1. Әфәсликләргә 6:10—13кә асасән Йәһва бизгә қандақ көңүл бөлиду? Чүшәндүрүп бериң.

 ЙӘҺВАНИҢ дүшмәнлиримизгә қарши турушқа ярдәм бериватқанлиғи — Униң бизгә көңүл бөлидиғанлиғиниң әң күчлүк испатиниң бири. Бизниң асасий дүшмәнлиримиз — Шәйтан билән җинлар. Йәһва бизни улар тоғрилиқ агаһландуруп, уларға қарши туруш үчүн немә қилишимиз керәклигини үгитиду (Әфәсликләргә 6:10—13ни оқуң). Йәһваниң ярдимини қобул қилип, Униңға пүтүнләй таянсақ, Иблисқа қарши туралаймиз. Шундақ қилсақ, әлчи Паулға охшаш: «Әгәр Худа биз тәрәп болса, кимму бизгә қарши болиду?»— дәп ишәнчлик ейталаймиз (Рим. 8:31).

2. Бу мақалидә немиләрни муһакимә қилимиз?

² Худаниң һәқиқий хизмәтчилири болғанлиқтин, биз Шәйтан билән җинларға қизиқмаймиз. Әксичә, Йәһва тоғрилиқ билим елишқа вә Униңға хизмәт қилишқа бар диққитимизни қаритимиз (Зәб. 25:5). Шундақ болсиму, биз Шәйтанниң һийлә-микирлирини билишимиз керәк. Немә үчүн? Шу чағда биз униңға алдинип қалмаймиз (Кор. 2-х. 2:11). Бу мақалидә биз Шәйтан вә җинлар адәмләрни алдаш үчүн қандақ тузақларни қуридиғанлиғини вә уларға қарши туруш үчүн немә қилиш керәклигини муһакимә қилимиз.

3, 4. a) Җинкәшлик дегинимиз немә? ә) Җинкәшлик қанчилик кәң тарқалған?

³ Шәйтан вә җинларниң адәмләрни алдаш үчүн пат-пат қоллинидиған усули — җинкәшлик. Җинкәшлик билән шуғуллинидиғанлар аддий адәмниң қолидин кәлмәйдиған нәрсиләрни қилалаймиз, сирларни ашкарә қилалаймиз дәп ейтиду. Мәсилән, бәзиләр пал ечип яки юлтузларға қарап келәчәкни ейтип берәләймиз дейишиду. Башқилар әрвалар билән сөзлишәләймиз дәйду. Йәнә башқилири сеһиргәрлик  яки бахшилиқ қилиш билән шуғуллинип, бирсини оқутушқа уруниду b.

⁴ Җинкәшлик қанчилик кәң тарқалған? Латин Америкаси вә Кариб араллириға җайлашқан 18 дөләттә елип берилгән пикир сораш йәкүни бойичә, адәмләрниң үчтин бир қисми җодигәрлик вә сеһиргәрликкә ишиниду. Бу кишиләрниң көпинчиси роһлар билән алақә қилиш мүмкин дәп һесаплайду. Африкидики 18 дөләттиму пикир сораш елип берилгән. Оттура һесапта қатнашқучиларниң тәңдин толиси сеһиргәрликкә ишинидекән. Әлвәттә, қәйәрдә яшимайли, җинкәшликниң тузиғиға чүшмәслик үчүн пәхәс болушимиз керәк. Чүнки Шәйтан «пүтүн дунияни» аздуриватиду (Вәһ. 12:9).

5. Йәһва Худа җинкәшликкә қандақ қарайду?

⁵ Йәһва Худа — «һәқ иқәтниң Рәбби» (Зәб. 31:5). Шу сәвәптин У җинкәшликни өч көриду! Йәһва Исраил хәлқигә мундақ дегән: «Сениң ичиңдә оғли вә йә қизини оттин өткүзүп, пал беқип, рәм селип, әпсун оқуп, җодигәрлик қилип, җинкәшлик қилип, роһлардин гәп сорап, рәммал болуп өлгәнләрдин мәслиһәт сорайдиған кишиләр тепилмисун. Чүнки кимки мундақ ишларни қилса, Худавәндиниң алдида жиркиничлик санилиду. Тәңриң Худавәндә болса мундақ жиркиничлик ишларниң сәвәвидин бу таипиләрни алдиңлардин чиқириду» (Қ. шәр. 18:10—12). Бүгүнки күндә биз Йәһва Худа исраиллиқларға бәргән Қанун бойичә яшимаймиз. Лекин Йәһва җинкәшликни шу чағда қандақ өч көргән болса, һазирму дәл шундақ өч көридиғанлиғини билимиз (Мал. 3:6).

