1, 2. Тӥ пылатӥськыны дась ӧвӧл на ке, малы ӝоже усёно ӧвӧл? (Учке вылбамысь суредэз.)

 ПОТЭ-А тӥляд пылатӥськемды? Та туж умой ужпум! Тӥ малпамъя, та вамышез тӥ лэсьтыны дась но тӧроос соглаш ке, соку ӝегатскытэк пылатӥське. Иеговалы ужан-тыршон улондэс шудо но тунсыко кароз.

² Нош мар кароно, куке тӥледлы веразы, мае ке тупатоно на шуыса? Оло нош, тӥ асьтэос но тае валаськоды. Озьы ке, мылкыдды медаз куашка. Кӧня гинэ арес тӥледлы медам луы, тӥ быгатӥськоды тупатскыны но та кулэ луись вамышез лэсьтыны.

3. Кыӵе юан сётӥз Эфиопияысь евнух Филипплы но кыӵе юан кылдэ та пумысен? (Апостолъёслэн ужъёссы 8:36, 38).

³ Лыдӟе Апостолъёслэсь ужъёссэс 8:36, 38. Эфиопияысь евнух Филипплэсь юаз: «Мар мыным люкетэ пылатӥськыны?» Эфиопияысь евнухлэн пылатӥськемез туж потэ вал ке но, дась вал-а со та вамышез лэсьтыны?

4. Кытысь адӟиське, Эфиопияысь евнухлэн тросгес тодэмез потэ вал шуыса?

⁴ Эфиопияысь евнух «Иерусалиме йыбырттыны вуылӥз» (Ап. уж. 8:27). Со иудейёслэн осконзыя улыны кутскиз но прозелит луиз, вылды. Еврей Гожтэмъёсысь со Иегова сярысь тодӥз, луоз. Но солэн тросгес тодэмез потэ вал. Тодӥськоды на-а, мар со каре вал, куке соин Филипп пумиськиз? Со Исаия пророклэсь гожъямзэ лыдӟе вал! (Ап. уж.  8:28). Та чурыт духовной сиён вал. Валтӥсь дышетонъёсты тодэм сяна, та евнухлэн тросгес тодэмез потэ вал.

5. Кызьы Эфиопияысь евнух тодэмзэ улоназ пыртӥз?

⁵ Та адями Эфиопияысь эксэй кышнолэн юртаз кузёйыр вал. Со «солэсь вань узырлыксэ возьмаса» улӥз (Ап. уж. 8:27). Евнухлэн ужъёсыз трос вал, дыр. Озьы ке но со дырзэ висъяз, Иеговалы йыбыртъян понна. Та евнухлэн зэмлыкез тодэмез гинэ уг поты вал — со тодэмзэ улоназ пыртӥз. Соин ик Иерусалимысь храмын Иеговалы йыбыртъян понна, Эфиопияысь со трос иськемъёс ортчиз. Та сюреслы солэн трос дырыз но коньдонэз кошкиз, луоз. Но солэн Иеговалы йыбыртъямез потэ вал. Та понна солы номыриз жаль ӧз поты.

6, 7. Малы луыса Эфиопияысь евнухлэн Иеговалы яратонэз будӥз но мар карыны та солэсь мылкыдзэ ӝутӥз?

⁶ Филипп Эфиопияысь евнухлы вераз валтӥсь зэмлыкъёсты, озьы ик вераз, Иисус Мессия луэ шуыса (Ап. уж. 8:34, 35). Та евнух шумпотӥз тодыны, мар со понна лэсьтӥз Иисус. Мар со кариз тае тодэмез бере? Со быгатэ вал азьло сямен ик гажамон иудей прозелит луыны. Но Филиппен вераськемез бере Иеговаез но Иисусэз яратонэз юнгес луиз. Та яратон солэсь мылкыдзэ ӝутӥз пылатӥськыны но Иисус Христослэн дышетскисез луыны. Филипп валаз, та евнух пылатӥськыны дась шуыса. Соин ик со сое пылатӥз.

⁷ Тӥ Эфиопияысь евнух сямен лэсьтӥды ке, соку пылатӥськыны дась луоды. Тӥ но юн мылкыдын вераны быгатоды: «Мар мыным люкетэ пылатӥськыны?» Та евнух тодон-валан басьтӥз, басьтэм тодон-валанзэ улоназ пыртӥз, озьы ик азьланяз но тыршиз Иеговаез золгес яратыны. Ойдолэ эскеромы, кызьы тӥ но таӵе ик вамышъёс лэсьтыны быгатоды.

8. Мар карыны мылкыддэс ӝуто кылъёс, кудъёсыз гожтэмын Иоаннлэсь 17:3?

