1, 2. а) Йеңи шәхскә еришәләйдиғанлиғимизни нәдин билимиз? ә) Колосилиқларға 3:10—14 айәтләрдә йеңи шәхскә киридиған қандақ хисләтләр бар?

МУҚӘДДӘС КИТАПНИҢ Әфәсликләргә 4:24 вә Колосилиқларға 3:10 айәтлиридә «йеңи шәхс» дегән ибарә икки қетим учришиду. Бу айәтләрдә Худаниң обризи бойичә яритилған шәхс һәққидә ейтилған. Биз йеңи шәхскә егә болалаймизму? Әлвәттә. Йәһва Худа бизни өзигә охшитип яратқанлиқтин, биз униң әҗайип хисләтлиригә тәқлит қилалаймиз (Яритилиш 1:26, 27; Әфәсликләргә 5:1).

² Мукәммәлсизликни мирас қилғанлиқтин, анда-санда һәммимиздиму яман истәкләр пәйда болидиғанлиғи раст. Буниңдин ташқири, әтрапимиздикиләрму бизгә тәсир қилиду. Лекин Йәһваниң меһрибан ярдими билән биз униң көңлидин чиқидиған адәм болалаймиз. Шу мәхсәткә йетишкә бәл бағлишимиз үчүн, йеңи шәхскә киридиған бирнәччә хисләтни қараштурайли (Колосилиқларға 3:10—14ни оқуң). Кейин мошу хисләтләрни хизмәттә қандақ көрситәләйдиғанлиғимизни қараштуримиз.

3. Йеңи шәхскә киридиған бир хисләт қандақ?

³ Паул адәмләргә үз-хәтир қилмаслиқ йеңи шәхсниң муһим бир қисми екәнлигини чүшәндүргән. У мундақ деди: «Йә грекму, йә йәһудийму, йә хәтниликму, йә хәтнисизликму, йә чәтәлликму, йә қулму, йә әркинликму йоқ». Җамаәттә һечким ирқи, миллити яки җәмийәттики орни сәвәвидин өзини башқилардин үстүн көрмәслиги керәк. Немишкә? Сәвәви Мәсиһниң әгәшкүчилири сүпитидә һәммимиз «бир шәхс» (Колосилиқларға 3:11; Галатилиқларға  3:28).

4. а) Йәһваниң хизмәтчилири башқиларға қандақ муамилә қилиши керәк? ә) Қайси вәзийәттә мәсиһийләрниң инақлиғи синилиши мүмкин?

⁴ Йеңи шәхскә кийингәндә биз ирқи билән келип чиқишиға қаримастин, һәммә адәмләргә иззәт-һөрмәт билән муамилә қилимиз (Римлиқларға 2:11). Дунияниң бәзи җайлирида мундақ қилиш асан әмәс болуши мүмкин. Мәсилән, бурун Җәнубий Африка Җумһурийитидә йәрлик һөкүмәт һәр түрлүк ирқтин чиққан адәмләрни бөләк турғузған. Бу дөләттики адәмләрниң көпинчиси, шу җүмлидин Йәһва гувачилириму, техичә мошу йәрләрдә яшайду. Рәһбәрлик кеңәш қериндашлиримизни «пүтүн қериндашлиқни сөйүшкә» дәвәт қилишни халиди. Шуңа 2013-жилниң октябрь ейида улар мәхсус бир чарә орунлаштурди. Бу чарә һәрхил ирқтин чиққан қериндашлиримизға бир-бирини яхширақ тонушқа йол ачқан (Петрусниң 1-хети 2:17).

5, 6. а) Бир дөләттә Худа хәлқиниң арисидики бирликни мустәһкәмләш үчүн қандақ чарә уюштурулған? (Мақалиниң бешидики рәсимгә қараң.) ә) Буниң нәтиҗиси қандақ болди?

