1. Кытысь адӟиське, Иеговалэн милемлы матэ кариськемез потэ шуыса?

 ИЕГОВА ӧте милемыз солы матэ кариськыны (Иак. 4:8). Солэн потэ милемлы Инмар, Атай но Эш луэмез. Со вӧсяськонъёсмес кылзэ но милемлы юрттэ. Аслаз организациез пыр со милемыз дышетэ но уте. Нош мар кароно милемлы, Иеговалы матэ кариськон понна?

2. Кызьы ми Иеговалы матэгес кариськыны быгатӥськомы?

² Ми быгатӥськомы Иеговалы матэ кариськыны, солы вӧсяськыса, солэсь Кылзэ лыдӟыса но со вылын малпаськыса. Озьы лэсьтӥмы ке, ми Инмарез эшшо но золгес яратомы но тау карон мылкыдмы будоз. Озьы ик милям мылкыдмы кылдоз солэсь кылзӥськыны но сое данъяны, малы ке шуоно со гинэ «данлыкез, сӥ-данэз... басьтыны ярась»! (Усьт. 4:11). Иеговаен умойгес тодматскыса, милям солы но солэн организациезлы осконмы юнмалоз.

3. Кызьы Шайтан тырше милемыз Иеговалэсь люкыны но мар юрттоз, ми Иеговалэсь но солэн организациезлэсь медам палэнске шуыса? (Псалтирь 30:14, 15).

³ Но Шайтан тырше милемыз Иеговалэсь люкыны, тужгес но шуг-секытъёсын пумиськыкумы. Кызьы со сое каре? Со тырше Иеговалы но солэн организациезлы осконмес лябӟытыны. Но ми Иеговалы юн оскимы ке, соку Иеговалэсь но солэн организациезлэсь ум палэнске. (Лыдӟе Псалтирез 30:14, 15.)

4. Мае ми эскеромы та статьяын?

⁴ Та статьяын ми эскеромы куинь шуг-секытъёсты, кудъёсыз  улонамы кылдо. Куддыръя соос Иеговалы но солэн организациезлы осконмес лябӟыто. Кызьы та шуг-секытъёс быгато милемыз Иеговалэсь люкыны? Мар милемлы кароно, Шайтанлы медам сётске шуыса?

5. Кызьы шуг-секытъёс Иеговалы но солэн организациезлы осконмес лябӟытыны быгато?

⁵ Дырын-дырын ми ваньмы бадӟым шуг-секытъёсын пумиськылӥськомы, кылсярысь, семьямы пумитъяськыны кутске яке ужмес ыштӥськомы. Кызьы таӵе шуг-секытъёс быгато Иеговалэн организациезлы осконмес лябӟытыны но Инмарлэсь палэнтыны? Шуг-секытмы кема дыр ӵоже уг ортчы ке, милям кужыммы быре но ми малпаськомы, номыре воштыны уг луы ини шуыса. Сыӵе дыре Шайтан одно ик тыршоз, ми мед малпаломы, Иегова милемыз уг яраты ини но ваньмыз понна со но солэн организациез янгыш шуыса. Сыӵе учыре сюризы израиль калык пӧлысь куд-огъёсыз, куке соос Египетын вал. Нырысь соос оскизы, соосты мозмытон понна, Моисеез но Ааронэз Иегова ыстӥз шуыса (Пот. 4:29—31). Но берлогес, куке фараон соослэсь улонзэс эшшо но секытгес кариз, соос Моисеез но Ааронэз янгыше уськытӥзы. Соос веразы: «Кузё-Инмар тӥледыз мед адӟоз но милемыз фараон азьын, солэн ляльчиосыз азьын синазькыльёслы пӧрмытэмды понна судить мед кароз, соослэн киязы меч сётӥды милемыз виён понна» (Пот. 5:19—21). Малпалэ гинэ: соос Иеговалэсь оскымон ужась-тыршисьёссэ янгыше уськытӥзы! Шуг-секытмы кема дыр ӵоже уг ортчы ке, мар милемлы кароно, Иеговалы но солэн организациезлы осконмы медаз лябӟы шуыса?

