1. Кызьы валано «сазь улэ» шуэмез? (1 Пётр 5:8).

 ШУГ-СЕКЫТЪЁСЫН пумиськыкумы, куддыръя Иеговалы но солэн организациезлы оскымон луыны капчи ӧвӧл. Кызьы шуг-секытъёсты вормоно? Со понна сазь улоно, сак луоно но осконын юн сылоно. (Лыдӟе 1 Пётрлэсь 5:8.) Кызьы валано «сазь улэ» шуэмез? Адями, кудӥз сазь улэ, ассэ кияз возе, умой вала кылдэм югдурез но ваньмыз шоры Иеговалэн синмыныз учке. Адями озьы улэ ке, соку со шӧдонъёсызлы уз сётскы.

2. Мае ми эскеромы та статьяын?

² Кылем статьяын ми эскеримы куинь шуг-секытъёсты, кудъёсыз улонын кылдо. Та статьяын ми эскеромы куинь шуг-секытъёсты, кудъёсыз кылдыны быгато кенешын. Соос Иеговалы оскымон луэммес эскерыны быгато. Ми учкомы таӵе учыръёсты: 1) куке ми малпаськомы, агай яке сузэр милемын ассэ шонертэм возиз шуыса, 2) куке милемыз тупато но 3) куке милемлы секыт организациын лэсьтэм воштӥськонъёсын соглаш кариськыны. Кызьы таӵе учыръёсын сазь визьмын улоно, озьы ик Иеговалы но солэн организациезлы оскымон луоно?

3. Кыӵе малпанъёсмы но шӧдонъёсмы кылдыны быгато, милемлы потӥз ке, агай яке сузэр милемын ассэ шонертэм возиз шуыса?

³ Вал-а тӥляд сыӵе учыръёсты, куке тӥледлы потӥз, агай яке сузэр тӥледын ассэ шонертэм возиз шуыса? Оло нош,  со тӧро вал. Солэн тӥледыз вӧсь каремез уг поты вал, дыр (Рим. 3:23; Иак. 3:2). Озьы ке но тӥледлы вӧсь луиз. Соин сэрен тӥ изьыны ӧд быгатэ, вылды. Йырады таӵе малпан бергаз, дыр: «Агай ассэ озьы возе ке, луэ-а вераны, та Инмарлэн организациез шуыса?» Шайтанлэн потэ, ми ӵапак тазьы мед малпаськомы шуыса (2 Кор. 2:11). Ми Шайтанлы сётскимы ке, со милемыз Иеговалэсь но солэн организациезлэсь палэнтыны быгатоз. Озьыен, ми малпаськомы ке, кин ке но милемын ассэ шонертэм возиз шуыса, мар юрттоз сазь визьмын улыны но урод малпанъёсты палэнтыны?

4. Мар юрттӥз Иосифлы сазь визьмын улыны, куке агайёсыз соин асьсэды шонертэм возизы? Малы дышетэ милемыз солэн учырез? (Улон-вылон 50:19—21).

⁴ Йыркуръяськыса эн улэ. Куке Иосиф егит на вал, агайёсыз асьсэды соин шонертэм возизы. Соос сое адӟемпотостэм каризы, куд-огъёсыз виыны но малпазы (Ул.-выл. 37:4, 18—22). Соин сэрен соос Иосифез ляльчие вузазы. Отын 13 ар ӵоже со курадӟыса улӥз. Соку Иосиф малпаны быгатэ вал, Иегова сое уг яраты но со сярысь вунэтӥз шуыса. Но Иосиф йыркуръяськыса ӧз улы. Со сазь визьмын улӥз. Иосиф ассэ кияз возиз. Куке со быгатэ вал агайёсызлы пунэмзэ берыктыны, со озьы ӧз лэсьты, нош соослы яратэмзэ возьматӥз но соосты простить кариз (Ул.-выл. 45:4, 5). Иосиф быгатӥз ассэ озьы возьыны, малы ке шуоно умой валаз кылдэм югдурез. Шуг-секытъёсыз сярысь гинэ малпаськем интые, со Иеговалэн эрикез сярысь малпаськиз. (Лыдӟе Улон-вылонэз 50:19—21.) Малы со милемыз дышетэ? Кин ке но ассэ тӥледын шонертэм возиз ке, эн йыркуръяське но эн малпалэ, Иегова тӥледыз вунэтӥз шуыса. Со интые, малпаське, кызьы со юрттэ тӥледлы секыт вакыттэс чиданы. Со сяна, кин ке но тӥледыз вӧсь кариз ке, тырше яратэмдэс возьматыны но простить карыны (1 Пётр 4:8).