⁸ Лыдӟе Иоаннлэсь 17:3. Иисуслэсь та кылъёссэ кылыса, ми пӧлысь тросэзлэн Библиез дышетэмзы потӥз, дыр. Но учке, та ик кылбур возьматэ, милемлы азьланяз но тодон-валан басьтоно шуыса. Ми ялан тодыны тыршомы «одӥг гинэ зэм Инмарез» (Екк. 3:11). Ми пырак дауръёс ӵоже со сярысь тодон-валан басьтомы. Макем тросгес ми тодон-валан басьтомы, сокем матэгес луомы Иеговалы (Пс. 72:28).

9. Мар милемлы кароно Библиысь валтӥсь зэмлыкъёсты тодэммы бере?

⁹ Валамон, Иеговаен тодматскон понна, Библиысь валтӥсь зэмлыкъёсты тодыны  кулэ. Апостол Павел Еврейёслы гожтэтаз соосты «Христослэн дышетонэзлэн кутсконэз» шуыса нимаз ке но, со соосты кулэен лыдъяз. Та дышетонъёсты со ӵошатӥз йӧлэн, кудӥныз пиналэз сюдо (Евр. 5:12; 6:1). Озьы ик со христианъёслэсь мылкыдзэс ӝутӥз Инмарлэн Кылысьтыз мур зэмлыкъёсты тодыны. Потэ-а тӥляд та зэмлыкъёсты тодэмды? Потэ-а тӥляд азьланяз но Иегова но солэн эрикез сярысь тодон-валан басьтэмды?

10. Малы куд-огъёсызлы дышетскыны капчи ӧвӧл?

¹⁰ Тросэзлы дышетскыны секыт потэ. Нош тӥледлы? Школаын дышетсконды дыръя дышиды-а тӥ умой лыдӟиськыны но эскеронъёс ортчытъяны? Кельше вал-а тӥледлы дышетскыны но асьтэлы пайдаё малпанъёс шедьтыны? Яке тӥ валады, тӥледлы книгаос лыдӟыны уг кельшы шуыса? Озьы ке, тӥ огнады ӧвӧл. Иегова тӥледлы юрттыны быгатэ. Со тырбыдэс, озьы ик со самой умой Дышетӥсь.

11. Малы вераны луоз, Иегова — умой Дышетӥсь шуыса?

¹¹ Иегова ассэ Дышетӥсен нима (Ис. 30:20, 21). Со чидась, ӟеч сямо но валась Дышетӥсь. Дышетскисьёсызлэсь со умойзэ адӟыны тырше (Пс. 129:3). Со милесьтым ноку уг возьма сое, мае ми лэсьтыны ум быгатӥське. Тодады возе: Инмар йырвизьмес кылдытӥз. Та туж паймымон кузьым (Пс. 138:14). Милям пичи дырысенымы ик дышетскыны мылкыдмы вань. Кылдытӥсьмылэн потэ, ми пырак дауръёс ӵоже выльзэ мед тодомы но талы мед шумпотомы шуыса. Соин ик умой луоз али ик ини мылкыдэз будэтыны Библиысь зэмлыкъёсты валаны (1 Пётр 2:2). Ас азяды быдэстымон ужпумъёс пуктэ. Ялан Библиез лыдӟе но эскере (Иис. Н. 1:8). Иеговалэн юрттэменыз тӥледлы эшшо но кельшоз лыдӟиськыны но со сярысь тодыны.

12. Малы Иисуслэн улонэз но ужан-тыршонэз сярысь тодыны кулэ?

¹² Ялан дыр висъялэ Иисуслэн улонэз но ужан-тыршонэз сярысь малпаськыны. Иеговалы йыбыртъян понна, уката ик та секыт дыръёсы, милемлы солэн Пиезлэсь адӟем карыны тыршоно (1 Пётр 2:21). Иисус вераз шуг-секытъёс сярысь, кудъёсыныз солэн дышетскисьёсыз пумиськозы (Лука 14:27, 28). Озьы ке но со оскиз, солэн зэмос дышетскисьёсыз, ачиз сямен ик, ваньзэ чиданы быгатозы шуыса (Иоанн 16:33). Пыр-поч эскере Иисуслэсь улонзэ но ужпум пуктэ котькуд нунал солэсь адӟем карыны.

13. Мар сярысь куроно Иеговаез но малы?

¹³ Но тодон-валан басьтыны гинэ тырмыт ӧвӧл — милемлы Иеговаен матэгес тодматсконо но сямъёсмес будэтоно, кылсярысь, Инмарез яратоно но солы осконо (1 Кор. 8:1—3). Соин ик куре Инмарез, со тӥледлы оскондэс юнматыны мед юрттоз шуыса (Лука 17:5). Таӵе вӧсяськонъёслы со шумпотыса ответ сётэ. Зэмос оскон, кудӥз Инмар сярысь шонер тодон-валан вылэ пыкиське, юрттоз тӥледлы улонады кутыны сое, мае тӥ тодӥськоды (Иак. 2:26).

