1. Кин пыр Иегова ӵем дыръя ответ сётэ ужась-тыршисьёсызлэн вӧсяськемзылы?

 ТОДӤСЬКОДЫ-А, тӥ пыр Иегова юрттыны быгатэ соослы, кинъёс солы ӟырдыт вӧсясько. Тӧро-а тӥ, кенешлы юрттӥсь-а, пионер яке ивортӥсь, агай яке сузэр, егит яке арлыдо — тӥ быгатӥськоды юрттыны. Куке кин ке но, кин Иеговаез яратэ, солэсь юрттэт куре, ӵем дыръя Иегова соослы тӧроос яке мукет оскымон ужась-тыршисьёсыз пыр юрттэ (Кол. 4:11). Ми понна туж бадӟым дан Иеговалы но вын-агайёсмылы ужаны-тыршыны! Та тужгес но кулэ, висёнъёс вӧлмыку, пӧртэм шимучыръёс но уйылон-уллянъёс дыръя.

2. Малы, висёнъёс вӧлмыку, мукетъёсызлы юрттыны секыт луэ?

² Висёнъёс вӧлмыку, ог-огмылы юрттыны секыт луэ. Шуом, милям потӥз эшъёсмы доры мынэммы, но со тазалыклы кышкытлык вайыны быгатэ. Яке милям потэ куанер вын-агаез яке сузэр-апаез куное ӧтеммы, но уг луы. Оло нош, милям кинлы ке юрттэммы потэ, но семьяямы кин ке висе бере, тае но лэсьтыны ум быгатӥське. Озьы ке но милям луэ вын-агайёсмылы но сузэр-апайёсмылы юрттэммы. Иегова туж шумпотэ, куке ми лэсьтӥськомы ваньзэ, мае быгатӥськомы (Мад. 3:27; 19:17). Мар милям кареммы луэ?

3. Малы дышетскыны луэ Дейзи сузэрлэн кенешысьтыз тӧроослэсь? (Иеремиялэсь 23:4).

 ³ Мар карыны быгато тӧроос. Тон тӧро ке, ыжъёстэ умой тодыны тыршы. (Лыдӟе Иеремиялэсь 23:4.) Дейзи b сузэр, кудӥз сярысь кылем статьяын вераськиз, шуэ: «Тодытон понна группаысьтым тӧроос монэн но мукет ивортӥсьёсын трос пол тодытӥзы но милемын дырзэс ортчытъязы». Соин ик тӧроослы капчигес вал Дейзи сузэрлы COVID-19 пандемия дыръя юрттыны но матысь адямиоссэ ыштэмез бере сое буйгатыны.

4. Малы тӧроос Дейзи сузэрлы юрттыны быгатӥзы но малы та тӧроосты дышетэ?

⁴ Дейзи тодаз вае: «Тӧроосын мынам умой кусыпъёсы вал, соин ик мыным секыт ӧй вал соослы шӧдонъёсы но сюлмаськонъёсы сярысь вераны». Малы та тӧроосты дышетэ? Шимучыр вуэмлэсь азьло ик ыжъёстэс умой тодыны тырше. Вын-агайёслы но сузэр-апайёслы эшъёс луэ. Висён вӧлмыку, тӥ соос доры мыныны уд ке быгатӥське, мукет луонлыкъёс утчалэ. Дейзи азьланьтэ: «Куддыръя одӥг нунал куспын кӧня ке тӧроос мыным жингыртылӥзы яке буйгатӥсь кылъёс гожъязы. Библиысь кылбуръёс, кудъёссэ соос мыным ыстылӥзы, мыным тодмо вал ке но, соос мынэсьтым сюлэмме ик бугыртылӥзы».

5. Кызьы тӧроослэн тодэмзы луэ, мар вын-агайёслы но сузэр-апайёслы кулэ, но кызьы тӧроос соослы юрттыны быгато?