6. a) Шәйтан адәмләргә зиянкәшлик қилиш үчүн җинкәшликтин қандақ пайдилиниду? ә) Вәз 9:5кә асасән, адәм өлгәндә униң билән немә болиду?

⁶ Йәһва Худа бизни җинкәшликниң хәвп-хәтири һәққидә агаһландуриду. Чүнки җинкәшликниң ярдими билән Шәйтан адәмләргә зиянкәшлик қилиду. Шәйтан җинкәшликни қоллинип, һәрқандақ ялған тәлиматларни тарқитиду. Мәсилән, у бизни адәм өлгәндин кейин униң роһи давамлиқ яшайду дегәнгә ишәндүрмәкчи (Вәз 9:5ни оқуң). Шундақла у җинкәшликтин пайдилинип, адәмләрни қорқутмақчи вә уларни Йәһвадин жирақлуштурмақчи. Шәйтанниң мәхсити — җинкәшлик билән шуғуллинидиған адәмләрни Йәһваға ишинишниң орниға, яман роһларға ишәндүрүш.

7. Йәһва бизгә немини чүшәндүриду?

⁷ Жуқурида ейтилип кәткәндәк, Йәһва бизгә Шәйтан билән җинларға алдинип қалмаслиғимиз үчүн немиләрни билишимиз керәклигини чүшәндүриду. Уларға қарши турушқа ярдәм беридиған бирнәччә пайдилиқ мәслиһәтләрни көрүп чиқайли.

8. a) Яман роһларға қарши турушниң асасий усули немә? ә) Зәбур 146:4тики сөзләр Шәйтанниң өлгәнләр тоғрилиқ ялғанлирини қандақ ашкарилайду?

⁸ Худаниң Сөзини оқуп, оқуғанлириңиз тоғрилиқ чоңқур ойлиниң. Бу — яман роһлар тарқитиватқан ялғанчилиққа алдинип қалмаслиқниң асасий усули. Худаниң Сөзи Шәйтанниң ялғанчи екәнлигини ашкарилайдиған өткүр қиличқа  охшайду (Әфәс. 6:17). Мәсилән, Муқәддәс китапта әрвалар билән сөзлишиш мүмкин әмәслиги ейтилған (Зәбур 146:4ни оқуң). Шундақла униңда пәқәт Йәһва Худа келәчәк һәққидә ишәнчлик пәйғәмбәрлик сөзләрни ейталайдиғанлиғи йезилған (Йәшая 45:21; 46:10). Худаниң Сөзини дайим оқуп, билгәнлиримиз тоғрилиқ чоңқур ойлисақ, яман роһлар ишәндүрмәкчи болған сахта тәлиматларни рәт қилип, уларни өч көрүшни үгинимиз.

9. Җинкәшликниң қандақ түрлиридин қечишимиз керәк?

⁹ Җинкәшликкә мунасивәтлик һәрқандақ иштин қечиң. Худаниң хизмәтчилири сүпитидә биз җинкәшликкә киридиған һечқандақ ишларни қилмаймиз. Мәсилән, бахшиларға бармаймиз вә өлгәнләр билән сөзлишишниң башқа йоллирини издимәймиз. Авалқи мақалидә ейтилғандәк, өлгәнләр башқа йәрдә давамлиқ яшайду дегән ишәнчигә асасланған урп-адәтләргә қатнашмаймиз. Шуниң билән биз юлтузларға қарап келәчәкни билишкә тиришмаймиз яки пал ачмаймиз (Йәшая 8:19). Сәвәви буларниң һәммиси наһайити хәтәрлик, һәтта Шәйтан вә җинлар билән удул алақә қилишқа йетәклиши мүмкин.

10, 11. a) Биринчи әсирдики бәзи адәмләр һәқиқәтни билгәндә, немә қилди? ә) Коринтлиқларға 1-хәт 10:21гә бенаән, биринчи әсирдики мәсиһийләрни қандақ үлгә қилалаймиз?

¹⁰ Җинкәшликкә бағлинишлиқ нәрсиләрдин айрилиң. Биринчи әсирдә Әфәстә яшиған бәзи адәмләр җинкәшлик билән шуғулланған. Улар һәқиқәтни билгәндә, һаятини өзгәртиш үчүн қәтъий һәрикәт қилған. «Сеһир-җодигәрлик билән шуғулланғанларниң интайин нурғуни өз китаплирини жиғип, һәммисиниң көзичә уларни көйдүрүвәтти» (Әлч. 19:19). Улар яман роһларға қарши туруш үчүн бар күчини чиқарған еди. Уларниң китаплири бәк қиммәт болған. Амма улар китаплирини сетишниң яки башқиларға бериветишниң орниға, уларни көзидин йоқ қилған еди. Шу кишиләр үчүн китапларниң  қанчә пул туридиғанлиғи әмәс, Йәһвани хошал қилиш муһимирақ болған.