6. Кызьы Аввакум пророклэн примерез юрттоз милемлы шуг-секытъёсмес чиданы? (Аввакум 3:17—19).

⁶ Иеговалы сюлэмдэс усьтэ но солэсь юрттэтсэ утчалэ. Аввакум пророклэн трос куректонъёсыз вал. Кыӵе ке но дыре со малпаны но кутскиз, кадь, Иегова со сярысь уг сюлмаськы ини шуыса. Соин ик со Инмарлы шӧдонъёсыз сярысь вераз: «Кузё-Инмаре, трос пол-а Тыныд вазиськоно на... ...Курадӟонъёс шоры учкыны малы мыным эрик сётӥськод?» (Авв. 1:2, 3). Иегова оскымон ужась-тыршисезлэсь сюлмысь вӧсяськемзэ кылӥз (Авв. 2:2, 3). Пророк мур малпаськиз, кызьы Иегова аслэсьтыз калыксэ азьвыл утьылӥз. Таӵе малпаськон Аввакумлы шумпотон сётӥз. Со адӟиз, Иегова со сярысь сюлмаське но котькыӵе шуг-секытэз чиданы юрттоз шуыса. (Лыдӟе Аввакумлэсь 3:17—19.) Малы та милемыз дышетэ? Тӥ но шуг-секытъёсын пумиськиды ке, Иеговалы вӧсяське но солы шӧдонъёсты сярысь вералэ. Юн оске, Иегова тӥледлы ваньзэ чиданы кужым сётоз шуыса. Куке тӥ солэсь юрттэмзэ адӟоды, тӥляд осконды юнмалоз.

7. Мар карыны тыршизы Ширли сузэрлэн ӵыжы-выжыосыз но мар со кариз, Иеговалы осконэз медаз лябӟы шуыса?

⁷ Азьланяз но тырше Иеговаен матысь кусыпъёс возьыны. Ӵапак та юрттӥз Папуа — Выль Гвинея шаерысь Ширли b сузэрмылы но, куке со шуг-секытъёсын пумиськиз. Солэн семьяез куанер вал. Куддыръя соос сиёнзэс но мырдэм тырмытӥзы. Огпол одӥг ӵыжы-выжыез тыршиз Иеговалы осконзэ лябӟытыны. Со шуиз: «Тон вераськод, тӥледлы Инмарлэн святой духез юрттэ шуыса. Ну и кытын солэн юрттэмез? Тӥ азьло сямен ик куанер улӥськоды. Тодытыны ветлыса, тон дырдэ юнме гинэ  быдтӥськод». Сузэрмы вера: «Мон малпай: зэм но, Инмар милемыз ӧз вунэты меда? Но таӵе малпанъёсы сярысь мон соку ик Иеговалы верай. Мон азьланяз но тырши Библиез но публикациосмес лыдӟыны, тодытыны но пумиськонъёсы ветлыны». Ӝоген Ширли валаз, Иегова семьязы сярысь сюлмаське шуыса. Малы ке шуоно соос сютэм ӧз улэ но, номыр шоры учкытэк, шудоесь вал. Ширли вера: «Мон валай, Иегова вӧсяськонъёсме кылэ шуыса» (1 Тим. 6:6—8). Тӥ но Иеговаен матысь кусыпъёс возьыны тыршиды ке, соку номыр уз быгаты тӥледыз Иеговалэсь люкыны.

8. Маин пумиськыны быгато агайёс, кудъёсыз Иеговалэн организацияз кивалтон ужез нуо?

