5-тӥ азьпалзэ ивортон. Музъемез кырсёмытон

«Музъемез саптасьёсты быдтон дырыд вуиз» (УСЬТӤСЬКОН 11:18).

● Кпор гуртысь (Нигерия) Пирри пальмалэсь вина поттэ вал. Но, Нигерлэн шурдӥняз нефть сюремен сэрен, ужзэ дугдытоно луиз. «Нефть милям кумылы изъян вае, чорыгмес быдтэ, шуръёсмес кырсёмытэ,— шуэ со.— Табере улыны мынам коньдон поттэме уг луы ни».

МАР СЯРЫСЬ ВЕРАЛО ФАКТЪЁС? Куд-ог эскерисьёс верамъя, котькуд аре зарезьёсы но океанъёсы 6,5 миллион тонна жаг сюре. Ӝыныез со жаг пӧлысь — со пластик, кудӥз трос сю аръёс ортчыса гинэ сисьме. Музъемез кырсёмытэм сяна, адямиос инкуазь узырлыкъёсты туж трос быдто. Эскеронъёс возьматӥзы, сомында ик инкуазь узырлык мед луоз шуыса, кӧня адямиос ар куспын быдтӥзы, музъемлы ар но вить толэзь кулэ. «Музъем вылысь адямиослэн лыдзы азьланяз но йылӥз но адямиос озьы ик инкуазь узырлыкъёсты быдтӥзы ке, 2035-тӥ арлы милемлы кык музъем кулэ луоз ини»,— верамын Австралиысь «Сидней морнинг геральд» газетын.

ПУМИТ ВЕРАН. Адямиос визьмоесь. Ми шедьтомы амал, кызьы та шуг-секытъёсты сэрттыны-пертчыны но музъемез утьыны.

ОЗЬЫ-А СО? Тросэз адямиос но организациос тросгес но тросгес вераны тыршо, макем кырсь луэмын ини музъем. Озьы ке но музъемез азьвыл сямен ик кырсёмыто.

КЫЗЬЫ ТӤ МАЛПАСЬКОДЫ? Кулэ-а, Инмар югдурез ас кияз мед кутоз но, музъемез утьыса, аслэсьтыз сётэм кылзэ мед быдэстоз шуыса?

Вить азьпалзэ ивортонъёслэн быдэсмемзы сярысь верам сяна, Библиын озьы ик верамын на вал, берпум аръёсы мар ке но умоез луоз шуыса. Ойдолэ тодомы мар со.

[Ватсан]

«Мыным потэ, рай сэрег, кудаз мон улӥ, жаг куян интылы пӧрмиз шуыса» (ТА КЫЛЪЁСТЫ ВЕРАЗ ЭРИН ТАМБЕР, КУДӤЗ УЛЭ ОГАЗЕЯСЬКЕМ ШТАТЪЁСЫН, МЕКСИКАНСКОЙ ВУКОЖЛЭН ЯРДУРАЗ, 2010-ТӤ АРЫН НЕФТЬЛЭН КИСЬТӤСЬКЕМЕЗ СЯРЫСЬ).

[Рамка]

Янгыш-а Инмар?

Библиын азьло ик верамын вал, кыӵе югдур кылдоз музъем вылын. Но луэ-а Инмарез янгыше уськытыны, таӵе кышкыт югдур кылдӥз шуыса? Янгыш-а со, ми курадӟиськомы шуыса? Та юанъёслы валэктонъёс шедьтоды «Малы дышетэ милемыз Библия?» книгалэн 11-тӥ люкетысьтыз. Та книга Иеговалэн Адӟись-Ивортӥсьёсыныз поттэмын.

[Суред сярысь]

U.S. Coast Guard photo