1. Малы тодыны кулэ, мар вера Библия кылчинъёс сярысь?

ИЕГОВАЛЭН потэ, ми кылчинъёс сярысь зэмлыкез мед тодомы шуыса, малы ке шуоно соос солэн семьяез пӧлы пыро. Библия кылчинъёсты «Инмар пиос» шуыса нима (Иов 38:7). Мар каро кылчинъёс? Юртто-а соос адямиослы? Быгато-а соос милемлы юрттыны? (Учке 8-тӥ ватсам валэктонэз.)

2. Кытысь кылчинъёс потӥзы но кӧня соос?

² Кытысь кылчинъёс потӥзы? Колоссыослы 1:16 гожтэмын, Иисусэз кылдытэмез бере Иегова кылдытӥз шуыса ваньзэ, «мар вань Инмын, мар вань музъем вылын», озьы ик кылчинъёсты но. Нош кӧня соос? Библия вера, трос миллион кылчинъёс кылдытэмын вал шуыса (Псалтирь 102:20; Усьтӥськон 5:11).

3. Мар гожтэмын Иов книгаын 38:4—7 кылчинъёс сярысь?

³ Библиын верамын, Иегова кылчинъёсты музъемлэсь азьло кылдытӥз шуыса. Кызьы гожтэмын Иов книгаын, кылчинъёс туж шумпотӥзы, Иеговалэсь музъемез кылдытэмзэ адӟыса. Со вакытэ кылчинъёс ваньзы ӵош, одӥг семья кадь, Иеговалы ужало-тыршо вал (Иов 38:4—7).

4. Кытысь ми тодӥськомы, кылчинъёслэн адямиослы юрттэмзы потэ шуыса?

⁴ Кылчинъёслэн адямиослы юрттэмзы потэ но тодэмзы потэ, кызьы музъем вылын Инмарлэн малпанэз  быдэсмоз (1 Пётр 1:11, 12). Веранэз ӧвӧл, кылчинъёс туж ӝожомизы, куке Адам но Ева Инмарлэсь кылзӥськытэк улыны малпазы. Туннэ тросэз адямиос Иеговалэсь уг кылзӥсько. Со кылчинъёсты эшшо но золгес ӝоже уськытэ, дыр. Тӥни малы кылчинъёс шумпото, куке адямиос пӧлысь кин ке ӧпкеле но Инмар доры лыктэ (Лука 15:10). Кылчинъёс котьку дась юрттыны соослы, кинъёс Инмарлы ужало-тыршо. Куке Иеговалэн ужась-тыршисьёсызлы юрттэт кулэ яке утёно соосты, Иегова аслэсьтыз кылчинъёссэ ыстэ (Еврейёслы 1:7, 14). Эскеромы куд-ог примеръёсты.

5. Кызьы кылчинъёс азьло дыръёсы Инмарлэн ужась-тыршисьёсызлы юрттӥзы?

⁵ Иегова кык кылчинъёсты ыстӥз, Содом но Гоморра каръёс куашкаку, Лотэз но солэсь семьязэ утён понна (Улон-вылон 19:15, 16). Куке Даниил пророкез левъёс пӧлы гуэ куштӥзы, Инмар «Аслэсьтыз Кылчинзэ ыстӥз но сьӧсь пӧйшуръёслэсь ымзэс пытсаз». Озьы Даниил утемын вал (Даниил 6:22). Берлогес Иегова кылчинэз ыстӥз, апостол Пётрез пытсэтысь мозмытон понна (Апостолъёслэн ужъёссы 12:6—11). Куке Иисус музъем вылын вал, кылчинъёс солы но юрттӥзы. Кылсярысь, Библиын верамын, Иисус пылатӥськем бере ик, «Кылчинъёс Солы юрттӥськыса улӥзы» шуыса (Марк 1:13). Нош Иисусэз кортӵоган азьын одӥгез кылчин «Сое юнматыса улӥз» (Лука 22:43).

6. а) Кытысь ми тодӥськомы, кылчинъёс милемлы юртто шуыса? б) Кыӵе юанъёсты ми эскеромы?

