Иеговалэн Адӟись-Ивортӥсьёсыз оско солы, малы дышетӥз Иисус Христос но солэн апостолъёсыз, но оскемзыя уло. Соин ик соос христианъёс луо (Апостолъёслэн ужъёссы 11:26). Зэмос христиан оскон туннэ но сыӵе ик, кыӵеен сое кылдытӥз Иисус. Та статьяын вакчияк верамын, малы ми оскиськомы.

1. Инмар. Ми йыбыртъяськомы одӥг гинэ зэмос Ваньзэ Быгатӥсь Инмарлы, Кылдытӥсьлы, кудӥзлэн нимыз Иегова a (Псалтирь 83:18, Выль дуннелэн берыктэмез [Псалтирь 82:19, Библия удмурт кылын]; Усьтӥськон 4:11). Со — Авраамлэн Инмарез, Моисейлэн Инмарез но Иисус Христослэн Инмарез (Потон 3:6; 32:11; Иоанн 20:17).

2. Библия. Ми оскиськомы, Библия — со адямиослы гожтэт шуыса, кудӥз Инмарлэн духезлэн кивалтэмез улсын гожтэмын (Иоанн 17:17; 2 Тимофейлы 3:16). Ми дышетӥськомы солы, мар гожтэмын Библилэн 66 книгаосаз ик, кудъёсыз пыро кызьы Вуж Сӥзёнэ, озьы ик Выль Сӥзёнэ но. Религиосты эскерись профессор Джейсон Дейвид Бедун шонер вераз, Иеговалэн Адӟись-Ивортӥсьёсыз солы гинэ оско шуыса, малы дышетэ Библия, но соя уло; соос уг тыршо Библиез асьсэ дышетонъёссыя тупатыны b.

   Ми санэ басьтӥськомы быдэс Библиез. Нош куке ми Библиез валаны тыршиськомы, ми тодӥськомы, куд-ог учыръёс сярысь отын шонерак верамын шуыса, нош куд-огъёсыз сярысь верамын, образъёсты но символъёсты уже кутыса.

3. Иисус Христос. Ми Иисус Христослэсь адӟем кариськомы но солэн дышетэмезъя улӥськомы. Ми оскиськомы, со милям Утисьмы но Инмарлэн Пиез луэ шуыса, но данъяськомы сое (Матфей 20:28; Апостолъёслэн ужъёссы 5:31). Соин ик ми христианъёс луиськомы (Апостолъёслэн ужъёссы 11:26). Со дыре ик ми тодӥськомы: Библия уг дышеты, Иисус со Ваньзэ Быгатӥсь Инмар шуыса. Озьы ик со уг дышеты, Инмар, Пи но святой дух — со одӥг шуыса (Иоанн 14:28).

4. Инмарлэн Эксэйлыкез. Инмарлэн Эксэйлыкез христиан муртлэн сюлмаз ӧвӧл, со зэмос инмысь кивалтэт. Эксэйлык адями кивалтӥсьёс интые кивалтыны кутскоз но Инмарлэсь музъем пумысен малпанзэ быдэстоз (Даниил 2:44; Матфей 6:9, 10). Ваньзэ сое Инмарлэн Эксэйлыкез ӝоген быдэстоз ини, малы ке шуоно, Библиысь азьпалзэ ивортонъёс верамъя, ми «берпум аръёсы» улӥськомы (2 Тимофейлы 3:1—5; Матфей 24:3—14).

   Иисус Христос — Инмарлэн Эксэйлыказ Эксэй. Со кивалтыны кутскиз 1914-тӥ арын (Усьтӥськон 11:15).

5. Утиськон. Иисус Христос, аслэсьтыз улонзэ сётыса, милемлы луонлык сётӥз сьӧлыклэсь но кулонлэсь мозмытскыны (Матфей 20:28; Апостолъёслэн ужъёссы 4:12). Иисуслэн кулэмез милемлы пайда мед ваёз шуыса, кулэ Иисуслы оскыны, нош озьы ик улонмес воштыны но пылатӥськыны (Матфей 28:19, 20; Иоанн 3:16; Апостолъёслэн ужъёссы 3:19, 20). Адямилэн ужъёсыз возьмато, улэп-а солэн осконэз (Иаков 2:24, 26). Утиськонэз ми асьмеос номырин но басьтыны ум быгатӥське, сое Инмар гинэ сётэ, аслаз «дэлетэзлы», яке гажан-жалянэзлы луыса (Галатъёслы 2:16, 21).

