1. Макем дуно луэ милям улонмы Иеговалэн син азяз?

 ПУКТЭ син азяды: эшты тӥледлы дано суредасьлэсь картиназэ кузьмаз. Со туж вуж, интыен-интыен бездэмын, саптаськемын но пильылӥськемын ини. Озьы ке но та картина кӧня ке миллион доллар сылэ. Валамон, та кузьым тӥледлы туж дуно потоз. Соин ик тӥ сое утьыны тыршоды. Инмысь Эшмы но, Иегова, милемлы дуно кузьым лэсьтӥз — со милемлы улон кузьмаз. Аслэсьтыз Пизэ курбонлы сётыса, Иегова возьматӥз, макем дуно луэ солэн син азяз милям улонмы (Иоанн 3:16).

2. Мае возьма милесьтым Иегова, 2 Коринфъёслы 7:1 лыдэ басьтыса?

² Иегова — «улонлэн ошмесэз» (Пс. 35:10). Апостол Павел та сярысь вераз: «Ваньмы асьмеос Со бордын улӥськомы, азьлань мынӥськомы, улӥськомы-вылӥськомы» (Ап. уж. 17:25, 28). Соин ик ми валаськомы, улон — со Инмарлэн кузьымез шуыса. Яратыса со милемлы ваньзэ кулэзэ сётэ (Ап. уж. 14:15—17). Но Иегова паймымон амалэн улонмес уг утьы. Со возьма, ми асьмеос но лэсьтомы шуыса ваньзэ, мае быгатӥськомы, тазалыкмес утён понна но азьланяз но солы ужан-тыршон понна. (Лыдӟе 2 Коринфъёслы  7:1.) Малы милемлы тазалыкмес утёно но мар со понна кароно?

3. Малы милемлы тазалыкмес утьыны кулэ?

³ Малы милемлы тазалыкмес утьыны кулэ? Одӥгез муг — милям Иеговалы вань кужмысьтымы ужаммы-тыршеммы потэ (Марк 12:30). Ми тыршиськомы кылзӥськыны Библиысь таӵе визь-кенешлэсь: «Асьтэлэсь быдэс улондэс дун-сьӧлыктэм, ярамон карыса, курбонэз кадь Инмарлы сётэлэ» (Рим. 12:1). Соин ик ми палэнскиськомы ваньмызлэсь, мар тазалыкмылы изъян вайыны быгатэ. Ми тыршиськомы ке но, вань висёнъёслэсь асьмеды утьыны ум быгатӥське. Но ми лэсьтӥськомы ваньзэ, мае быгатӥськомы, тазалыкмес утён понна. Малы ке шуоно инмысь Атаймылы возьматэммы потэ, солэсь дуно кузьымзэ, улонмес, дунъяськомы шуыса.

4. Кыӵе мылкыдыз вал Давид эксэйлэн?

⁴ Давид эксэй валэктӥз, малы солэн Инмарен кузьмам улонэз дунъямез потэ вал: «Мар пайдаез луоз мынам вирылэсь, шайгуэ ке мыным пыроно? Сюй Тонэ данъялоз-а? Тынэсьтыд зэмлыктэ ивортоз-а?» (Пс. 29:10). Давид та кылъёсты кулон азяз вераз, вылды. Но Давидлэн юн мылкыдыз вал Иеговаез данъяны, соин ик солэн улэмез но тазалыксэ утемез потэ вал. Ваньмылэн милям таӵе ик мылкыдмы вань.

5. Мар ми карыны быгатӥськомы, кыӵе гинэ арлыдмы но тазалыкмы медам луы?

