1. Мар вераз Иисус йыруж лэсьтӥсьлы, кудӥз со вӧзын юбо борды кортӵогамын вал? (Лука 23:39—43).

 ИИСУС юбо борды кортӵогамын вал. Со вӧзын кортӵогамын вал кык йыруж лэсьтӥсьёс (Лука 23:32, 33). Соос Иисусэз «урод кылъёсын куаретӥзы». Татысь адӟиське, та пиосмуртъёс Иисуслэн дышетскисьёсыз ӧй вал шуыса (Матф. 27:44; Марк 15:32). Но кыӵе ке дыре одӥгезлэн мылкыдыз воштӥськиз. Со Иисуслэсь куриз: «Аслад Эксэйлыкад вуид ке, монэ буре вай». Иисус солы шуиз: «Зэм ик тыныд верасько туннэ: монэн огазьын райын тон луод» (Лука 23:43, ВД). (Лыдӟе Лукалэсь 23:39—42.) Та йыруж лэсьтӥсь «Ин Эксэйлык» сярысь иворез азьвыл но кылыны быгатэ вал ке но, со Христослэн дышетскисез ӧз луы. Иисус ӧз вера, та адями Эксэйлыке пыроз шуыса (Матф. 4:17). Иисус вераз музъем вылысь рай сярысь. Малы тазьы вераны луоз?

2. Малы вераны луоз, йыруж лэсьтӥсь, кудӥз ӧпкелиз, еврей калыкысь вал шуыса?

² Йыруж лэсьтӥсь, кудӥз ӧпкелиз, еврей калыкысь потэмын вал, дыр. Кытысь со адӟиське? Мукет йыруж лэсьтӥсьлэсь со юаз: «Тон Инмарлэсь уд курдаськы шат?» (Лука 23:40). Еврей калык одӥг Инмарлы оскиз, нош мукет калыкысь адямиос трос инмаръёслы оскизы (Пот. 20:2, 3; 1 Кор. 8:5, 6). Юбо борды кортӵогам пиосмуртъёс еврей калыкысь ӧй луысалзы ке, йыруж лэсьтӥсь тазьы шуысал: «Тон инмаръёслэсь уд курдаськы шат?» Озьы ик Иисус мукет калыкысь адямиос доры ыстэмын ӧй вал, нош Израиль юртлэн ышем ыжъёсыз доры гинэ (Матф. 15:24, ВД). Со сяна, Инмар израиль калыклы валэктӥз, кулэмъёсты  улӟытоз шуыса. Йыруж лэсьтӥсь, кудӥз ӧпкелиз, та сярысь тодӥз но малпаз, дыр: Иегова Иисусэз улӟытоз Инмарлэн Эксэйлыказ кивалтыны. Соин ик со оскиз, луоз, Инмар сое но улӟытоз шуыса.

3. Мае син азяз пуктӥз, вылды, йыруж лэсьтӥсь, куке Иисус рай сярысь вераз? Валэктэ (Улон-вылон 2:15).

³ Йыруж лэсьтӥсь, кудӥз ӧпкелиз, еврей калыкысь вал бере, со тодӥз Адам, Ева но рай сярысь, кудаз Иегова соосты улыны интыяз. Соин ик, куке Иисус вераз рай сярысь, та пиосмурт музъем вылысь чебер садэз син азяз пуктӥз, вылды. (Лыдӟе Улон-вылонэз 2:15.)

4. Мар сярысь малпаськыны мылкыдмес ӝуто Иисуслэн кылъёсыз, кудъёссэ со йыруж лэсьтӥсьлы вераз?

⁴ Иисуслэн кылъёсыз мылкыдмес ӝуто малпаськыны, кыӵе улон луоз райын. Та сярысь кӧня ке тодыны луэ, Соломон эксэйлэн кивалтэмез сярысь лыдӟыса. Библиын вераське, Иисус Соломонлэсь быдӟымгес шуыса (Матф. 12:42). Соин ик ми оскиськомы, Иисус юрттӥсьёсыныз ӵош музъем вылэ туж умой улон ваёз шуыса. Нош «мукет ыжъёслы» тодыны кулэ, мар кароно, райын пырак улон понна (Иоанн 10:16).

5. Кызьы тӥ син азяды пуктӥськоды райын улонэз?