6. Инъёс. Иегова Инмар, Иисус Христос но Инмарлы оскымон кылчинъёс инмын уло (Псалтирь 102:19—21; Апостолъёслэн ужъёссы 7:55) c. Инмын улон понна но Иисус Христосэн ӵош Инмарлэн Эксэйлыказ кивалтон понна 144 000 адями улӟытэмын луоз (Даниил 7:27; 2 Тимофейлы 2:12; Усьтӥськон 14:1, 3).

7. Музъем. Инмар музъемез кылдытӥз, со вылын адямиос пырак дауръёс ӵоже мед улозы шуыса (Псалтирь 103:5; 113:24; Екклесиаст 1:4). Инмар адямиосты бакель кароз но, адямиос пырак дауръёс ӵоже музъем вылын райын улозы но ноку уз висе (Псалтирь 36:11, 34).

8. Лек ужъёс но курадӟонъёс. Лек ужъёс но курадӟонъёс потӥзы, куке одӥгез кылчин Инмарлы пумит ӝутскиз (Иоанн 8:44). Инмарлы пумит ӝутскемез бере со кылчин Шайтан но Дьявол шуыса нимамын вал. Шайтан нырысетӥ адямиосты, Адамез но Еваез, ас палаз кыскиз. Со туж бадӟым курадӟонъёс вайиз Адамлэн но Евалэн вань нылпиоссылы (Улон-вылон 3:1—6; Римъёслы 5:12). Шайтанэн ӝутэм юанъёсты сэрттон-пертчон понна Инмар лек ужъёсты но курадӟонъёсты ӧз быдты. Но лек ужъёс но курадӟонъёс пырак уз луэ, Инмар соосты быдтоз.

9. Кулон. Куке адями кулэ, со быре, со нокытын уг улы ни (Псалтирь 145:4; Екклесиаст 9:5, 10). Инмар адямиосты тылын ӝуась адын уг курадӟыты.

   Инмар адямиосты улӟытоз но, трос миллиард адямиос выльысь улозы (Апостолъёслэн ужъёссы 24:15). Соос, кинъёс улӟемзы бере Инмарлэн сюресъёсызлы дышетскыны пумит кариськозы, пыраклы быдтэмын луозы. Выльысь улӟыса султыны осконзы соослэн уз луы ни (Усьтӥськон 20:14, 15).

10. Семья. Нырысетӥ пиосмуртэз но кышномуртэз огазеяса, Инмар нырысетӥ семья кылдытӥз. Инмарлэн куронэзъя, кузпалъяськон одӥг пиосмурт но одӥг кышномурт вискын луыны кулэ. Ми кылзӥськиськомы со куронлэсь. Инмарлэн законэзъя, одӥг гинэ муг вань люкиськыны, со — азон-калгон сьӧлык (Матфей 19:4—9). Ми ас выламы шӧдӥмы, Библиысь визьмо визь-кенешъёс семьяослы шудо луыны юртто шуыса (Ефесъёслы 5:22—6:1).

11. Инмарлы йыбырттонмы. Киросэз но мукет тус-суредъёсты Инмарлы йыбырттонамы ми ум кутӥське (Кыкетӥ Закон 4:15—19; 1 Иоанн 5:21). Тани мар пыре Инмарлы йыбырттонмы пӧлы:

    • Инмарлы вӧсяськон (Филиппыослы 4:6).

    • Библиез лыдӟон но сое дышетон (Псалтирь 1:1—3).

    • Библиысь лыдӟем вылын малпаськон (Псалтирь 76:13).

    • Пумиськонъёс, кудъёсаз ми ӵош вӧсяськиськомы, Библиез дышетӥськомы, кырӟаськомы, осконмы сярысь вераськиськомы, огъя оскисьёсмес но мукет адямиосты юнматӥськомы (Колоссыослы 3:16; Еврейёслы 10:23—25).

    • «Эксэйлыклэсь Евангелизэ», яке Эксэйлык сярысь ӟеч иворез, тодытон (Матфей 24:14).

    • Ёрмисьёслы юрттон (Иаков 2:14—17).

    • Эксэйлык юртъёсты но мукет юртъёсты пуктон но эскерон-тупатъян, кудъёсыз кутӥсько быдэс дунне вылын ортчытӥськись Инмар сярысь ужрадэз нуонын (Псалтирь 126:1).

