1, 2. а) Кыӵе юанъёсты ми эскеромы? б) Кытысь ми тодӥськомы, Иеговалэн милемлы юрттэмез туж потэ шуыса?

 ИЕГОВА милемлы юрттыны быгатэ шуг-секытъёсмы пыр потыны но солы шумпотыса ужаны-тыршыны. Кызьы Инмар милемлы юрттэ? Мар кароно, солэн юрттэмез эшшо но тросгес пайда мед ваёз шуыса? Ойдолэ эскеромы та юанъёсты. Но нырысь тодомы, зэм ик-а Иеговалэн потэ милемлы юрттэмез?

² Со понна эскеромы, мар вераз апостол Павел Еврейёслы гожтэтаз Иегова сярысь. Со гожтӥз: «Уг кышка, Кузё-Инмар мон палан: адями мыным мар кароз?» (Евр. 13:6). Библейской справочникъёсын гожтэмъя, та кылбурын вераське адями сярысь, кудӥз туж дыртэ юрттыны солы, кин юрттэт куре. Пуктэ син азяды, кызьы Иегова дыртэ шуге-леке сюремъёсты мозмытыны. Соглаш луоды, дыр, та туж умой возьматэ: Иегова дась гинэ ӧвӧл, солэн туж потэ ми пала султэмез, яке милемлы юрттэмез. Со ми палан ке, ми котьмае шумпотыса чиданы быгатомы.

3. Кызьы Иегова юрттэ милемлы ваньзэ шумпотыса чиданы?

³ Кызьы Иегова юрттэ милемлы ваньзэ шумпотыса чиданы? Тае валан понна, эскеромы Исаиялэсь книгазэ. Малы? Малы ке шуоно та книгаысь тросэз азьпалзэ ивортонъёс герӟаськемын Инмарлэн ужась-тыршисьёсыныз, кудъёсыз асьме нуналъёсы уло. Со сяна, куке Исаия Иегова сярысь вера, со кутэ сыӵе кылъёсты, кудъёссэ валаны капчи. Кылсярысь, эскеромы та книгаысь 30-тӥ люкетэз. Сое лыдӟыса,  туж капчи валаны, кызьы Иегова аслаз калыкезлы юрттэ. Исаия гожтэ, кызьы Инмар: 1) милесьтым вӧсяськонъёсмес сак кылзэ но милемлы ответ сётэ, 2) кивалтэт сётэ но 3) туннэ ик ини бакель каре но вуонояз кароз на. Ойдолэ пыр-почгес эскеромы та малпанъёсты.

4. а) Кызьы Иегова нимаз Исаия дыръя улӥсь еврейёсты но малэсь со соосты ӧз утьы? б) Кыӵе умой ивор Иегова вераз еврей калыкысь оскымон адямиослы? (Исаия 30:18, 19).

⁴ Исаиялэн книгаысьтыз 30-тӥ люкетлэн кутсконаз Иегова еврей калыкез нима «тэрытскисьтэм муртъёсын», кудъёсыз «сьӧлык вӧзы сьӧлык» ватсало. Со сяна, Инмар шуэ: «Та бугыръяськись калык... Кузё-Инмарлэсь законзэ кылзӥськемзы потӥсьтэм нылпиос» (Ис. 30:1, 9). Кытчы вуттоз соослэн кылзӥськымтэзы? Исаия азьло ик вераз, Иегова ас калыксэ шуге-леке сюронлэсь уз утьы шуыса (Ис. 30:5, 17; Иер. 25:8—11). Та быдэсмиз, куке вавилон калык еврейёсты пленэ нуиз. Но еврей калык пӧлын Инмарлы оскымон адямиос но вал. Соослы Исаия умой ивор вераз. Со шуиз, вуоз нунал, куке Инмар соослы ӟечлыксэ возьматоз. (Лыдӟе Исаиялэсь 30:18, 19 сноскаысь b.) Озьы ик луиз, куке Инмар соосты мозмытӥз. Но Инмар соку ик соосты ӧз мозмыты. Иегова «возьмалоз, тӥледлы ӟечлыксэ возьматон понна» шуыса кылъёсысь адӟиське, израиль калыклэн мозмытскемезлэсь азьло кӧня ке дыр ортчыны кулэ вал шуыса. Иеговалэн калыкез вавилон пленын 70 ар ӵоже улӥз. Со бере гинэ куд-огъёсызлы Иерусалиме берытскыны лэземын вал (Ис. 10:21; Иер. 29:10). Куке соос ас музъемазы берытскизы, соос кайгырыса ӧз бӧрдэ ини — соос шумпотыса бӧрдӥзы.

5. Кыӵе оскытӥсь малпан гожтэмын Исаиялэн 30:19?

