1. Мае ми валаськомы но кыӵе осконмы милям вань?

 ВАЛАМОН, тодытыкумы куд-ог адямиос милемлы пумитъяськозы. Вуонояз сыӵе адямиос эшшо но тросгес луозы, дыр (Дан. 11:44; 2 Тим. 3:12; Усьт. 16:21). Но ми оскиськомы, Иегова милемлы юрттоз шуыса. Малы ке шуоно со котьку но юрттылӥз ужась-тыршисьёсызлы соослы сётэм ужъёссэс быдэсъяны, кыӵе гинэ секытэсь соос медам луэ. Тае адӟыны луэ Иезекииль пророклэн улонысьтыз, кудӥз вавилон пленэ сюрем еврейёслы тодытӥз.

2. Иеговалэн верамезъя, кыӵе адямиослы тодытӥз Иезекииль, но мае ми эскеромы та статьяын? (Иезекииль 2:3—6).

² Кыӵе адямиослы тодытӥз Иезекииль? Иегова шуиз, соос «чурытомем, лек сюлэмоесь» но бугыръяськисесь шуыса. Соос кельшо вал бышкись будосъёслы, скорпионъёслы. Соин ик паймонэз ӧвӧл, Инмар трос пол аслаз пророкезлы вераз: «Эн кышка». (Лыдӟе Иезекиильлэсь 2:3—6.) Иезекииль быгатӥз солы сётэм ужез быдэстыны, малы ке шуоно: 1) сое Иегова ыстӥз, 2) солы Инмарлэн духез кужым сётӥз но 3) сое Инмарлэн кылъёсыз юнматӥзы. Кызьы ваньмыз та пророклы юрттӥз? Кызьы со милемлы но юрттыны быгатэ?

3. Иеговалэн кыӵе кылъёсыз Иезекиилез юнматӥзы, луоз, но кызьы Инмар сое оскытӥз, солы юрттоз шуыса?

³ Иегова Иезекиильлы шуиз: «Мон тонэ ыстӥсько» (Иез. 2:3, 4). Та кылъёс пророкез юнматӥзы, дыр. Малы озьы вераны луоз? Малы ке шуоно Иезекииль тодӥз, вылды, кызьы Иегова та выллем кылъёсты Моисейлы но Исаиялы вераз, куке соосты пророкъёс карыса пуктӥз (Пот. 3:10; Ис. 6:8). Озьы ик Иезекииль тодӥз, кызьы Инмар та ужась-тыршисьёсызлы шуг-секытъёссы пыр потыны юрттылӥз. Соин ик, куке Иегова Иезекиильлы кык пол вераз: «Мон тонэ ыстӥсько», пророк оскиз, Инмар солы но юрттоз шуыса. Со сяна, Иезекиильлэн книгаяз трос пол гожтэмын таӵе кылъёс: «Кузё-Инмар дорысь мыным верамын вал» (Иез. 3:16; 6:1). Соин ик Иезекииль юн оскиз, сое Иегова ыстӥз шуыса. Эшшо Иезекиильлэн атаез священник вал. Со пиезлы вералляз, луоз, Инмар аслэсьтыз пророкъёссэ котьку юнматэ шуыса. Кылсярысь, Исааклы, Иаковлы но Иеремиялы Иегова вералляз: «Мон тонэн огазьын» (Ул.-выл. 26:24; 28:15; Иер. 1:8).

4. Кыӵе малпанъёс Иезекиилез буйгатӥзы но юнматӥзы, луоз?

⁴ Кызьы израиль калык пӧлысь тросэз Иезекиильлэн тодытэмез шоры учкизы? Иегова азьло ик вераз: «Израиль калыклэн тонэ кылзэмез уг поты, уго соослэн Монэ кылзэмзы уг поты» (Иез. 3:7). Иезекиилез палэнтыса, калык Иеговаез палэнтӥз. Инмарлэн верамез Иезекиилез оскытӥз: калыклэн кылзымтэез уг возьматы, со умойтэм пророк шуыса. Со сяна, Иегова Иезекиильлы вераз, куке быдэсмоз приговор, кудзэ Иезекииль вераз, адямиос «тодозы,  соос пӧлын пророк вал шуыса» (Иез. 2:5; 33:33). Валамон, та малпанъёс Иезекиилез буйгатӥзы но солы сётэм ужез быдэстыны юрттӥзы.

5. Исаиялэн 44:8 верамъя, мар милемыз юнматэ?