5. Мар юрттӥз Микеаслы сазь визьмын улыны, куке со малпаз, тӧроос асьсэды соин шонертэм возизы шуыса?

⁵ Эскеромы туала учырез. Тани мар вера Лымшор Америкаысь Микеас b нимо тӧро. Огпол со малпаз, куд-ог тӧроос асьсэды соин туж шонертэм возизы шуыса. Со вера: «Мыным туж секыт вал. Номыр карыны луымтэен, мон изьыны ӧй быгаты но бӧрдыса улӥ». Озьы ке но Микеас быгатӥз сазь визьмын но шӧдонъёсызлы сётскытэк улыны. Со ӵем вӧсяськиз. Иеговалэсь святой духсэ но ваньзэ чиданы кужым куриз. Озьы ик со публикациосмес эскериз. Малы со милемыз дышетэ? Тӥ малпаськоды ке, агай яке сузэр ассэ тӥледын шонертэм возиз шуыса, асьтэды кияды возе но тырше урод малпанъёстэс палэнтыны. Ми ум тодӥське, вылды, малы адями ассэ озьы возиз. Соин ик ваньмыз сярысь Иеговалы вералэ. Тырше асьтэды со агай яке сузэр интые пуктыны. Соку тӥ быгатоды, вылды, сое валаны но простить карыны (Мад. 19:11). Эн вунэтэ: Иегова адӟе, маин тӥ пумиськоно луиды, но со тӥледлы ваньзэ чиданы юрттоз (2 Пар. 16:9; Екк. 5:7).

6. Малы вунэтоно ӧвӧл, Иегова милемыз яратэменыз тупатэ шуыса? (Еврейёслы 12:5, 6, 11).

⁶ Куке Иегова милемыз тупатэ, милемлы со уг кельшы, дыр. Но ми шӧдонъёсмылы укыр трос саклыкмес висъямы ке, малпаломы, Иеговалэн визь-кенешез шонертэм шуыса. Озьы малпамы ке, ми вунэтомы, Иегова милемыз яратэ, соин ик тупатэ шуыса.  (Лыдӟе Еврейёслы 12:5, 6, 11.) Со сяна, ми асьмеды киямы ӧм возе ке, Шайтанлы сётскомы. Солэн потэ, ми визь-кенешлэсь медам кылзӥське, Иеговалы ужамысь-тыршемысь мед дугдомы но кенешез мед кельтомы шуыса. Тӥледыз тупато ке, мар юрттоз тӥледлы сазь визьмын улыны?

7. а) Учке суредэз. Пётр тупатэмлэсь кылзӥськем бере кыӵе дано ужъёсты оскиз солы Иегова? б) Малы дышетэ тӥледыз Пётрлэн учырез?

⁷ Тырше тупатскыны. Иисус кӧня ке пол Пётрез мукет апостолъёс азьын тупатъяз (Марк 8:33; Лука 22:31—34). Пётрлы та умой ӧз поты, дыр. Озьы ке но со Иисуслы оскымон кылиз. Со тупатэмлэсь кылзӥськиз но аслаз янгышъёсыз вылын дышетскиз. Соин ик Иегова оскымон луэмез понна Пётрез бакель кариз но кенешын дано ужъёсты оскиз (Иоанн 21:15—17; Ап. уж. 10:24—33; 1 Пётр 1:1). Малы дышетэ милемыз Пётрлэн учырез? Милемыз тупато ке, асьме шӧдонъёсмы сярысь малпаськем интые, тупатэмлэсь кылзӥськимы ке но тупатскимы ке, асьмелы но мукетъёсызлы умойгес каромы. Соку ми Иеговалы, вын-агайёсмылы но сузэр-апайёсмылы эшшо но тросгес пайда ваёмы.