⁵ Туннэ милемыз буйгатыны быгато таӵе кылъёс: «Тынэсьтыд викышъям куарадэ кылыса, Со тонэ простить кароз» (Ис. 30:19). Исаия оскытэ, Иегова сюлворыса вӧсяськеммес сак кылзэ шуыса. Со ватса: «Кылэм бераз соку ик тыныд юрттэт сётоз». Та кылъёс тодамы вайыто: Инмысь Атаймы дась гинэ ӧвӧл, солэн туж потэ юрттэмез соослы, кинъёс юрттэт куро. Тае тодамы возимы ке, милемлы капчигес луоз ваньзэ шумпотыса чиданы.

6. Кызьы Исаиялэн кылъёсыз возьмато, Иегова котькуд ужась-тыршисезлэсь вӧсяськемзэ сак кылзэ шуыса?

⁶ Кыӵе эшшо буйгатӥсь малпан гожтэмын на та кылбурын? Иегова котькуд ужась-тыршисезлэсь вӧсяськемзэ сак кылзэ. Кытысь со адӟиське? Исаиялэн книгаысьтыз 30-тӥ люкетлэн кутсконаз «тӥ» шуыса вераське, малы ке шуоно Иегова быдэс калыкезлы вазиське. Нош 19-тӥ кылбурын «тон» шуыса гожтэмын, малы ке шуоно Иегова ми пӧлысь котькудӥзлы вазиське. Исаия гожтэ: «Тон трос уд бӧрды... тонэ простить кароз... тыныд юрттэт сётоз». Яратӥсь Атай кадь, Иегова куректӥсь пиезлы ноку уз шуы: «Учкы ай агаед шоры. Тон со кадь кужмо луыны кулэ». Иегова озьы уг вера. Ми пӧлысь котькудӥз солы дуно потэ. Со котькуд ужась-тыршисезлэсь вӧсяськемзэ сак кылзэ (Пс. 114:1; Ис. 57:15).

7. Кызьы Исаия но Иисус возьматӥзы, дугдылытэк вӧсяськыны кулэ шуыса?

⁷ Куке ми Иеговалы сюлмаськонъёсмы сярысь вераськомы, соосты чиданы со  милемлы соку ик кужым сётыны быгатэ. Нош шуг-секытмы малпаммылэсь кемагес кыстӥське ке, милемлы Иеговалэсь кужым трос пол куроно, вылды. Но Иеговалэн аслаз но потэ, ми трос пол мед куромы шуыса. Та адӟиське Исаиялэн кылъёсысьтыз: «[Иегова] азьын чус эн улэ» (Ис. 62:7). Мае та возьматэ? Иеговалы дугдылытэк вӧсяськоно, соин сэрен солы пуксьыны маза но ӧвӧл кадь. Исаиялэн кылъёсыз тодамы вайыто Иисуслэсь вӧсяськонзэ, кудӥз гожтэмын Лукалэсь 11:8—10, 13. Иисус мылкыдмес ӝутэ дугдылытэк вӧсяськыны но Инмарлэсь святой духсэ курыны. Со сяна, шонер ужпумъёс кутон понна, ми Иеговалэсь кивалтэтсэ курыны быгатӥськомы.

8. Кызьы кылъёс, кудъёсыз гожтэмын Исаиялэн 30:20, 21, вашкала дыръя быдэсмизы?

⁸ Лыдӟе Исаиялэсь 30:20, 21. Куке вавилон ожгарчиос Иерусалимез ар но ӝыны котыртыса возизы, еврей калык курадӟыса улыны сокем дышемын вал, нянез сием но вуэз юэм кадь. Нош 20-тӥ но 21-тӥ кылбуръёсын верамъя, Иегова еврей калыклы кылзэ сётӥз, соос ӧпкелизы но воштӥськизы ке, соосты утёз шуыса. Исаия Иеговаез «дышетӥсьёс» c, яке «Быдӟым дышетӥсь», шуыса нима. Тае вераса, Исаия калыкез оскытэ, Иегова соосты аслаз курон-косонъёсызъя йыбыртъяны дышетоз шуыса. Та кылъёс быдэсмизы, куке еврей калык вавилон пленысь мозмытэмын вал. Иегова соослэн Быдӟым дышетӥсьсы луиз. Солэн кивалтэмез улсын соос чылкыт йыбырттонэз тупатыны быгатӥзы. Ми шумпотӥськомы, Иегова милям но Быдӟым дышетӥсьмы шуыса.

9. Вералэ нырысетӥ амалэз, кызьы Иегова милемыз дышетэ.

