1, 2. Мар сярысь малпаськоно но малы?

БИБЛИЕЗ дышетыса, тӥ тодӥды, Инмарлы уг кельшы шуыса со, малы дышето но мае лэсьто тросэз соос пӧлысь, кинъёс асьсэды оскись шуо (2 Коринфъёслы 6:17). Иегова милемыз зэмос луисьтэм религиысь, «Быдӟым Вавилонысь», потыны косэ (Усьтӥськон 17:5; 18:2, 4). Мар кароды тӥ? Котькудмылы тани мар сярысь малпаськоно: «Кызьы мынам Инмарлы йыбыртъяме потэ: озьы, кызьы Инмар возьма, яке озьы, кызьы мон дышемын?»

² Туж умой, тӥ зэмос луисьтэм религиысь потӥды ке ини. Озьы ке но, оло нош, тӥледлы азьвыл сямен ик кельшо зэмос луисьтэм религиен герӟаськем куд-ог сямъёс. Ойдолэ вераськомы куд-ог паськыт вӧлмем сям-йылолъёс сярысь но тодомы, малы соос шоры учконо озьы ик, кызьы учке Инмар.

3. а) Малы кинлы ке секыт луыны быгатэ Инмарлы тус-суредъёстэк йыбыртъяны? б) Мар верамын Библиын соосты уже кутон сярысь?

³ Куд-ог адямиос трос аръёс ӵоже ини, Инмарлы йыбырттыкузы, тус-суредъёсты, сульдэръёсты яке мудоръёсты уже куто. Оло нош, тӥ но  дышемын Инмарлы озьы йыбыртъяны. Соин ик, кин ке со арбериостэк Инмарлы йыбыртъя ке, со тӥледлы паймымон, оло шонертэм но потэ, дыр. Но эн вунэтэ: Инмар гинэ вераны быгатэ, кызьы солы йыбыртъяно. Библиын валамон верамын, Иеговалэн уг поты, солы йыбырттыкумы, ми мудоръёсты, сульдэръёсты яке мукет со выллем арбериосты уже мед кутомы шуыса. (Лыдӟе Потонэз 20:4, 5; Псалтирь 113:12—16; Исаия 42:8; 1 Иоанн 5:21.)

4. а) Малы кулэм ӵыжы-выжыослы йыбыртъяны уг яра? б) Малы Иегова израиль калыклы кулэмъёсын вераськыны ӧз лэзьы?

⁴ Куд-ог адямиос трос дырзэс но кужымзэс быдто, кулэм ӵыжы-выжыоссы медаз уродъяське шуыса. Оло нош, соос соослы йыбыртъяло но. Нош, кызьы ми тодӥмы ини, кулэмъёс милемлы умойзэ но, уродзэ но лэсьтыны уг быгато. Кулэм беразы соос нокытын но уг уло ни. Соосын кызьы ке герӟаськыны тыршимы ке, со туж кышкыт, малы ке шуоно ваньзэ, мае адямиос малпало, кулэм ӵыжы-выжыоссы лэсьто шуыса, зэмзэ вераса, периос лэсьто. Тӥни малы Иегова израиль калыклы кулэмъёсын вераськыны ӧз лэзьы. Соослы нокыӵе амалэн но периосын кусып возьыны уг яра вал (Кыкетӥ Закон 18:10—12; учке 26-тӥ ватсам валэктонэз но 31-тӥ ватсам валэктонэз).

5. Мар юрттоз тӥледлы куштӥськыны тус-суредъёсты уже кутыса Инмарлы йыбыртъянлэсь но кулэм ӵыжы-выжыосты сӥлы каронлэсь?

⁵ Озьыен, тус-суредъёсты уже кутыса Инмарлы йыбыртъяны, нош озьы ик кулэм ӵыжы-выжыосты  сӥлы карыны — шонертэм. Нош мар юрттоз милемлы солэсь куштӥськыны? Библиез лыдӟе но малпаське, кызьы Иегова сыӵе йыбырттон шоры учке. Со солы юрӟым потэ (Кыкетӥ Закон 27:15). Котькуд нунал вӧсяське Иеговалы но куре, со тӥледлы мед юрттоз шуыса сыӵе йыбырттон шоры солэн синмыныз учкыны но солы йыбыртъяны озьы, кызьы солэн потэ (Исаия 55:9). Иегова тӥледлы одно ик кужым сётоз, тӥ куштӥськыны мед быгатоды шуыса ваньмызлэсь, мар зэмос луисьтэм йыбырттонэн герӟаськемын.