⁵ Кызьы тодыны луэ, мар кулэ вын-агайёслы но сузэр-апайёслы? Одӥгез амал — умой малпам юанъёс сётъяны (Мад. 20:5). Тырше валаны, тырмыт-а агайёслэн но сузэръёслэн сиёнзы, эмъюмзы, дӥськутсы. Уз ыштэ-а соос ужзэс но улон интызэс? Кулэ-а соослы валэктыны, кызьы кивалтӥсьёслэсь юрттэт куроно? Вын-агайёс но сузэр-апайёс Дейзилы коньдонэн юрттӥзы. Но тужгес но сое юнматӥз, куке тӧроос солы яратэмзэс возьматӥзы но солы Библиысь буйгатӥсь кылъёс лыдӟизы. Сузэрмы тодаз вае: «Тӧроос монэн ӵош вӧсяськизы. Мон уг тодӥськы ини, мар соос веразы, но мон умой тодӥсько на, мар мон соку шӧдӥ. Мыным ачиз Иегова вераз кадь: „Тон огнад ӧвӧл“» (Ис. 41:10, 13).

6. Мар карыны быгато кенешысь тросэз, мукетъёсызлы юрттон понна? (Учке суредэз.)

⁶ Мар карыны быгато мукетъёсыз. Ми возьмаськомы, тӧроос вын-агайёсты но сузэр-апайёсты юнматыны тыршозы шуыса. Но Иегова котькудмес ӧте мукетъёссэ юнматыны (Гал. 6:10). Пичи гинэ ӟеч ужмы висись адямилэсь мылкыдзэ ӝутыны быгатэ. Нылпилэн мае ке суредамез яке открытка  лэсьтэмез луэ. Бадӟымгес нылпиос быгато корка котырысь кыӵе ке ужъёсты быдэстыны яке магазинэ ветлыны. Озьы ик висись адямилы луэ сиён пӧраны но корка дораз вайыса кельтыны. Висёнъёс вӧлмыку, кенешысь котькудзэ юнматыны кулэ. Быгатӥськомы-а ми кенеш бере кыльыны, вын-агайёсын но сузэр-апайёсын вераськон понна, пумиськыса яке интернет пыр герӟаськыса? Нош кулэ-а тӧроосты юнматыны? Туж кулэ! Куд-огъёсыз соослы тау карон кылъёсын открыткаос ыстылӥзы, малы ке шуоно висёнъёс вӧлмыку, соослэн ужъёссы тужгес но трос. Кыӵе умой, ваньмы ми ог-огмес юнматыны быгатӥськомы шуыса! (1 Фес. 5:11).

7. Кызьы шимучыр адямилэсь улонзэ воштыны быгатэ?

⁷ Шимучыр сэрен адямилэн улонэз син куспын быдэсак воштӥськыны быгатэ. Адямиос улэм-вылэмзэс, улон интызэс, матысь адямиоссэс но ышто. Иеговалэн ужась-тыршисьёсыз но шимучыръёсын пумиськыны быгато. Кызьы ми соослы юрттыны быгатӥськомы?

8. Мар кароно тӧроослы но семьяослэн йыръёссылы шимучыр кылдэмлэсь азьло?

⁸ Мар карыны быгато тӧроос. Тӧроос, юрттэ вын-агайёслы но сузэр-апайёслы шимучырлы азьло ик дасяськыны. Кенешысьтыды котькудӥз тодэ-а, кызьы утиськоно но тӧроосын герӟаськоно? Маргрет сузэр, кудӥз сярысь ми кылем статьяын лыдӟимы ини, шуэ: «„Интыысь кулэяськонъёс“ пунктын верамын вал, пожаръёс ӧз быре на шуыса. Тӧроос веразы, кивалтӥсьёс ваньзэ кельтыса кошкыны куризы ке яке югдур эшшо но секытгес луиз ке, милемлы соку ик кошкыны кулэ шуыса». Та туж дырыз дыръя верамын вал, малы ке шуоно, толэзь но ӝыны ортчыса, туж бадӟым пожар кылдӥз. Семьяен йыбырттонзы дыръя картъёслы но атайёслы семьяысьтызы котькудӥныз вераськоно, мар соос карозы, шимучыр кылдыку. Тӥ асьтэос но, нылпиосты но дась ке, тӥледлы шимучыр дыръя каньыл сюлмын улыны капчигес луоз, дыр.

