Реве́кка — со кышномурт, кудӥз Иеговаез яратэ вал. Солэн картэзлэн нимыз вал Исаа́к. Со но Иеговаез яратэ вал. Ойдо тодомы, кызьы Ревекка Исаакен тодматскиз но кызьы со возьматӥз, Иеговаез шумпоттыса улэмез потэ шуыса.

Исааклэн атаез но анаез вал Авраа́м но Са́рра. Соос быдэс семьяенызы Ханаа́н музъемын улӥзы. Отын адямиос Иеговалы уг йыбыртъяло вал. Но Авраамлэн потэ вал, солэн пиез Иеговалы оскись нылмуртэз кышно мед басьтоз шуыса. Соин ик со Елиезе́р ляльчизэ Харра́н каре ыстӥз, отысь Исааклы кышно шедьтон понна. Со карын Авраамлэн ӵыжы-выжыосыз уло вал.

Елиезер Авраамлэн мукет ляльчиосыныз ӵош сюрес вылэ потӥз. Со туж кузь сюрес вал. Со сьӧраз басьтӥз дас верблюдъёсыз, кудъёсыз вылэ кузьымъёс но сиён тыремын вал. Но кызьы Елиезер валаны быгатысал, кыӵе нылмуртэз Исааклы кышнолы быръёно? Харранэ вуыса, Елиезер но соин ӵош лыктэмъёс ошмес дуре дугдӥзы. Елиезер тодэ вал, ӝоген татчы адямиос вулы лыктозы шуыса. Соку со Иеговалы вӧсяськыны кутскиз: «Мед луоз тазьы: со нылмурт, кудӥзлэсь мон ву куро но кудӥз мыным но, мынам верблюдъёсылы но ву сётоз, со ик тынад быръемед мед луоз».

Но тани ошмес дуре лыктэ Ревекка. Библиын вераське, со туж чебер вал шуыса.  Куке Елиезер солэсь ву куриз, со шуиз: «Ю, кузёе! Мон тыныд но, тынад верблюдъёсыдлы но юыны сёто». Пукты ай син азяд, кӧня ву юыны быгато верблюдъёс! Соин ик Ревеккалы выльысь но выльысь ошмес дуре вулы ветлоно луиз. Учкы суред шоры: адӟиськод-а, кыӵе мылысь-кыдысь со тырше?~ Елиезер туж паймиз, кызьы Иегова солэн вӧсяськемезлы ответ сётӥз.

Елиезер Ревеккалы трос паймымон кузьымъёс сётӥз. Нылмурт сое но Авраамлэсь мукет ляльчиоссэ атай юртаз ӧтиз. Елиезер вераз, малы Авраам сое татчы ыстӥз но кызьы Иегова солэн вӧсяськемезлы ответ сётӥз. Ревеккалэн ӵыжы-выжыосыз шумпотыса сое Исааклы кышнолы сётӥзы.

Кызьы тон малпаськод, Ревеккалэн Исааклы кышно луэмез потэ вал-а?~ Ревекка тодэ вал, Елиезерез татчы Иегова ыстӥз шуыса. Тӥни малы, куке солэн семьяез солэсь юаз, потэ-а солэн Ханаан музъеме мынэмез, Исааклы бызён понна, со шуиз: «Потэ». Ӝегатскытэк со Елиезерен ӵош сюрес вылэ потӥз. Ханаанэ вуыса, со Исааклэн кышноез луиз.

Ревекка лэсьтӥз сое, мар Иеговалэн потэ вал, соин ик со сое бакель кариз. Со выжыысь Иисус Христос вордӥськиз! Иегова тонэ но бакель кароз, тон, Ревеккалэсь адӟем карыса, сое шумпоттӥд ке.