⁹ Та кылбуръёсын Исаия милемыз дышетскисьёсын ӵошатэ, нош Иеговаез — дышетӥсен. Инмар милемыз кык амалъёсын дышетэ. Тани нырысетӥез. Исаия вера, ми Быдӟым дышетӥсьмес ас синъёсынымы адӟомы шуыса. Татын дышетӥсь дышетскисьёсыз азьын сылэ. Милемлы бадӟым дан сётэмын Иегова Инмармылэсь дышетскыны. Кызьы Иегова милемыз дышетэ? Аслаз организациез пыр. Ми туж тау кариськомы, со милемлы валамон кивалтэт сётэ шуыса.  Иегова дышетэ милемыз кенешлэн пумиськонъёсаз но конгрессъёсын. Озьы ик милям вань печатлам но электрон публикациосмы, JW Broadcasting^® программаосмы но трос мукетыз. Ваньмыз та юрттэ милемлы секыт вакытъёсты, шумпотонмес ыштытэк, чиданы.

10. Малы вераны луоз, ми мышкамы верам куараез кылӥськомы шуыса?

¹⁰ Со сяна, Исаия вераз кыкетӥ амалэз, кызьы Иегова милемыз дышетэ. Со шуиз: «Пельёсыд мышкад верам кылэз кылозы». Татын пророк Иеговаез ӵошатэ сак дышетӥсен. Со дышетскисьёсыз сьӧрын мынэ но вера, кытчы соослы мыноно. Туннэ но ми мышкысьтымы Иеговалэсь куаразэ кылӥськомы. Малы озьы вераны луоз? Инмарлэсь Кылзэ гожтэм бере трос аръёс ортчизы ини. Соин ик, Библиез лыдӟыкумы, ми мышкамы верам Иеговалэсь куаразэ кылӥськомы кадь (Ис. 51:4).

11. Кыӵе вамышъёсты лэсьтоно, шумпотонмес ыштытэк ваньзэ чидан понна, но малы?

¹¹ Озьыен, Иегова милемлы кивалтэт сётэ аслаз организациез но Кылыз пыр. Мар милемлы кароно, солэн юрттэмез милемлы пайда мед ваёз шуыса? Висъялэ саклыктэс кык малпанъёслы. Нырысетӥез: «Тани сюрес». Кыкетӥез: «Со кузя мынэ» (Ис. 30:21). «Сюресэз» тодыны гинэ тырмыт ӧвӧл, со кузя мыныны кулэ. Инмарлэн Кылысьтыз, кудзэ милемлы солэн организациез валэктэ, ми тодӥськомы, мае Инмар милесьтым возьма но кызьы басьтэм тодон-валанмес улонамы пыртоно. Шумпотонмес ыштытэк Иеговалы ужан-тыршон понна, кык вамышез ик лэсьтоно. Соку гинэ ми оскыны быгатӥськомы, Иегова милемыз бакель кароз шуыса.

12. Кызьы Иегова аслэсьтыз калыксэ бакель кариз? (Исаия 30:23—26).

¹² Лыдӟе Исаиялэсь 30:23—26. Кызьы быдэсмиз та азьпалзэ ивортон еврей калык вылын, кудӥз вавилон пленысь ас музъемаз берытскиз? Иегова соосты жалятэк бакель кариз. Соос номырлы но ӟудыса ӧз улэ. Инмар соослы кӧт тырымон сиён сётӥз. Нош тужгес но кулэез — Иегова ужась-тыршисьёсызлы сётӥз ваньзэ, соос солы ужаны-тыршыны но чылкыт йыбырттонэз тупатыны мед быгатозы шуыса. Сокем бакель каремын Инмарлэн калыкез ноку ӧй вал на. 26-тӥ кылбурын верамъя, Иегова соос вылын пиштыса улӥз, яке соослы аслэсьтыз Кылзэ валаны юрттӥз (Ис. 60:2). Ваньмыз та Инмарлэсь ужась-тыршисьёссэ  юнматӥз но соослы юрттӥз, «сюлэмзы шумпотыса», солы йыбыртъяны (Ис. 65:14).

13. Кызьы чылкыт йыбырттонэз тупатон сярысь азьпалзэ ивортон туннэ быдэсме?

¹³ Чылкыт йыбырттон сярысь азьпалзэ ивортон милемын герӟаськемын-а? Одно ик герӟаськемын! 1919-тӥ арысен кутскыса, трос миллион адямиос мозмытско Быдӟым Вавилонлэн пленысьтыз — зэмос луисьтэм религилэн дунневыл империезлэн пленысьтыз. Сӥзем музъемен ӵошатыса, Иегова нуэ соосты трослы умойгес интые,— духовной рае (Ис. 51:3; 66:8). Мар со сыӵе?

14. Мар со сыӵе духовной рай но кин отын улэ? (Учке «Валэктонэз».)

