Ӧз. Та юан шоры Давид шонер учкиз.

Учке, мар со гожтӥз та но мукет кылбуръёсын: «Аслэсьтым сӥзиськонъёсме нуналлы быдэ быдэсъяса, Тынэсьтыд нимдэ пумтэм вапумъёс ӵоже кырӟаса данъяло», «Вань сюлмысьтым, Кузё-Инмаре, Инмаре, Тыныд тау каро, пумтэм вапумъёс ӵоже Тынэсьтыд нимдэ данъяло», «Тынэсьтыд нимдэ вапумъёсысь вапумъёсы данъяса уло» (Пс. 60:9; 85:12; 144:1, 2).

Давид ӧз малпа, со ноку уз кулы шуыса. Со туж умой тодӥз, сьӧлыкъёссы понна адямиос куло шуыса. Со валаз, ачиз но сьӧлыко вал шуыса (Ул.-выл. 3:3, 17—19; Пс. 50:6, 7). Озьы ик Давид тодӥз: Инмарлэн оскымон ужась-тыршисьёсыз но, кылсярысь, Авраам, Исаак но Иаков, кулӥзы. Давид тодӥз, вуоз дыр, куке со но кулоз шуыса (Пс. 36:25; 38:5). Но Псалтирьысь 60:9 адӟиське: Давидлэн «пумтэм вапумъёс ӵоже», яке вань улытозяз, Инмарез данъямез потэ вал (2 Экс. 7:12).

Давидлэн куд-ог псаломъёсаз вераське аслаз улонысьтыз учыръёс сярысь, кылсярысь, 17-тӥ, 50-тӥ но 51-тӥ Псаломъёсын. Давид ачиз но пудо возьмаз бере, 22-тӥ Псаломын Иеговаез со ӵошатэ пудо возьмасен, кудӥз нуллэ, сюдэ но уте. Инмарлэсь ӟечлыксэ адӟыса, Давидлэн «вань улоно нуналъёсыз ӵоже» Инмарлы ужамез-тыршемез потэ вал (Пс. 22:6).

Ойдолэ ум вунэтэ, Давид Иеговалэн духезлэн валтэмез улсын гожъяз шуыса. Со гожтӥз азьпалзэ ивортонъёсты но, кудъёсыз трос аръёс ортчыса гинэ быдэсмыны кулэ вал. Кылсярысь, 109-тӥ Псаломын Давид вераз дыр сярысь, куке солэн Кузё-Инмарез Инмарлэн бурпалаз пукоз но солы бадӟым кивалтэт сётэмын луоз. Малы? Со Инмарлэн тушмонъёсыз пӧлын кузёяськыса улоз но «калыкъёслы суд лэсьтоз». Кузё-Инмар, кудӥз сярысь Давид гожъяз, солэн выжыысьтыз потоз. Со Мессия, кудӥз инмысен кивалтоз но «пумтэм вапумлы... священник» луоз (Пс. 109:1—6). Иисус вераз, 109-тӥ Псаломысь азьпалзэ ивортонын со сярысь гожтэмын но со трос аръёс ортчыса гинэ быдэсмоз шуыса (Матф. 22:41—45).

Кызьы ми адӟимы, Иегова Давидлэсь мылкыдзэ ӝутӥз гожъяны аслаз дырыз сярысь но, вуоноез сярысь но, куке Давид улӟоз но «пумтэм вапумъёс ӵоже» Инмарез данъяны быгатоз. Озьыен, Псалтирь 36:10, 11, 29 быдэсмиз ини азьвыл, вашкала Израиль дыръя, озьы ик быдэсмоз на вуонояз быдэс дунне вылын, куке Инмар аслэсьтыз кылсётонъёссэ быдэстоз. (Учке та журналысь «„Монэн огазьын райын тон луод“» статьяысь 8-тӥ абзацез.)

Йылпумъян лэсьтомы: Псалтирь 60:9 но та выллем мукет кылбуръёс возьмато, вашкала дыръя Давидлэн вань улытозяз Иеговаез данъямез потэ вал шуыса. Озьы ик таӵе кылбуръёс возьмато: вуонояз но, куке Давид улӟытэмын луоз, со вань улонэз ӵоже Инмарез данъяны быгатоз.