⁵ Шу дөләттики қериндашлар мундақ чарә орунлаштурди: бәзи дәм елиш күнлири тили яки ирқи охшимайдиған икки җамаәтниң қериндашлири биллә вақит өткүзүши керәк еди. Шундақ қилип, бу қериндашлар биллә вәз қилип, җамаәт учришишиға қатнашти вә бир-бириниң өйигә меһманға барди. Бу чаригә йүзлигән җамаәтләр қатнишип, филиалға көплигән хәтләр кәлди. Бу хәтләрдә һәтта Гувачи әмәс адәмләр өз иҗабий пикрини билдүрди. Мәсилән, бир диний хизмәтчи мундақ деди: «Мән Йәһва гувачиси әмәс, лекин вәз паалийитиңлар әҗайип уюштурулғанлиғи вә һәрхил ирқ арисидики бирлигиңлар һәққидә ейтмисам болмайду». Қериндашлар бу чариниң қандақ пайдисини көрди?

⁶ Коса тилида сөзләйдиған Нома исимлиқ қериндишимиз дәсләптә инглиз тилидики җамаәттин Гувачиларни өзиниң аддий өйидә меһман қилишқа хиҗаләт болатти. Амма у ақ тәнлик Гувачилар билән вәз қилғандин кейин, өзини әркин һис қилишқа башлиди. «Уларму өзүмизгә охшаш аддий адәмләр екәнғу!»— дәп бөлүшти Нора. Бир қетим инглиз тилидики җамаәттин қериндашлар коса тилидики җамаәт билән хизмәт қилишқа кәлгәндә, у бирнәччә қериндашни өйигә чақириду. Нома өйигә кәлгән бир ақ тәнлик ақсақалниң кичиккинә пластик  ящиктә олтурғанлиғини көрүп, һәйран қалди. Һазирғичә давамлишиватқан бу чарә түпәйлидин көплигән қериндашлар йеңи достларни тепип, келип чиқиши һәр түрлүк адәмләр билән тонушмақта.

7. Немишкә биз һәрқачан һәмдәртлик көрситишимиз керәк?

⁷ Шәйтанниң дунияси вәйран қилинмиғичә, Йәһваниң хәлқи қийинчилиқларға дуч келиду. Ишсизлиқ, җиддий кесәл, тәқипләр, тәбиий апәтләр, җинайәтниң көпийишидин мал-мүлүктин айрилиш вә йәнә башқа қийинчилиқлар бешимизға чүшүши мүмкин. Қийин вақитларда бир-биримизгә ярдәм қолимизни сунуш үчүн, һәқиқәтән һәмдәртмән болушимиз лазим. Һәмдәртлик башқиларға меһрибан болушқа дәвәт қилиду (Әфәсликләргә 4:32). Бу хисләтләр йеңи шәхсниң бир қисми вә улар Худаға тәқлит қилип, башқиларға тәсәлли беришимизгә ярдәм бериду (Коринтлиқларға 2-хәт 1:3, 4).

8. Җамаәттикиләрниң һәммисигә һәмдәрт вә меһрибан болсақ, буниң қандақ яхши нәтиҗиси болиду? Мисал кәлтүрүң.

⁸ Җамаитимиздики башқа дөләттин көчүп кәлгән яки турмуши начар қериндашларға қандақларчә көпирәк меһрибанлиқ көрситәләймиз? Биз уларни иллиқ чирай билән қарши елип, улар билән дост болушни вә өзлириниң җамаәткә керәк екәнлигини һис қилишиға ярдәм беришни халаймиз (Коринтлиқларға 1-хәт 12:22, 25). Мәсилән, Дэнникарл Филиппиндин Япониягә көчүп барған. Чәт әллик болғанлиқтин, ишида хизмәтдашлири униңға һөрмәт көрсәтмигән. Андин у Йәһва гувачилириниң учришишиға қатнашти. У мундақ дәйду: «Җамаәттикиләрниң һәммиси дегидәк японлуқлар болсиму, мени бурундин тонуйдиғандәк иллиқ чирай билән қарши алди». Қериндашлиримизниң меһрибанлиғи униңға Йәһва Худа билән йеқин мунасивәтни риваҗландурушқа ярдәм бәрди. Бираз вақиттин кейин Дэнникарл чөмдүрүлүш мәрасимидин өтти вә һазир ақсақал болуп хизмәт қилиду. Униң билән биллә хизмәт қилидиған ақсақаллар Дэнникарл билән аяли Дженниферға охшаш қериндашларниң уларниң җамаитидә болғанлиғиға хошал екәнлигини ейтип: «Улар пешқәдәмләр сүпитидә бәк аддий һаят кәчүриду вә Падишалиқни биринчи орунға қоюшниң әҗайип үлгисини көрситиду»,— дегән (Луқа 12:31).

