1. Мар паймытэ троссэ адямиосты, куке соос нырысетӥзэ пумиськонъёсамы лыкто? (Озьы ик учке суредэз.)

 ПУКТЭ син азяды, кызьы кузпалъёс нырысетӥзэ лыктӥзы Иеговалэн Адӟись-Ивортӥсьёсызлэн Эксэйлык юртазы. Соос туж паймизы, кенеш соосты шумпотыса но яратыса пумитаз шуыса. Бертыкузы кышноез картэзлы вераз: «Адӟись-Ивортӥсьёс мукет адямиос кадь ӧвӧл. Мыным соос дорын кельшиз».

2. Малы куд-огъёсыз Иеговалы ужамысь-тыршемысь дугдӥзы?

² Христиан кенешын яратон паймымон. Но Иеговалэн Адӟись-Ивортӥсьёсыз тырбыдэстэмесь (1 Иоанн 1:8). Соин ик, вын-агайёсынымы но сузэр-апайёсынымы матэгес тодматскыса, ми соослэсь янгышъёссэс адӟомы, вылды (Рим. 3:23). Жаляса верано луэ, куд-огъёсыз мукетъёсызлэн тырмымтэоссылы мултэс трос саклыксэс висъязы но Иеговалы ужамысь-тыршемысь дугдӥзы.

3. Кызьы тодманы луэ Христослэсь зэмос дышетскисьёссэ? (Иоанн 13:34, 35).

³ Ойдолэ нош ик учкомы та статьялэсь валтӥсь кылбурзэ. (Лыдӟе Иоаннлэсь 13:34, 35.) Кызьы тодманы луэ Христослэсь зэмос дышетскисьёссэ? Ог-огзэс яратэмзыя, тырбыдэс луэмзыя ӧвӧл. Иисус ӧз вера: «Тӥ Мынам дышетскисьёсы шуыса, тӥ тодмалоды». Со шуиз: «Тӥ Мынам дышетскисьёсы шуыса, тӥледыз ваньмыз тодмалозы». Тазьы Иисус возьматӥз: дышетскисьёсыз гинэ ӧвӧл, христиан кенеше пырисьтэм адямиос но зэмос дышетскисьёссэ тодмалозы ог-огзэс вань сюлмысьтызы яратэмзыя.

4. Мае куд-огъёсызлэн тодэмзы потэ зэмос христианъёс сярысь?

 ⁴ Иеговалэн ужась-тыршисьёсыз луисьтэм адямиослэн кылдыны быгато таӵе юанъёссы: «Кызьы яратон Христослэсь зэмос дышетскисьёссэ тодманы юрттэ? Кызьы Иисус апостолъёсызлы яратонзэ возьматылӥз? Кызьы ми туннэ Иисуслэсь адӟем карыны быгатӥськомы?» Адӟись-Ивортӥсьёслы но умой луоз та юанъёс вылын малпаськыны. Та милемлы юрттоз эшшо но умойгес возьматыны яратонмес, уката но вын-агайёсмылэн но сузэр-апайёсмылэн тырмымтэосынызы пумиськиськомы ке (Еф. 5:2).

5. Валэктэ Иисуслэсь кылъёссэ, кудъёсыз гожтэмын Иоаннлэсь 15:12, 13.

⁵ Иисус валамон возьматӥз, дышетскисьёссэ нимысьтыз яратонъя тодманы луоз шуыса. (Лыдӟе Иоаннлэсь 15:12, 13.) Учке, мар вераз Иисус аслаз дышетскисьёсызлы: «Яратэлэ огдэс огды, кызьы Мон тӥледыз яратӥ». Мар сярысь вераз Иисус? Со дышетскисьёссэ косӥз, асьсэды жалятэк, ог-огзэс яратыны. Таӵе яратон христиан муртлэсь мылкыдзэ ӝутэ, кулэ луиз ке, агаез понна кулыны но дась луыны b.

6. Кызьы Инмарлэн Кылыз возьматэ, яратон туж кулэ шуыса?

⁶ Инмарлэн Кылыз яратонлы бадӟым саклык висъя. Тросэз адямиос туж умой тодо Библиысь таӵе кылбуръёсты: «Инмар — со яратон» (1 Иоанн 4:8); «Матысьтэ астэ ачид кадь ик яраты» (Матф. 22:39); «Яратон трос сьӧлыкъёсты шобыртэ» (1 Пётр 4:8); «Яратон ноку но уз быры» (1 Кор. 13:8). Та но Библиысь мукет кылбуръёс туж умой  возьмато, яратонэз будэтыны но уж вылын возьматыны туж кулэ шуыса.