⁵ Оло нош, висёнмы яке бадӟым арлыдмы сэрен ми азьвыл лэсьтэм ужъёсмес быдэсъяны ум быгатӥське ни. Таин сэрен милям киосмы ик лэзиськыны быгато. Но лэзёно ӧвӧл мылкыдмылы куашканы. Азьланяз но тазалыкмес утьыны тыршоно. Малы? Малы ке шуоно кыӵе гинэ арлыдмы но кыӵе гинэ висёнъёсмы милям медам луэ, Давид эксэй сямен, ми быгатӥськомы Иеговаез данъяны. Милемыз туж буйгатэ таӵе малпан: тырбыдэстэм луэммы шоры учкытэк, Иегова милемыз дунъя! (Матф. 10:29—31). Милемлы кулоно ке но луиз, Инмар туж возьмалоз со дырез, куке милемыз улӟытоз (Иов 14:14, 15). Нош улэп дыръямы ойдолэ туж тыршомы тазалыкмес утьыны.

6. Мае возьма милесьтым Иегова со пумысен, мае ми сииськомы но юиськомы?

⁶ Библиын тазалыко улон но шонер сиськон сярысь номыр уг вераськы. Но Библия возьматэ, мар малпа Иегова та юанъёс пумысен. Кылсярысь, Инмарлэн Кылыз милесьтым мылкыдмес ӝутэ: «Уродзэ-лексэ мугор бордысьтыд палэнты» (Екк. 11:10). Библия ӧте милемыз палэнскыны мултэс трос сиськонлэсь но вина юонлэсь, кудъёсыз кулонэ но вуттыны быгато (Мад. 23:20). Иегова возьма, мае но кӧня сиыны но юыны бырйыкумы, ми асьмеды киямы кутомы шуыса (1 Кор. 6:12; 9:25).

7. Кызьы Мадёнъёсысь 2:11 кылъёс юртто милемлы тазалык пумысен умой ужпумъёс кутыны?

⁷ Ми улон понна Инмарлы тау каронмес возьматомы, ужпумъёс малпаськыса кутыны тыршимы ке (Пс. 118:99, 100; лыдӟе Мадёнъёсты 2:11). Кылсярысь, ми бырйиськомы, мае сииськомы. Милемлы кыӵе ке сиён кельше ке, но ми тодӥськомы ке, со милемлы изъян ваёз шуыса, ми сое ум сие. Озьы ик малпаськоно, кӧня изёно, кызьы мугормес кыдатоно, кызьы асьмеды но улон интымес чылкыт возёно.

8. Потэ-а Иеговалэн, ми шудтэм учыръёслэсь палэнскыны мед тыршомы шуыса? Валэктэ.

⁸ Законын, кудзэ Иегова израиль калыклы сётӥз, гожтэмын вал, мар кароно, доразы но ужан интыосазы шудтэм учыръёс медаз луэ шуыса (Пот. 21:28, 29; К. Зак. 22:8). Кинэ ке янгышен виё вал ке, виись муртэ кылкутытыны кулэ вал (К. Зак. 19:4, 5). Кыл кутытоно вал сое но, кин вордӥськымтэ нылпилы янгышен изъян вайиз (Пот. 21:22, 23). Кызьы адӟиське Священной Гожтэмысь, Иеговалэн туж потэ, ми шудтэм учыръёслэсь палэнскыны мед тыршомы шуыса.

9. Мар милям кареммы луэ, шудтэм учыръёслэсь палэнскон понна? (Озьы ик учке суредэз.)

⁹ Ми улон понна Инмарлы тау каронмес возьматомы, дорамы но ужан интыосамы шудтэм учыръёслэсь палэнскыны тыршимы ке. Кылсярысь, милемлы куштоно ке лэчыт арбериез, химикатъёсты яке эмъюмъёсты, лэсьтоно ваньзэ, соос мукетъёсызлы изъян медаз вае шуыса. Ми тыршиськомы, соосты нылпиос  но медаз шедьтэ шуыса. Озьы ик ми туж чакласькыса выриськомы тылын, пӧсь вуэн но электроинструментъёсын. Соосты чаклатэк ум кельтӥське. Куке ми асьмеды урод шӧдӥськомы, эмъюмъёс, вина юэменымы яке тырмыт изьымтэенымы сэрен, ми руль сьӧры ум пуксиське. Со сяна, руль сьӧрын ми телефонмес киямы ум басьтӥське.