9. Кызьы тӧроос мукетъёсызлы юрттыны быгато шимучырлэсь азьло но со бере?

⁹ Агай, тон тодытон группа понна кыл кутӥськод ке, берлолы эн кельты но азьло ик ивортӥсьёслэсь юа, кызьы соосын герӟаськыны луэ. Тае гожты но дырын-дырын эскеры, номыр ӧз воштӥськы-а шуыса. Та юрттоз тыныд шимучыр дыръя котькуд вын-агаен но сузэр-апаен герӟаськыны но тодыны, мар соослы кулэ. Тае тодэмед бере соку ик вера тӧроослэн кенешсылэсь ужзэс радъясь агайлы, нош со ваньзэ ёросэз чакласьлы вералоз. Ӵош тыршыса, туж трос лэсьтыны луэ! Пожар бере Маргрет сузэрлэн ёросэз чакласез, 36 час изьытэк, со интыысь тӧроосын телефон пыр герӟаськылӥз. Ваньзы ӵош соос юрттӥзы ог 450 агайёслы но сузэръёслы, кудъёсыз улон интыоссэс кельтоно луизы (2 Кор. 11:27). Ӵош тыршемзылы луыса ваньзэс интыяны луиз.

10. Малы тӧроос туж тыршо вын-агайёсты но сузэр-апайёсты юнматыны? (Иоанн 21:15).

¹⁰ Тӧроос тыршо Библиысь буйгатӥсь кылъёс лыдӟыны но юнматыны соосты, кинъёс сюлмаськыса уло (1 Пётр 5:2). Шимучыр дыръя тӧроос нырысь ик валаны тыршо, агайёслы но сузэръёслы номыр кышкытлык уг вайы-а, соослэн сиёнзы, дӥськутсы но улон интызы вань-а шуыса. Кӧня ке толэзьёс ортчыса но, шимучырен пумиськемъёслы Библиысь юнматӥсь кылъёс лыдӟыны но соосты юнматыны кулэ луоз, дыр. (Лыдӟе Иоаннлэсь 21:15.) Харолд агай, кудӥз филиаллэн комитетаз ужа-тырше, вераськиз трос вын-агайёсын но сузэр-апайёсын, кудъёсыз шимучырен пумиськизы. Тани мар со вера:  «Буйгатскон понна, дыр кулэ. Улон ӧраз пырем бере но тодэ ваёнъёс сюлэмез вӧсь карыны быгато. Котькудӥз туж бадӟым куректонэн пумиськиз — кин ке но ыштӥз матысь адямизэ, кин ке но яратоно арбериоссэ, кин ке но ачиз мырдэм улэп кылиз. Таӵе тодэ ваёнъёс сюлэмез выльысь но выльысь вӧсь карыны быгато. Но та уг возьматы, адямилэн осконэз ляб шуыса. Таӵе шӧдонъёсыз котькудӥзлэн кылдыны быгато».

11. Кыӵе юрттэт кӧня ке дыр ӵоже семьяослы кулэ луоз, дыр?

¹¹ Тӧроос бӧрдӥсьёсын ӵош бӧрдо (Рим. 12:15). Шимучырен пумиськемъёсты оскытыны кулэ, Иегова, вын-агайёс но сузэр-апайёс соосты азьло сямен ик ярато шуыса. Тӧроос семьяослы юрттозы азьланяз но вӧсяськыны, эскеронъёс ортчытъяны, кенешлэн пумиськонъёсаз ветлыны но тодытыны. Озьы ик соос анай-атайёслы юрттозы нылпиоссылы валэктыны, мае соос нокыӵе шимучыр дыръя уз ыштэ. Анай-атайёс, нылпиостылы тодазы вайытэ, Иегова котьку соослэн эшсы луоз но соосты ноку уз кельты шуыса. Нылпиостылы одно ик валэктэ, соослэн быдэс дунне вылын агайёссы но сузэръёссы вань шуыса, кудъёсыз котьку юрттыны дась (1 Пётр 2:17).