⁵ Кызьы тӥ син азяды пуктӥськоды райын улонэз? Оло нош, син азяды пуксе Едем сад выллем чебер парк (Ул.-выл. 2:7—9). Яке тӥляд тодады лыктэ Михейлэн азьпалзэ ивортонэз, Инмарлэн котькуд ужась-тыршисез «аслаз мерттэм виноградпуд улаз, смоквапу улаз» пукоз шуыса (Мих. 4:3, 4). Библиысь мукет кылбуръёс возьмато, туж трос сиён луоз шуыса (Пс. 71:16; Ис. 65:21, 22). Соин ик тӥ син азяды пуктӥськоды, дыр, кызьы чебер садын пукиськоды, нош азяды ӝӧквыл тыр сиён. Котькытын сяськаослэн ческыт зынзы шӧдӥське. Тӥ кылӥськоды, кызьы семьяды, эшъёсты, улӟем матысь адямиосты серекъяло. Ми юн оскиськомы, таӵе улон быдэс музъем вылын одно ик луоз шуыса. Со сяна, райын шумпотон вайись ужмы луоз.

6. Мар ми каромы райын? (Учке суредэз.)

⁶ Иегова милемыз кылдытӥз, лэсьтэм ужмы шумпотон мед ваёз шуыса (Екк. 2:24). Тужгес но трос ужано луоз Христослэн сюрс ар ӵоже кивалтонэз дыръя. Бадӟым куректон пыр потэмъёслы но трос миллион улӟем адямиослы кулэ луоз дӥськут, сиён но улон инты. Соин ик трос ужано луоз. Но та уж милемлы шумпотон ваёз. Адам но Ева Едем садэз утялтыны кулэ вал. Ӵапак озьы ик милемлы но музъемез райлы пӧрмытоно луоз. Пуктэ син азяды, кыӵе ми шумпотомы дышетыны трос миллион улӟем адямиосты, кудъёсыз Иегова сярысь  но солэн эрикез сярысь номыр ӧз тодэ. Нош кыӵе ми шумпотомы, куке Христос дырозь улӥсь Инмарлэн ужась-тыршисьёсызлы вераломы, мар луиз соослэн кулэмзы бере!

7. Кыӵе осконмы милям вань но малы?

⁷ Вуоно райын ми тупаса но огкылысь уломы. Ваньмыз тырмыт луоз. Кытысь ми тае тодӥськомы? Иегова возьматӥз ини, кыӵе улон луоз Пиезлэн кивалтэмез улсын. Со выллем улон Соломон эксэйлэн кивалтэмез дыръя вал.

8. Кызьы Псалтирьысь 36:10, 11, 29 кылъёс вашкала дыръя быдэсмизы? (Учке та журналысь «Лыдӟисьёслэсь юанъёссэс».)

⁸ Иегова Давидлэсь мылкыдзэ ӝутӥз гожтыны, кыӵе улон луоз, куке визьлыко но Инмарлы оскымон эксэй кивалтоз. (Лыдӟе Псалтирез 36:10, 11, 29.) Ӵем дыръя, вуоно рай сярысь вераськыкумы, ми лыдӟиськомы Псалтирез 36:11. Та шонер, малы ке шуоно Иисус но, гурезь йылын тодытыкуз, та кылбурез вераз. Озьы со возьматӥз, та кылъёс вуонояз быдэсмозы шуыса (Матф. 5:5). Со сяна, Давидлэн кылъёсыз возьмато, кызьы адямиос улыны кулэ вал, Соломон эксэй кивалтыку. Куке Соломон Израильын эксэй вал, Инмарлэн калыкез туж тупаса но азинлыко улӥз. Израиль калык «йӧлын чечыен бызись музъемын» улӥз. Иегова шуиз: «Мынам пуктон-косонъёсыя тӥ улӥды ке... Музъем вылады тупаса улон лэзё, изьыны выдӥды ке, нокин но уз люкеты» (Лев. 20:24; 26:3, 6). Та кылъёс Соломон кивалтыку быдэсмизы (1 Пар. 22:9; 29:26—28). Озьы ик Иегова израиль калыклы кылзэ сётӥз, «сьӧлыклэсь кышкасьтэм уз кыльы ни» шуыса (Пс. 36:10). Озьыен, Псалтирьысь 36:10, 11, 29 кылъёс вашкала дыръя быдэсмизы, озьы ик вуонояз но быдэсмозы.

9. Мар вераз Саваысь эксэй кышномурт Соломон эксэйлэн кивалтэмез сярысь?

 ⁹ Соломон кивалтыку, тупаса но азинлыко улон сярысь Саваысь эксэй кышномурт но кылӥз. Со кыдёкысен Иерусалиме лыктӥз, ваньзэ ас синмыныз адӟон понна (3 Экс. 10:1). Соломонлэсь эксэйлыксэ адӟыса, со шуиз: «Мыным ӝыныез но верамын ӧвӧл... Шудоесь тынад адямиосыд, шудоесь тынад азяд ялан сылӥсь но визьлыко веранъёстэ кылӥсь медоосыд» (3 Экс. 10:6—8). Нош куке Иисус кивалтоз, Иегова адямиос понна эшшо но тросгес лэсьтоз.