10. Мар карыны луэ шимучыр дыръя но со бере, кудӥз улонмылы кышкытлык вайыны быгатэ?

¹⁰ Куддыръя ми ум быгатӥське палэнскыны учыръёслэсь, кудъёсыз улонмылы кышкытлык ваё. Озьы луэ инкуазь шимучыръёс, эпидемиос но ожмаськонъёс дыръя. Озьы ке но ми быгатӥськомы мар ке но карыны, улонмес утён понна. Мар карыны луэ? Кивалтӥсьёслэсь кылзӥськоно комендантской час, эвакуация но мукетыз пумысен (Рим. 13:1, 5—7). Куд-ог кышкытлыкъёсты азьло ик адӟыны луэ. Соин ик кивалтӥсьёслэсь кылзӥськоно. Кылсярысь, дорамы возёно ву, ӝог сӧриськисьтэм сиён-юонэз но эмъюмъёсты.

11. Мар кароно, паласькись висён вӧлмыку?

¹¹ Мар кароно, тӥ палан паласькись висён вӧлмиз ке? Кивалтӥсьёслэн куремзыя, киосмес миськоно, мукетъёсызлэсь палэнынгес возиськоно, маскаосты нуллоно но карантин возёно. Та куронъёсты быдэсъяса, ми возьматомы, улонэз, Инмарлэсь дуно кузьымзэ, дунъяськомы шуыса.

12. Кызьы возет, кудӥз гожтэмын Мадёнъёсын 14:15, валаны юрттэ, кыӵе информациез кылзоно шимучыр дыръя?

¹² Шимучыр дыръя ми шонертэм информациез кылыны быгатӥськомы. Сое кылыны луэ эшъёсмылэсь, бускельёсмылэсь яке интернет, телевидение, радио но газетъёс пыр. «Котькыӵе но кыллы» оскем интые, ми кылзӥськомы кивалтӥсьёсты но эмъясьёсты, кудъёсыз кылдэм югдурез умой тодо. (Лыдӟе Мадёнъёсты 14:15.) Кенешлэн пумиськонъёсыз но тодытон уж пумысен кивалтэт сётэмлэсь азьло Кивалтӥсь кенеш но филиалъёс информациез пыр-поч эскеро (Евр. 13:17). Соослэсь кылзӥськыса, ми асьмеды но мукетъёсты утёмы. Озьы ик кылзӥськеммылы луыса кенеш ӟеч нимзэ уз ышты (1 Пётр 2:12).

13. Кызьы возьматоно, ми улонэз туж дунъяськомы шуыса, куке вераськон мынэ вирез кутыса эмъяськон сярысь?

¹³ Тросэз тодо, Иеговалэн Адӟись-Ивортӥсьёсыз вирез святоен лыдъяло шуыса. Ми кылзӥськиськомы Иеговалэн вир сярысь законэзлэсь, куке сое вирсэре ум лэзиське соку но, куке малпамтэ шорысь эмъюрттэт кулэ луэ (Ап. уж. 15:28, 29). Но та уг возьматы, милям кулэммы потэ шуыса. Ми туж дунъяськомы улонэз — Инмарлэсь дуно кузьымзэ. Ми вазиськиськомы со эмъясьёслы, кудъёсыз виртэк умой эмъяны быгато.

14. Мар кароно, эмъюртэ вазиськон понна мугъёс ӧжытгес мед луозы шуыса?

