Пичи дырысеным ик мон инкуазез яратӥсько. Ми семьяеным ӵош ӵем ветлӥмы кар сьӧры. Ми яратӥськомы вал учкыны паймымон чебер тэльёсты но тыосты, кудъёсыз интыяськемын вордӥськем кар котырам, Ювяскюля кар котырын (Финляндия). Озьы ик мон туж яратӥсько пудо-животъёсты. Пичи дыръям мон котькуд пуныез но коӵышез ӟыгыртыны дась вал! Будэмъям мынам мылкыды ик куашка вал, куке адӟисько вал, кызьы адямиос пудо-животъёсты вӧсь каро. Дыр ортчыса мон пыриськи пудо-животъёсты утёнъя огазеяськонэ, кытын пумитай мон кадь малпаськись адямиосты.

Ми туж тыршимы пудо-животъёсты вӧсь каронлэсь утьыны. Ми информация вӧлмытъямы, озьы ик маршъёсы пыриськимы, адямиос пудо-животъёсты медаз виылэ шуыса, соослэсь дӥськут вурон понна но соос вылын опытъёс ортчытъян понна. Со сяна, ми асьмеос но кылдытӥмы пудо-животъёсты утёнъя огазеяськонэз. Ӵем дыръя, ми малпанъёсмес кужмысь пыӵатыны тыршиськомы вал бере, милям кивалтӥсьёсын шуг-секытъёсмы кылдылӥзы. Соин ик монэ кӧня ке пол судъязы но.

Но мон пудо-животъёс сярысь гинэ ӧй сюлмаськы. Озьы ик монэ сюлмаськытӥзы дунне вылысь мукет шуг-секытъёс но. Дыр ортчыса, мон пыриськи таӵе огазеяськонъёсы: «Международная амнистия» но «Гринпис». Вань кужмысьтым мон тырши юрттыны соослы ужзэс нуыны. Мон утьыны тырши правооссэс сыӵе адямиослэсь, кудъёсызлы коньдон, сиён но улон понна мар ке но мукетыз уг тырмы вал.

Дыр ортчемъя мон валаны кутски, та дуннеез тупатыны уг луы шуыса. Сыӵе организациос огшоры шуг-секытъёсты сэрттыны-пертчыны быгатӥзы ке но, бадӟым шуг-секытъёс эшшо но бадӟымгес луо вал кадь. Та шоры учкыса, малпан кылдэ вал, быдэс дунне лек ужъёс пӧлы выемын но соосты сэрттыны-пертчыны нокин уг тыршы шуыса. Соку мон валай, кызьы гинэ мон медам тыршы, та югдурез тупатыны уг быгаты шуыса.

Куке мон валай, номыр карыны уг быгатӥськы шуыса, мон малпаськыны кутски Инмар но Библия сярысь. Куке но мон Иеговалэн Адӟись-Ивортӥсьёсыныз Библиез дышетӥ вал ини. Мыным кельше вал ке но, Адӟись-Ивортӥсьёс монэн гажаса но лякытэн вераськизы шуыса, соку улонме воштыны мон дась ӧй вал на. Но табере ваньмыз мукет сямен вал.

Мон аслэсьтым Библиме шедьтӥ но, сое лыдӟыса, мынам сюлэмы ик буйгаз. Мон адӟи, Библия пудо-животъёс сярысь сюлмаськыны дышетэ шуыса. Кылсярысь, Мадёнъёсын 12:10 гожтэмын: «Шонер улӥсь пудо-животэз сярысь но сюлмаське». Озьы ик мон валай, дунне вылысь шуг-секытъёс Инмар бордысь уг пото шуыса. Югдур уродгес но уродгес луэ, малы ке шуоно тросэз адямиос Инмарлэсь уг кылзӥсько. Со, кызьы Иегова яратонзэ но гажан-жалянзэ возьматэ, мынэсьтым сюлэмме ик бугыртӥз (Псалтирь 102:8—14).

Со дырегес ик мон шедьтӥ купонэз «Малы зэмзэ ик дышетэ Библия?» книгаез курон понна. Мон сое гожтӥ но ыстӥ. Ӝоген мон доры лыктӥзы кык Адӟись-Ивортӥсьёс. Соос мыным Библиез дышетыны ӵектӥзы но, мон соглаш кариськи. Озьы ик мон ветлыны кутски христиан пумиськонъёсы, кудъёсыз Эксэйлык юртын ортчытъяськизы. Ваньмыз та юрттӥз мыным Библиысь зэмлыкез яратыны.

Библия юрттӥз мыным улонме воштыны. Мон тамак кыскемысь, вина юэмысь, кырсь кылъёсын вераськемысь дугдӥ. Озьы ик ӝикыт дӥсяськыны кутски. Со сяна, табере мон кивалтӥсьёс шоры но мукет сямен учкисько (Римъёслы 13:1). Азьвыл мон туж азыса-калгыса улӥ, нош табере Иеговалэн вылӥ эсэпъёсызъя улӥсько.

Мыным тужгес но секыт вал мукет сямен учкыны огазеяськонъёс шоры, кудъёсыз адямиослы но пудо-животъёслы юрттыны тыршизы. Одӥг нунал куспын со ӧз пӧрмы. Нырысь мон малпай, со огазеяськонъёсысь потӥ ке, соос мон шоры, тушмонзы шоры кадь учкозы шуыса. Но дыр ортчемъя мон валай, Инмарлэн Эксэйлыкез гинэ быдэс дунне вылысь шуг-секытъёсты сэрттыны-пертчыны быгатэ шуыса. Соин ик мон ужпум кутӥ, вань кужмысьтым Эксэйлыклэн ужаз пыриськыны но мукетъёсызлы юрттыны со сярысь тодыны (Матфей 6:33).

Мон малпаны дышемын вал, вань умой но урод адямиос шуыса. Соин ик пумит мыныны тырши соослы, кинъёсты урод адямиосын лыдъяй. Но Библилы луыса, табере мон адямиосты адӟемпотостэм уг кариськы ни. Со интые, мон тыршисько вань адямиосты яратыны (Матфей 5:44). Кылсярысь, сое возьматыны луэ, мукетъёсызлы Инмарлэн Эксэйлыкез сярысь ӟеч иворез вераса. Мон шумпотӥсько, та уж адямиослы тупаса улон но шумпотон вае, озьы ик вуоноезлы оскон сётэ шуыса.

Куке мон дыши Иегова вылэ оскиськыны, мынам сюлмы ик буйгаз. Мон оскисько: Кылдытӥсь уз лэзьы адямиосты но пудо-животъёсты ялан курадӟытыны но музъемез быдтыны. Ӝоген Эксэйлыкез пыр со музъем вылысь вань уродэз быдтоз (Исаия 11:1—9). Мон туж шумпотӥсько, та зэмлыкъёсты тодӥсько но мукетъёсызлы осконзэс будэтыны юрттӥсько шуыса. Табере мон уг малпаськы ни, мыным та дуннеез тупатыны кулэ шуыса.