9, 10. Хизмәттә һәмдәртлик көрсәткәнлигимиз яхши нәтиҗигә әкелидиғанлиғини көрситидиған мисалларни кәлтүрүң.

⁹ Биз Падишалиқ һәққидики хуш хәвәрни җакалиғанда, «һәммисигә» яхшилиқ қилалаймиз (Галатилиқларға 6:10). Көп Гувачиларниң башқа дөләтләрдин көчүп кәлгәнләргә ичи ағрип, уларниң тилини үгинишкә тиришиду (Коринтлиқларға 1-хәт 9:23). Бу көп бәрикәт елип кәлди. Мәсилән, Австралиядә яшайдиған Тиффани исимлиқ пешқәдәм Брисбен шәһиридики суахили тилидики җамаәткә ярдәм бериш үчүн шу тилни үгинивалған. Тил үгиниш қийин болсиму, униң һаяти мәналиқ болди. Тиффани мундақ дәйду: «Әгәр хизмитиңизниң қизиқарлиқ болушини халисиңиз, башқа тилдики җамаәткә өтүш һәққидә ойлинип көрүң. Шу чағда өз шәһириңиздин кәтмәйла  сәяһәт қилғандәк һис қилисиз. Дуниявий қериндашлиғимизни сезип, аримиздики әҗайип бирликни өз көзүңиз билән көрәләйсиз».

¹⁰ Япониядики бир аилә мундақ қилған. Қизлири Сакико мундақ дәйду: «Вәз қилғанда пат-пат Бразилиядин көчүп кәлгән адәмләрни учраштураттуқ. Уларға португал тилидики Муқәддәс китаптин Вәһий 21:3, 4 яки Зәбур 37:10, 11, 29ға охшаш айәтләрни көрсәткәндә, улар диққәт билән тиңшатти, бәзилири һәтта көз яшму қилатти». Бу аилиниң шу адәмләргә ичи ағрип, уларға һәқиқәтни билишкә ярдәм бериш үчүн пүтүн аилиси билән биллә португал тилини үгинишкә башлиған. Кейинирәк португал тилидики җамаәтниң ечилишиға ярдәм бериду. Жиллар давамида улар бирталай қачақларға Йәһваниң хизмәтчиси болушқа ярдәмләшти. Сакико мундақ дәйду: «Португал тилини үгиниш үчүн көп тәр төктуқ, амма еришкән бәрикәтләр һәммидин ешип чүшти. Йәһваға болған миннәтдарлиғимиз чәксиз» (Әлчиләр 10:34, 35ни оқуң).

11, 12. а) Немишкә йеңи шәхсни кийишкә нийитимиз тоғра болуши керәк? ә) Кәмтәр болушқа бизгә немә ярдәм бериду?

¹¹ Йеңи шәхскә кийиништики нийитимиз — башқиларниң махтишиға еришиш әмәс, Йәһвани мәдһийиләш болуш керәк. Һәтта мукәммәл пәриштиниң өзи тәкәббур болуп кәткәнликтин, гуна қилғанлиғини унтумаң (Әзәкиял 28:17ни селиштуруң). Биз болсақ мукәммәлсиз, шуңа бизгә тәкәббурлуқтин нери туруш техиму қийин. Шундақ болсиму, үстимизгә кәмтәрликни кийәләймиз. Мундақ қилишқа немә ярдәм бериду?

