ИЗРАИЛЕН но Иудаен эксэйёс кивалтон дыръя бадӟым инты басьтӥзы нимысьтыз адямиос — Инмарлэн пророкъёсыз. Кышкатэк но юн оскыса, соос Инмарлэсь эриксэ веразы. Эскеромы ньыль валтӥсь темаосты, кудъёсыз усьтӥсько соослэн азьпалзэ ивортонъёсазы.

1. Иерусалимез куашкатон. Иерусалимез куашкатонлэсь кемалы азьлогес Инмарлэн пророкъёсыз, кылсярысь, Исаия но Иеремия, алӥзы, кар куашкатэмын но кельтэмын луоз шуыса. Соос яркыт кылъёсын возьматӥзы, малы со Инмарлэсь вожзэ поттӥз. Иерусалимын улӥсьёс Иеговалэн ужась-тыршисьёсыз шуыса нимаськыны ярамон ӧй вал ни, малы ке шуоно со карын сульдэръёслы-идолъёслы йыбыртъян, юрӟым но лек ужъёс вӧлмемын вал (4 Эксэйлыкъёслэн 21:10—15; Исаия 3:1—8, 16—25; Иеремия 2:1—3:13).

2. Зэмос Инмарлы чылкыт йыбырттонэз выльысь берыктон. 70 ар пленын улэм бере, Инмарлэн калыкез Вавилонысь мозмытэмын луоз. Израиль калык бушам музъемаз берытскоз но Иерусалимын Иеговалэсь храмзэ выльысь пуктоз (Иеремия 46:27; Амос 9:13—15). Ог 200 арлэсь азьлогес Исаия азьпалзэ ивортыса вераз, солэн, кин Вавилонэз киултоз но Инмарлэн калыкезлы чылкыт йыбырттонзэс берыктыны лэзёз, нимыз луоз Кир. Озьы ик пророк пыр-поч вераз ожгарчиосын кивалтӥсьлэн ожмаськон амалэз сярысь (Исаия 44:24—45:3).

3. Мессиялэн лыктонэз. Мессия Вифлеемын вордӥськоз (Михей 5:2). Со Иерусалиме ишак вылын пыроз, мар возьматэ солэсь зӥбыт-востэм луэмзэ (Захария 9:9). Со востэм но ӟеч сямо луиз ке но, тросэз сое кулэ уз каре (Исаия 42:1—3; 53:1, 3). Мессия курадӟыса кулоз, но со улонзэ пыраклы уз ышты. Солэн сётэм курбонэзлы луыса, трос адямиослэн сьӧлыкъёссы куштэмын луозы (Исаия 53:4, 5, 9—12). Сыӵе луонлык усьтӥськоз, куке со улӟытэмын луоз.

4. Мессиялэн музъемен кивалтэмез. Тырбыдэстэм адямиослэн кивалтэмзы тупаса улон вайыны уг быгаты, нош Мессия Эксэй «Тупаса улонлэн Эксэез» шуыса нимаськоз (Исаия 9:6, 7; Иеремия 10:23). Со кивалтыку, вань адямиос ог-огенызы но пудо-животъёсын тупаса улозы (Исаия 11:3—7). Висёнъёс уз луэ ни (Исаия 33:24). Кулон но пумтэм вапумъёслы ньылэмын луоз (Исаия 25:8). Нош соос, кинъёс кулӥзы, музъем вылын улыны улӟытэмын луозы (Даниил 12:13).

Пыкиськемын: Исаия, Иеремия, Даниил, Амос, Михей но Захария книгаос.