⁸ Газетъёс, радио, телевидение но интернет пыр тушмонъёс шонертэмзэ верало агайёсмы сярысь, кудъёсыз Иеговалэн организацияз кивалтон ужез нуо (Пс. 30:14). Куд-ог вын-агайёсмес янгыше уськытӥзы, соос кыӵе ке йыружъёсты лэсьтӥзы шуыса, но пытсэтэ пуктӥзы. Таӵе ик учыр вал нырысетӥ даурын но, куке апостол Павелэз шонерлыктэм янгыше уськытӥзы но пытсэтэ куштӥзы. Кызьы асьсэды возизы солэн вын-агайёсыз но сузэр-апайёсыз?

9. Кызьы асьсэды возизы куд-ог христианъёс, куке апостол Павелэз пытсэтэ пуктӥзы?

⁹ Нырысетӥ даурын, куке апостол Павелэз Римысь пытсэтэ пуктӥзы, куд-ог христианъёс со бордысь куштӥськизы (2 Тим. 1:8, 15). Малы? Оло нош, соос Павеллэсь возьдаськизы, малы ке шуоно тросэз со шоры йыруж лэсьтӥсь шоры кадь учкизы (2 Тим. 2:8, 9). Яке соос кышказы, соосты но уйылозы-уллялозы шуыса. Павел соос понна трос шуг-секытъёсты чидаз но соос понна улонзэ но сётыны дась вал. Малпалэ гинэ, мар со шӧдӥз, куке соос солэсь палэнскизы (Ап. уж. 20:18—21; 2 Кор. 1:8). Ойдолэ ум луэ соос кадь, кинъёс Павеллы секыт дыръя ӧз юрттэ! Мар сярысь тодамы возёно, куке кенешысь вын-агайёсмес уйыло-улляло?

10. Мар сярысь тодамы возёно, куке уйыло-улляло агайёсты, кудъёсыз Иеговалэн организацияз кивалтон ужез нуо, но малы?

 ¹⁰ Эн вунэтэ, малы но кин милемыз уйылэ-улля. 2 Тимофейлы 3:12 гожтэмын: «Ваньзэс Иисус Христос бордын шонерлыко улыны кутскисьёсты улляса-ӝикатыса возьыны кутскозы». Соин ик ми ум паймиське, Шайтан тужгес но уйылэ-улля шуыса со вын-агайёсты, кудъёсыз Иеговалэн организацияз кивалтон ужез нуо. Солэн потэ, та агайёс Иеговалы ужамысь-тыршемысь мед дугдозы но ми мед кышкаломы шуыса (1 Пётр 5:8).

11. Малы дышетэ милемыз Онисифорлэн примерез? (2 Тимофейлы 1:16—18).

¹¹ Вын-агайёслы котьку юрттэ но соосты эн кельтэ. (Лыдӟе 2 Тимофейлы 1:16—18.) Тодамы ваёмы нырысетӥ даурысь Онисифор нимо христиан муртлэсь примерзэ. Павел со сярысь гожтӥз: «Жильыетын пукисько шуыса, мынэсьтым со ӧз возьдаськылы». Павеллы юрттыса, Онисифор улонзэ но ыштыны быгатэ вал ке но, со Павелэз утчаз, шедьтӥз но солы юрттыны тыршиз. Малы та милемыз дышетэ? Адямиослэсь кышканлы сётсконо ӧвӧл но юрттыны тыршоно агайёслы, кудъёссэ уйыло-улляло. Ойдолэ котьку но соос пала пыромы но соослы юрттӥськыны тыршомы (Мад. 17:17). Агайёслы туж кулэ, ми соосты мед яратомы но соосты медам кельтэ шуыса.

12. Кыӵе адӟем карон возьмато Россиысь вын-агайёс но сузэр-апайёс?