14. Кызьы апостол Пётр пусйиз, басьтэм тодон-валанмес улонамы кутоно шуыса? (Озьы ик учке суредэз.)

¹⁴ Апостол Пётр пусйиз, Христослэн дышетскисьёсызлы басьтэм тодон-валанзэс улоназы кутоно шуыса. Та малпанэз юнматон понна, со Нойлэсь учырзэ вераз. Иегова Нойлы шуиз, лек адямиосты ву тудӟонын быдтоз шуыса. Утиськон понна Нойлы но семьяезлы ӝоген ву тудӟон вуоз шуыса тодыны гинэ тырмыт ӧй вал. Висъялэ саклыктэс:  со дырез Пётр нимаз «ковчег пыж лэсьтон вакыт» шуыса (1 Пётр 3:20). Зэм, Ной но солэн семьяез Инмарлэсь кылзӥськизы — соос ковчег пуктӥзы (Евр. 11:7). Собере Пётр ӵошатӥз сое, мае лэсьтӥз Ной, «пылатӥськонэн, кудӥз... табере тӥледыз уте» (1 Пётр 3:21, ВД). Озьыен, пылатӥськонлы дасяськондэс ӵошатыны луэ соин, кызьы Ной но семьяез ковчегез пуктӥзы. Мар тӥледлы кароно, пылатӥськонлы дасяськон понна?

15. Кызьы ми возьматыны быгатӥськомы, вань сюлмысьтымы ӧпкелиськомы шуыса?

¹⁵ Пылатӥськыны мылкыдмы вань ке, туж кулэ сьӧлыкъёсмы понна вань сюлмысьтымы ӧпкельыны (Ап. уж. 2:37, 38). Куке ми вань сюлмысьтымы ӧпкелиськомы, ми воштӥськонъёс лэсьтӥськомы. Кельтӥды-а тӥ ужъёсты, кудъёсыз Иеговалы уг кельшо? Кылсярысь, азон-калгонэз, тамак кысконэз яке лек но ултӥясь кылъёсын вераськонэз (1 Кор. 6:9, 10; 2 Кор. 7:1; Еф. 4:29). Тӥ тае ӧд лэсьтэ на ке, азьланяз но та вылын ужалэ. Юрттэт но визь-кенеш куре солэсь, кин тӥледын Библиез дышетэ, яке кенешысь тӧролэсь. Нош тӥ егитэсь но анай-атаеныды улӥськоды ке, соослэсь юрттэт куре. Соос юрттозы тӥледлы урод сямъёстылэсь куштӥськыны, кудъёсыз люкето тӥледлы пылатӥськыны.

16. Мар милемлы кароно, Иеговалы ялан йыбыртъян понна?

¹⁶ Озьы ик милемлы ялан лэсьтоно со ужъёсты, кудъёсыз герӟаськемын Инмарлы йыбырттонэн. Со ужъёс пӧлы пыре христиан пумиськонъёсы ветлон но отчы пыриськон (Евр. 10:24, 25). Тӥ кенешен ӵош тодытӥськоды ни ке, та уже ялан пыриське. Макем тросгес тӥ тодытоды, сокем золгес со тӥледлы кельшыны кутскоз (2 Тим. 4:5). Тӥ егитэсь но анай-атаеныды улӥськоды ке, юалэ асьтэлэсь: «Кулэ-а анай-атаелы ялан мыным тодам вайытыны, кенеше яке ужан-тыршонэ мыноно шуыса? Яке мон ачим та сярысь тодам возисько?» Кенеше ветлыса но тодытыса, тӥ возьматӥськоды Иеговалы оскемдэс, сое яратэмдэс но солы тау каремдэс. Та ужъёс Иеговалы сётэм кузьымъёс кадь луо, кудъёсыз солы оскымон луэмдэс возьмато (2 Пётр 3:11; Евр. 13:15). Та ужъёсты  мылысь-кыдысь лэсьтӥськоды ке, соос Инмармес шумпотто. (Ӵошатэ 2 Коринфъёслы 9:7.) Милемлы кельше Иеговалы самой умойзэ сётыны. Соин ик ми ваньзэ тае лэсьтӥськомы.

17, 18. Кыӵе кулэ луись сям юрттоз тӥледлы пылатӥськонлы дасяськыны но малы? (Мадёнъёс 3:3—6).

