ЕГИТ Даниилэз, кудӥз Инмарлы юн осконэныз висъяськиз, Иерусалимез куашкатэмлэсь азьло ик Вавилонэ нуизы. Солы но куд-ог мукет еврейёслы — киултэм Иуда эксэйлыкысь пленэ нуэмъёслы — вавилон пиос кӧня ке эрик сётӥзы. Инмар бакель кариз Данииллэсь Вавилонын кема улонзэ. Со утиз пророкез левъёс пӧлын мур гуын кулонлэсь но адӟонъёс пыр возьматӥз кыдёкысь азьпал улонэз. Данииллэн валтӥсь азьпалзэ ивортонъёсаз саклык висъяськиз Мессиялы но солэн кивалтэмезлы.

Даниил тодэ, ку лыктоз Мессия. Данииллы верамын вал, Иерусалимез выльдыны-ӝутыны косон потэм бере 69 пол сизьым ар ортчыса, Христос, яке Мессия, лыктоз шуыса. Со косон потӥз а. э. азьло 455-тӥ арын, Даниил кулэм бере трос аръёс ортчыса. Озьыен, 69 пол сизьым ар кутскиз а. э. азьло 455-тӥ арын, кыстӥськиз 483 ар но йылпумъяськиз а. э. 29-тӥ арын. Со сярысь, мар соку луиз, тодомы мукет люкетысь. Со сяна, Даниил азьло ик вераз, Мессия сьӧлыкъёсты басьтон понна виемын луоз шуыса (Даниил 9:24—26).

Мессия инмын Эксэй луоз. Данииллы Мессия сярысь паймымон адӟон возьматэмын вал: инмын «Адями Пилы укшась» мынӥз но, со Иеговалэн престолэз азе султӥз. Инмар солы «кужым, данлык, эксэйлык» сётӥз. Со Эксэйлык пумтэм вапумъёс ӵоже луоз. Даниил Мессиялэн Эксэйлыкез сярысь эшшо паймымонзэ тодӥз на: солэн Эксэез огназ уз кивалты, соин ӵош кивалтозы соос, кинъёс «Вылысь Инмарлэн дун-сьӧлыктэм» калыкез шуыса нимамын (Даниил 7:13, 14, 27).

Эксэйлык дунне вылысь вань кивалтэтъёсты быдтоз. Инмар Данииллы юрттӥз валэктыны уйвӧтэз, кудӥз Вавилонлэсь эксэйзэ, Навуходоносорез, мур малпаськонэ уськытӥз. Эксэй уйвӧтаз туж бадӟым сульдэрез адӟиз. Солэн йырыз зарнилэсь лэсьтэмын, гадьыз но киосыз—азвесьлэсь, кӧтыз но макесъёсыз—ыргонлэсь, пыдъюмылъёсыз—кортлэсь, нош пыдпыдэсъёсыз—горд сюен сурам кортлэсь. Гурезьысь из палдыса, пырдӥсь пыдпыдэсъёсыз борды шуккиськиз но сульдэрез пазьгиз. Пророк валэктӥз, сульдэрлэн люкетъёсыз — со валтӥсь кунъёс, кудъёсыз ог-огзэс вошто. Нырысетӥез соос пӧлысь луэ Вавилон, сульдэрлэн зарни йырыз. Даниил азьло ик вераз, та сьӧлыклэсь кышкасьтэм дуннелэн берпуметӥ валтӥсь кунэз кивалтыку, Инмарлэн Эксэйлыкез малпам ужъёссэ быдэстыны кутскоз шуыса. Со музъем вылысь вань кивалтэтъёсты пазьгоз, нош ачиз пумтэм вапумъёс ӵоже сылоз (Даниил, 2-тӥ люкет).

Мур пересьмыса, Даниил Вавилонлэсь куашкамзэ адӟиз. Пророкъёслэн верамзыя ик, Кир эксэй вормыны луонтэм карез киултӥз. Ӝоген еврейёс пленысь мозмытэмын вал но верам дыре—70 ар ортчыса—буш кылем музъемазы берытскизы. Инмарлы оскымон кивалтӥсьёс, священникъёс но пророкъёс валтэм улсын, соос Иерусалимез выльысь ӝутӥзы но Иеговалэсь храмзэ лэсьтыса быдэстӥзы. Ойдолэ учкомы, мар луиз, куке со 483 аръёс ортчизы.

Пыкиськемын: Даниил книга.