¹² Умой адӟем-карон возьмато Россиысь вын-агайёс но сузэр-апайёс. Соос юрттыны тыршо огъя оскисьёссылы, кудъёсыз пытсэтын пуко. Соосты юнматон понна, соос судэ но лыкто. Малы та милемыз дышетэ? Куке вын-агайёс сярысь шонертэмзэ верало, соосты уйыло-улляло но пытсэтъёсы пуктыло, эн кышкалэ. Соос понна вӧсяське, семьяоссылы юрттӥське но малпалэ, мар эшшо соос понна карыны быгатӥськоды на (Ап. уж. 12:5; 2 Кор. 1:10, 11).

13. Кызьы адямиослэн милемыз серекъямзы Иеговалы но солэн организациезлы осконмес лябӟытыны быгатэ?

¹³ Иеговалы оскисьтэм ӵыжы-выжыосмы, ӵош ужасьёсмы яке ӵош дышетскисьёсмы милемыз серекъяны быгато, ми тодытӥськомы яке Иеговалэн вылӥ эсэпъёсызъя улӥськомы шуыса (1 Пётр 4:4). Куд-огъёсыз верало: «Тон умой адями, но осконэд тыныд номыр карыны уг лэзьы. Тон мукет дуннеын улӥськод кадь». Нош кинлы ке но уг кельшы, кызьы ми учкиськомы кенешысь поттэм агайёс но сузэръёс шоры. Соос вераны быгато: «Тон шуиськод на, тӥ матысьёстэс яратӥськоды шуыса!» Таӵе веранъёсыз кылыса, милям юанъёсмы кылдыны быгато: «Иеговалэн куронъёсыз укыр чурытэсь ӧвӧл-а? Солэн организациез укыр трос куронъёс уг пукты-а?» Тӥ но таӵе учыръёсын пумиськылӥды ке, мар юрттоз тӥледлы Иеговалэсь но кенешлэсь палэнскытэк улыны?

14. Кызьы асьмеды возёно, куке адямиос милемыз серекъяло Иеговалэн куронъёсызъя улэммы понна? (Псалтирь 118:50—52).

¹⁴ Номыр шоры учкытэк, Иеговалэн куронъёсызъя улэ. Та пумысен умой адӟем карон возьматӥз Иов. Сое серекъязы ке но, со Иеговалэсь кылзӥськыса улӥз. Иовлэн одӥгез эш шуонэз сое оскытыны тыршиз, Инмарлы нокыӵе ик уг поты, Иов солэсь кылзӥське-а, уг-а шуыса (Иов 4:17, 18; 22:3). Но Иов талы ӧз оскы. Со тодӥз, Иеговалэн ӟечез но уродэз пумысен  курон-косонъёсыз шонересь шуыса. Иовлэн юн мылкыдыз вал Инмарлэсь кылзӥськыса улыны. Со шуиз: «Кулытозям мон аслэсьтым дун-шектэм луонме ватыса уг возьы» (Иов 27:5, 6). Малы та милемыз дышетэ? Адямиослэн серекъяменызы сэрен эн малпалэ, Иеговалэн куронъёсыз шонересь ӧвӧл шуыса. Тодады вае, кызьы Инмар тӥледлы юрттылӥз ини. Тӥ шӧдӥды, дыр, Иеговалэн куронъёсыз самой умоесь но соос пайда ваё шуыса. Ноку эн кельтэ организациез, кудӥз та куронъёсъя улэ! Соку, адямиос тӥледыз серекъязы ке но, тӥ Иеговалэсь уд палэнске. (Лыдӟе Псалтирез 118:50—52.)

15. Мар понна Бриджит сузэрез серекъязы?