¹² Бизгә кәмтәр болушқа Худа Сөзини һәр күни оқуп, оқуғанлиримиз һәққидә мулаһизә қилиш ярдәм бериду (Қанун шәрһи 17:18—20). Хусусән, Әйса Мәсиһниң тәлимлири билән кәмтәрликниң әҗайип үлгиси һәққидә мулаһизә қилишимиз керәк (Мәтта 20:28). Әйсаниң кәмтәр болғанлиғи шуки, у һәтта шагиртлириниң путлирини жуйған (Йоһан 13:12—17). Йәһвадин дуада муқәддәс роһни сорашму кәмтәр болушқа ярдәм берәләйду. Униң роһи өзүмизни башқилардин үстүн һесаплашқа дәвәт қилидиған һәрқандақ майиллиқ билән күришишкә ярдәмлишиду (Галатилиқларға 6:3, 4; Филипиликләргә 2:3).

13. Кәмтәр болсақ, қандақ бәрикәтләргә еришимиз?

 ¹³ Пәнд-нәсиһәтләр 22:4ни оқуң. Йәһва биздин кәмтәр болушни тәләп қилиду. Кәмтәрлик көплигән бәрикәтләргә ериштүриду. Биз кәмтәр болсақ, җамаәтниң течлиғи билән инақлиғи ешип чүшиду. Шундақла Йәһва бизгә меһрини мол төкиду. Әлчи Паул мундақ дегән: «Барлиғиңлар бир-бириңларға муамилә қилишта әқил мөмүнлүгиниң бәлбеғини бағлаңлар, чүнки Худа чоңчиларға қаршилиқ көрситиду, мөмүнләргә болса, мол меһрини намайән қилиду» (Петрусниң 1-хети 5:5).

14. Мулайим вә сәвирлик болушниң әң яхши үлгиси ким?

¹⁴ Мошу дунияда көп адәмләр мулайим вә сәвирлик адәмни пат-пат аҗиз дәп ойлайду. Лекин бу ундақ әмәс. Бу гөзәл хисләт аләмдики әң қудрәтлик Шәхс Йәһвадин кәлгән. У — мулайим вә сәвирлик болушниң әң улуқ үлгиси (Петрусниң 2-хети 3:9). Мәсилән, Йәһва Худа Ибраһим билән Лутниң соаллириға пәриштилири арқилиқ җавап бәргәндә, қанчилик сәвирлик болғанлиғини есимизға алайли (Яритилиш 18:22—33; 19:18—21). Шуниң билән, Йәһваниң итаәтсиз исраиллиқларға 1500 жилдин ошуқ вақит давамида көрсәткән сәвир-тақитиму есимизда (Әзәкиял 33:11).

15. Әйса Мәсиһ мулайим вә сәвирлик болушниң қандақ үлгисини көрсәтти?

¹⁵ Әйса Мәсиһму «мулайим» болған (Мәтта 11:29). Шагиртлириниң аҗизлиқлириға сәвирлик чидиған. Йәрдики хизмити вақтида Әйсани пат-пат асассиз тәнқит қилип, әйиплигән. Бирақ у та өлүмигичә мулайим вә сәвирлик болған. Азап түврүгидә қийналған болсиму, у Атисидин өзини өлүмгә һөкүм қилғанларни кәчүрүшини сориған. Әйса: «Улар немә қиливатқанлиғини билмәйватиду»,— дегән (Луқа 23:34). У һәтта азап чекип, җени қийналған чағдиму дайим мулайим вә сәвирлик болған (Петрусниң 1-хети 2:21—23ни оқуң).

16. Мулайимлиқ билән сәвирни қандақ көрситәләймиз?

¹⁶ Паул мулайим вә сәвирлик болушниң бир йолини көрситип мундақ дегән: «Һәтта әгәр кимду-бирсиниң башқисиға шикайәт қилишиға асас болсиму, бир-бириңларға чидамлиқ болуп, бир-бириңларни һиммәтлик кәчүрүңлар. Йәһва силәрни һиммәтләрчә кәчүргәндәк, силәрму шундақ кәчүрүңлар» (Колосилиқларға 3:13). Кәчүрүмчан болуш үчүн бизгә мулайимлиқ билән сәвир хисләтлири керәк. Бу җамаәтниң инақ болушиға тәсир қилиду.

17. Немишкә мулайим вә сәвирлик болуш муһим?

