1932-ЖИЛНИҢ ноябрь ейиниң ахири. Аһалиси бир миллиондин ошуқ Мехико шәһиридә адәмләр миғ-миғ боливатиду. Буниңдин бир һәптә бурунла бу йәрдә әң дәсләпки светофор (қатнаш чириғи) орнитилған еди. Лекин адәмләрни башқа бир нәрсә һаяҗанландурмақта. Фотоаппаратлирини қолида тутқан мухбирлар поезд станциясидә туруп, алаһидә бир меһманни күтмәктә. Қайси меһманни? Бу Күзитиш мунари җәмийитиниң президенти Джозеф Ф. Рутерфорд еди. Йәрлик Гувачиларму үч күнлүк чоң жиғилишқа келиватқан Рутерфорд бурадәрни қучақ йейип қарши елишқа тәйяр.

«Алтун дәвир» журналида мундақ йезилған еди: «Шәк-шүбһисиз, бу конгресс әһмийити зор бир вақиә ретидә тарихта өз изини қалдуриду». Амма бу пәқәт тәхминән 150 адәм қатнашқан кичик конгресс еди. Ундақта, бу конгрессниң немә алаһидилиги болған?

Бу конгресскичә Мексикида һәқиқәт анчә көп тарқалмиған еди. 1919-жилдин тартип бу йәрдә кичик конгресслар өткүзүлсиму, шу жилдин кейин җамаәтләрниң сани азийип кәтти. 1929-жили Мехикода филиалниң ечилиши билән вәзийәт оңшилинидиғандәк көрүнсиму, техичә бәзи тосалғулар болған. Мәсилән, тәшкилатимиз китап тарқатқучиларға (шу чағда пешқәдәмләр шундақ аталған) вәз қилған чағда сода-сетиқ билән шуғулланмаслиққа тегишлик көрсәтмә бәргәндә, бир китап тарқатқучиниң аччиқлиниши шуки, у һәқиқәтни ташлап, өзиниң Муқәддәс китапни тәтқиқ қилиш групписини уюштурған. Буниң билән бир вақитта Муқәддәс китапқа қарши жүрүш-туруши сәвәвидин филиал назарәтчисини алмаштурушқа тоғра кәлди. Раст, Мексидики садиқ Гувачилар тәсәллигә муһтаҗ еди.

Рутерфорд бурадәр кәлгәндә уларға илһам берип, тәсиратлиқ икки нутуқ вә радио арқилиқ аңлитилған бәш нутуқ ейтқан. Шу чағда қериндашлар Мексикида хуш хәвәрни җакалаш үчүн радиостанцияләрни биринчи қетим ишләткән. Конгресстин кейин вәз ишиға рәһбәрлик қилидиған йеңи филиал назарәтчиси тайинланған. Әнди Гувачиларниң қәлблири қизғинлиққа толуп, улар Йәһваниң бәрикити билән вәз қилишни давамлаштурди.

1933-жили Мексикида икки конгресс өткүзүлди: бирси Веракрус шәһиридә, иккинчиси Мехикода. Қериндашлар һармай-талмай вәз қилип, бәк яхши нәтиҗиләргә еришти. Мәсилән, 1931-жили бу йәрдә 82 җакалиғучи болди, 1941-жили болса уларниң сани он һәссә көпәйди! 1941-жили өткән конгрессқа 1000ға йеқин адәм кәлди.

1943-жили Гувачилар Мексикиниң 12 шәһиридә өткүзүлмәкчи болған «Азат болған хәлиқ»  намлиқ конгрессқа чақиришни башлиди * (Изаһәткә қараң.). Буниң үчүн улар «сэндвич» плакатларни кийип жүрди. Гувачилар мүрисидә бириктүрүлгән, бири алдиға, иккинчиси кәйнигә чүшүп турған мундақ плакатларни 1936-жилдин башлап адәмләргә конгрессни елан қилиш үчүн қоллинип кәлгән.

Мехикода плакатларни тақап конгрессни елан қилиш ишиниң утуқлуқ болғини шуки, бир йәрлик журналда конгрессқа қатнашқан Гувачилар һәққидә мундақ йезилған еди: «[Конгрессниң] биринчи күни уларға көпирәк адәмни тәклип қилиш керәклиги ейтилған. Әтиси болса, улар жиғилған йәр адәмләргә лиқ толди» («La Nación»). Гувачиларниң бу утуғи католик чиркосиниң чишиға тәгкәнликтин, улар қаршилиқ көрсәтти. Бирақ қериндашлар һеч қорқмиди. Улар адәмләрни конгрессқа тәклип қилишни давамлаштурди. Мәзкүр журналдики башқа бир мақалидә: «Улар пүткүл шәһәр турғунлириниң көзигә чүшти»,— дәп йезилип, қериндашлиримизниң «елан “сэндвичлириға” айланғанлиғи» ейтилған. Шундақла шу мақалидә Мехико шәһириниң кочилирида жүргән қериндашлиримизниң рәсими чиққан еди. Рәсимниң астида: «Улар кочиларни қаплавалди»,— дәп йезилған.

Шу жиллири Мексикидики Йәһва гувачилириниң көпинчисигә конгрессларға қатнишиш асан болмиған. Көп қериндашлар поезд йоллири вә һәтта машина жүридиған йоллардин жирақ җайлашқан йезилардин кәлгән. Бир җамаәт мундақ язған еди: «Бу йәрләрдә телеграф линиясидин башқа һечнемә өтмәйду». Шу сәвәптин, конгрессқа бериш үчүн, уларға хечир ешәк билән яки нәччә күн пиядә меңишқа тоғра кәлди.

Қериндашларниң көпинчиси кәмбәғәл болғанлиқтин, когрессқа йетиш үчүн пуллири аранла йетәтти. У йәргә йетивалғандин кейин, улар меһир-муһәббәт вә меһмандостлуқ көрсәткән йәрлик Гувачиларниң өйидә тохтиған. Башқилири Ибадәт өйлиридә қонуп қалатти. Бир қетим тәхминән 90 қериндаш филиалда китап коробкилириниң үстидә ухлиған. «Жилнамидә» йезилғандәк, қериндашлар буниңға миннәтдар болуп, бу коробкиларниң «бетонлуқ едәндин хелила юмшақ» болғанлиғини ейтқан.

Бу Гувачилар қериндашлири билән җәм болуш һәммә күчини чиқиришқа әрзийду дәп һесаплиған. Бүгүнки таңда Мексикида 850 000 Йәһва гувачиси бар вә уларниң һәммиси миннәтдарлиқ роһини көрситиду * (Изаһәткә қараң.). 1949-жилниң «Жилнамә» китавида йезилғандәк, қериндашларниң ибадәткә болған қизғинлиқ отини һечқандақ қийинчилиқлар өчүрәлмиди. Һәрбир конгресстин кейин «улар узун вақит давамида көпинчә шу конгресс тоғрисида сөзләп жүргән». Қериндашлар қайта-қайта: «Конгресс йәнә қачан болиду?»— дәп соришатти. Мәркизий Америкидики архивимиздин.