КЫЗЬЫ Иегова азьло ик вераз вал, Соломон солэсь палэнтӥськем бере Израиль люкиськиз. Ровоам, Соломонлэн пиез, кудӥз со бере эксэй луиз, туж лек вал. Соин ик дас израиль выжыос пумит ӝутскизы но Израиль шуыса нимаськись уйпал эксэйлык кылдытӥзы. Мукет кык выжыос Давидлэн Иерусалимысь престолэзлы оскымон кылизы но Иуда шуыса нимаськись лымшор эксэйлык кылдытӥзы.

Кызьы Израильын, озьы ик Иудаын югдур ялан вошъяськылӥз, ӵем дыръя эксэйёслэн Инмарлы оскымтэзы но солэсь кылзӥськымтэзы сэрен. Уйпал эксэйлыкын югдур, лымшораз сярысь, эшшо но секытгес вал, малы ке шуоно солэн эксэйёсыз, эксэйлык кылдэм бере ик, ӧрекчи йыбырттон пыртӥзы. Илья но Елисей пророкъёслэн, кудъёсыз кулэмъёсты но улӟытъязы, паймымон ужъёссы шоры учкытэк, Израиль озьы ик кылзӥськытэк улӥз. Бератаз Инмар Ассирилы уйпал эксэйлыкез киултыны лэзиз.

Сю арлэсь ӧжытак тросгес ортчыса, Инмар Иудаез но кыл кутытӥз. Иудалэн куд-ог эксэйёсыз гинэ Инмарлэн пророкъёсызлэсь алонъёссэс лыдэ басьтӥзы но калыкез Иегова доры берен берыктыны тыршизы. Кылсярысь, Иосия эксэй Иудаез ӧрекчи йыбырттонлэсь чылкытатыны кутскиз но Иеговалэсь храмзэ тупатӥз. Куке Инмарлэн Катэныз книга, кудзэ со Моисей пыр сётӥз, шедьтэмын вал, Иосиялэн сюлмыз юн бугырскиз но, со осконэн герӟаськем воштӥськонъёсты эшшо но тыршыса ортчытыны кутскиз.

Жаляса верано луэ, Иосия бере пуксем эксэйёс солэсь адӟем ӧз каре. Соин Иегова ӧз люкеты вавилон калыклы Иудаез киултыны но Иерусалимез но храмез куашкатыны. Улэп кылемъёсты Вавилонэ пленэ нуизы. Инмар азьло ик вераз, соос отын 70 ар улозы шуыса. Нош калык пленысь ас музъемаз берытскытозь, Иуда кыр дунне кадь луоз.

Со сяна, сӥзем Мозмытӥсь, азьло ик верам Мессия, кивалтыны кутскытозь, Давид выжыысь нокин но эксэй уз луы ни. Тросэзлэн эксэйёслэн улонзы, кудъёсыз Давидлэн Иерусалимысь престолаз пукизы, возьматэ, тырбыдэстэм адямиос мукетъёсыныз кивалтыны уг быгато шуыса. Одӥг Мессия гинэ быгатэ. Давидлэн выжыысьтыз берпуметӥ эксэйлы Иегова вераз: «Эксэй изьыдэ но кушты... солэн Кузёез лыктытозь, со уз ни луы; Мон сое Солэн киулаз сёто» (Иезекииль 21:26, 27).

Пыкиськемын: 3 но 4 Эксэйлыкъёслэн, 2 Паралипоменон, 10—36-тӥ люкетъёс; Иеремия 25:8—11.