¹⁴ 1919-тӥ арысен кутскыса, духовной райын d зырӟем христианъёс улыны кутскизы. Дыр ортчыса, отын улыны кутскизы «мукет ыжъёс» но — соос, кинъёслэн музъем вылын пырак дауръёс ӵоже улыны осконзы вань (Иоанн 10:16). Соосты но Иегова жалятэк бакель каре (Ис. 25:6; 65:13).

15. Кытын туннэ духовной рай?

¹⁵ Кытын туннэ духовной рай? Иеговалэн ужась-тыршисьёсыз музъемлэн пӧртэм палъёсаз уло. Соин ик духовной рай быдэс музъем вылын. Кыӵе шаерын гинэ ми медам улэ, ми духовной райын улӥськомы, зэмос йыбырттонэз утьыны тыршиськомы ке.

16. Мар юрттоз милемлы котьку но адӟыны духовной райлэсь чеберзэ?

¹⁶ Духовной райын луон понна, милемлы туж дунъяно быдэс дунне вылысь христиан кенешмес. Кызьы возьматоно, ми сое дунъяськомы шуыса? Вын-агайёсмылэн но сузэр-апайёсмылэн тырмымтэоссылы саклыкмес висъям интые, соослэсь умой сямъёссэс адӟыны тыршоно (Иоанн 17:20, 21). Малы со туж кулэ? Малпаськомы таӵе пример вылын. Чебер нюлэскысь пӧртэм писпуосты адӟыны луэ. Озьы ик духовной райын но вань пӧртэм агайёс но сузэръёс, кудъёсыз Библиын писпуосын ӵошатӥсько (Ис. 44:4; 61:3). Ми вӧзын будӥсь «писпуослэн»  тырмымтэоссылы саклыкмес висъям интые, «нюлэслэсь» чеберзэ адӟыны тыршоно. Милям асьмелэн но, огъя оскисьёсмылэн но янгышъёссы вань ке но, быдэс дунне вылысь огкылысь улӥсь христиан кенешлэсь чеберзэ адӟыны кулэ.

17. Мар карыны быгатэ ми пӧлысь котькудӥз, кенеш огкылысь мед улоз шуыса?

¹⁷ Мар карыны быгатэ ми пӧлысь котькудӥз, огкылысь улон понна? Со понна тупаса улон вайыны тыршоно (Матф. 5:9; Рим. 12:18). Кенешысь агайёсынымы но сузэръёсынымы тупаса но огкылысь улыны тыршиськомы ке, духовной раймы эшшо но чебергес луэ. Ми тодӥськомы, духовной райын котькуд улӥсез Иегова ас дораз вайиз шуыса (Иоанн 6:44). Малпалэ гинэ, макем шумпотэ Инмар, куке ми тыршиськомы тупаса но огкылысь улыны солэн ужась-тыршисьёсыныз, кудъёсыз солы туж дуно пото! (Ис. 26:3; Агг. 2:7).

18. Мар сярысь ялан малпаськоно но малы?

¹⁸ Иегова аслэсьтыз ужась-тыршисьёссэ жалятэк бакель каре. Мар милям кареммы луэ, солэн бакель каронъёсыз эшшо но тросгес пайда мед ваёзы шуыса? Библиез но со вылэ пыкиськыса гожтэм публикациосты эскерыкумы, мур малпаськыны кулэ. Сыӵе малпаськон но эскерон юрттоз милемлы христиан сямъёсты будэтыны. Нош соос юрттозы вын-агайёсмес но сузэр-апайёсмес яратыны но гажаны (Рим. 12:10). Ми малпаськимы ке, кызьы Иегова милемыз туннэ ик ини бакель каре, милям соин кусыпъёсмы юнмалозы. Нош малпаськимы ке, кызьы Иегова милемыз вуонояз бакель кароз, милям пырак улыны осконмы юнмалоз. Ваньмыз та юрттоз эшшо но бадӟым шумпотонэн Иеговалы ужаны-тыршыны.

19. а) Малы ми оскыны быгатӥськомы? (Исаия 30:18, ВД). б) Мар юрттоз милемлы ваньзэ шумпотыса чиданы?

¹⁹ Иегова милемлы гажан-жалянзэ возьматоз, куке ваньзэ уродзэ быдтоз (Ис. 30:18, ВД). Ми оскиськомы, «шонерлыклэн Инмарез» Шайтанлэсь дуннезэ дырыз дыръя быдтоз шуыса (Ис. 25:9). Иеговаен ӵош ми чидаса возьмаськомы, ку со милемыз утёз. Нош со дырозь ми тыршомы вӧсяськыны, Инмарлэсь Кылзэ эскерыны но сое улонамы пыртыны, озьы ик бакель каронъёсмы сярысь малпаськыны. Соку Иегова милемлы одно ик юрттоз ваньзэ шумпотыса чиданы.