2-ТӤ ЛЮКЕТ
Рай ыштэмын
Бугыръяськись кылчин нырысетӥ пиосмуртлэсь но кышномуртлэсь, Адамлэсь но Евалэсь, мылкыдзэс ӝутэ Инмарлэсь кивалтэтсэ палэнтыны. Озьы сьӧлык но кулон дуннее пыро
АДЯМИОСТЫ кылдытэмлэсь кемалы азьлогес, Инмар кылдытӥз туж-туж трос кылчинъёсты — адӟиськисьтэм духовной кылдытэмъёсты. Едемын бугыръяськись кылчин, кудӥз Шайтан Дьявол шуыса нимамын, кескич амалэн Евалэсь мылкыдзэ ӝутӥз сиыны со писпулэсь емышсэ, кудӥзлэсь Инмар сиыны ӧз лэзьы вал.
Кый пыр Шайтан вераз, Инмар маке но умойзэ кышномуртлэсь но солэн картэзлэсь ватэ шуыса. Пумит ӝутскем кылчин Евалы вераз, соос, сиыны лэзьымтэ емышез сиизы ке, уз кулэ шуыса. Озьы Шайтан Инмарез янгыше уськытӥз, со аслэсьтыз музъем вылысь пиналъёссэ пӧя шуыса. Дьявол Инмарлэсь кылзӥськытэк улонэз синмаськымон карыса возьматӥз но валэктӥз, со аспӧртэмлыко тодон-валан но эрик сётэ шуыса. Но со пӧяськон вал — музъем вылын нырысетӥез верам пӧяськон. Зэмзэ вераса, вераськон мынӥз Инмарлэн кивалтонэз, яке вылӥ кивалтэт, сярысь. Таӵе юанъёс ӝутэмын вал: вань-а Инмарлэн кивалтыны правоез, кивалтэ-а Иегова кивалтэмез улсын улӥсьёсызлэсь кулэяськонъёссэс лыдэ басьтыса но шонерлыко?
Ева Шайтанлы оскиз. Сиыны лэзьымтэ емыш табере солэн син азяз туж чебер адӟиськиз, соин ик со емышез сиыны кутскиз. Собере Ева картэзлы но сиыны сётӥз,— со но сииз. Озьы соос сьӧлыказы. Огшоры гинэ емышез веръяса, зэмзэ верано ке, соос Инмарлы пумит ӝутскизы. Адам но Ева Инмарлэсь курон-косонзэ валаса вылысь тӥязы но озьы палэнтӥзы кивалтэтсэ Кылдытӥсьлэсь, кудӥз соослы ваньзэ сётӥз, дун-шектэм улонэз но.
Кидыс-Выжы «тынэсьтыд йырдэ сузмытоз, нош тон солэн пыдтышказ лекалод» (Улон-вылон 3:15)
Инмар бугыръяськисьёсты кыл кутытӥз. Со азьло ик вераз, Кидыс-Выжы, яке Мозмытӥсь, лыктоз шуыса, кудӥз кыез, Шайтанэз, быдтоз. Инмар Адамез но Еваез соку ик ӧз быдты, озьы соослэн вордӥськымтэ нылпиоссылы гажан-жалянзэ возьматӥз. Инмар малпаз ыстыны сое, кин Едемын луэм бугыръяськонлэсь урод бервылъёссэ быдтоз, кинлы луыса, адямиослэн оскиськыны мугзы луоз. Кызьы Инмар та малпанзэ быдэстоз но кин луоз сӥзем Утись? Со сярысь дыр ортчемъя тодмо луиз — Библиез гожъямъя.
Инмар Адамез но Еваез райысь улляз. Соослы, ымныртӥзы нюлам вузы бызьыса, Едем сад сьӧрысь музъем бордын ужаны кулэ луиз. Ева секытэн луиз но нырысетӥ нылпизэ, Каинэз, вайиз. Дыр ортчыса, Адамлэн но Евалэн мукет пиоссы но нылъёссы вордӥськизы на, соос пӧлын вал Авель но Сиф, кудӥзлэн выжыысьтыз потэмын Ной.
Пыкиськемын: Улон-вылон, 3—5-тӥ люкетъёс; Усьтӥськон 12:9.