6. Малы Иисус Христослэсь вордскем нуналзэ 25-тӥ толсуре пусйыны кутскизы?

⁶ Дуннеын тужгес но вӧлмем праздник — со Иисус Христослэсь вордӥськон нуналзэ пусъён. Нош тодӥськоды вал-а тӥ, со праздник зэмос луисьтэм религиен герӟаськемын шуыса? Одӥг энциклопедиын валэктэмын, 25-тӥ толсуре Рим империын улӥсь язычникъёс шундылэсь вордскем нуналзэ пусъё вал шуыса. Священникъёслэн потэ вал, язычникъёс христиан осконэ мед выжозы шуыса, соин ик со нуналэз соос Иисус Христослэн вордскем нуналэныз ялӥзы. Но Иисус со нуналэ ӧз вордӥськы * (Лука 2:8—12). Иисуслэн нырысетӥ дышетскисьёсыз солэсь вордскем нуналзэ уг пусъё вал. Одӥг книгаын верамын, Христос  вордӥськем бере 200 аръёс ӵоже «туж ӧжытэз малпаськиз со сярысь, ку со вордӥськиз; адямиос со нуналэз уг тодо вал» (Sacred Origins of Profound Things). Иисус кулэм бере 300 арлэсь тросгес ортчыса гинэ, солэсь вордскем нуналзэ пусйыны кутскизы.

7. Малы зэмос христианъёс Иисуслэсь вордскем нуналзэ уг пусъё?

⁷ Тросэз адямиос тодо, Иисуслэн вордскем нуналэныз герӟаськем сям-йылолъёс, кылсярысь, кузьымъёс кузьман яке огазе люкаськыса ӝӧк сьӧрын пукон, христиан луисьтэм религиосысь пото шуыса *. Соин вал сыӵе вакыт, куке Англиын но Америкалэн куд-ог интыосаз Иисуслэсь вордскем нуналзэ пусйыны уг яра вал. Нош кин пусъе вал, солы штраф сёто вал. Дыр ортчыса адямиос нош ик со праздникез пусйыны кутскизы. Зэмос христианъёс Иисуслэсь вордскем нуналзэ уг пусъё, малы ке шуоно соослэн Инмарлэсь кылзӥськемзы потэ.

8, 9. Малы нырысетӥ христианъёс вордскем нуналъёсты уг пусъё вал?

⁸ Адямиослэн эшшо одӥгез яратоно праздниксы — со вордскем нунал. Яра-а христианъёслы со праздникез пусйыны? Библиын верамын куд-ог адямиос сярысь, кудъёсыз вордскем нуналъёсты пусъё вал. Но соос Иеговалы уг йыбыртъяло  вал (Улон-вылон 40:20; Марк 6:21). Сыӵе праздникъёс дыръя адямиос зэмос луисьтэм инмаръёсты данъязы. Соин ик, кызьы верамын одӥг энциклопедиын, нырысетӥ христианъёс «котькыӵе вордскем нуналэз пусъёнэз зэмос луисьтэм религилэн сямыныз лыдъяло вал» (The World Book Encyclopedia).

⁹ Вашкала рим но грек калыкъёс оско вал, адями кыӵе ке инмарлэн вордскем нуналаз вордӥське шуыса. Соос малпало вал, со адямилы аслэсьтыз вордскем нуналзэ одно ик пусйыны кулэ шуыса, соку инмар, кудӥзлэн вордскем нуналаз со вордӥськиз, сое вань улытозяз утёз.

10. Малы христианъёслы вордскем нуналъёсты пусъёно ӧвӧл?

¹⁰ Кызьы Иегова учке зэмос луисьтэм религиен герӟаськем праздникъёс шоры? (Исаия 65:11, 12). Соос солы уг ярало. Соин ик ми ум пусйиське вордскем нуналъёсты но, мукет праздникъёсты но, кудъёсыз зэмос луисьтэм религиен герӟаськемын.

11. Малы адямиослы кельше праздникъёсты пусйыны? Мар ми понна нырысетӥ интыын луыны кулэ?