10. Мар ласянь Иисус Соломонлэсь быдӟымгес?

¹⁰ Иисус Соломонлэсь котьмар ласянь быдӟымгес. Соломон сьӧлыко адями вал но бадӟым янгышъёс лэсьтылӥз, кудъёсыз Инмарлэн калыкезлы трос шуг-секытъёс вайизы. Нош Иисус — тырбыдэс кивалтӥсь, кудӥз ноку уг янгыша (Лука 1:32; Евр. 4:14, 15). Туж бадӟым шуг-секытъёс дыръя но Иисус Инмарлы оскымон кылиз. Со возьматӥз, ноку уз сьӧлыка но кивалтэмез улсын улӥсьёслы уродзэ ноку уз лэсьты шуыса. Ми туж шумпотӥськомы, милям таӵе эксэймы шуыса!

11. Кинъёс кивалтозы Иисусэн ӵош?

¹¹ Иисуслэн 144 000 юрттӥсьёсыз луозы, кудъёсыз соин ӵош адямиос сярысь сюлмаськозы но Иеговалэсь музъем пумысен эриксэ быдэстозы (Усьт. 14:1—3). Музъем вылын улыкузы, соос трос шуг-секытъёсты но куректонъёсты чидано луизы. Соин ик кивалтэмзы улсын улӥсьёсты соос гажалозы-жалялозы. Кыӵе ужъёсты соос быдэсъялозы?

12. Кыӵе уж сётӥз Иегова 144 000 зырӟем христианъёслы?

¹² Соломон туж бадӟым ужъёсты быдэсъяз ке но, соосты ӵошатыны ик уг луы соин, кыӵе уж сётэмын Иисуслы но соин ӵош кивалтӥсьёслы. Соломон эксэй кивалтӥз кӧня ке миллион адямиосын, кудъёсыз одӥг шаерын улӥзы. Нош Инмарлэн Эксэйлыказ кивалтӥсьёс сюлмаськозы кӧня ке миллиард адямиос сярысь, кудъёсыз быдэс дунне вылын улозы. Макем бадӟым уж сётӥз Иегова 144 000 зырӟем христианъёслы!

13. Мар карозы Иисусэн ӵош кивалтӥсьёс?

¹³ Иисус сямен, 144 000 зырӟем христианъёс луозы эксэйёс но священникъёс (Усьт. 5:10). Моисейлэн законэзъя священникъёс израиль калыклы юрттыны кулэ вал, соослэн юн тазалыксы но Инмарен матысь кусыпъёссы мед луозы шуыса. Закон «вуоно ӟечлыклэн вужерез гинэ» вал (Евр. 10:1). Та возьматэ: Иисусэн ӵош кивалтӥсьёс Инмарлэн ужась-тыршисьёсызлы юрттозы, соослэн умой тазалыксы но Иеговаен матысь кусыпъёссы мед луозы шуыса. Али ми ум тодӥське, кызьы та эксэйёс но священникъёс Эксэйлыклэн кивалтэмез улсын музъем вылын улӥсьёслы кивалтэт сётъялозы. Но кызьы гинэ медам луы, Иегова райын улӥсь адямиослы кулэ луись кивалтэт одно ик сётоз (Усьт. 21:3, 4).

14. Мар огазея «мукет ыжъёсты» но «пичи уллёез»?

¹⁴ Ӵош кивалтӥсьёссэ Иисус нимаз «пичи уллёен» (Лука 12:32). Озьы ик со вераз «мукет ыжъёс» сярысь. Таосыз но, соосыз но одӥг уллёе пыро (Иоанн 10:16). Туннэ ик ини соос ӵош ужало. Та ужез соос райын но ӵош азьланьтозы. Соку «пичи уллёе» пырисьёс пӧлысь ваньзы инмын луозы ини. Нош «мукет ыжъёс» музъем вылын  пырак улыны быгатозы. Но со понна соослы али ик ини мар ке но кароно.

15. а) Кызьы мукет ыжъёс юртто Христослэн вынъёсызлы? б) Учке суредэз. Кызьы тӥ быгатӥськоды адӟем карыны агайлэсь, кудӥз аптекаын тодытэ?

