьыны усё ке, соос доры лыктӥськомы. Мылкыдзы куашка ке, вань сюлмысьтымы соосты юнматыны тыршиськомы (2 Кор. 1:3—7; 1 Фес. 5:11, 14). Ми ялан соос понна вӧсяськиськомы но тодамы возиськомы, «шонер улӥсьлэн сюлмысь вӧсяськемез трос лэсьтыны быгатэ» шуыса (Иак. 5:16).

9. Кызьы эшшо ми возьматыны быгатӥськомы, вын-агайёсмес но сузэр-апайёсмес яратӥськомы шуыса?

⁹ Озьы ик ми вын-агайёсмылы но сузэр-апайёсмылы яратонмес возьматомы, куке вань кужмысьтымы тыршомы соосын тупаса улыны. Та пумысен ми Иеговалэсь адӟем карыны тыршиськомы. Иегова дась вал аслэсьтыз Пизэ милям сьӧлыкъёсмы понна курбонлы сётыны. Кулэ ӧвӧл-а ми но агайёсмес но сузэръёсмес простить карыны, куке соос милемлы пумит сьӧлыкало? Милям уг поты Иисуслэн мадёнысьтыз урод ляльчи кадь луэммы. Кузёез солэсь бадӟым тыронзэ простить кариз, нош та ляльчи простить ӧз кары мукет ляльчилэсь тыронзэ, со ӧжыт вал ке но (Матф. 18:23—35). Кенешын тӥляд кинэн ке валамтэосты кылдо ке, быгатӥськоды-а тӥ Ӝытанлэсь азьло ик со адямиен кусыпъёстэс тупатыны? (Матф. 5:23, 24). Озьы лэсьтӥды ке, тӥ Иеговалы но Иисуслы юн яратэмдэс возьматоды.

10, 11. Кызьы тӧроос Иеговалы но Иисуслы яратэмзэс возьматыны быгато? (1 Пётр 5:1, 2).

¹⁰ Кызьы тӧроос Иеговалы но Иисуслы яратэмзэс возьматыны быгато? Иисуслэн ыжъёсыз сярысь сюлмаськыса. (Лыдӟе 1 Пётрлэсь 5:1, 2.) Иисус тае валэктӥз, Пётрен вераськыкуз. Иисуслэсь куинь пол куштӥськемез бере, Пётрлэн туж потэ вал, дыр, возьматэмез, со Иисусэз яратэ шуыса. Улӟем Иисус Пётрлэсь юаз: «Иона пи Симон! Тон Монэ яратӥськод-а?» Пётр котьмае лэсьтыны дась вал, Иисусэз яратэмзэ возьматон понна. Иисус солы вераз: «Мынэсьтым ыжъёсме возьма» (Иоанн 21:15—17). Пётр вань улонэз ӵоже Иисуслэн ыжъёсыз сярысь сюлмаськиз но озьы сое яратэмзэ возьматӥз.

¹¹ Дуно тӧроос, кызьы Ӝытан вакытэ тӥ возьматыны быгатӥськоды, Иисуслэсь Пётрлы верам кылъёссэ валаськоды шуыса? Тӥ Иеговалы но Иисуслы яратэмдэс возьматоды, агайёсты но сузэръёсты юнматӥды ке, озьы ик юрттӥды ке Иегова доры берытскыны соослы, кинъёс тодытон уже пыриськемысь дугдӥзы (Иез. 34:11, 12). Со сяна, тӥ быгатӥськоды саклыктэс висъяны дышетскисьёслы но соослы, кинъёс Ӝытанэ нырысетӥзэ лыктӥзы. Милям потэ, соос асьсэды умой мед шӧдозы но Иисуслэн дышетскисьёсыз мед луозы шуыса.

12. Кызьы Иисуслэн кылъёсыз, кудъёссэ со кулон азяз ӝытэ вераз, юртто милемлы кышкасьтэмесь луыны? (Иоанн 16:32, 33).

¹² Кулон азяз ӝытэ Иисус дышетскисьёсызлы вераз: «Дунне вылын куректон-кайгуды луоз, но юнматске: Мон дуннеез  ворми». (Лыдӟе Иоаннлэсь 16:32, 33.) Мар юрттӥз Иисуслы тушмонъёсызлы сётскытэк улыны но кулытозяз Инмарлы оскымон кыльыны? Со Иеговалы оскиськиз. Иисус тодӥз, дышетскисьёсыз но та выллем шуг-секытъёсын пумиськозы шуыса. Соин ик со Атайзэ куриз соосты утьыны (Иоанн 17:11). Малы та юрттэ милемлы кышкасьтэмесь луыны? Малы ке шуоно Иегова тушмонъёсмылэсь кужмогес (1 Иоанн 4:4) Со ваньзэ адӟе. Ми тодӥськомы, Иеговалы оскиськимы ке, кышкасьтэмесь луыны быгатомы шуыса.

13. Кызьы Аримафеяысь Иосиф кышкасьтэм луэмзэ возьматӥз?

¹³ Эскеромы Аримафеяысь Иосифлэсь учырзэ. Со пыре вал Сӥнедрионэ, иудейёслэн вылӥ судазы. Иудейёс сое гажало вал. Но нырысь Иосифез кышкасьтэм шуыны уг луы вал. Иоанн вераз, «со иудейёслэсь кышкаменыз Иисуслэн лушкем дышетскисез вал» шуыса (Иоанн 19:38). Иосиф Эксэйлык сярысь иворен тунсыкъяськиз ке но, Иисуслы осконзэ со ватыса возиз. Со кышказ, луоз, дано интызэ ыштыны. Кызьы гинэ медам луы, Библиын вераське, Иисус кулэм бере Иосиф, «кышканзэ куштыса, Пилат доры пыриз но Иисуслэсь Мугорзэ куриз» шуыса (Марк 15:42, 43). Иисуслэн дышетскисез луэмзэ со ӧз ваты ни.