7. Малы Шайтан уг быгаты адямиосты дышетыны ог-огзэс яратыны но огкылысь улыны?

⁷ Тросэзлэн тодэмзы потэ, кызьы зэмос религиез шедьтоно. Соос малпало, дыр: «Вань религиос верало, соос зэмлыклы дышето шуыса. Но соос пӧлысь котькудӥз Инмар сярысь пӧртэм сямен дышетэ». Шайтан быгатӥз адямиослэсь визьзэс туганы, трос зэмос луисьтэм религиосты кылдытыса. Но со уг быгаты быдэс дунне вылысь адямиосты огазеяны но соосты дышетыны ог-огзэс яратыса улыны. Тае Иегова гинэ лэсьтыны быгатэ, малы ке шуоно зэмос яратон со бордысь потэ. Соос гинэ, кинъёслы Иегова аслэсьтыз духсэ сётэ но кинъёсты бакель каре, быгато ог-огзэс вань сюлмысьтызы яратыны (1 Иоанн 4:7). Тӥни малы Иисус вераз, зэмос дышетскисьёссэ ог-огзэс вань сюлмысьтызы яратэмзыя тодманы луоз шуыса.

8, 9. Мае валало тросэз адямиос, куке адӟо, Иеговалэн Адӟись-Ивортӥсьёсыз ог-огзэс вань сюлмысьтызы ярато шуыса?

⁸ Кызьы азьло ик вераз Иисус, тросэз адямиос солэсь дышетскисьёссэ тодмало ог-огзэс вань сюлмысьтызы яратэмзыя. Кылсярысь, тани кызьы тодаз вае И́ен нимо агай нырысетӥ конгрессэ, кудӥз ортчытӥськиз корка вӧзысьтыз стадионын. Конгресслэсь азьвыл отын матч ортчиз. Агай вера: «Конгрессэ но матче лыктэм адямиос туж пӧртэмесь вал! Адӟись-Ивортӥсьёс асьсэды лякыт возизы. Соос чылкыт дӥсяськемын вал. Нылпиоссы но асьсэды умой возизы». Агаймы азьланьтэ: «Но валтӥсез: адӟиськиз, соос шумпотыса уло шуыса. Мынам но озьы улэме потэ вал. Мон уг тодӥськы ини, мар веразы со конгрессын. Но Адӟись-Ивортӥсьёслэн асьсэды воземзы мынам сюлмам ик пыриз» c. Ми асьмеды озьы возиськомы, малы ке шуоно ог-огмес вань сюлмысьтымы яратӥськомы. Вын-агайёсмес но сузэр-апайёсмес яратон мылкыдмес ӝутэ ог-огмылы ӟеч ужъёс лэсьтыны но ог-огмес гажаны.

⁹ Джон нимо агайлэн, кудӥз христиан пумиськонъёсы ветлыны кутскиз, сыӵе ик шӧдонъёсыз вал. Со вера: «Та адямиослэн лякыт луэмзы монэ туж паймытӥз. Мыным потӥз, соос сьӧлыктэмесь шуыса. Ог-огзэс вань сюлмысьтызы яратэмзыя мон валай, зэмос религиез шедьтӥ шуыса» d. Таӵе учыръёс возьмато, Иеговалэн Адӟись-Ивортӥсьёсыз — зэмос христианъёс шуыса.

10. Кыӵе учыръёсы ми христиан яратонмес возьматыны быгатӥськомы? (Озьы ик учке сноскаез.)

¹⁰ Кызьы вераськиз ини статьялэн кутсконаз, вын-агайёсмы но сузэр-апайёсмы пӧлын сьӧлыктэм адямиос ӧвӧл. Куддыръя соослэн кылъёссы но ужъёссы милемыз вӧсь карыны быгато (Иак. 3:2) e. Сыӵе учыръёсы ми быгатӥськомы кылъёсынымы но ужъёсынымы соослы зэмос яратонмес возьматыны. Малы дышетскыны луэ та пумысен Иисуслэсь? (Иоанн 13:15).

11. Кыӵе умойтэм сямъёссэс возьматӥзы Иаков но Иоанн? (Озьы ик учке суредэз.)