12. Кызьы мукетъёсыз шимучыре сюремъёслы юрттыны быгато? (Учке суредэз.)

¹² Мар карыны быгато мукетъёсыз. Шимучыр тӥ палан луиз ке, тӧроослэсь юалэ, кызьы тӥ юрттыны быгатӥськоды. Оло нош, тӥ быгатӥськоды ас дорады пыртыны шимучыре сюремъёсты яке шимучыр дыръя юрттӥсьёсты. Яке тӥ быгатӥськоды шимучыре сюремъёслы сиён пӧраны но улон понна самой кулэзэ сётыны. Шимучыр кытын ке палэнын луиз ке но, тӥ юрттыны быгатӥськоды. Мар тӥляд каремды луэ? Вын-агайёс но сузэр-апайёс понна вӧсяське (2 Кор. 1:8—11). Озьы ик тӥ быгатӥськоды быдэс дунне вылын ортчытӥськись ужмылы ас мылкыд каремдыя коньдон сётыны (2 Кор. 8:2—5). Тӥ дась ке мыныны отчы, кытын шимучыр луиз, та сярысь тӧроослы вералэ. Куке тӥледыз ӧтёзы, нырысь отын тӥ дышетскоды, дыр, кулэ луись ужъёсты быдэсъяны.

13. Кыӵе шуг-секытъёссы вань агайёслэн, кудъёсыз уйылон-уллянъёсын пумиськыло?

¹³ Уйылон-уллянъёс дыръя улонмы эшшо но секытгес луэ. Вын-агайёслэн но сузэр-апайёслэн, кудъёсыз уло шаеръёсын, кытын  кивалтӥсьёс ужмес нуыны уг лэзё, мукет шаеръёсын улӥсьёслэн кадь ик, коньдонэн герӟаськем шуг-секытъёссы вань, соос висё, матысь адямиоссэс ыштыло. Но уйылон-уллянъёсын сэрен тӧроослы соос доры ветлыны секытгес. Озьы ик вал Андрей агаен но, кудӥз сярысь вераськиз ини. Тодытон понна группаысьтыз сузэр коньдонзэ мырдэм тырмытэ вал. Со сяна, со аварие сюриз. Солы кӧня ке операциос лэсьтӥзы. Соин ик ужаны со ӧз быгаты. Уйылон-уллянъёс но пандемия шоры учкытэк, агайёс туж тыршизы солы юрттыны. Иегова но ваньзэ адӟиз.

14. Кыӵе адӟем карон возьмато милемлы тӧроос?

¹⁴ Мар карыны быгато тӧроос. Андрей вӧсяськиз но лэсьтӥз ваньзэ, мае быгатӥз. Кызьы Иегова солы ответ сётӥз? Со вын-агайёслэсь но сузэр-апайёслэсь мылкыдзэс ӝутӥз со сузэрлы юрттыны. Кин ке но сое эмъясь доры нуиз. Кин ке но коньдонэн юрттӥз. Иегова соослэсь мылкыдзэс ӝутӥз лэсьтыны ваньзэ, мае быгато. Нош кылемзэ ачиз лэсьтӥз (Евр. 13:16). Тӧроос, тӥ улӥськоды ке шаерын, кудаз кивалтӥсьёс ужмес нуыны люкето, ваньзэ асьтэос лэсьтыны эн тырше. Мукетъёссэ но мае ке карыны куре (Иер. 36:5, 6). Валтӥсез — Иеговалы оскиське. Со юрттоз тӥледлы вын-агайёс но сузэр-апайёс сярысь сюлмаськыны.

15. Мар юрттоз уйылон-уллянъёс дыръя огкылысь улыны?