⁵ Ми но быгатӥськомы кышкасьтэмесь луыны, малы ке шуоно тодӥськомы, милемыз Иегова ыстӥз шуыса. Со милемыз аслаз Адӟись-Ивортӥсьёсыныз нима (Ис. 43:10). Со туж бадӟым дан! Иегова Иезекиильлы вераз: «Эн кышка». Инмар милемлы но вера: «Эн кышкалэ». Малы милемлы тушмонъёсмылэсь кышкано ӧвӧл? Иезекиилез кадь ик, милемыз ыстӥз но юнматэ Иегова. (Лыдӟе Исаиялэсь 44:8.)

6. а) Кызьы Иегова оскытэ, милемлы юрттоз шуыса? б) Мар милемыз буйгатэ но юнматэ?

⁶ Иегова кылзэ сётэ милемлы юрттыны. Кылсярысь, «Мынам адӟисьёсы» шуэмезлэсь азьло Иегова оскытӥз: «Вуос вамен-а выжод — Мон тонэн, шуръёс вамен-а потод — соос тонэ уз выйытэ; тыл пыр-а мынод — уд сутӥськы, гомась тыл но тонэ уз ӵушка» (Ис. 43:2). Зэм но, куддыръя ужакумы-тыршыкумы кылдо бадӟым шуръёс выллем шуг-секытъёс яке тыл выллем визь сынаськонъёс. Но Иеговалэн юрттэменыз ми тодытэмысь ум дугдӥське (Ис. 41:13). Иезекииль улон нуналъёсы кадь ик, туннэ тросэз Библиысь иворез уг кылзо. Но адямиослэн кылзымтэзы уг возьматы, ми умойтэмесь тодытӥсьёс шуыса. Иегова шумпотэ, куке ми, номыр шоры учкытэк, ӟеч иворез верамысь ум дугдӥське. Та малпан гинэ но милемыз буйгатэ но юнматэ ини. Та сярысь апостол Павел вераз: «Соос котькудзы ужамзыя уждун басьтозы» (1 Кор. 3:8; 4:1, 2). Нош одӥг сузэр, кудӥз трос аръёс ӵоже ини пионер луыса ужа-тырше, шуиз: «Туж шумпотоно тодыны, Иегова тыршеммес бакель каре шуыса!»

7. Мае шӧдӥз, вылды, Иезекииль, солы возьматэм адӟон сярысь малпаськыса? (Учке вылбамысь суредэз.)

⁷ Адӟонын Иезекиильлы возьматэмын вал, Инмарлэн духез — со туж бадӟым кужым шуыса. Со адӟиз, кызьы святой дух валтэ туж кужмо духовной кылдытэмъёсты но инмысь уроболэсь туж бадӟымесь поглянъёссэ (Иез. 1:20, 21). Мае шӧдӥз Иезекииль, тае адӟыса? Со гожтӥз: «Тае адӟыкум, Мон ымныр вылам уськытски» (Иез. 2:1). Та адӟонэз адӟыса, Иезекииль туж паймиз. Берлогес, та сярысь малпаськыса, солэн осконэз юнмаз, святой духлэн юрттэменыз солы сётэм ужез со быдэстыны быгатоз шуыса.

8, 9. а) Мар луиз Иезекиилен, куке Иегова сое султыны косӥз? б) Кызьы Иегова Иезекиильлы юрттӥз секыт ужзэ быдэстыны?

⁸ Иегова Иезекиильлы шуиз: «Адямилэн пиез! Султы пыд вылад, Мон тонэн верасько». Та косон но Инмарлэн духез пророклы юрттӥзы пыд вылаз султыны. Иезекииль гожтӥз: «Мон пушкы дух пыриз но монэ пыдъёсы вылэ султытӥз» (Иез. 2:1, 2). Пророк луыса ужакуз-тыршыкуз, святой дух Иезекиильлы кивалтэт сётэ вал (Иез. 3:22; 8:1; 33:22; 37:1; 40:1). Инмарлэн духез солы юрттӥз аслэсьтыз ужзэ быдэстыны — «чурыт сюлэмо, вогъяськись сямо» калыклы тодытыны (Иез. 3:7). Иегова Иезекиильлы вераз: «Тынэсьтыд кыместэ Мон излэсь юнгес, алмаз кадь кари; соослэсь эн кышка, соослэн ымныр азязы эн куалекты» (Иез. 3:8, 9). Вераны луоз, Иегова тазьы  шуиз: «Адямиос тонэ уг кылзо ке но, киостэ эн лэзьы. Мон тонэ юнмато».