¹⁵ Тае возьматэ Индиысь Бриджит сузэрлэн учырез. Осконэз понна ӵыжы-выжыосыз сое серекъязы. 1997-тӥ арын пылатӥськемез берегес ик, Адӟись-Ивортӥсь луисьтэм картэз ужзэ ыштӥз. Соин ик картэз малпаз быдэс семьязэ нуыны анаез-атаез доры, кудъёсыз мукет карын улӥзы. Но Бриджит мукет шуг-секытъёсын пумиськиз на. Картэз уж шедьтыны ӧз быгаты бере, солы аслыз быдэс нуналъёсын ужано луиз. Со сяна, матысез кенеш 350 иськем кемын вал. Осконэз понна Бриджитлэн ӵыжы-выжыосыз сое урод каризы. Югдурзы сокем секыт луиз, со семьяеныз ӵош нош ик мукет интые кошконо луиз. Собере малпамтэ шорысь картэз кулӥз. Эшшо берлогес 12 аресъем нылыз ракен висьыса кулӥз. Но югдур эшшо но секытгес луиз, куке Бриджитлэн ӵыжы-выжыосыз ваньмыз понна сое янгыше уськытӥзы. Соос веразы, Бриджит Иеговалэн Адӟись-Ивортӥсез ӧй луысал ке, ваньмыз умой луысал шуыса. Озьы ке но сузэрмы Иеговалы но солэн организациезлы оскемысь ӧз дугды.

16. Кызьы Бриджит бакель каремын вал, Иеговалы но солэн организациезлы оскымон луэмез понна?

¹⁶ Бриджит кенешлэсь кыдёкын улӥз бере, ёросэз чаклась солэсь мылкыдзэ ӝутӥз со палан улӥсь адямиослы тодытыны но пумиськонъёсты дораз ортчытъяны. Нырысь та солы секыт потӥз ке но, со агайлэсь кылзӥськиз. Со мукет адямиослы  ӟеч иворез вералляз, пумиськонъёсты ортчытъяз но нылъёсыныз ӵош семьяен йыбырттон понна ялан дыр висъялляз. Кыӵе пайда со вайиз? Сузэрмы трос адямиосын Библиез дышетыны кутскиз. Соос пӧлысь тросэз пылатӥськизы. 2005-тӥ арын Бриджит пионер луиз. Иеговалы но солэн организациезлы оскымон луэмез бакель каремын вал. Солэн нылъёсыз Иеговалы ужало-тыршо, нош со интыын, кытын со улэ, кык кенеш вань. Сузэрмы оске, вань шуг-секытъёссэ но семьяезлэсь серем каремзэ чиданы солы Иегова юрттӥз шуыса.

17. Мар карыны милям мылкыдмы луыны кулэ?

¹⁷ Шайтанлэн милемыз оскытэмез потэ, ми шуг-секытъёсын пумиськимы ке, Иегова милемыз кельтоз шуыса. Озьы ик солэн оскытэмез потэ, ми Инмарлэн организацияз луимы ке, ми асьмелы ик урод каромы шуыса. Куке вын-агайёс сярысь шонертэмзэ верало яке куке соосты уйыло-улляло но пытсэтъёсты пуктыло, Шайтанлэн потэ, ми мед кышкаломы шуыса. Нош адямиослэн милемыз серекъямзы пыр Шайтан тырше, ми Иеговалы но солэн организациезлы оскемысь мед дугдомы шуыса. Ми тодӥськомы Шайтанлэсь кескич малпанъёссэ, соин ик со милемыз пӧяны уз быгаты (2 Кор. 2:11). Эн оске солэн пӧяськемезлы. Азьланяз но Инмарлы но солэн организациезлы оскымон луэ. Эн вунэтэ: Иегова тӥледыз ноку уз кельты (Пс. 27:7). Номыр но тӥледыз Иеговалэсь медаз люкы! (Рим. 8:35—39).

18. Мае ми эскеромы вуоно статьяын?

¹⁸ Та статьяын ми эскеримы куинь шуг-секытъёсты, кудъёсыз улонын кылдыны быгато. Нош Иеговалы но солэн организациезлы осконмы лябӟыны быгатэ секыт учыръёсын сэрен, кудъёсыз кенешын кылдо. Мар юрттоз милемлы соосты вормыны? Та эскериськоз вуоно статьяын.