¹⁷ Пылатӥськонлы дасяськыкуды, шуг-секытъёс но кылдозы. Кыӵе? Кылсярысь, выль осконды сэрен тӥледыз серекъялозы яке тӥледлы пумит мынозы (2 Тим. 3:12). Оло нош, тӥ нюръяськиськоды кыӵе ке урод сямыныды но дырын-дырын со выльысь кытысь ке потэ. Оло нош, тӥляд чиданды быре яке тӥ ӝоже усиськоды, малы ке шуоно ужпумды быдэстонтэм потэ. Мар юрттоз тӥледлы ваньзэ тае чиданы? Иеговаез яратон — туж кулэ луись сям.

¹⁸ Иеговаез яратонды — со тужгес но умой сямды. (Лыдӟе Мадёнъёсты 3:3—6.) Инмарез юн яратон юрттоз тӥледлы шуг-секытъёстэс вормыны. Иегова ачиз возьматӥз, кызьы яратоно. Библиын ӵем верамын, Иегова ужась-тыршисьёсызлы оскымон яратонзэ возьматэ шуыса. Та сям возьматэ, со ужась-тыршисьёссэ ноку уз кельты но яратэмысь ноку уз дугды шуыса (Пс. 99:5). Нош тӥ Инмарлы укшатыса кылдытэмын (Ул.-выл. 1:26). Кызьы тӥ возьматыны быгатӥськоды сыӵе яратонэз?

19. Кызьы тӥ быгатӥськоды Иеговалы тау карондэс будэтыны ваньмыз понна, мае со тӥледлы лэсьтэ? (Галатъёслы 2:20).

¹⁹ Нырысь ик, тау карондэс будэтэ (1 Фес. 5:18). Котькуд нунал асьтэлэсь юалэ: «Кызьы Иегова туннэ возьматӥз, монэ яратэ шуыса?» Собере эн вунэтэ Иеговаез тау карыны но вераны ужъёс сярысь, кудъёссэ со тӥледлы лэсьтӥз. Апостол Павел сямен ик, адӟыны тырше, кызьы Иегова тӥледлы яратонзэ возьматэ. (Лыдӟе Галатъёслы 2:20.) Юалэ асьтэлэсь: «Потэ-а мынам но солы яратонме возьматэме?» Иеговаез яратон юрттоз тӥледлы азьланяз но визь сынаськонъёсын нюръяськыны но шуг-секытъёсты вормыны. Со мылкыддэс ӝутоз азьланяз но Иеговалы йыбыртъяны. Озьы тӥ нуналысь нуналэ возьматоды, инмысь Атайдэс яратӥськоды шуыса.

20. Мар кароно, улондэ Иеговалы сӥзён понна, но макем кулэ луэ та ужпум?

²⁰ Дыр ортчыса, Иеговаез яратонды мылкыддэс  ӝутоз нимысьтыз вӧсяськонын солы асьтэлэсь улондэс сӥзьыны. Тодады возе: Иеговалы улондэс сӥзиды ке, тӥ быгатоды пырак дауръёс ӵоже солэн ужась-тыршисез луыны. Куке тӥ Иеговалы улондэс сӥзиськоды, тӥ кылдэс сётӥськоды солы ужаны-тыршыны умой дыръёсы но, секыт дыръёсы но. Тӥледлы выльысь сӥзиськоно уз луы ни. Улонмес Иеговалы сӥзьыса, ми туж кулэ луись ужпум кутӥськомы. Но малпаське тани мар сярысь: улонын тӥледлы трос ужпумъёс кутоно луоз на. Куд-огъёсыз соос пӧлысь умоесь луозы, но одӥгез но уз ӵошатӥськы Иеговалы сӥзиськыны ужпумен (Пс. 49:14). Шайтан туж тыршоз, тӥ Иеговаез яратэмысь мед дугдоды но солы оскымон медад кыле шуыса. Эн сётске Шайтанлы! (Иов 27:5). Иеговаез ӟырдыт яратон юрттоз тӥледлы сётэм кылдэс быдэстыны но инмысь Атаеныды кусыпъёстэс юнматыны.

21. Малы вараны луоз, пылатӥськон — со пумыз ӧвӧл, нош кутсконэз гинэ шуыса?

²¹ Иеговалы улондэс сӥземды бере вераське кенешысьтыды тӧроосын мукет вамыш сярысь — пылатӥськон сярысь. Но тодады возе: пылатӥськон — со пумыз ӧвӧл, нош кутсконэз гинэ. Та бордысен кутске Иеговалы пырак дауръёс ӵоже ужан-тыршон. Соин ик инмысь Атайдылы яратондэс будэтэ. Пуктэ ужпумъёс, кудъёсыз юрттозы тӥледлы нуналысь нуналэ сое эшшо но золгес яратыны. Та тӥлесьтыд мылкыддэс ӝутоз пылатӥськыны. Пылатӥськон нуналды туж умой нунал луоз. Но та кутсконэз гинэ. Иеговаез но солэсь Пизэ яратонды пырак дауръёс ӵоже эшшо но юнгес мед луоз!