⁶ Туннэ кылчинъёсты адӟыны уг луы. Но Инмар азьвыл сямен ик соос пыр адямиослы юрттэ.  Библиын гожтэмын: «Кузё-Инмарлэн Кылчинэз Солэсь кышкасьёс котыре интыяське но соосты уте» (Псалтирь 33:8). Малы милемлы кулэ, кылчинъёс милемыз мед утёзы шуыса? Малы ке шуоно милям кужмо но лек тушмонъёсмы вань. Кинъёс со? Кытысь соос потӥзы? Но кызьы соос милемлы уродзэ лэсьтыны тыршо? Та юанъёслы валэктонъёс шедьтон понна, ойдолэ тодамы ваёмы, мар луиз Инмар Адамез но Еваез кылдытэм берегес ик.

7. Мар каризы адямиос, Шайтан соосты пӧямен сэрен?

⁷ Кызьы ми тодӥмы 3-тӥ люкетысь, одӥг кылчин Инмарлы пумит султӥз но солэн мукетъёсыныз кивалтэмез потӥз. Библия сое Шайтан Дьявол шуыса нима (Усьтӥськон 12:9). Шайтанлэн потэ вал, адямиос но Инмарлы пумит мед султозы шуыса. Со пӧяз Еваез, нош собере трос мукет адямиосты но. Озьы ке но куд-ог адямиос Иеговалы оскымон кылизы, кылсярысь, Авель, Енох но Ной (Еврейёслы 11:4, 5, 7).

8. а) Кызьы куд-ог кылчинъёс периос луизы? б) Мар каризы периос, ву тудӟон дыръя утиськон понна?

⁸ Ной улон нуналъёсы куд-ог кылчинъёс но Инмарлы пумит султӥзы. Соос инмысь улон интызэс кельтӥзы, музъем вылэ васькизы но адямиос кариськизы. Малы? Библиын верамын, соослэн кышномуртъёсты кышно басьтэмзы потӥз шуыса. (Лыдӟе Улон-вылонэз 6:2.) Кылчинъёслы озьы лэсьтыны уг яра вал (Иуда 6). Со лек кылчинъёслэсь адӟем карыса, тросэз адямиос сӧриськизы но туж лекесь луизы. Соин ик Иегова музъем вылэ ву тудӟон лэзьыны но лек адямиосты быдтыны малпаз. Нош аслэсьтыз оскымон ужась-тыршисьёссэ со утиз (Улон-вылон 7:17, 23). Утиськон понна лек кылчинъёслы берен инме ӝутсконо луиз. Библиын соос периос шуыса нимамын. Периос Шайтанлэн пумит ӝутсконаз пыриськизы. Озьы Шайтан соослэн кивалтӥсьсы луиз (Матфей 9:34).

9. а) Басьтӥз-а Инмар периосты берен аслаз семьяяз? б) Мае ми тодомы?

⁹ Пумит султэмзы понна Иегова периосты берен  аслаз семьяяз ӧз басьты ни (2 Пётр 2:4). Туннэ периос адями кариськыны уг быгато ке но, соос азьвыл сямен ик «быдэс дуннелэсь визьзэ» тугало (Усьтӥськон 12:9; 1 Иоанн 5:19). Ойдолэ эскеромы, кызьы соос сомында адямиослэсь визьзэс туганы, яке сомында адямиосты пӧяны, быгато. (Лыдӟе 2 Коринфъёслы 2:11.)

10. Мар каро периос, адямиосты пӧян понна?

¹⁰ Периос адямиосты пӧртэм амалэн пӧяло. Адямиос периосын пӧртэм сямен герӟасько, яке асьсэос, яке мукет адямиос пыр, кылсярысь, туно-пеллё яке ведӥн пыр. Периосын кусып возёнэз спиритизм шуыса нимало. Библиын верамын, милемлы матаз но лыктоно ӧвӧл шуыса со доры, мар периосын герӟаськемын (Галатъёслы 5:19—21). Малы? Малы ке шуоно со сьӧлтэт. Озьы ик, кызьы пӧйшурась пӧйшурез кутон понна сьӧлтэтэ пӧртэм гочатӥсь сиён тыре, озьы ик периос но адямиосты пӧртэм амалэн пӧяло. (Учке 26-тӥ ватсам валэктонэз.)

11. Мар со сыӵе тунаськон, пелляськон но веднаськон но малы милемлы солэсь палэнсконо?

