Инмар — со Кылдытӥсь. Со ваньзэ кылдытӥз. Солэн кутсконэз ӧй вал, озьы ик со ноку но уз быры (Псалтирь 89:3). Со вераз милемлы ӟеч иворез, кудӥз Библиын гожтэмын (1 Тимофейлы 1:11). Инмар милемлы улон сётӥз, соин ик ми сое данъяны но солы гинэ ужаны-тыршыны кулэ. (Лыдӟе Усьтӥськонэз 4:11.)

Одӥг адями но Инмарез ӧз адӟы, малы ке шуоно со дух. Инмар адямиослэсь трослы кужмогес но визьмогес (Иоанн 1:18; 4:24). Сое адӟыны уг луы ке но, со сярысь тодыны луэ, солэсь кылдытэмъёссэ чакласа-эскерыса. Кылсярысь, Инмар милемлы трос пӧртэм емышъёс но сяськаос сётӥз. Со возьматэ, Инмар туж визьмо но милемыз яратэ шуыса. Нош со, мар быдӟа милям Музъеммы но макем трос инмын кизилиос, вера милемлы, Инмар туж кужмо шуыса. (Лыдӟе Римъёслы 1:20.)

Эшшо тросгес Инмар сярысь тодыны луэ, Библиез лыдӟыса. Отын верамын, мае Инмар яратэ, нош мае уг, кызьы со ассэ возе пӧртэм адямиосын но пӧртэм учыръёсын. (Лыдӟе Псалтирез 102:7—10.)

Иисус вераз: «Инмысь Атаймы! Тынад нимыд дано мед луоз» (Матфей 6:9). Инмарлэн одӥг гинэ нимыз. Пӧртэм кылъёсын сое пӧртэм сямен верало. Удмурт кылын сое «Иегова» шуо (Потон 17:15).(Лыдӟе Псалтирез 83:18, Выль дуннелэн берыктэмез (ВД) [82:19, Библия удмурт кылын (УБ)] *.)

Куке Библия гожтэмын вал, отын Инмарлэн нимыз ог 7 000 пол пумиськиз. Озьы ик Иисус, адямиосты Инмар сярысь дышетыкуз, котьку Инмарлэсь нимзэ вералляз. Нош берлогес Инмарлэн нимыз трос Библиосысь куштэмын но Кузё-Инмар  яке Инмар кылъёсын воштэмын вал. (Лыдӟе Иоаннлэсь 17:26.)

Учке «Вань-а Инмарлэн нимыз?» видеороликез.

Туннэ туж трос курадӟонъёс но шуг-секытъёс. Возьматэ-а со, Инмар милемыз уг яраты но ми сярысь уг сюлмаськы шуыса? Куд-огъёсыз верало, Инмар милемыз чаклан-эскерон понна милемыз курадӟытэ шуыса. Но со озьы ӧвӧл. (Лыдӟе Иаковлэсь 1:13.)

Иегова адямилы аслыз бырйыны право сётӥз. Со милемыз роботъёс карыса ӧз кылдыты. Со понна ми солы тау кариськомы. Ми асьмеос бырйыны быгатӥськомы, ужано-тыршоно-а солы яке ӧвӧл-а (Иисус Навин 24:15). Но тросэз адямиос мукет сюрес быръё. Соос мукет адямиослы уродзэ лэсьто. Соин ик дунне вылын сомында курадӟонъёс. Адямиослэсь курадӟемзэс адӟыса, Иеговалэн сюлмыз туж вӧсь луэ. (Лыдӟе Улон-вылонэз 6:5, 6.)

Иегова милемыз яратэ. Солэн потэ, ми шумпотыса мед уломы шуыса. Ӝоген со быдтоз музъем вылысь ваньзэ уродзэ но соосты, кинъёс лек ужъёс лэсьто. Али Иегова курадӟонъёсты уг быдты, со понна солэн мугез вань. Но ӝоген со музъем вылысь вань курадӟонъёсты быдтоз. Нош малы Инмар курадӟонъёсты уг быдты на, ми тодомы 8-тӥ урокысь. (Лыдӟе Псалтирез 36:10, 11; Мадёнъёсты 2:21, 22.)

Иеговалэн потэ, ми со доры матэ мед кариськомы шуыса. Солы матэ кариськыны милемлы юрттоз вӧсяськон. Милемлы Инмарен вераськыны кулэ. Инмар сюлмаське котькуд адями сярысь (Псалтирь 64:3; 144:18). Иегова котьку дась простить карыны. Со адӟе, куке ми сое шумпоттыны тыршиськомы. Со адӟе тыршеммес соку но, куке милям уг пӧрмы. Ваньмыз со возьматэ, ми сьӧлыкоесь ке но, Инмарлы матэ кариськыны быгатӥськомы шуыса. (Лыдӟе Псалтирез 102:12—14; Иаковлэсь 4:8.)

Иегова милемлы улон кузьмаз, соин ик сое котькинлэсь юнгес яратоно (Марк 12:30). Инмарлы яратэммес возьматон понна, азьланяз но кулэ со сярысь тодыны но солэн курон-косонъёсызлэсь кылзӥськыны. Озьы тӥ Иегова доры матэ кариськыны быгатоды. (Лыдӟе 1 Иоаннлэсь 5:3; 1 Тимофейлы 2:4.)