14. Мар кароно, тӥ адямиослэсь кышкаськоды ке?

¹⁴ Тӥ куке но, Иосиф сямен, адямиослэсь кышкады-а? Кышкады-а тӥ вераны школаын яке уж дорады, Иеговалэн Адӟись-Ивортӥсез луиськоды шуыса? Оло нош, тӥ уд дӥсьтӥське ивортӥсь луыны яке пылатӥськыны, малы ке шуоно кышкаськоды, мар малпалозы тӥ сярысь мукетъёсыз? Эн лэзе кышканлы люкетыны тӥледлы асьтэды шонер возьыны. Вань сюлмысьтыды Иеговалы вӧсяське. Куре Иеговаез юрттыны тӥледлы солэсь эриксэ кышкатэк быдэсъяны. Куке тӥ адӟоды, кызьы Иегова тӥледлы юрттэ, та тӥледлы кужым сётоз но кышкасьтэм луыны юрттоз (Ис. 41:10, 13).

15. Мар карыны мылкыдзэс ӝутӥз дышетскисьёслэсь шумпотон? (Лука 24:52, 53).

¹⁵ Иисус кулэм бере дышетскисьёсызлэн мылкыдзы усиз. Пуктэ асьтэды соос интые. Соос яратоно эшсэс ыштӥзы, озьы ик соос малпазы, вуоноезлы нокыӵе осконзы ӧвӧл ини шуыса (Лука 24:17—21). Дышетскисьёсызлы возьматскыкуз, Иисус соослы валаны юрттӥз, Библиысь азьпалзэ ивортонъёс со вылын быдэсмизы шуыса. Со сяна, со  соослы кулэ луись уж сётӥз (Лука 24:26, 27, 45—48). Иисуслэн инме ӝутсконэз азьын дышетскисьёсыз шумпотыса уло вал ини. Табере соос тодӥзы: Иисус улэп но со одно ик юрттоз соослы выль ужзэс быдэстыны. Та шумпотон соослэсь мылкыдзэс ӝутӥз дугдылытэк Иеговаез данъяны (лыдӟе Лукалэсь 24:52, 53; Ап. уж. 5:42).

16. Кызьы ми Иисуслэн дышетскисьёсызлэсь адӟем карыны быгатӥськомы?

¹⁶ Кызьы ми Иисуслэн дышетскисьёсызлэсь адӟем карыны быгатӥськомы? Милям луэ Иеговалы шумпотыса ужаммы-тыршеммы Ӝытан вакытэ но, быдэс ар ӵоже но. Со понна милемлы Инмарлэсь Эксэйлыксэ улонамы нырысетӥ интые пуктоно. Кылсярысь, тросэз ужан дырзэс радъязы озьы, соос ялан тодытыны, кенешлэн пумиськонъёсаз ветлыны но семьяен йыбырттонзэс ортчытъяны мед быгатозы шуыса. Куд-огъёсызлэн тросгес лэсьтэмзы потэ асьсэлэн кенешазы яке отын, кытын тодытӥсьёс уг тырмо. Соин ик соос уг басьтыло сыӵе арбериосты, кудъёсыз тросэзлы туж кулэ кадь пото. Зэм но, ялан Инмарлы ужан-тыршон понна но солэсь Эксэйлыксэ улонамы нырысетӥ интые пуктон понна, юн луыны кулэ. Ми озьы лэсьтӥмы ке, Иегова милемыз бакель кароз (Мад. 10:22; Матф. 6:32, 33).

17. Мар карыны тӥляд мылкыдды вань Ӝытан вакытэ? (Учке суредэз.)

¹⁷ Пуксёнэ, 4-тӥ оштолэзе, ми люкаськомы Ӝытанэз пусйыны. Ми туж возьмаськомы та нуналэз! Милемлы туж кулэ малпаськыны Иисуслэн улонэз но кулонэз сярысь, озьы ик яратон сярысь, кудзэ со но Иегова милемлы возьматӥзы. Та сярысь Ӝытан нуналэ гинэ малпаськоно ӧвӧл. Тырше со сярысь малпаськыны Ӝытан азьын но со бере. Кылсярысь, лыдӟиське но малпаське со сярысь, мар гожтэмын «Иисуслэн музъем вылын улонэзлэн берпуметӥ арняез» буклетын. (Учке jw.org сайтысь БИБЛИОТЕКА > КНИГАОС НО БРОШЮРАОС > «ИИСУСЛЭН МУЗЪЕМ ВЫЛЫН УЛОНЭЗЛЭН БЕРПУМЕТӤ АРНЯЕЗ».) Иисуслэн улонэз сярысь лыдӟыкуды, висъялэ саклыктэс со кылбуръёслы, кудъёсыз тау карон мылкыддэс, яратондэс, кышкасьтэм сямдэс юнматозы, озьы ик эшшо но шумпотыса улыны юрттозы. Собере малпаське, кызьы тӥ уж вылын тау карыны быгатоды. Юн оске: Иисус туж дунъя ваньзэ, мае тӥ лэсьтӥськоды, Ӝытан вакытэ сое тодэ ваён понна (Усьт. 2:19).