8, 9. Мар нырысь шӧдӥз Бернарду, куке солы тӧро луыны ӧз лэзе ни, но мар юрттӥз солы малпанъёссэ воштыны?

⁸ Тани Мозамбикысь Бернарду агайлэн учырез. Солы ӧз лэзе ни тӧро луыса ужаны-тыршыны. Мар со нырысь шӧдӥз? Со тодаз вае: «Мон соин соглаш ӧй вал, соин ик куатаськи». Агаймы сюлмаськиз, кызьы со шоры мукет агайёс но сузэръёс учкозы. Бернарду вера: «Кӧня ке толэзьёс ортчыса гинэ, мон быгатӥ кылдэм югдур шоры шонер учкыны, озьы ик Иеговалы но солэн организациезлы выльысь оскыны». Мар юрттӥз агаймылы кылдэм югдур шоры шонер учкыны?

⁹ Бернарду аслэсьтыз малпанъёссэ воштӥз. Со валэктэ: «Куке мон тӧро луыса ужай-тырши, мон мукетъёсызлы юрттӥ Иеговалэн тупатэмез шоры шонер учкыны. Со понна мон соосын эскери кылъёсты, кудъёсыз гожтэмын Еврейёслы 12:7. Нош али мон аслэсьтым юай: „Кинлы та кылъёслэсь кылзӥськоно?“ Иеговалэн вань ужась-тыршисьёсызлы, озьы ик мыным но». Иеговалы но солэн организациезлы выльысь оскон понна, Бернарду мукет воштӥськонъёс лэсьтӥз на. Со кутскиз тросгес Библиез  лыдӟыны но со вылын мургес малпаськыны. Агаймы азьло сямен ик сюлмаськиз ке но, мар малпало со сярысь агайёс но сузэръёс, со соосын тодытӥз но кенешлэн пумиськонъёсаз пыриськиз. Дыр ортчыса, Бернарду нош ик тӧро луиз. Тӥледыз но тупатӥзы ке, тырше йыркуръяськытэк улыны, сётэм визь-кенешлэсь кылзӥськыны но тупатскыны (Мад. 8:33; 22:4) c. Озьы лэсьтӥды ке, тӥ юн оскыны быгатӥськоды: Иеговалы но солэн организациезлы оскымон луэмды понна Иегова тӥледыз бакель кароз.

10. Кыӵе воштӥськонэн израиль калык пӧлысь куд-огъёсызлы соглаш кариськыны секыт вал?

¹⁰ Куке организациямы кыӵе ке воштӥськонъёс лэсьтӥсько, Иеговалы оскымон луэммы эскериськыны быгатэ. Сак ӧм луэ ке, ми Иеговалэсь но палэнскыны быгатомы. Кылсярысь, эскеромы, кыӵе воштӥськонъёс лэсьтэмын вал, куке Иегова Моисей пыр Закон сётӥз, но кызьы со шӧдӥськиз израиль калык вылын. Куке Моисейлэн законэз ӧй вал на, священниклэсь ужъёссэ семьяослэн йыръёссы быдэсъязы. Соос курбон сётон понна ӝӧкъёсты пуктылӥзы но семьяоссы понна Иеговалы курбонъёс вайылӥзы (Ул.-выл. 8:20, 21; 12:7; 26:25; 35:1, 6, 7; Иов 1:5). Нош куке Моисейлэн законэз сётэмын вал, семьяослэн йыръёссы та ужъёсты быдэсъямысь дугдӥзы. Священникъёс луыны Иегова бырйиз Ааронлэн семьяысьтыз пиосты. Табере соос курбонъёс вайылыны кулэ вал. Таӵе воштӥськонъёс лэсьтэм бере Ааронлэн выжыысьтыз потымтэ пиосмурт курбон вае вал ке, сое виыны кулэ вал (Лев. 17:3—6, 8, 9) d. Малы Корей, Дафан, Авирон но 250 кивалтӥсьёс Моисейлы но Ааронлы пумит ӝутскизы? Соослы та воштӥськон ӧз кельшы-а? (Лыд. 16:1—3). Ми ум тодӥське. Малы гинэ соос пумит медам ӝутске, Корей но со пала султӥсьёс Иеговалы оскымон ӧз кыле. Тӥледлы но организациын лэсьтэм воштӥськонъёсын соглаш кариськыны секыт ке, мар тӥ карыны быгатӥськоды?