¹¹ Куд-ог адямиос тодо, Иисуслэсь вордскем нуналзэ пусъён но мукет праздникъёс зэмос луисьтэм религиысь потэмын шуыса. Озьы ке но соос соосты пусъё. Соос малпало, праздникъёс семьяенызы дырзэс ортчытыны луонлык сёто шуыса. Нош тӥ кызьы малпаськоды? Веранэз ӧвӧл, дырез семьяен ортчытыны кулэ. Иегова — семьяез  кылдытӥсь, соин ик солэн потэ, адямиослэн семья пушказы кусыпъёссы умой мед луозы шуыса. Зэм, ми соглаш луимы ке ӵыжы-выжыосынымы зэмос луисьтэм религиен герӟаськем кыӵе ке праздникез пусйыны, ми соосыз шумпоттомы, но Иеговаен кусыпъёсмы сӧриськозы. Нош ми понна нырысетӥ интыын луэ Иеговаен матысь кусыпъёсмес утён. Соин ик апостол Павел вераз: «Инмарлы ярамон луоноез сярысь тодыны тырше» (Ефесъёслы 5:10).

12. Кыӵе праздникъёс Иеговалы уг ярало?

¹² Тросэз адямиос малпало, сокем тодыны но кулэ ӧвӧл шуыса, кытысь праздникъёс пото. Нош Иегова озьы уг малпа. Солы уг ярало зэмос луисьтэм религиен герӟаськем праздникъёс. Озьы ик солы уг ярало кыӵе ке адямиез яке шаерез данъясь праздникъёс. Кылсярысь, египет калыклэн трос праздникъёсыз вал, кудъёсыз зэмос луисьтэм инмаръёсызлы сӥземын вал. Куке израиль калык Египетысь потӥз, со пусйыны кутскиз одӥг праздникез, кудзэ пусъе вал египет калык. Со праздникез израиль калык «Кузё-Инмарлэн праздникез» шуыса нимаз ке но, сое пусъемез понна Иегова сое кыл кутытӥз (Потон 32:2—10). Библия ӧте милемыз: «Мар чылкыт ӧвӧл, со борды эн йӧтӥське». (Лыдӟе Исаиялэсь 52:11.)

13. Кыӵе юанъёсты кылдыны быгатозы, тӥ ужпум кутӥды ке, праздникъёсты уд пусъе ни шуыса?

¹³ Тӥ ужпум кутӥды ке праздникъёсты уд пусъе ни шуыса, тӥ малпаськиськоды, луоз: «Мар мон  верало, ӵош ужасьёсы юазы ке, малы мон со яке та праздникез соосын ӵош уг пусйиськы? Мар кароно, празднике мыным кузьым кузьмало ке? Мар кароно, кузпалы соин ӵош праздникез пусйыны куре ке? Мар кароно, нылпиос ӝоже медаз усе, ми соослэсь вордскем нуналзэс яке мукет праздникез ум пусйиське шуыса?»

14, 15. Мар кароно, тӥледыз праздникен ӟечкылало яке кузьым кузьмало ке?

¹⁴ Югдуръёс пӧртэм луыны быгато. Соин ик котьку умой малпаськоно, мар верано но мар кароно. Кылсярысь, кин ке тӥледыз праздникен ӟечкыла ке, тӥ солы тау карыны быгатоды. Нош со адямилэн тодэмез потэ ке, малы тӥ со праздникез уд пусйиське, тӥ тросгес вераны быгатоды асьтэлэн осконды сярысь. Но котьку лякытэн но гажаса вераське. Библия визь-кенеш сётэ: «Калыкен котьку визьмо, лякыт кылын вераське, отын сылалэз мед луоз,— тодэ кызьы кулэ котькудӥзлы адямилы ответ сётыны» (Колоссыослы 4:6). Кылсярысь, вераны луоз, тӥледлы эшъёсыныды ӵош дырдэс ортчытыны но кузьымъёс кузьманы кельше шуыса, нош тӥляд уг поты сое каремды кыӵе ке празднике.