¹¹ Одӥгез амал, кызьы периос адямиосты пӧяло,— со туно-пеллёос но ведӥнъёс пыр. Висёнъёсты эмъяны, адямиез сӧрыны яке мае ке мукетсэ карыны туно-пеллёослы но ведӥнъёслы кужым сёто периос. Кыӵе ке адямилы уродзэ лэсьтон понна, ведӥнъёс курыны быгатозы вайыны со адямилэсь дӥськутсэ, туспуктэмзэ, йырсизэ яке мае ке мукетсэ. Со сяна, периос пӧяло на сыӵе адямиос пыр, кудъёсыз картаосын тунасько, вӧтъёсты но пӧртэм тодметъёсты  чаклало. Со адямиослы но азьпалзэ тунаса яке мае ке тодмотэмзэ тодон понна кужым сёто периос. Тросэз малпало, сыӵе ужъёсын номыр уродэз ӧвӧл шуыса. Но со озьы ӧвӧл. Кылсярысь, Библия вера, периос но туноос ӵош ужало шуыса. Апостолъёслэн ужъёсысьтызы 16:16—18 ми лыдӟиськомы «азьпалзэ тодытыса верась урод дух» сярысь, кудӥз нылмуртлы тунаса вераны юрттэ вал. Нош куке апостол Павел периез улляса поттӥз, нылмурт азьпалзэ тунаса вераны ӧз быгаты ни.

12. а) Малы кулэмъёсын вераськыны кышкыт? б) Малы Инмарлэн ужась-тыршисьёсыз ноку но уз пыриське куд-ог ватон сямъёсы?

¹² Эшшо одӥгез амал, кызьы периос пӧяло,— со кулэмъёсын вераськон. Периослэн потэ, ми мед оскомы, кулэмъёс сопал дуннеын уло но милемын вераськыны яке милемлы уродзэ лэсьтыны быгато шуыса. Куд-огъёсыз, куке соослэн матысь эшсы яке ӵыжы-выжызы кулэ, мыно адямиос доры, кудъёсыз верало, кулэмъёсын вераськыны быгато шуыса. Со адямиос кулэм мурт сярысь мае ке но вераны быгато яке солэн куараеныз но вераськыны (1 Эксэйлыкъёслэн 28:3—19). Ми малпаны быгатомы, вераськиськомы шуыса соин, кин кулӥз, нош зэмзэ ке верано, со периосын вераськем луэ. Со сяна, адямиос оско, кулэм бераз адями сопал дуннее кошке но отын улэ шуыса. Соин ик тросэз адямиез ватон сямъёс герӟаськемын сопал дуннеын улонлы осконэн. Кылсярысь, кулэмъёсты буре ваё, яке кисьтон каро, кулэмъёслы кузьымъёс сёто яке адямиез ватыку трос пӧртэм сямъёсты чаклало. Ваньмыз со сямъёс периосын герӟаськемын. Христианъёс сыӵе сямъёсы пыриськыны  пумит луо ке, ӵыжы-выжыоссы но бускельёссы соосты урод кылъёсын вераны, ултӥяны яке соосын вераськемысь ик дугдыны быгато. Но христианъёс тодо, адямиос кулэм беразы сопал дуннее уг кошко, соосын вераськыны уг луы но соос милемлы уродзэ лэсьтыны уг быгато шуыса (Псалтирь 113:25). Соин ик чаклаське. Ноку но эн тырше вераськыны кулэм адямиосын яке периосын но со выллем сямъёсы эн пыриське. (Лыдӟе Кыкетӥ Законэз 18:10, 11; Исаия 8:19.)

13. Мар карыны быгатӥзы соос, кинъёс азьвыл периослэсь кышкаса улӥзы?

¹³ Адямиосты пӧям сяна, периос соосты кышкатыса но возё на. Шайтан но солэн периосыз тодо, Инмар соосты музъем вылысь палэнтытозь, соослы «ӧжыт дыр кылемын ни» шуыса, соин ик соос лекгес но лекгес луо (Усьтӥськон 12:12, 17). Но трос сюрс адямиос, кудъёсыз периослэсь кышкаса улӥзы, соослэсь кышкамысь дугдӥзы. Кызьы соос периослэсь кышканлэсь мозмытскизы?

14. Кызьы ми, Ефесысь христианъёс сямен, периослэсь мозмытскыны быгатомы?