¹⁵ Мар карыны быгато мукетъёсыз. Уйылон-уллянъёс дыръя милемлы пичи группаосын пумиськылоно луоз, дыр. Соку тужгес но кулэ ог-огенымы тупаса улыны. Шайтанэн нюръяське, нош вын-агайёсын но сузэр-апайёсын — эн. Мукетъёсызлэн янгышъёссылы саклыктэс эн висъялэ. Тупамтэос кылдо ке, соосты соку ик сэрттыны-пертчыны тырше (Мад. 19:11; Еф. 4:26). Эн возьмалэ, куке тӥлесьтыд юрттэт курозы. Асьтэос юрттыны тырше (Тит. 3:14). Куке агайёс но сузэръёс юрттӥзы сузэрлы, кудӥзлы юрттэт кулэ вал, соослэн кусыпъёссы юнмазы. Соос зэмос семья луизы (Пс. 132:1).

16. Кызьы ми быгатӥськомы юрттыны агайёслы но сузэръёслы, кудъёссэ уйыло-улляло? (Колоссыослы 4:3, 18).

 ¹⁶ Трос сюрс агайёсмы но сузэръёсмы ужало-тыршо шаеръёсын, кытын кивалтӥсьёс ужмес нуыны люкето. Куд-огъёсыз осконзы понна пытсэтын пуко. Ми быгатӥськомы соос понна но семьяоссы понна вӧсяськыны. Озьы ик вӧсяськыны луэ соос понна, кинъёс кышкатэк пытсэтэ пуктэм агайёслы но сузэръёслы юртто, соос асьсэос но пытсэтэ сюрыны быгато ке но. Соос тыршо пытсэтэ пуктэмъёслы юрттыны Иеговалы оскымон кыльыны, ваньзэ кулэзэ сётыны но судъёсын утьыны c. (Лыдӟе Колоссыослы 4:3, 18.) Ноку эн вунэтэ, тӥляд вӧсяськонъёсты сыӵе вын-агайёслы но сузэр-апайёслы юрттыны туж быгато шуыса! (2 Фес. 3:1, 2; 1 Тим. 2:1, 2).

17. Кызьы али ик ини уйылон-уллянъёслы дасяськыны луэ?

¹⁷ Асьтэды но асьтэлэсь семьядэс уйылон-уллянъёслы али ик дасялэ (Ап. уж. 14:22). Мултэс сюлмаськыса эн улэ. Эн малпалэ, кыӵе кышкыт учыръёс луыны быгато. Со интые, Иеговаен кусыпъёстэс юнматэ но нылпиостылы юрттэ соин эшъяськыны. Сюлмаськонъёсты кылдо ке, Инмар азьын сюлэмдэс усьтэ (Пс. 61:8, 9). Семьяеныды эскере, малы тӥ Инмарлы оскиськыны быгатӥськоды d. Кылъёсыныды но ужъёсыныды нылпиостэс дышетэ шимучырлы дасяськыны но Иеговалы быдэсак оскиськыны. Соку соос быгатозы кышканъёссэс вормыны но каньыл сюлмын улыны.

18. Кыӵе улон милемыз азьланяз возьма?

¹⁸ Инмарлэн каньыллыкез юрттэ милемлы кышкатэк улыны (Флп. 4:6, 7). Сыӵе каньыллыкез сётыса, Иегова милемыз буйгатэ, висёнъёс вӧлмыку, шимучыръёс но уйылон-уллянъёс дыръя. Инмар юрттэ милемлы тӧроос пыр, кудъёсыз мылысь-кыдысь ми сярысь сюлмасько. Озьы ик Инмар милемлы луонлык сётэ мукетъёсызлы юрттыны. Каньыллык, кудӥз милям али вань, юрттэ дась луыны вуоно шуг-секытъёслы, озьы ик «бадӟым куректонлы» но (Матф. 24:21). Со секыт дыре милемлы асьмелы но каньыл сюлмын улоно луоз, мукетъёсызлы но юрттоно луоз каньыл сюлмын улыны. Бадӟым куректон бере ми номырлэсь ум кышкалэ ни. Ми тупаса но каньыл сюлмын уломы, кызьы Иегова нырысь ик малпаз вал (Ис. 26:3, 4).