¹¹ Биз биринчи әсирдики мәсиһийләрни қандақ үлгә қилалаймиз? Җинкәшлик билән бағлинишлиқ һәрқандақ нәрсидин айрилиш бәк муһим. Мәсилән, тумар, көз мончақ вә яман роһлардин яки көз тегиштин сақлайдиған башқа нәрсиләрни йоқ қилишимиз зөрүр (Коринтлиқларға 1-хәт 10:21ни оқуң).

12. Оюн-тамашиға мунасивәтлик қандақ соалларни өзүмизгә қоюшимиз керәк?

¹² Қандақ оюн-тамашиларни таллиғанлиғиңизға пәхәс болуң. Өзүңиздин мундақ дәп сораң: Мән җинкәшлик тоғрилиқ китап-журналлар яки тордин оқуймәнму? Мән тиңшайдиған музыка, көридиған фильмлар вә телевизийә программилири, ойнайдиған видео оюнлар тоғрилиқ немә ейтишқа болиду? Мән таллиған оюн-тамашида қан шориғучлар, гөрдин чиққан өлүкләр, роһлардин күч алған адәмләргә охшаш җинкәшликкә бағлинишлиқ бир нәрсиләр йоқму? Сеһир-җодигәрликниң һеч зийини йоқ, қизиқарлиқ нәрсидәк көрситиләмду? Әлвәттә, ойдурма, әпсанә-ривайәт яки һекайә-чөчәкләрниң һәммисини җинкәшлик дәп ейталмаймиз. Шундақ болсиму, көңүл ечиш түрини таллиғанда, Йәһва өч көридиған нәрсиләрдин нери турушқа бәл бағлаң. Чүнки һәммимиз Худаниң алдида пак вижданға егә болуш үчүн бар күчимизни чиқиришни халаймиз c (Әлч. 24:16).

13. Биз немиләрни ейтип бәрмәймиз?

¹³ Башқиларға җинлар тоғрилиқ һекайиләрни ейтип бәрмәң. Биз бу җәһәттин Әйсадин үлгә елишни халаймиз  (Пет. 1-х. 2:21). Йәргә келиштин бурун Әйса асманда яшиғанлиқтин, Шәйтан вә униңға қошулған җинлар тоғрилиқ көп нәрсиләрни билгән. Лекин у шу яман роһларниң ишлири һәққидә һечқандақ һекайиләрни ейтмиған. Сәвәви Әйса Шәйтанниң вәкили әмәс, Йәһваниң гувачиси болушни халиған. Биз Әйсадин үлгә елип, җинлар тоғрилиқ һекайиләрни тарқатмаймиз. Буниң орниға қәлбимизгә йеқимлиқ бир нәрсә, йәни һәқиқәт тәсир қиливатқанлиғи сөзлиримиздин көрүнсун (Зәб. 45:1).

14, 15. a) Немә үчүн яман роһлардин қорқушимизниң һаҗити йоқ? ә) Йәһва Өз хизмәтчилирини һимайә қилидиғанлиғиниң қандақ дәлили бар?

¹⁴ Яман роһлардин қорқмаң. Бүгүнки дунияда биз түрлүк яманлиққа йолуқушимиз еһтимал. Биз күтүлмигән паҗиәгә, ағриққа яки һәтта өлүмгә дуч келишимиз мүмкин. Лекин буларниң һәммиси яман роһларниң кесиридин болди дәп ейтишқа боламду? Муқәддәс китапта һәрбиримизниң «вақит билән пурсәт[кә]» дуч келишимиз мүмкинлиги йезилған (Вәз 9:11). Йәһва җинлардин нәқәдәр күчлүк. Мәсилән, Худа Шәйтанниң Аюпни өлтүрүшигә рухсәт бәрмиди (Аюп 2:6). Муса пәйғәмбәрниң күнлиридә Йәһва Худа Өзиниң сеһиргәрлик билән шуғулланған Мисир каһинлиридин күчлигирәк екәнлигини испатлиған (Чиқ. 8:18; 9:11). Йәһва Худа кейинирәк Әйсаға һоқуқ бәргәндә, у Шәйтан билән җинларни асмандин йәргә қоғлавәтти. Пат арида улар һаңға ташлиниду, шу йәрдә улар һечкимгә зиян кәлтүрәлмәйду (Вәһ. 12:9; 20:2, 3).

