МЫНЭ вал а. э. 33-тӥ ар. Иисус инме ӝутскем бере 10 нунал ортчыса, иудейёслэн Витьтонэтӥ Нунал праздниксы дыръя, ог 120 дышетскисьёсыз Иерусалиме люкаськизы. Малпамтэ шорысь пукон коркаязы кужмо сильтӧллы укшась куара кылӥськиз. Дышетскисьёс паймымон амалэн тодмотэм кылъёсын вераськыны кутскизы. Кызьы сое валэктоно? Инмар соослы святой духсэ сётӥз.

Корказы доры пӧртэм палъёсысь празднике лыктэм трос адямиос люкаськизы. Соос паймизы, куке кылӥзы, Иисуслэн дышетскисьёсыз соослэн кылъёсынызы капчиен верасько шуыса. Луэмзэ валэктыса, Пётр Иоильлэн азьпалзэ ивортонысьтыз кылъёсты вераз, кытын гожтэмын, соос, кинъёс вылэ Инмар духсэ кисьтоз, паймымон кузьымъёс басьтозы шуыса (Иоиль 2:28, 29). Святой духлэн таӵе юн кужымез умой возьматӥз, воштӥськонъёс ортчизы шуыса: та дырысен Инмар Израиль калык интые, выль кылдэм христиан кенешез бакель карыны кутскиз. Соослы, кинъёслэн Инмарлы ярамон луэмзы потэ вал, Христослэн дышетскисьёсыз луоно вал.

Дыр ортчыса, пумитъяськонъёс кутскизы. Религиозной пумитъяськисьёс Иисуслэсь дышетскисьёссэ пытсэтэ пуктӥзы. Нош Иеговалэн кылчинэз уйин пытсэтлэсь ӧссэ усьтӥз но соосты тодытыны мыныны косӥз. Куазь ӟардыку, соос храме мынӥзы но Иисус сярысь дышетыны кутскизы. Тушмонъёссылэн туж вожзы потӥз но соосты тодытыны ӧз лэзе. Ответ сётыса, апостолъёс кышкатэк веразы: «Адямиослы сярысь, Инмарлы золгес тэрытскыны кулэ» (Апостолъёслэн ужъёссы 5:28, 29).

Уйылон-уллянъёс кужмогес луизы. Куд-ог иудейёс Стефан нимо дышетскисез, со Инмарез сантэма шуыса, янгыше уськытӥзы но изъёсын зӥръяса виизы. Стефанэз виемзэс Тарсысь Савл учкыса сылӥз но сое умой ужен лыдъяз. Та егит адями Дамаске Христослэсь дышетскисьёссэ пытсэт улэ пуктон вылысь мынӥз. Мынон сямен, инмысь тыл пиштӥз но, со куара кылӥз: «Савл, Савл! Малы тон Монэ улляськод?» Синмыз мальдыса, Савл юаз: «Кин тон?» Соиз шуиз: «Мон — Иисус» (Апостолъёслэн ужъёссы 9:3—5).

Куинь нунал ортчыса, Иисус Анания нимо дышетскисез Савл доры ыстӥз, со выльысь адӟыны мед кутскоз шуыса. Савл пылатӥськиз но христиан кенешлэн ужъёсаз мылысь-кыдысь пыриськыны кутскиз. Со кышкатэк тодытӥз Иисус сярысь но апостол Павел шуыса тодмо луиз.

Иисуслэн дышетскисьёсыз Инмарлэн Эксэйлыкез сярысь нырысь иудейёслы но самаритянъёслы гинэ веразы. Нош одӥг пол Корнилийлы, рим армиысь сю солдатэн кивалтӥсьлы, кудӥз Инмарлы оске вал, кылчин возьматӥськиз. Со косӥз сое апостол Пётр сьӧры ыстыны. Мукет дышетскисьёсын ӵош Пётр Корнилийлы но солэн дорысьёсызлы тодытӥз. Пётр веран дыръя вань кылзӥсьёс вылэ святой дух васькиз но, апостол соосты Иисуслэн нимыз понна пылатӥськыны косӥз. Соос еврей калыкысь ӧй вал бере, валамон луиз, пырак улонэ сюрес вань калыкысь адямиослы усьтӥськиз шуыса. Табере кенеш котькытын ӟеч иворез ивортыны дась вал.

Пыкиськемын: Апостолъёслэн ужъёссы 1:1—11:21.