    • Инкуазь шимучыръёсы сюремъёслы юрттон (Апостолъёслэн ужъёссы 11:27—30).

12. Милям организацимы. Ми кенешъёсы огазеямын. Котькуд кенеш сярысь тӧроослэн кенешсы сюлмаське. Но тӧроос кыӵе ке нимысьтыз вылӥе пуктэм адямиосын уг лыдъясько но ужам-тыршемзы понна уждун уг басьто (Матфей 10:8; 23:8). Ми дасэтӥ люкетэз ум тыриське но пумиськонъёсамы нокыӵе коньдон ум бичаське (2 Коринфъёслы 9:7). Быдэс ужмы ас мылкыд каремъя сётэм коньдонэн возиське. Нош кин но кӧня коньдон сётэ, нокинлы тодмо ӧвӧл.

    Быдэс дунне вылысь Иеговалэн Адӟись-Ивортӥсьёсызлэсь ужзэс Кивалтӥсь кенеш радъя. Кивалтӥсь кенеш со пичи группа, кудӥз пӧлы пыро Инмарлы оскымон но тодӥсь-валась христианъёс, кудъёсыз дунневыл валтӥсь кивалтонниын ужало-тыршо (Матфей 24:45).

13. Огкылысь улонмы. Вань шаеръёсын Иеговалэн Адӟись-Ивортӥсьёсыз одӥг малы ке оско но одӥг малы ке дышето (1 Коринфъёслы 1:10). Ми кариськомы ваньзэ, мае быгатӥськомы, ми пӧлын люкиськонъёс медаз луэ шуыса: нокин нокинэ улӥе-вылӥе медаз пукты, кылсярысь, адямилэн дышетскемез, узыр-а, куанер-а луэмез но кыӵе калыкысь потэмез шоры учкыса (Апостолъёслэн ужъёссы 10:34, 35; Иаков 2:4). Ми одӥг малы ке оскиськомы но одӥг малы ке дышетӥськомы ке но, ми пӧлысь котькудӥз ачиз быръён лэсьтэ, но со быръён пӧртэм луыны быгатэ. Котькуд Адӟись-Ивортӥсь ужпум кутэ, аслэсьтыз возьытлыксэ лыдэ басьтыса, кудзэ со Библияя дышетӥз (Римъёслы 14:1—4; Еврейёслы 5:14).

14. Асьмеды воземмы. Котькыӵе ужъёсын ми тыршиськомы возьматыны яратонэз, кудӥз аслыз пайда уг утча (Иоанн 13:34, 35). Ми ум лэсьтӥське ужъёсты, кудъёсыз Инмарлы уг ярало, озьы ик пушкамы вир ум лэзиське, малы ке шуоно, Библия верамъя, со шонертэм уж луэ (Апостолъёслэн ужъёссы 15:28, 29; Галатъёслы 5:19—21). Ми тупаса улыны тыршиськомы но ожъёсы ум пыриськиське (Матфей 5:9; Исаия 2:4). Ми шаерысьтымы кивалтӥсьёсты гажаськомы но шаерамы кутэм катъёсты быдэсъяськомы, соос Инмарлэн законэзлы пумит уг луо ке (Матфей 22:21; Апостолъёслэн ужъёссы 5:29).

15. Мукет адямиосын кусыпъёсмы. Иисус таӵе косон сётӥз: «Матысьтэ астэ ачид кадь ик яраты». Озьы ик со вераз, христианъёс «таизлэн дуннелэн адямиосыз ӧвӧл» шуыса (Матфей 22:39; Иоанн 17:16). Соин ик ми тыршиськомы «вань адямиослы ӟеч уж» лэсьтыны, озьы ке но ми политика удысын нокин пала кариськытэк улӥськомы но мукет религиосын нокыӵе кусып ум возиське (Галатъёслы 6:10; 2 Коринфъёслы 6:14). Со дыре ик ми гажаськомы котькыӵе быръёнэз, кудзэ лэсьто мукет адямиос та удысын (Римъёслы 14:12).

Тӥляд юанъёсты кылизы на ке, малы оско Иеговалэн Адӟись-Ивортӥсьёсыз, тросгес тодыны быгатоды милям сайтысьтымы, одӥгысьтыз филиалысьтымы, тӥледлы матысяз Эксэйлык юртэ пумиськонэ лыктыса яке Иеговалэн Адӟись-Ивортӥсьёсыз пӧлысь кинэн ке вераськыса, кин тӥ палан улэ.