Иеговалэн Адӟись-Ивортӥсьёсыз луыса, ми тыршиськомы семьяосмес юнматыны, озьы ик матысь адямиосмылэсь семьяоссэс но. Инмарез ми семьяез Кылдытӥсен лыдъяськомы (Улон-вылон 2:21—24; Ефесъёслы 3:14, 15). Библия пыр со сётӥз возетъёсты, кудъёсыз быдэс дунне вылысь адямиослы юртто шудо но юн семья кылдытыны но кусыпъёссэс утьыны.

 Ми тыршиськомы Библиысь визь-кенешъёсъя улыны, малы ке шуоно со юрттэ милемлы умойгес картъёс, кышноос но анай-атайёс луыны (Мадёнъёс 31:10—31; Ефесъёслы 5:22—6:4; 1 Тимофейлы 5:8). Библиысь визьлык шудогес луыны юрттэ со семьяослы но, кудъёсаз Инмарлы пӧртэм сямен оско (1 Пётр 3:1, 2). Тани мар верало куд-ог Адӟись-Ивортӥсь луисьтэм адямиос, кудъёсызлэн картсы яке кышнозы Иеговалэн Адӟись-Ивортӥсез луиз:

•   «Кузпалъяськеммы бере куать ар ӵоже ми ялан керетыса но керӟегъяськыса улӥмы. Нош Адӟись-Ивортӥсь луэмез бере Ивети эшшо но яратӥсь но чидась луиз. Солэн воштӥськемез милесьтым семьямес утиз» (Клауир, Бразилия).

•   «Куке Чанса картэ Иеговалэн Адӟись-Ивортӥсьёсыныз Библиез дышетыны кутскиз, мон пумит вал, малы ке шуоно малпай, соос семьяосты люко шуыса. Но собере мон валай: Библия семьямес юнматыны юрттӥз» (Агнесс, Замбия).

 Адямиослы тодытыкумы, ми возьматӥськомы, кызьы Библиысь визь-кенешъёс юрттозы соослы

•   Кузпал бырйыны

•   Кузпалъяськемзы бере нырысетӥ араз огкыл шедьтыса улыны

•   Картлэн яке кышнолэн анай-атайёсыныз тупаса улыны

•   Коньдонэз шонер кутыны

•   Споръяськытэк улыны

•   Дышетскыны кӧтӝожез вунэтыны

•   Нылпиосты будэтыны

 Вераны кулэ, сыӵе учыръёс луо шуыса. Кылсярысь, 1998-тӥ арын одӥг компаниялэн отчётаз вераськиз, кызь семьяос пӧлысь одӥгаз бадӟым шуг-секытъёс кылдӥзы шуыса, куке кузпалъёс пӧлысь одӥгез Иеговалэн Адӟись-Ивортӥсез луиз.

 Иисус азьло ик вераз, дышетскисьёсызлэн семьяосазы тупаса улон куддыръя уз луы шуыса (Матфей 10:32—36). История удысысь Вил Дюрант тодосчилэн верамезъя, Рим империын малпазы, «христиан оскон семьяосты люке» шуыса a. Туннэ но Иеговалэсь Адӟись-Ивортӥсьёссэ со понна ик янгыше уськыто. Нош зэм ик-а Адӟись-Ивортӥсьёс семьяосты люко?

 Одӥг пол адямиослэсь правооссэс утёнъя Европаысь судын эскериськиз уж, кудаз Иеговалэсь Адӟись-Ивортӥсьёссэ янгыше уськытӥзы, соос семьяосты люко шуыса. Суд вераз, ӵем дыръя семьяосын ченгешонъёс кылдо, малы ке шуоно со, кин Адӟись-Ивортӥсь уг луы, уг гажа оскись ӵыжы-выжыезлэсь бырйыны правозэ, кызьы Инмарлы йыбыртъяно но мар со понна кароно. Суд вераз на, таӵе югдур ӵем дыръя кылдэ вань семьяосын, кытын Инмарлы пӧртэм сямен йыбыртъяло. Иеговалэн Адӟись-Ивортӥсьёсыз но таӵе учырен пумиськыло b. Иеговалэсь Адӟись-Ивортӥсьёссэ осконзы понна адӟемпотостэм каро ке но, соос тыршо Библиысь визь-кенешъя улыны: «Нокинлы но уродлы пумит уродэн пунэмзэ эн берыктэ. [...] Быгатэмдыя вань адямиосын тупаса улэ» (Римъёслы 12:17, 18).

 Адӟись-Ивортӥсьёс уло Библиысь таӵе визь-кенешъя: кузпалъяськоно «Кузё-Инмарлы оскись муртэн» гинэ, яке адямиен, кудӥзлэн сыӵе ик осконэз (1 Коринфъёслы 7:39). Библиысь та курон-косон пайдаё. Кылсярысь, 2010-тӥ арын одӥг журналын, кудаз семья но кузпалъяськон пумысен юанъёс эскерисько, гожтэмын вал, «кузпалъёс, кудъёсыз Инмарлы одӥг сямен оско но кудъёссэ огкадь сям-йылолъёс огазеяло», ӵем дыръя ог-огзэс валасагес уло шуыса c.

 Озьы ке но Иеговалэн Адӟись-Ивортӥсьёсыз огъя оскисьёссылэсь мылкыдзэс уг ӝуто кельтыны кузпалзэс, кудӥз Адӟись-Ивортӥсь уг луы. Библиын гожтэмын: «Кудӥзлэн ке агай-вынлэн кышноез Инмарлы оскисьтэм ке, но со кышномурт картэныз улыны соглаш ке, та пиосмуртлы кышнозэ куштыны уг яра. Кышномурт но, кудӥзлэн кузпалыз Инмарлы оскисьтэм ке, но со соин улыны соглаш ке, солы картсэ кельтыны уг яра» (1 Коринфъёслы 7:12, 13). Иеговалэн Адӟись-Ивортӥсьёсыз та курон-косонъя уло.