⁹ Собере Инмарлэн духез адӟонын Иезекиильлы возьматӥз, кытын солы тодытоно луоз. Пророк гожтӥз: «Кузё-Инмарлэн киыз мон вылын зол улӥз». Иезекиильлы быдэс арня кулэ луиз, иворез пыр-поч валан понна но сое юн мылкыдын тодытыны дасяськон понна (Иез. 3:14, 15). Собере Иегова Иезекиилез бусые вайиз но, со пушкы дух пыриз (Иез. 3:23, 24). Табере пророк ужаны-тыршыны дась вал.

10. Кыӵе юрттэт милемлы кулэ, тодытон ужез нуон понна, но малы?

¹⁰ Кыӵе юрттэт милемлы кулэ, тодытон ужез нуон понна? Ойдолэ малпаськомы Иезекииль сярысь. Ужзэ быдэстон азьын Инмарлэн духез солы кужым сётӥз. Тае ик вераны луэ ми сярысь но. Ми быгатӥськомы тодытон уже пыриськыны святой духлэн юрттэмезлы луыса гинэ. Шайтанлэн тодытон ужез дугдытэмез потэ. Соин ик со милемын ожмаське (Усьт. 12:17). Адями синмын учкыса, ми сое вормыны ум быгатэ кадь потэ. Но азьланяз но тодытыса, ми сое вормиськомы! (Усьт. 12:9—11). Кызьы? Тодытон уже пыриськыса, ми возьматӥськомы, Шайтанлэсь ум кышкаське шуыса. Куке ми ӟеч иворез вераськомы, ми Шайтанэз вормиськомы. Мае возьматэ, пумитъяськонъёс шоры учкытэк, ӟеч иворез вераммы? Со возьматэ, святой дух милемлы кужым сётэ но ми Иеговалы ярамон луиськомы шуыса (Матф. 5:10—12; 1 Пётр 4:14).

11. Кызьы милемлы Инмарлэн духез юрттоз но мар кароно, Инмар милемлы сое котьку но мед сётоз шуыса?

¹¹ Малы эшшо милемыз дышетэ на со, кызьы Иегова Иезекиильлы тодытон понна кужым сётӥз? Инмарлэн юрттэменыз ми быгатӥськомы ужан-тыршон дыръя кылдэм котькыӵе шуг-секытъёсты вормыны (2 Кор. 4:7—9). Нош мар кароно, Инмар милемлы святой духсэ котьку но мед сётоз  шуыса? Со сярысь дугдылытэк вӧсяськоно но осконо, Иегова милемыз кылоз шуыса. Иисус дышетскисьёсызлэсь мылкыдзэс ӝутӥз: «Курелэ... утчалэ... йыгаське». Ми но та курон-косонъя лэсьтӥмы ке, соку «Инмысь Атай Солэсь курисьёслы Святой Духез сётоз» (Лука 11:9, 13; Ап. уж. 1:14; 2:4).

12. Кытысь потӥз свиток но мар отын гожтэмын вал? (Иезекииль 2:9—3:3).

¹² Инмарлэн духез сяна, Иезекиилез Инмарлэн кылъёсыз но юнматӥзы. Адӟонын пророк адӟиз киез, кудӥз «бинялтэм книгаез», яке свитокез, кутэ вал. (Лыдӟе Иезекиильлэсь 2:9—3:3.) Кытысь потӥз та свиток? Мар отын гожтэмын вал? Кызьы со Иезекиилез юнматӥз? Ойдолэ тодомы. Свиток потӥз Инмарлэн пыд выжыысьтыз. Сое Иегова Иезекиильлы сётӥз, вылды, ньыль кылчинъёс пӧлысь одӥгез пыр. Та кылчинъёсты Иезекииль азьло адӟиз вал ини (Иез. 1:8; 10:7, 20). Свитокын гожтэмын вал Инмарлэн кылъёсыз — кузь судъян ивор, кудзэ Иезекииль бугыръяськись калыклы вераны кулэ вал (Иез. 2:7). Та ивор свитоклэн кык палаз но гожъямын вал.

13. Мар карыны Иегова косӥз Иезекиилез свитокен но малы со ческыт вал?

¹³ Иегова пророклы шуиз: «Тыныд сётэм книга бинялтэтэным кӧтпуштэ тырмыты». Иезекииль кылзӥськиз но быдэс свитокез сииз. Мае возьматэ адӟонлэн та люкетэз? Пророклы пыр-поч валано вал иворез, кудзэ калыклы тодытоно вал. Солы осконо вал та иворлы, тодытыны ӟырдыт мылкыдыз мед луоз шуыса. Туж паймоно кадь, мар собере луиз. Иезекииль шӧдӥз, свиток «чечы кадь ческыт вал» шуыса (Иез. 3:3). Мае та возьматэ? Иеговалы ужан-тыршон солы бадӟым шумпотон вайиз, ческыт мае ке сием кадь (Пс. 18:9—12). Иезекииль Иеговалы туж тау кариз, со сое аслаз пророкез луыны бырйиз шуыса.