¹⁴ Та статьяысь визь-кенешъёслэсь кылзӥськыса но тазалыкмес утьыса, эмъясьёс доры шергес вазиськоно луоз. Тазалыкмы юн луиз ке, ми операция бере но ӝоггес бурмомы. Со сяна, эскероно, дорамы но ужан интыосамы номыр кышкытлык медаз вайы шуыса. Озьы ик сюрес вылын но куронъёслэсь кылзӥськоно. Соку эмъюртэ вазиськон понна мугъёс ӧжытгес луозы.

15. а) Малы «Волеизъявление» документмы котьку но сьӧрамы луыны кулэ? (Озьы ик учке суредэз.) б) Кызьы вирез кутыса эмъяськон пумысен шонер ужпум кутоно? (Учке сноскаез.)

 ¹⁵ Ми улонмес дунъяськомы бере, ми котьку но сьӧрамы нуллӥськомы «Волеизъявление и доверенность относительно медицинского вмешательства» гожтэм документэз. Отын гожтэмын, кызьы ми учкиськомы вирез вирсэре лэзён шоры но кыӵе медицинской процедураослы соглаш кариськиськомы. Ӧз вужмы-а тӥляд та документты? Кулэ ке, сое гожтэ яке выльдэ. Тае берлолы эн кельтэ. Кутэм ужпуммы бумага вылэ гожтэмын ке, соку милемлы эмъюрттэт ӝегатскытэк сётозы, вылды. Озьы ик та документлы луыса милемлы эмъясьёсын ог-огмес валаны капчигес луоз b.

16. Мар карыны луэ, ми ум ке тодӥське, кызьы «Волеизъявление» документэз гожтоно?

¹⁶ Котькин, егит но юн тазалыко адями но, шудтэм учыре сюрыны яке висьыны быгатэ (Екк. 9:11). Соин ик визьмо луысал «Волеизъявление» документэз гожтыны. Тӥ уд ке тодӥське, кызьы сое гожтоно, тӧроослэсь юрттэт куре — соос тодо. Тӧроос  тӥ интые ужпум уз кутэ. Ужпум асьтэлы кутоно (Гал. 6:4, 5). Но тӧроос юрттозы тӥледлы валаны, кыӵе эмъяськон амалъёс вань, озьы ик юрттозы кутэм ужпумдэс бумага вылэ гожтыны.

17. Кытысь адӟиськоз, тазалык пумысен ми асьмеды визьнодо возиськомы шуыса?

¹⁷ Тазалык но эмъяськон пумысен ужпум кутыны милемлы юрттэ Библия вылэ пыкиськыса дышетэм возьытлыкмы (Ап. уж. 24:16; 1 Тим. 3:9). Куке ми ужпум кутӥськомы но со сярысь мукетъёсыныз вераськиськомы, милемлы кылзӥськоно визь-кенешлэсь, кудӥз гожтэмын Мадёнъёсын 15:21: «Визьнодо адями шонер сюрес кузя мынэ». Ми визьнодо луэммес возьматомы, тазалыкмы сярысь мултэс ӧм ке сюлмаське. Озьы ик ми асьмелэсь малпанмес мукетъёсызлы кужмысь ум ӵектэ. Ми вын-агайёсмес но сузэр-апайёсмес яратӥськомы но гажаськомы, соос милесьтым мукет сямен малпасько ке но (Рим. 14:10—12).

18. Кызьы ми улон понна Иеговалы тау кареммес возьматыны быгатӥськомы?

¹⁸ Кызьы ми улон понна Иеговалы тау кареммес возьматӥськомы? Ми улонмес утиськомы но Инмарлы самой умойзэ сётӥськомы (Усьт. 4:11). Али ми висёнъёсын но шимучыръёсын пумиськоно луиськомы. Но Кылдытӥсь милемлы мукет улон малпаз вал. Ӝоген ми висьытэк но кулытэк пырак уломы (Усьт. 21:4). Нош со дырозь ойдолэ дунъяломы, ми улэпесь но инмысь яратӥсь Атаймылы, Иеговалы, ужаны-тыршыны быгатӥськомы шуыса!