¹⁵ Нош тӥледлы кузьым кузьмало ке? Со пумысен Библиын шонерак верамын ӧвӧл. Но отын верамын, тӥляд сюлэмды, яке возьытлыкты, чылкыт луыны кулэ шуыса (1 Тимофейлы 1:18, 19). Со, кин тӥледлы кузьым кузьма, уг тоды, вылды, тӥ со праздникез уд пусйиське шуыса.  Яке тодэ, но вера: «Тон та праздникез уд пусйиськы ке но, мынам тыныд кузьым кузьмаме потэ». Сояз но, таяз но учырын тӥ асьтэос ужпум кутыны кулэ: кузьымез басьтоно яке ӧвӧл. Нош кыӵе гинэ ужпум тӥ медад кутэ, возьытлыкты чылкыт луыны кулэ. Милям уг поты кареммы сое, мар Иеговаен кусыпъёсмес сӧроз.

16. Мар кароно, семьяды кыӵе ке праздникез пусйыны малпа ке?

¹⁶ Мар кароно, семьяды кыӵе ке праздникез пусйыны малпа ке? Кулэ ӧвӧл споръяськыны — тодады возе, котькуд адями ачиз ужпум кутыны быгатэ шуыса. Лякытэсь луэ но гажалэ соослэсь кутэм ужпумзэс, малы ке шуоно тӥляд но потэ, дыр, соос тӥлесьтыд кутэм ужпумдэс мед гажалозы шуыса. (Лыдӟе Матфейлэсь 7:12.) Нош семьядылэн потэ ке, праздник дыръя тӥ соосын ӵош мед луоды шуыса? Нырысь ик Иеговалы вӧсяське. Куре сое юрттыны тӥледлы шонер ужпум кутыны. Тырше тросгес тодыны со праздник сярысь но со сярысь, кызьы сое пусъёзы. Ужпум кутыкуды, тодады возе: валтӥсез — Иеговаез шумпоттон.

17. Мар тӥ карыны быгатӥськоды, мукет адямиослэсь праздникъёсты пусъемзэс адӟыса, нылпиосты ӝоже медаз усе шуыса?

¹⁷ Мар карыны луоз, мукет адямиослэсь праздникъёсты пусъемзэс адӟыса, нылпиосты ӝоже медаз усе шуыса? Дырын-дырын тӥ быгатоды соослэсь эшъёссэс люканы но соослы праздник карыны. Тӥ соослы нокыӵе мугтэк кузьымъёс  кузьманы быгатоды. Одӥгез тужгес но умой кузьым — со тӥляд дырды но яратонды.

18. Малы Иеговалэн Адӟись-Ивортӥсьёсызлэн пумиськонъёсазы ветлоно?

¹⁸ Иеговаез шумпоттон понна, кулэ потыны зэмос луисьтэм религиысь. Озьы ик кулэ дугдыны соин герӟаськем сям-йылолъёсты чакламысь но праздникъёсты пусъемысь. Но со гинэ тырмыт ӧвӧл — Инмарлы шонер йыбыртъяны кутсконо. Кызьы? Кылсярысь, Иеговалэн Адӟись-Ивортӥсьёсызлэн пумиськонъёсазы ялан ветлоно. (Лыдӟе Еврейёслы 10:24, 25.) Кенешлэн пумиськонъёсыз Инмарлы йыбырттонын бадӟым инты басьто (Псалтирь 21:23; 121:1). Со сяна, сыӵе пумиськонъёсын ми ог-огмес юнматыны быгатӥськомы (Римъёслы 1:12).

19. Малы туж кулэ мукетъёсызлы вераны сое, мае тӥ Библиысь тодӥды?

¹⁹ Озьы ик кулэ на мукетъёсызлы вераны сое, мае тӥ Библиысь тодӥды. Троссэ адямиосты сюлмаськытэ, дунне вылын туж трос лек ужъёс шуыса. Тӥлесьтыд тодмоостэс но со сюлмаськытэ, вылды. Вералэ соослы, кыӵе умой улон возьма милемыз азьланяз. Иеговалэн Адӟись-Ивортӥсьёсызлэн пумиськонъёсазы ветлыса но Библиысь тодэмды сярысь мукетъёсызлы вераса, тӥ валалоды, тӥляд уг поты ни, тӥледыз мар ке но зэмос луисьтэм религиен мед герӟалоз шуыса. Эн вунэтэ: тӥ Иеговалы шонер йыбыртъяды ке, со тӥледыз бакель кароз но тӥ трос шумпотон басьтоды! (Малахия 3:10).