МАЛЫ Иисус музъем вылэ лыктӥз? Со шуиз: «Инмар Эксэйлык сярысь Ӟеч Иворез Мон вераны кулэ, со понна ик Мон ыстэмын уго» (Лука 4:43). Кызьы адӟиське, Иисуслэн тодытонэзлэн валтӥсь темаез Эксэйлык сярысь ивор вал. Эскеромы та темаез ньыль пал ласянь.

1. Иисус — Мессия Эксэй. Иисус шонерак вераз, со азьло ик верам Мессия шуыса (Иоанн 4:25, 26). Озьы ик со вераз, со луоз ӵапак соиз Эксэй, кудзэ Даниил пророк адӟонын адӟиз. Иисус апостолъёслы вераз, «пиштӥсь данлыкезлэн престол вылаз» пуксён нуналэ соос но престолъёсазы пуксёзы шуыса (Матфей 19:28). Соин ӵош кивалтӥсьёссэ со «пичи уллё» шуыса нимаз но вераз, солэн «мукет ыжъёсыз» но вань на шуыса, кудъёсыз та группае уг пыро (Лука 12:32; Иоанн 10:16).

2. Инмарлэн Эксэйлыкез зэмос шонерлык ваёз. Иисус вераз, Эксэйлык быдӟым шонерлыктэм ужез быдтоз шуыса. Со Инмарлэсь нимзэ дун-чылкыт кароз но солэсь данзэ берыктоз, малы ке шуоно Едемын бугыръяськон дырысен ини Инмарлэн нимыз Шайтанэн сантэмамын (Матфей 6:9, 10). Иисус вылтус шоры ӧз учкы, со дышетӥз котькинэ — пиосмуртъёсты но кышномуртъёсты, узыръёсты но куанеръёсты. Иисус израиль калык доры ыстэмын вал ке но, со озьы ик юрттӥз самаритянъёслы но мукет калыкысь адямиослы. Со дыръёсысь религиозной кивалтӥсьёслэсь Иисус пӧртэм вал, со нокин шоры но азьвыл ик урод малпанэн ӧз учкы.

3. Инмарлэн Эксэйлыкез та дуннелэн люкетэз уз луы. Иисус политика удысын вошъяськонъёс дыръя улӥз. Солэн вордӥськем музъеменыз мукет кун кивалтӥз. Нош куке калык сое эксэй карыны малпа вал, со кошкиз (Иоанн 6:14, 15). «Мынам Эксэйлыке та дуннелэсь ӧвӧл»,— шуиз Иисус одӥг кивалтӥсьлы (Иоанн 18:36). Дышетскисьёсызлы вазиськыса, со вераз: «Тӥ дуннелэн ӧвӧл» (Иоанн 15:19). Со ӧз лэзьы дышетскисьёссэ ожтӥрлык кутыны соку но, куке соос сое утьыны тыршизы (Матфей 26:51, 52).

4. Христослэн кивалтэмезлэн инъетэз луоз яратон. Иисус кылзэ сётӥз, со адямиосты буйгатоз но соослэсь зӥбетсэс капчиятоз шуыса (Матфей 11:28—30). Сётэм кылзэ со быдэстӥз. Солэн дуно визь-кенешъёсысьтыз мур сюлмаськемез шӧдӥське вал. Иисус валэктӥз, кызьы сюлэмшугъяськонъёслэсь палэнсконо, адямиосын кусыпъёсты тупатоно, ваньбур люкан сьӧлтэтлэсь утиськоно но кызьы шудо луоно (Матфей, 5—7-тӥ люкетъёс). Яратӥсь луэменыз, пӧртэм адямиос — синазькыль каремъёсыз но, ултӥямъёсыз но — трос кузя со доры кыстӥськизы. Соос тодӥзы, Иисус соосын ассэ ӟеч возёз но соосты гажалоз шуыса. Макем умой Кивалтӥсь со луоз!

Инмарлэн Эксэйлыкез сярысь тодытыса, Иисус адямиосты дышетэм сяна, трос паймымон ужъёс лэсьтӥз на. Малы? Ойдолэ учкомы.

Пыкиськемын: Матфей, Марк, Лука но Иоанн книгаос.