¹¹ Иисус ӧз возьма, дышетскисьёсыз сьӧлыкатэк улозы шуыса. Со яратыса юрттӥз  соослы тырмымтэоссэс тупатыны, соос Иеговалы ярамон мед луозы шуыса. Огпол Иаков но Иоанн апостолъёс Иисус доры анайзэс ыстӥзы, со соослы Эксэйлыкын дано интыос мед куроз шуыса (Матф. 20:20, 21). Иаковлэн но Иоаннлэн куронзы возьматӥз, соос вылтӥяськисесь вал шуыса (Мад. 16:18).

12. Малы вераны луоз, урод сямъёссэс Иаков но Иоанн гинэ ӧз возьматэ шуыса? Валэктэ.

¹² Та учырын урод сямъёссэс Иаков но Иоанн гинэ ӧз возьматэ. Учке, кызьы асьсэды возизы мукет апостолъёс: «Тае кылыса, мукетъёсыз дас дышетскисьёсыз кык братъёслы вожзэс поттӥзы» (Матф. 20:24). Пуктэ син азяды, кыӵе чурыт кылъёс соос веразы Иаковлы но Иоаннлы. Мукет апостолъёс соослы веразы, вылды: «Малы тӥ асьтэлы Эксэйлыкын дано интыос куриськоды? Тӥ асьтэды кин кожаськоды? Тӥ гинэ Иисусэн ӵош ужады-тыршиды, шат? Ми но вылӥ инты басьтыны быгатӥськомы!» Мае гинэ соос медам вералэ, та учыр сэрен апостолъёслэн ог-огзэс яратонзы лябӟиз.

13. Кызьы возиз ассэ Иисус, апостолъёсызлэн тырмымтэоссы вал ке но? (Матфей 20:25—28).

¹³ Нош кызьы та учырын ассэ возиз Иисус? Со вожзэ ӧз потты. Иисус ӧз вера, аслыз умойгес апостолъёс шедьтоз шуыса, кудъёсыз зӥбыт-востэм сямзэс возьматозы но ог-огзэс котьку но яратозы. Со интые, Иисус та пиосмуртъёсын чидаса вераськиз,  малы ке шуоно тодӥз, соослэн асьсэды шонер воземзы потэ шуыса. (Лыдӟе Матфейлэсь 20:25—28.) Вал мукет но учыръёс, куке апостолъёс ченгешизы со пумысен, кин соос пӧлын валтӥсез луэ. Озьы ке но Иисус соослы яратэмзэ возьматэмысь ӧз дугды (Марк 9:34; Лука 22:24).

14. Кыӵе адямиос пӧлын будӥзы Иисуслэн апостолъёсыз?

¹⁴ Иисус лыдэ басьтӥз, кыӵе адямиос пӧлын будӥзы апостолъёс (Иоанн 2:24, 25). Иудей калык пӧлын книга тодӥсьёс но фарисейёс туж тыршизы вылӥ инты басьтыны но дано луыны (Матф. 23:6; ӵошатэ 2010-тӥ арын 1-тӥ оштолэзь понна поттэм «Возьмаськон башняысь» «Иисус и его ученики проповедовали в синагогах» статьяез). Озьы ик та религиозной кивалтӥсьёс асьсэды шонер улӥсь адямиосын лыдъязы (Лука 18:9—12) f. Иисус валаз, таин сэрен апостолъёс но асьсэос шоры но мукет адямиос шоры озьы ик учкыны быгато вал шуыса (Мад. 19:11). Иисус дышетскисьёсызлэсь укыр троссэ ӧз возьма. Куке соос янгышазы, Иисус соослы ӧз йыркуръяськы. Со тодӥз, апостолъёсызлэн ӟеч сюлэмзы шуыса. Соин ик чидаса юрттӥз соослы вылтӥяськон сямынызы нюръяськыны но яратонзэс возьматыны.

15. Малы милемыз дышетыны быгатэ Иаковен но Иоаннэн луэм учыр?

