Малы Ноеминьлэн ӵыжы-выжез, кудӥзлэн нимыз Библиын гожтэмын ӧвӧл, Воозлы вераз, Руфез кышно басьтӥз ке, люкет музъемез куашкалоз шуыса? (Руфь 4:1, 6).

Вашкала дыръя кышнояськем пиосмурт кулэ вал ке но солэн нылпиосыз ӧй вал ке, кулэ луись юанъёс кылдо вал. Кылсярысь, мар луоз солэн музъеменыз? Солэн нимыз быроз-а? Та юанъёслы валэктонъёс Моисейлэн законысьтыз шедьтыны луэ вал.

Мар луэ вал нылпитэк кулэм адямилэн музъеменыз? Сое сёто вал вын-агаезлы яке мукет матысь ӵыжы-выжыезлы. Нош куанер улэменыз сэрен адями аслэсьтыз музъемзэ вуза вал ке, матысь ӵыжы-выжыез сое берен басьтыны быгатэ вал. Талы луыса семья музъемтэк уг кыльы вал (Лев. 25:23—28; Лыд. 27:8—11).

Мар каро вал Израильын, кулэм пиосмуртлэн нимыз медаз быры шуыса? Со понна радъямын вал левиратной кузпалъяськон: Израильысь кулэм пиосмуртлэн вын-агаез солэсь кышнозэ аслыз каре вал но вордӥськем нылпизылы кулэм вын-агайзылэн нимыз но музъемез выже вал. Та закон палкышноосты но утьылӥз (К. Зак. 25:5—7; Матф. 22:23—28).

Эскеромы Ноеминьлэсь учырзэ. Со быземын вал Елимелех пиосмуртлы. Куке Елимелех но кык пиоссы кулӥзы, Ноеминь сюдӥсьтэк-вордӥсьтэк кылиз (Руфь 1:1—5). Иудеяе берытскыса, Ноеминь Руфь кенэзлы шуиз Воозэз курыны музъемзэс басьтыны. Вооз Елимелехлэн матысь ӵыжы-выжыез вал (Руфь 2:1, 19, 20; 3:1—4). Но Вооз тодӥз: Израильын вал на эшшо но матысез ӵыжы-выжызы. Библия солэсь нимзэ уг вера. Таин сэрен нырысь ик со пиосмуртлы вазиськоно вал (Руфь 3:9, 12, 13).

Нырысь со ӵыжы-выжызы соглаш кариськиз (Руфь 4:1—4). Солы кӧня ке коньдонзэ быдтоно луысал ке но, со вала вал, Ноеминьлэн нылпиез уз вордӥськы ни но со нылпилы Елимелехлэн музъемез уз выжы ни шуыса. Басьтэм музъем та ӵыжы-выжызылы сюрысал. Озьыен, со коньдонзэ юнме ӧз быдтысал.

Но куке та пиосмурт тодӥз, солы Руфез но кышно басьтоно луоз шуыса, со мукет сямен малпаськыны кутскиз. Со вераз: «Аслэсьтым люкет музъемме куашкатонтэм понна сое кышно басьтыны уг быгатӥськы» (Руфь 4:5, 6). Малы та ӵыжы-выжызы малпанзэ воштӥз?

Та пиосмурт яке мукетыз Руфез кышно басьтысал ке но Руфь пи вайысал ке, Елимелехлэн музъемез та нылпилы выжысал. Малы та учырын ӵыжы-выжызылэн люкет музъемез куашкасал? Библиын та сярысь уг вераськы ке но, солы куд-ог мугъёс луыны быгато вал.

• Нырысетӥез, малпан кылдыны быгатэ вал, бусыез басьтыса, ӵыжы-выжызы коньдонзэ юнме гинэ быдтэ шуыса. Малы ке шуоно та музъем солы ӧз сюрысал, нош Руфьлэн пиезлы выжысал.

• Кыкетӥез, ӵыжы-выжызылы Ноеминез но, Руфез но сюдоно-вордоно луысал.

• Куинетӥез, Руфь нылпи вайысал ке, ӵыжы-выжызылы аслэсьтыз музъемзэ люконо луысал Руфьлэн нылпиосызлы но, аслаз нылпиосызлы но, кудъёсыз солэн азьвыл вордӥськизы вал ини.

• Ньылетӥез, ӵыжы-выжызылэн аслаз нылпиосыз ӧй вал ке, соку Руфьлэн пиезлы Елимелехлэн но музъемез, аслаз но музъемез выжысал. Кулэмез бере музъем выжысал нылпилы, кудӥз Елимелехлэсь нимзэ нуллысал, нош солэсь — ӧз. Та пиосмуртлэн, кудӥзлэн нимыз Библиын гожтэмын ӧвӧл, аслэсьтыз люкет музъемзэ ыштэмез но Ноеминьлы юрттэмез уг поты вал. Соин ик со Воозлы ӵектӥз Елимелехлэсь музъемзэ басьтыны, малы ке шуоно ачиз бере Вооз матысез ӵыжы-выжызы луэ вал. Мар кариз Вооз? Со соглаш кариськиз, Руфьлэн «кулэм картэзлэсь нимзэ солэн люкет музъемаз кельтон понна» (Руфь 4:10).

Адӟиське, пиосмуртлэн, кудӥзлэсь нимзэ ми ум тодӥське, аслэсьтыз нимзэ но люкет музъемзэ утемез потэ вал шуыса. Нырысь ик со ачиз сярысь малпаськиз. Но, тыршемез шоры учкытэк, солэн нимыз ышиз-быриз. Со сяна, со Мессиялэн, Иисус Христослэн, выжыяз ӧз пыры. Та луонлык Воозлы сюриз. Израильысь ассэ гинэ яратӥсь пиосмуртлэн учырез возьматэ, мар луэ адямиен, кудӥзлэн куанеръёслы юрттӥськемез уг поты (Матф. 1:5; Лука 3:23, 32).