¹⁷ Йәһва биздин адәмләргә мулайим вә сәвирлик болушни тәләп қилиду. У орнитидиған йеңи дунияда яшаш үчүн биз бу хисләтләрни риваҗландурушимиз лазим (Мәтта 5:5; Яқуп 1:21). Мулайим вә сәвирлик болсақ, Йәһвани мәдһийиләймиз вә башқиларниму буниңға дәвәт қилимиз (Галатилиқларға 6:1; Тимотийға 2-хәт 2:24, 25).

18. Меһир-муһәббәт билән үз-хәтир қилмаслиқ қандақ бағлинишлиқ?

¹⁸ Биз жуқурида муһакимә қилған хисләтләрниң һәммиси меһир-муһәббәт билән зич бағлиқ. Мәсилән,  шагирт Яқуп қериндашларниң кәмбәғәлләргә қариғанда байларға яхширақ муамилә қилғанлиғини байқап, уларға мәслиһәт бәргән. У буниң Худа бәргән «йениңдики кишини өзүңни сөйгәндәк, сөйгин» дегән әмригә қарши екәнлигини ейтқан. Андин: «Үз-хәтир қилсаңлар, гуна қилған болисиләр»,— дәп қошти (Яқуп 2:8, 9). Адәмләрни яхши көрсәк, һечкимниң билимигә, ирқиға яки иҗтимаий әһвалиға қарап муамилә қилмаймиз. Башқиларға үз-хәтир қилмиғанлиғимиз сахта болмаслиғи лазим. У һәқиқий шәхсимизниң аҗримас бир қисми болуши керәк.

19. Немишкә меһир-муһәббәткә кийингәнлигимиз муһим?

¹⁹ Шуниң билән меһир-муһәббәт «сәвирлик һәм меһривандур» вә у «тәкәббурланмайду» (Коринтлиқларға 1-хәт 13:4). Адәмләргә хуш хәвәрни йәткүзүшни давамлаштуруш үчүн биз сәвирлик, меһрибан вә кәмтәр болушимиз керәк (Мәтта 28:19). Буниңдин ташқири бу хисләтләр бизгә җамаәттики һәммә қериндашлар билән тил тепишни асанирақ қилиду. Һәммимиз мундақ меһир-муһәббәт көрситидиған болсақ, җамаитимиз инақ болиду вә бу Йәһва Худаға шан-шәрәп әкелиду. Башқилар аримиздики бирликни көриду вә бу уларни һәқиқәткә җәлип қилиду. Йеңи шәхсниң тәсвирлиниши Муқәддәс китапта мундақ аяқлашқини орунлуқ: «Униңдин ташқири, меһир-муһәббәткә йөгиниңлар, чүнки у — бирликниң мукәммәл риштилиридур» (Колосилиқларға 3:14).

20. а) Өзүмизгә қандақ соалларни қоюшимиз керәк вә немишкә? ә) Биз қандақ әҗайип келәчәкни тақәтсизлик билән күтиватимиз?

²⁰ Һәрқайсимиз өзүмиздин: «Кона шәхсни йешип, уни қайтидин киймәслик үчүн йәнә қайси тәрәптин өзгиришим керәк?»— дәп сорисақ болиду. Буниң үчүн Йәһваға дуа қилип, ярдәм сорап ялвурушимиз керәк. «Худаниң Падишалиғиға варис» болуш үчүн, натоғра ойлар билән һәрикәтләрдин айрилишқа бар күчимизни селишимиз лазим (Галатилиқларға 5:19—21). Шуниң билән: «Йәһваниң мақуллишиға еришиш үчүн пикир қилиш тәрзимни өзгәртишкә давамлаштуриватимәнму?»— дәп өзүмизни тәкшүрүшимиз керәк (Әфәсликләргә 4:23, 24). Биз намукәммәл болғанлиқтин, йеңи шәхсни кийип, уни йәшмәслик үчүн тәр төкүшимиз керәк. Бу — тохтимайдиған җәриян. Йәрдики һәрбир адәм йеңи шәхскә кийинип, Йәһваниң әҗайип хисләтлирини мукәммәл тәрздә әкс әттүргәндә, һаятимизниң қанчилик бәхитлик болидиғанлиғини тәсәввур қилиң!