¹⁵ Иаковен но Иоаннэн луэм учыр милемыз тросэзлы дышетыны быгатэ. Валамон, соос шонертэм лэсьтӥзы, куке Эксэйлыкын асьсэлы дано интыос куризы. Но мукет апостолъёс но шонертэм лэсьтӥзы, куке та учыр сэрен огкылысь улонзы сӧриськиз. Озьы ке но Иисус вань апостолъёсыныз ассэ лякытэн возиз но соослы яратонзэ возьматӥз. Малы та милемыз дышетэ? Кызьы гинэ вын-агайёс но сузэр-апайёс асьсэды медам возе, саклыкмес висъяно солы, кызьы ми асьмеды возиськомы, соослэн тырмымтэосынызы пумиськыса. Мар юрттоз милемлы асьмеды шонер возьыны? Куке кин ке но сэрен милям мылкыдмы куашка, малпаськыны кулэ: «Малы мынам сокем зол мылкыды куашказ? Уг возьматы-а со, мынам умойтэм сямы вань шуыса, кудзэ мыным тупатыны кулэ? Оло нош, адямилэн, кудӥз монэ вӧсь кариз, али кыӵе ке шуг-секытъёсыз вань? Мынам кинлы ке йыркуръяськыны муге вань ке но, быгатӥсько-а мон со адямилы яратонме возьматыны но сое простить карыны?» Мукетъёсызлы яратонмес возьматӥмы ке, тодманы луоз, ми Иисуслэн зэмос дышетскисьёсыз шуыса.

16. Малы дышетэ милемыз Иисуслэн примерез?

¹⁶ Иисуслэн примерез милемыз дышетэ огъя оскисьёсмес валаны (Мад. 20:5). Иисус быгатэ вал адямилэсь сюлэмзэ адӟыны. Нош ми ум быгатӥське. Но милям луэ вын-агайёсмылы но сузэр-апайёсмылы чиданмес возьматэммы, куке соос милемыз вӧсь каро (1 Пётр 3:8; Еф. 4:1, 2). Тае лэсьтыны капчигес луоз, ми соосты умойгес тодыны тыршимы ке. Ойдолэ учкомы одӥг учырез.

17. Кыӵе пайда вайиз ёросэз чакласьлы, куке со одӥг агаен умойгес тодматскыны тыршиз?

¹⁷ Шундыӝужанпал Африкаысь ёросэз чаклась одӥг агай сярысь вераз. Нырысь  со малпаз, со агай туж урод сямо шуыса. Мар кариз ёросэз чаклась? Со вера: «Та агайлэсь палэнскем интые, мон тырши соин умойгес тодматскыны». Та юрттӥз ёросэз чакласьлы валаны, кызьы будӥз со агай но кызьы со сямъёсыз вылын шӧдӥськиз. Ёросэз чаклась азьланьтэ: «Куке мон валай, макем тырше со агай умойтэм сямъёсыныз нюръяськыны, мон адӟи, макем трос со лэсьтыны быгатӥз ини. Та монэ туж паймытӥз. Ми умой эшъёс луимы». Зэм но, куке ми тыршиськомы вын-агайёсмес но сузэр-апайёсмес валаны, милемлы капчигес соослы яратонмес возьматыны.

18. Кыӵе юанъёс вылын малпаськоно, куке милемыз вӧсь каризы? (Мадёнъёс 26:20).

¹⁸ Куддыръя милям потэ милемыз вӧсь карись вын-агаен вераськеммы. Но нырысь умой луысал малпаськыны: «Умой-а мон валасько кылдэм югдурез? (Мад. 18:14). Оло нош, агайлэн монэ вӧсь каремез уг но поты вал? (Екк. 7:20). Мон ачим сыӵе ик янгыш ӧй лэсьтылы-а? (Екк. 7:21, 22). Та адямиен вераськыса, мон югдурез эшшо но секытгес уг кары-а?» (Лыдӟе Мадёнъёсты 26:20.) Та юанъёс вылын малпаськыса, вын-агаймес яратон мылкыдмес ӝутыны быгатэ кылдэм югдурлы мултэс трос саклыкмес висъятэк улыны.

19. Мар карыны тӥляд мылкыдды вань?

¹⁹ Иеговалэн Адӟись-Ивортӥсьёсыз ог-огзэс ярато. Та возьматэ, соос Иисуслэн зэмос дышетскисьёсыз шуыса. Кызьы ми пӧлысь котькудӥз возьматыны быгатэ, Христос сьӧры мынэ шуыса? Вын-агайёсмес но сузэр-апайёсмес вань сюлмысьтымы яратыса, соослэн тырмымтэоссы вань ке но. Таӵе яратонмес адӟыса, мукетъёсыз быгато зэмос религиез шедьтыны но милемын ӵош йыбыртъяны Иеговалы, яратонлэн Инмарезлы. Зэмос христианъёс сямен, ойдолэ котьку но ог-огмес яратыса уломы.