Учкы суред вылысь та пияш шоры. Адӟиське, солы мӧзмыт но кышкыт шуыса. Тон астэ куке озьы шӧдылӥд-а?~ Котькудӥз ми пӧлысь куддыръя ассэ озьы шӧдылӥз, дыр. Библиысь ми тодӥськомы Иеговалэн эшъёсыз сярысь, кудъёсызлы озьы ик мӧзмыт но кышкыт вал. Одӥгез соос пӧлысь — Илия́. Ойдо со сярысь тросгес тодомы.

Илия улӥз Изра́ильын Иисус Христослэн вордскемезлэсь трослы азьлогес. Израильлэн Аха́в нимо эксэез зэмос Инмарлэн, Иеговалэн, ужась-тыршисез ӧй вал. Ахав но солэн Иезаве́ль кышноез зэмос луисьтэм Ваа́л нимо инмарлы йыбыртъязы. Соин ик Израильысь тросэз адямиос но Вааллы йыбыртъяны кутскизы. Иезавель нимо эксэй кышно туж лек вал, но солэн потэ вал виемез ваньзэс, кинъёс Иеговалы ужало-тыршо вал, Илияез но. Тодӥськод-а, мар кариз Илия?~

 Со кыдёке луоё кыр дуннее бызьыса кошкиз но гурезьгырке ватскиз. Кызьы тон малпаськод, малы со озьы лэсьтӥз?~ Малы ке шуоно со кышказ. Но солы кышкано ӧй вал. Малы? Со тодэ вал, Иегова солы юрттыны быгатэ шуыса. Иегова аслэсьтыз кужымзэ Илиялы азьвыл но возьматъяз вал ини. Одӥг пол Иегова солэн вӧсяськемезлы ответ сётӥз, инмысен тыл лэзьыса. Иегова солы али но юрттыны быгатэ вал!

Куке Илия гурезьгыркын вал, Иегова солэсь юаз: «Мар тон татын кариськод?» Илия шуиз: «Ужась-тыршисьёсыд пӧлысь мон гинэ кыли. Мон огнам кыли но кышкасько, монэ виёзы шуыса». Илия малпа вал, Иеговалэн мукет ужась-тыршисьёсыз виемын ини шуыса. Но Иегова Илиялы шуиз: «Эн кышка! Со озьы ӧвӧл. Вань на эшшо 7 000 адямиос, кудъёсыз мыным азьвыл сямен ик ужало-тыршо. Мынам тыныд кулэ луись уже вань!» Кызьы тон малпаськод, Илия шумпотӥз-а, тае кылыса?~

Малы ми дышетскиськомы Илияен луэм учырысь?~ Эн кышка но эн малпа, тон огнад шуыса. Тодад возь, тынад эшъёсыд вань шуыса, кудъёсыз Иеговаез но тонэ ярато. Эн вунэты: Иегова туж кужмо но со котьку но тыныд юрттоз. Шумпотоно тодыны, тон огнад ӧвӧл шуыса. Озьы-а?~