Пукты син азяд таӵе югдурез: Анна Максимез кык толэзь гинэ тодэ ай, нош солы потэ, со Максимез вань улытозяз тодэ ини шуыса. Соос дугдылытэк ог-огзылы СМС ыстыло но быдэс часъёсын телефон пыр верасько. Одӥгез вераськонэз мытэ ке, мукетыз соку ик малпанзэ азьланьтэ.

Та кык толэзь ӵоже Максим но Анна китӥзы гинэ кутскыса ветлӥзы но ог-огзэс чупаллязы. Нош табере Максимлы со тырмыт ӧвӧл ни. Анналэн матэгес кариськемез уг поты али, но солэн Максимез но ыштэмез уг поты. Максимен гинэ со ассэ туж чебер но дуно шуыса шӧдэ. «Со сяна,— малпаське Анна,— ми ог-огмес яратӥськомы».

Тынад пумиськылыны арлыдыд вуэмын ке ини, мар тон карысалыд та выллем учырын?

Мар луоз, тон сюрес вамен, горд тыл ӝуаку, бызьыса потӥд ке? Со кышкыт бервылъёсы вуттыны быгатоз, малы ке шуоно тон катэз тӥяд. Озьы ик луоз, тон нравственность ласянь курон-косонъёслэсь ӧд кылзӥськы ке, кылсярысь, таӵе косонлэсь: «Азыса-калгыса улонлэсь куштӥське» (1 Фессалоникаослы 4:3).

Кытчы вуттоз кылзӥськымтэед? Библиын верамын: «Азон-калгон сьӧлык лэсьтӥсь аслаз мугорезлы пумит сьӧлыка» (1 Коринфъёслы 6:18). Кызьы сое валано?

 Эскеронъёс возьмато, тросэз егитъёс, кудъёсыз кузпалъяськемзылэсь азьло ик ныллыксэс яке пилыксэс ыштӥзы, одӥгеныз ке но улӥын гожтэм шуг-секытэн пумиськизы:

• КУРЕКТОН. Тросэз егитъёс, кудъёсыз кузпалъяськемзылэсь азьло сексэн вырыны кутскизы, берлогес со пумысен туж куректӥзы.

• ОСКЕМЫСЬ ДУГДОН. Егитъёс ӵош кӧлэмзы бере ог-огзы сярысь тазьы малпаны кутско: «Кинэн эшшо со кӧлаз на?»

• ӜОЖЕ УСЁН. Котькуд ныллэн потэ, со сярысь мед сюлмаськозы, нош кыӵе ке арбериен кадь медаз выре шуыса. Нош тросэз егит пиос чаклало, ныл секслы соглаш кариське ке, собере со сокем мусо уг поты ни шуыса.

• Йылпумъян лэсьтомы. Кузпалъяськемедлэсь азьло секслы соглаш луиськод ке, озьы тон ыштӥськод мае ке, мар зэмзэ ик дуно луэ (Римъёслы 1:24). Тынад мугорыд туж дуно, соин ик уть сое!

Возьматы, тынад юн мылкыдыд вань шуыса кылзӥськыны Инмарлэн таӵе курон-косонэзлэсь: «Азыса-калгыса улонлэсь куштӥське» (1 Фессалоникаослы 4:3). Нош берлогес тон кузпалъяськид ке, тон быгатод чылкыт возьытлыкен ас кузпалэныд ӵош кӧланы. Соку номыр но тынэсьтыд шумпотондэ уз быдты: нокыӵе сюлэмшугъяськонъёс но, ӝоже усёнъёс но, куректонъёс но, мукет бервылъёс но, кудъёссэ вае кузпалъяськемлэсь азьло секс (Мадёнъёс 7:22, 23; 1 Коринфъёслы 7:3).

• Тонэ зэмзэ ик яратӥсь адями тазалыкедлы но шӧдонъёсыдлы кышкытлык кылдытоз-а?

• Куроз-а со тонэ лэсьтыны сое, мар Инмарен кусыпъёстэ куашкатыны быгатоз? (Еврейёслы 13:4).