11. Малы дышетскыны луэ Кааф выжыысь левитъёслэсь?

¹¹ Организациын лэсьтэм воштӥськонъёсын соглаш кариське. Куке израиль калык кыр дуннеын вал, Кааф выжыысь левитъёс туж кулэ ужез быдэсъязы. Куке калык кытчы ке мыныны потэ вал, Кааф выжыысь пиос ваньмыз азьын мынӥзы но Кузё-Инмарлэсь ковчегзэ нуизы (Лыд. 3:29, 31; 10:33; Иис. Н. 3:2—4). Со туж бадӟым дан вал! Но ваньмыз воштӥськиз, куке израиль калык Сӥзем музъеме пыриз. Ковчегез интыысь интые ялан нуллоно ӧй вал ини. Соин ик Кааф выжыысь пиослы мукет ужъёс сётӥзы. Кылсярысь, Соломон кивалтыку, соос кырӟасьёс, капка возьмасьёс но ваньбур возён комнатаосты чакласьёс вал (1 Пар. 6:31—33; 26:1, 24). Озьы ке но соос ӝожтӥськыса ӧз улэ но асьсэлы даногес уж ӧз куре. Малы та милемыз дышетэ? Иеговалэн организацияз воштӥськонъёс ортчо ке, соосын соглаш кариське. Котькыӵе ужлы шумпотэ. Эн вунэтэ: кыӵе гинэ ужез тӥ медад быдэсъялэ, кылзӥськемды Иеговалы дуногес потэ.

12. Мар шӧдӥз Рахима, куке солы Вефильысь кошконо луиз?

 ¹² Эскеромы Рахима сузэрлэсь учырзэ. Со туж яратӥз Вефильын ужаны-тыршыны. Но отын 23 ар ӵоже ужамез-тыршемез бере сое нимысьтыз пионер луыса ужаны-тыршыны ыстӥзы. Рахима вера: «Мон талы туж пайми. Мон асме кулэтэмен шӧдӥ. Мон весь малпай: „Мае мон шонертэм кари?“». Со сяна, кенешысь куд-ог вын-агайёс но сузэр-апайёс солы эшшо но вӧсьгес каро вал, тазьы шуыса: «Тыныд Вефильысь кошконо луиз бере, тон аслэсьтыд ужъёстэ умой быдэсъяны ӧд быгаты, луоз». Кӧня ке дыр ӵоже Рахималы сокем секыт вал, со котькуд уе бӧрдыса улӥз. Но со вера: «Мон азьло сямен ик оски, Иеговалэн организациез шонер ужпумъёс кутэ но Иегова монэ яратэ шуыса». Мар юрттӥз сузэрмылы сазь визьмын улыны?

13. Мар юрттӥз Рахималы урод шӧдонъёссэ вормыны?

