ТӤ АДӞИДЫ, луоз, трос религиослэн нимысьтыз интыоссы вань, кытчы адямиос вӧсяськыны ветло. Ӵем дыръя со бадӟым чебер юртъёс луо. Со сяна, со религиосын вӧсяськон понна нимысьтыз дыр висъямын. Нош мар верамын Библиын со сярысь, кытын но ку вӧсяськоно?

Библиын верамын, кыӵе учыръёсы умой луоз вӧсяськыны. Кылсярысь, отын верамын, дышетскисьёсыныз ӵош сиськон азяз Иисус Инмарлы тау кариз шуыса (Лука 22:17). Озьы ик Иисуслэн дышетскисьёсыз вӧсяськизы, куке Инмарлы йыбырттон понна люкаськылӥзы. Озьы соос азьланьтӥзы иудейёслэсь сӥнагогаосын но Иерусалим храмын вӧсяськон сямзэс. Инмарлэн потэ вал, со храм вӧсяськон инты мед луоз шуыса. Со вераз: «Мынам коркае вань калыкъёс понна вӧсяськон корка шуыса нимаськоз» (Марк 11:17).

Куке Инмарлэн ужась-тыршисьёсыз, ӵош люкаськыса, вӧсясько, ӵем дыръя Инмар соослэсь вӧсяськемзэс кылэ. Одӥг мылкыдын, одӥг осконэн улӥсь адямиос вӧсясько ке но соослэн вӧсяськонзы Библилы пумит ӧвӧл ке, со Инмарлы яра. Вӧсяськон Инмарлэсь мылкыдзэ ӝутыны быгатэ лэсьтыны сое, мае со лэсьтыны уг малпа вал (Еврейёслы 13:18, 19). Иеговалэн Адӟись-Ивортӥсьёсыз котькуд пумиськоназы вӧсясько. Ми сюлмысь ӧтиськомы тӥледыз сыӵе пумиськонъёсы тӥледлы матысяз Эксэйлык юртэ. Отын тӥ кылыны быгатоды сыӵе вӧсяськонъёсты.

Но Библиын номыр верамын ӧвӧл со сярысь, вӧсяськыны кулэ шуыса кыӵе ке нимысьтыз интыын но юри висъям дыре. Отын верамын Инмарлэн трос ужась-тыршисьёсыз сярысь, кудъёсыз вӧсяськизы пӧртэм интыын но пӧртэм дыре. Иисус вераз: «Тон нош вӧсяськыкуд бӧльмы сьӧрад пыр, ӧстэ ворса но адскисьтэм Атаедлы вӧсяськы, лушкемез адӟись Атаед тыныд шара берыктоз» (Матфей 6:6).

Малпалэ гинэ! Тӥ быгатӥськоды Дунне Кутӥсь Инмарлы вӧсяськыны котькыӵе дыре но котькыӵе интыын но оскыны, со тӥледыз одно ик кылоз шуыса! Макем со умой! Иисус луонлык утчаз огназ кыльыса Инмарлы вӧсяськыны. Одӥг пол, кулэ луись ужпум кутон азяз, со быдэс уй Инмарлы вӧсяськиз (Лука 6:12, 13).

Библиын верамын пӧртэм пиосмуртъёс но кышномуртъёс сярысь, кудъёсыз, ужпум кутон азязы яке кыӵе ке шуг-секытъёсын пумиськыкузы, Инмарлы вӧсяськизы. Кин ке но вӧсяськиз ас понназ, кин ке но шара, кин ке но огназ кыльыса яке мукетъёсыныз ӵош. Но соос вӧсяськизы! Инмар ӧте аслэсьтыз ужась-тыршисьёссэ: «Дугдылытэк вӧсяське» (1 Фессалоникаослы 5:17). Со котьку дась кылзыны соосты, кинъёс солэсь эриксэ быдэсъяло. Макем со яратэ аслэсьтыз ужась-тыршисьёссэ но сюлмаське соос сярысь!

Но туала дуннеын тросэз малпасько, юрттэ-а вӧсяськон. Оло нош, тӥ но юалоды: «Мон вӧсяськи ке, юрттоз-а со мыным?»