¹⁵ Иисус вӧзын кортӵогам йыруж лэсьтӥсь Иисуслы тау каремзэ уж вылын возьматыны уг быгаты вал. Нош милям, мукет ыжъёслэн, трос луонлыкъёсмы вань Иисуслы яратэммес возьматыны. Кылсярысь, ми быгатӥськомы зырӟем вын-агайёслы юрттыны. Иисуслэн верамезъя, со тае лыдэ басьтоз, ыжъёсты кечъёслэсь люкыкуз (Матф. 25:31—40). Ми быгатӥськомы Христослэн вынъёсызлы юрттыны, тодытон но дышетскисьёсты дасян уже вань сюлмысьтымы пыриськыса (Матф. 28:18—20). Тӥни малы ми тыршиськомы уже кутыны дышетон тырлыкъёсты, кудъёссэ соос милемлы сёто, кылсярысь, «Пумтэм вапумъёс ӵоже шумпотыса улэ!» книгаез. Тӥляд Библия дышетонды ӧвӧл на ке, пуктэ асьтэлы ужпум тросгес адямиослы ӵектыны Библиез дышетыны.

16. Кызьы дасяськыны луэ Инмарлэн Эксэйлыкезлэн кивалтэмез улсын улыны?

¹⁶ Иеговалы ярамон адями луон понна, райлэсь вуэмзэ возьмано ӧвӧл. Ми али ик ини быгатӥськомы пӧяськытэк улыны но асьмеды киямы возьыны. Со сяна, ми быгатӥськомы Иеговалы, кузпалмылы, озьы ик кенешысь агайёсмылы но сузэръёсмылы оскымон кыльыны. Та лек дуннеын улыса, ми Инмарлэн курон-косонъёсызъя улыны тыршимы ке, соку милемлы капчигес луоз райын но Иеговалэсь кылзӥськыса улыны. Со сяна, ми тыршиськомы будэтыны сямъёсты но быгатонлыкъёсты, кудъёсыз милемлы выль дуннеын кулэ луозы. Та сярысь тросгес тодыны луэ та журналысь, «Дась-а тӥ „музъем басьтыны“?» статьяез лыдӟыса.

17. Азьвыл лэсьтэм сьӧлыкъёсмы понна асьмеды янгыше уськытыса улоно-а? Валэктэ.

¹⁷ Ми азьвыл секыт сьӧлыкамы ке, асьмеды янгыше уськытыса улоно ӧвӧл ини. Со дыре ик ми ум малпаське, Иисус ми понна кулӥз бере, табере юри сьӧлыканы  быгатӥськомы шуыса (Евр. 10:26—31). Ми юн оскиськомы, вань сюлмысьтымы ӧпкелимы ке, Иеговалэсь юрттэтсэ утчамы но воштӥськимы ке, со милемыз простить кариз шуыса (Ис. 55:7; Ап. уж. 3:19, 20а). Эн вунэтэ, мар вераз Иисус фарисейёслы: «Мон шонер улӥсьёсты ӧтьыны ӧй лыкты, сьӧлыкоосты ӧпкельыса сьӧлыкъёссылэсь куштӥськонэ ӧтьыны лыктӥ» (Матф. 9:13). Иисуслэн курбонэз милемыз вань сьӧлыкъёсмылэсь мозмытыны быгатэ.

18. Мар сярысь тӥ вераськысалды йыруж лэсьтӥсен, кудӥз Иисус вӧзын кортӵогамын вал?

¹⁸ Пуктэ син азяды, кызьы тӥ вераськиськоды йыруж лэсьтӥсен, кудӥз Иисус вӧзын кортӵогамын вал. Тӥ но, со но Христослэн курбонэз понна Инмарлы тау кариськоды. Тӥ солэсь юаськоды, дыр: «Быгатӥськод-а тросгес вераны, мар луиз Иисусэн улонэзлэн берпум часъёсаз? Мае тон шӧдӥд, куке со вераз тыныд, тон соин огазьын райын луод шуыса?» Нош со тӥлесьтыд юа, дыр: «Вера, кыӵе улон вал Шайтан дуннелэн берпум нуналъёсаз?» Ми понна туж бадӟым дан луоз та пиосмурт выллем адямиосын Инмарлэсь Кылзэ дышетыны! (Еф. 4:22—24).

19. Малы райын улон ноку но мӧзмыт уз луы? (Учке вылбамысь суредэз.)

¹⁹ Райын улон ноку но мӧзмыт уз луы. Ми котьку но пумиталомы тунсыко адямиосты. Милям котьку но луоз тунсыко ужмы. Но тужгес но валтӥсез — нуналысь нуналэ ми умойгес но умойгес тодматскомы Инмысь Атаенымы но солэн кузьымъёсызлы шумпотомы. Ми пырак дауръёс ӵоже Иегова сярысь но солэн кылдытэмъёсыз сярысь маке но выльзэ тодомы. Улэммыя Инмарез яратонмы юнгес но юнгес луоз. Ми туж тау кариськомы Иеговалы но Иисуслы райын пырак дауръёс ӵоже улыны луонлык кузьмамзы понна!