Кин ке но тыныд вераз-а мае ке, мае со мукетъёсызлы ӧз вера?~ * Вераз ке, со тыныд ватӥськыса улӥсь зэмлыкез усьтӥз, малы ке шуоно мукетъёсыз со сярысь уг тодо. Библия нимысьтыз «ватӥськыса улӥсь зэмлык» сярысь вера, кудӥз Инмар бордысь потэ. Со ватӥськыса улӥсь шуыса нимаське, малы ке шуоно сое адямиос уг тодо. Кылчинъёслэн гинэ но со сярысь тросгес тодэмзы потэ вал. Потэ-а тынад со ватӥськыса улӥсь зэмлыкез тодэмед?~

Кемалась-кемалась Инмар нырысетӥ пиосмуртэз но нырысетӥ кышномуртэз кылдытӥз. Соослэн нимъёссы вал Ада́м но Е́ва. Инмар соослы чебер рай улон инты кузьмаз, кудӥз Еде́м сад шуыса нимаськиз. Адам но Ева Инмарлэсь кылзӥськысалзы ке, соос но соослэн нылпиоссы быдэс Музъеммес со садлы кельшись райлы пӧрмытыны быгатысалзы. Но соос Райын пырак улысалзы. Нош тодӥськод на-а тон, мар каризы Адам но Ева?~

Соос Инмарлэсь ӧз кылзӥське. Тӥни малы ми туннэ райын ум улӥське. Но Инмар вераз, со быдэс Музъемез паймымон садлы пӧрмытоз шуыса, кытын котькуд адями шудо луоз но пырак улыны быгатоз. Нош кызьы Инмар сое лэсьтоз? Кема дыр ӵоже адямиос сое ӧз тодэ. Со ватӥськыса улӥсь зэмлык вал.

Куке Иису́с Христо́с музъем вылэ лыктӥз, со адямиослы ватӥськыса улӥсь зэмлык сярысь вераны кутскиз. Иисус вераз, со Инмарлэн Эксэйлыкез сярысь ватӥськыса улӥсь зэмлык шуыса. Иисус дышетӥз вӧсяськыны, со Эксэйлык мед лыктоз шуыса. Ӵапак со Эксэйлык музъемез паймымон райлы пӧрмытыны юрттоз.

Шумпотӥськод-а тон, та ватӥськыса улӥсь зэмлыкез табере тодӥськод шуыса?~ Эн вунэты: Райын улозы соос гинэ, кинъёс Иего́ва Инмарлэсь кылзӥсько. Библиын верамын трос учыръёс адямиос сярысь, кудъёсыз Иеговалэсь кылзӥськыса уло вал. Нош тодӥськод-а тон кинэ ке но соос пӧлысь?~ Ойдо соос сярысь лыдӟомы но малпаломы, кызьы ми соослэсь адӟем карыны быгатӥськомы.