¹⁴ Библия вера милемлы, кызьы ми периослэсь мозмытскыны быгатомы. Кылсярысь, отын верамын Ефес карын улӥсьёс сярысь, кудъёсыз Инмар сярысь зэмлыкез тодэмзылэсь азьло периосын кусып возизы. Кызьы соос периослэсь мозмытскыны быгатӥзы? Апостолъёслэн ужъёсазы 19:19 гожтэмын, тунаськонэн вырисьёс пӧлысь тросэз книгаоссэс люказы но вань калык азьын сутӥзы шуыса. Соослэн Христослэн дышетскисьёсыз луэмзы  потэ вал, соин ик соос тунаськонэн герӟаськем книгаоссэс сутӥзы. Озьы ик туннэ но: кинлэн ке Иеговалэн ужась-тыршисез луэмез потэ ке, солы куштоно ваньзэ, мар периосын герӟаськемын. Отчы пырыны быгато книгаос, журналъёс, гороскопъёс, фильмъёс, кырӟанъёс, шудонъёс, суредъёс — ваньмыз, мар периосын кусып возёнэз яке паймымон-валантэм ужъёсты тунсыкоен но кышкыттэмен возьматэ. Озьы ик отчы пыртыны луэ арбериосты, кудъёссэ лыдъяло, соос уродэзлэсь утьыны быгато шуыса (1 Коринфъёслы 10:21).

15. Мар эшшо милемлы кароно на, Шайтанлы но периослы пумит сылон понна?

¹⁵ Ефесысь христианъёс тунаськонэн герӟаськем книгаоссэс сутэм бере трос аръёс ортчыса но, апостол Павел ӧтиз соосты азьланяз но «урод духъёслы» пумит нюръяськыны (Ефесъёслы 6:12). Малы? Малы ке шуоно периос азьвыл сямен ик соослы уродзэ лэсьтыны тыршизы. Мар эшшо кароно на вал со христианъёслы? Апостол Павел гожтӥз: «Осконлэсь щитсэ кияды басьтэ, соин кескичлэсь ӟырдатыса лэзьям вань ньӧлъёссэ кысыны [яке дугдытыны] быгатоды» (Ефесъёслы 6:16). Кызьы щит ожгарчиез уте, озьы ик милям осконмы но милемыз утёз. Юн оскимы ке, Иегова милемыз утьыны быгатоз шуыса, ми Шайтанлы но периослы пумит сылыны быгатомы (Матфей 17:20).

16. Мар юрттоз милемлы осконмес юнматыны?

¹⁶ Мар юрттоз милемлы Иеговалы осконмес юнматыны? Котькуд нунал Библиез лыдӟоно но Иеговалы оскиськыны дышетсконо. Соку Шайтан но  периос милемлы уродзэ лэсьтыны уз быгатэ (1 Иоанн 5:5).

17. Кызьы эшшо ми периослэсь утиськыны быгатомы на?

¹⁷ Ефес карын тросэз адямиос периосын кусып возизы, соин ик апостол Павел отын улӥсь христианъёсты «ялан вӧсяськыса» улыны ӧтиз (Ефесъёслы 6:18). Со возьматэ вал, соослы ялан Иеговаез куроно вал, со соосты мед утёз шуыса. Нош милемлы? Ми но улӥськомы адямиос пӧлын, кудъёсыз периосын кусып возё. Соин ик милемлы но куроно Иеговаез, со милемыз мед утёз шуыса, но вӧсяськыкумы солы нимызъя вазиськоно. (Лыдӟе Мадёнъёсты 18:11.) Иеговаез куримы ке милемыз Шайтанлэсь утьыны, со милемыз одно ик кылоз (Псалтирь 144:19).

18, 19. а) Кызьы ми Шайтанэз но периосты вормыны быгатомы? б) Мае ми тодомы вуоно люкетысь?

¹⁸ Озьыен, ми куштӥмы ке ваньзэ, мар спиритизмен герӟаськемын, но оскимы ке, Иегова милемыз утёз шуыса, ми Шайтанлы но солэн периосызлы пумит сылыны быгатомы. Соослэсь кышкано ӧвӧл. (Лыдӟе Иаковлэсь 4:7, 8.) Иегова периослэсь трослы кужмогес. Ной улон нуналъёсы Инмар соосты кыл кутытӥз, нош вуонояз со соосты быдтоз (Иуда 6). Эн вунэтэ, ми огнамы ум нюръяськиське шуыса — Иегова милемыз кылчинъёсыз пыр уте (4 Эксэйлыкъёслэн 6:15—17). Ми оскыны быгатӥськомы: Иегова милемлы юрттоз но ми Шайтанэз но периосты вормыны быгатомы (1 Пётр 5:6, 7; 2 Пётр 2:9).

¹⁹ Нош Шайтан но солэн периосыз сомында курадӟонъёс ваё ке, малы Инмар соосты али ке но ӧз быдты на? Сое ми тодомы вуоно люкетысь.