Ойдо тодомы пияш сярысь, кудӥз ӵужмуртэзлэсь, апостол Павеллэсь, улонзэ утиз. Ми ум тодӥське, кызьы нимыз вал со егит пилэн, но ми тодӥськомы, одӥг пол со кышкасьтэм сямзэ возьматӥз шуыса. Потэ-а тодэмед, мар со кариз?~

Апостол Павел Иерусалимын пытсэтын вал. Сое пытсэтэ пуктӥзы, малы ке шуоно со Иисус сярысь вера вал. Урод адямиос Павелэз адӟемпотостэм каризы но кескич сьӧд уж малпазы. Соос вераськизы: «Ойдолэ сюрс солдатэн кивалтӥсьлы вераломы, со ожгарчиоссэ Павелэз судэ вайыны мед косоз шуыса. Нош ми сюрес урдсы ватскомы но, Павел матамы вуыку, со вылэ урдскомы!»

Со сярысь апостол Павеллэн сузэрезлэн пиез тодӥз. Мар со кариз? Со аслаз ӵужмуртэз доры мынӥз но ваньзэ солы вераз. Павел соку ик ыстӥз сое сюрс солдатэн кивалтӥсь доры со кескич сьӧд уж сярысь вераны. Кызьы тон малпаськод, капчи-а вал егит пилы сюрс солдатэн кивалтӥсен вераськыны?~ Капчи ӧй вал. Малы ке шуоно сюрс солдатэн кивалтӥсь вылӥ инты басьтэ вал. Нош пияш ӧз кышка но ваньзэ солы вераз.

Сюрс солдатэн кивалтӥсь тодэ вал, мар кароно. Апостол Павелэз утён понна, со 500 пала ожгарчиосты люказ! Но со уе ик Павелэз Кеса́рияе нуыны косӥз. Павел утиськыны быгатӥз-а?~ Быгатӥз. Урод адямиос кышказы со вылэ урдскыны. Соослэн кескич сьӧд ужзы ӧз удалты.

Малы тон дышетскыны быгатӥськод та веранысь?~ Тон Павеллэн сузэрезлэн пиез кадь ик кышкасьтэм луыны быгатод. Кышкасьтэм сям милемлы туж кулэ, куке ми мукетъёсызлы Иегова сярысь вераськомы. Вералод-а тон кышкатэк Иегова сярысь?~ Кышкатэк верад ке, тон кинлэсь ке улонзэ утьыны быгатод, вылды.