Иисус сьӧлыктэм адями вал. Солэн ӧй вал куректон-кайгуосыз но шуг-секытъёсыз, кудъёсыныз вань адямиос пумиськыло. Озьы ке но со туж гажаз-жаляз адямиосты. Мукет адямиос понна со вань кужмысьтыз кулэезлэсь но тросгес лэсьтэ вал. Мукетъёсызлы юрттӥськыны солэсь мылкыдзэ ӝутӥз гажан-жалян.

Пӧртэм арлыдо адямиос Иисус доры кыстӥськизы, малы ке шуоно со вылтӥяськыса ӧз улы но мукетъёсызлы дырзэ висъяны дась вал. Адямиос шӧдӥзы, со соослы юрттыны дась шуыса. Иисус вӧзын адямиос асьсэды умой шӧдӥзы.

Иисус ӵем вань сюлмысьтыз Атаезлы вӧсяськиз. Со вӧсяськиз одӥгназ но, Инмарлэн мукет ужась-тыршисьёсыз пӧлын но. Со вӧсяськиз пӧртэм учыръёсын, сиськон азяз гинэ ӧз. Иисус Атайзэ тау кариз, данъяз сое но кулэ луись ужпумъёс кутон азяз солэсь кивалтэтсэ куриз.

Куддыръя Иисус, ассэ жалятэк, мукетъёсыз понна тыршиз, аслыз шутэтскыны кулэ вал ке но. Иисус котьку но нырысь ик мукетъёсыз сярысь малпаськиз. Та пумысен со милемлы умой адӟем карон возьматӥз.

Иисус дышетӥз, мукетъёссэ простить кароно шуыса. Со сяна, со ачиз но простить карылӥз дышетскисьёссэ, озьы ик мукет адямиосты но.

Библиын азьло ик гожтэмын вал, иудейёс пӧлысь тросэз Мессияез палэнтозы но тушмонъёсыз сое виёзы шуыса. Малпаны луэ вал, вань кужымез поныса адямиослы ужан-тыршон нокыӵе пайда уз вайы шуыса. Озьы ке но Иисус зэмос йыбырттон понна туж тыршиз. Вань дышетскисьёсызлы, кудъёссэ адямиос уг кылзо но уйыло-улляло, со адӟем карон возьматӥз, кызьы ӟырдыт мылкыдын ужано-тыршоно.

Иисусэз сьӧлыко адямиосын ӵошатыны ик уг луы. Кылсярысь, солэн тодон-валанэз но визьлыкез, адямиослэн сярысь, тросгес вал. Иисус сьӧлыктэм вал бере, солэн кадь тазалыкез но визьмыз нокинлэн но ӧй вал ни. Озьы ке но Иисус зӥбыт-востэмен мукетъёсызлы ужаз-тыршиз.

Иисус котьку но чиданзэ возьматӥз апостолъёслы но мукет адямиослы, куке соос солэсь адӟем ӧз каре но солэн дышетэмезъя ӧз улэ. Иисус трос пол туж чидаса тыршиз соослы валэктыны малпанъёсты, кудъёсыз юрттысалзы соослы Иеговалы матэ кариськыны.