14. Мар юрттӥз Иезекиильлы солы сётэм уж борды басьтӥськыны?

¹⁴ Собере Иегова Иезекиильлы шуиз: «Мынэсьтым тыныд верано вань кылъёсме вань сюлмыныд кабыл басьты, пельыныд кылзӥськы» (Иез. 3:10). Пророк свитокын гожтэмез тодаз возьыны но со вылын малпаськыны кулэ вал. Озьы Инмарлэн кылъёсыз Иезекиилез юнматӥзы. Табере со быгатэ вал вавилон пленэ сюремъёс доры мыныны но соослы Инмарлэсь кулэ луись иворзэ вераны (Иез. 3:11). Та иворез пыр-поч валамез но солы оскемез бере пророк дась вал солы сётэм уж борды басьтӥськыны но сое йылпумъяны. (Ӵошаты Псалтирез 18:15.)

15. Мар вылын мур малпаськоно, азьланяз но ӟырдыт мылкыдын ужан-тыршон понна?

¹⁵ Азьланяз но ӟырдыт мылкыдын ужан-тыршон понна, милемлы ялан асьмеды Инмарлэн кылъёсыныз юнматоно. Со понна мур малпаськоно ваньмыз вылын, мар вера Иегова. Туннэ со вераське милемын Библия пыр. Мар милемлы кароно, Инмарлэн Кылыз милемыз ялан мед юнматоз шуыса?

16. Мар юрттоз милемлы Инмарлэсь Кылзэ эшшо но умойгес валаны?

¹⁶ Сиёнэз сиыса но сое умой-умой кушаса, милемлы кужым пыре. Ӵапак озьы ик, Инмарлэсь Кылзэ эскерыса но со вылын малпаськыса, ми осконмес юнматӥськомы. Талы дышетэ свиток сярысь адӟонлэн  люкетэз. Инмарлэн потэ, ми солэн Кылыныз «кӧтмес мед тыромы», яке Библиез умой мед валаломы шуыса. Со понна вӧсяськоно, лыдӟиськоно но малпаськоно. Нырысь, Инмарлэсь малпанъёссэ валан понна, ми вӧсяськиськомы. Собере Библиез лыдӟиськомы но лыдӟеммы вылын мур малпаськиськомы. Кыӵе пайда со вае? Мур малпаськыса, ми эшшо но умойгес Инмарлэсь Кылзэ валаськомы но осконмес юнматӥськомы.

17. Малы туж кулэ Библиысь лыдӟеммы вылын малпаськыны?

¹⁷ Малы туж кулэ Библиез лыдӟыны но со вылын малпаськыны? Со милемлы кужым сётэ али ик ини Эксэйлык сярысь иворез вераны. Озьы ик со юрттоз милемлы лек судъян иворез тодытыны, кудзэ ми матысь дыре вераломы, вылды. Со сяна, Иеговалэн паймымон сямъёсыз вылын малпаськыса, милям соин кусыпъёсмы юнмало. Солы луыса ми шумпотыса но каньыл сюлмын улӥськомы, ческыт сиёнэз сием кадь (Пс. 118:103).

18. Мае валано луоз ми палан улӥсь адямиослы но малы?

¹⁸ Иезекиилен ӵошатыса, ми пророкъёс ӧвӧл. Но солэн кадь ик, милям потэ адямиослы Иеговалэсь иворзэ вераммы. Та ивор Библиын гожтэмын. Иегова тодытон ужез дугдытытозь ми та уже пыриськемысь ум дугдэ. Куке Иегова судъяны кутскоз, ми палан улӥсь адямиос уз быгатэ вераны, соос номыре ӧз тодэ яке Инмар соос сярысь вунэтӥз шуыса (Иез. 3:19; 18:23). Адямиослы валано луоз, ми соослы Инмарлэсь иворзэ тодытӥмы вал шуыса.

19. Мар милемлы юрттоз тодытон уже пыриськыны?

¹⁹ Мар милемлы юрттоз тодытон уже пыриськыны? Со ик, мар юрттӥз Иезекиильлы. Ми тодытэмысь ум дугдӥське, малы ке шуоно тодӥськомы: милемыз Иегова ыстӥз, милемлы Инмарлэн духез кужым сётэ но милемыз Инмарлэн Кылыз юнматэ. Иеговалэн юрттэменыз милям туж потэ милемлы сётэм ужез быдэстэммы но пумозяз чидаммы (Матф. 24:13).