¹⁵ Бүгүнки күндә Йәһва Өз хизмәтчилирини һимайә қиливатқанлиғиниң көп дәлили бар. Бу тоғрисида ойлап көрүң: биз һәқиқәтни йәрниң булуң-пушқақлириғичә җакалап, башқиларниң уни тонуп-билишигә ярдәм беримиз (Мәт. 28:19, 20). Нәтиҗидә, биз Шәйтанниң яман ишлирини ашкарилаймиз. Чамиси йәткән болса, Шәйтан һәммә паалийитимизни тохтитип қоятти, лекин бу униң қолидин кәлмәйду. Шуниң үчүн яман роһлардин қорқушниң һаҗити йоқ. Биз билгинимиздәк, «Худавәндиниң көзлири пүтүн йәр йүзини көрүп туруп, өз көңүллирини Униңға майил қилғанларға өзини қудрәтлик көрситиду» (Тар. 2-яз. 16:9). Әгәр биз Йәһваға садиқ болсақ, җинлар мәңгү һаятқа еришишимизгә тосалғу болидиған һеч зиянкәшлик қилалмайду.

16, 17. Яман роһларға қарши туруш үчүн жүрәклик болушимизниң муһимлиғини көрситидиған мисал кәлтүрүң.

¹⁶ Болупму яхши нийәт билән һәрикәт қилған дост-бурадәр яки уруқ-туққанлиримиз бизгә бесим қилғанда, яман роһларға қарши туруш үчүн жүрәклик болушимиз керәк. Жүрәклик билән мәһкәм турған хизмәтчилирини Йәһва Худа чоқум бәрикәтләйду. Ганада яшайдиған Эрика исимлиқ қериндишимизниң мисали буни испатлайду. У 21 йешида Муқәддәс китапни үгинишни башлиған. Униң дадиси җодигәрлик билән шуғуллинидиған диний хизмәтчи болған. Шуниң үчүн Эрикадин җинкәшлик билән бағлинишлиқ урп-адәтләргә қатнишиш тәләп қилинип, у атиси сәҗдә қилидиған илаһларға атап қурбан қилинған малниң гөшидин йейиши керәк еди. Эрика буниңдин баш тартқанда, туққанлири буни илаһларға болған һөрмәтсизлик дәп қариған. Уруқ-туққанлири Эрика сәвәплик илаһлар уларниң аилисини роһий вә җисманий кесәлликләр билән җазалайду дәп ишәнгән.

¹⁷ Эриканиң аилиси уни урп-адәтләргә қатнишишқа мәҗбурлимақчи болған. У көнмисә һәтта униңдин ваз кечип, өйдин қоғлап чиқиримиз дәп ейтқан. Лекин Эрика бесимға баш әгмигән. Бәзи етиқатдашлар уни өйгә тәклип қилип, униңға ғәмхорлуқ қилған. Шундақ қилип Йәһва Худа уни йеңи аилә билән бәрикәтлигән. Етиқатдашлар униң үчүн бир туққан қериндашлардәк болуп кәтти (Марк 10:29, 30). Эриканиң уруқ-туққанлири униңдин ваз кечип, һәммә нәрсилирини көйдүривәтсиму, у Йәһваға садиқ қелип, чөмдүрүлүштин өтти вә һазир пионер болуп хизмәт қиливатиду. Эрика яман роһлардин қорқмайду. У аилиси тоғрилиқ мундақ дәйду: «Мән һәр күни уруқ-туққанлирим үчүн дуа қилип, уларниң Йәһвани тонуп-билишини вә әркинликкә еришишини сораймән. Шундақ әркинликкә пәқәт меһрибан Худайимизға хизмәт қилиш арқилиқ еришкили болиду».

18. Йәһваға таянсақ, қандақ бәрикәтләргә егә болумиз?

¹⁸ Әлвәттә, һәрбиримиз буниңға охшаш синақларға дуч кәлмәймиз. Амма һәммимиз яман роһларға қарши турушимиз вә Йәһваға тайинишимиз керәк. Шундақ қилсақ, көп бәрикәтләргә егә болумиз вә Шәйтанға алдинип қалмаймиз. Шундақла яман роһлардин қорқуш бизни Йәһваға хизмәт қилиштин тохтатмайду. Әң муһими, Йәһва билән достлуқ мунасивитимиз техиму күчийиду. Әйсаниң шагирти Яқуп мундақ дәп язған: «Рәбкә бойсунуп, Иблисқа қарши туруңлар һәм у силәрдин қачиду. Худаға йеқинлишиңлар һәм Уму силәргә йеқинлишиду» (Яқуп 4:7, 8).