¹³ Рахима быгатӥз урод шӧдонъёссэ вормыны. Мар солы юрттӥз? Публикациосысьтымы со лыдӟиз статьяосты, кудъёсаз солы тупась учыръёс гожтэмын вал. Тужгес но солы юрттӥз 2001-тӥ арын 1-тӥ тулыспал понна поттэм «Возьмаськон башняысь» «Урод мылкыддэ вормы» статья (ӟуч). Отын вераськиз Иисуслэн Марк дышетскисез сярысь, кудӥзлэн сузэрмылэн кадь ик шӧдонъёсыз вал, дыр. Рахима тодаз вае: «Марклэн учырез юрттӥз мыным урод шӧдонъёсме вормыны». Озьы ик со эшъёсызлэсь ӧз палэнскы но ассэ гинэ жаляса ӧз улы. Мае валаз Рахима? Со оске вал, Иеговалэн организациеныз святой дух кивалтэ но тӧроос сое ярато шуыса. Со сяна, со валаз: Иеговалэн организациез понна валтӥсез — Иеговалэсь эриксэ быдэсъян.

14. Кыӵе воштӥськонъёсын соглаш кариськыны секыт вал Владо агайлы но мар солы юрттӥз?

¹⁴ Словениысь 73 аресъем Владо нимо тӧролы секыт вал, куке солэсь кенешсэ мукет кенешен огазеязы, нош Эксэйлык юртсэ ворсазы. Со вера: «Мон уг валаськы вал, малы сыӵе чебер Эксэйлык юртэз ворсано. Мынам сюлмы вӧсь луиз, малы ке шуоно ми али гинэ сое выльдӥмы вал. Мон ачим пу бордын ужасько бере, троссэ ас киыным лэсьтӥ вал. Куке кенешъёсты огазеяло, трос воштӥськонъёс лэсьтоно луэ. Милемлы, арлыдо ивортӥсьёслы, соос секытэн  сётӥсько ини». Мар юрттӥз Владо агайлы тӧроослэсь кылзӥськыны? Со шуэ: «Куке ми Иеговалэн организацияз лэсьтэм воштӥськонъёсын соглаш луиськомы, Иегова бакель каре. Озьы ми дасяськиськомы эшшо но бадӟымгес шуг-секытъёслы, кудъёсыз азьланяз луозы». Иеговалэн организацияз кыӵе ке воштӥськонъёс лэсьтӥсько ке но тӥледлы соосын соглаш кариськыны секыт ке, оске, Иегова шӧдонъёстэс вала шуыса. Тӥ сыӵе воштӥськонъёсын соглаш кариськиды ке, озьы ик Иеговалы но солэн организациезлы оскымон кылиды ке, Иегова тӥледыз одно ик бакель кароз (Пс. 17:26).

15. Мар кароно, сазь визьмын улон понна, куке кенешын шуг-секытъёсын пумиськиськомы?

¹⁵ Та дуннелэн пумыз матэктэмъя, кенешын шуг-секытъёс эшшо но тросгес луозы, дыр. Соос Иеговалы оскымон луэммес эскерыны быгатозы. Соин ик кулэ сазь визьмын улыны. Тӥ малпаськоды ке, вын-агай яке сузэр-апай тӥледын ассэ шонертэм возиз шуыса, йыркуръяськыса эн улэ. Тӥледыз тупато ке, асьтэлэн шӧдонъёсты сярысь гинэ малпаськем интые, тупатскыны тырше. Нош куке Иеговалэн организацияз кыӵе ке воштӥськонъёс ортчо, соосын соглаш кариське но соосты улонады пыртэ.

16. Мар юрттоз Иеговалы но солэн организациезлы оскымон луыны?

¹⁶ Куке Иеговалы оскымон луэмды эскериське, тӥ быгатӥськоды Иеговалы но солэн организациезлы оскымон кыльыны. Нош со понна сазь визьмын улоно, яке асьмеды киямы возёно, умой валано кылдэм югдурез но ваньмыз шоры Иеговалэн синмыныз учконо. Тырше тросгес тодыны но малпаськыны вашкала дыръя улэм адямиос сярысь, кудъёсыз тӥляд кадь ик шуг-секытъёсын пумиськизы. Иеговалэсь юрттэтсэ куре. Кенешысь вын-агайёслэсь но сузэр-апайёслэсь ноку эн палэнске. Соку, мар гинэ медам луы, Шайтан уз быгаты тӥледыз Иеговалэсь но солэн организациезлэсь люкыны (Иак. 4:7).