14-ТӘТҚИҚ МАҚАЛИСИ
Хизмитиңизни толуқ мөлчәрдә атқуруватамсиз?
«Вәзилик иши билән шуғуллан, өзүңниң хизмитини толуқ мөлчәрдә атқур» (ТИМ. 2-Х. 4:5).
142-НАХША Һәрхил инсанларға вәз қилимиз
БУ МАҚАЛИДӘ a
Әйса тирилгәндин кейин шагиртлири билән учришип, уларға «берип,... шагиртларни тәйярлаңлар» дәп буйриди (1-абзацқа қараң).
1. Худаниң һәммә садиқ хизмәтчилири немини халайду вә немә үчүн? (Муқавидики рәсимгә қараң.)
ӘЙСА МӘСИҺ шагиртлириға: «Берип барлиқ хәлиқләрдин... шагиртларни тәйярлаңлар»,— дәп буйруқ бәргән (Мәт. 28:19). Худаниң һәммә садиқ хизмәтчилири тапшурулған вәзипини қандақ қилип «толуқ мөлчәрдә» атқуралайдиғанлиғини үгинишни халайду (Тим. 2-х. 4:5). Бу иш башқа ишларға қариғанда, әң муһим, әң әһмийәтлик вә әң җиддий. Амма бәзидә вәз хизмитигә өзүмиз халиғандәк көпирәк қатнишиш қийин болуши мүмкин.
2. Вәз хизмитини толуқ мөлчәрдә атқурушта қандақ қийинчилиқларға дуч келишимиз мүмкин?
2 Һәммимизниң вақтимизни вә күчимизни алидиған башқиму муһим ишлиримиз бар. Өзүмизни вә аилимизни беқиш үчүн көп ишләшкә тоғра келиду. Бәлким, өзүмизниң яки аилимиздики бирсиниң саламәтлиги начар болуши, яки болмиса, роһий чүшкүнлүк чирмавелиши мүмкин. Йә болмиса, йешимиз чоңайғансири дуч келиватқан қийинчилиқларниң дәрдини тартиватқандимиз. Шундақ қийинчилиқларға қаримастин, хизмитимизни толуқ мөлчәрдә атқурушимиз мүмкинму?
3. Мәтта 13:23тики сөзләрдин қандақ хуласә чиқиришимиз мүмкин?
3 Вәзийитимиз түпәйли, Йәһваға көпирәк хизмәт қилалмисақ, роһумиз чүшмәслиги керәк. Әйса Падишалиқ һәққидики хуш хәвәрни вәз қилиш үчүн һәрбиримизниң охшаш күч вә вақит чиқиралиши мүмкин әмәслигини билиду (Мәтта 13:23ни оқуң). Әгәр биз қолумиздин кәлгиничә Йәһваға хизмәт қилсақ, У көрсәткән тиришчанлиғимизни бәкму қәдирләйду (Ибр. 6:10—12). Шундақ болсиму, биз көпирәк хизмәт қилалайдиғанлиғимизни чүшинишимиз мүмкин. Бу мақалидә хизмәтни һаятимизда биринчи орунға қоюш, аддий һаят кәчүрүш, вәз хизмитимиздә вә тәлим бериштә техиму маһир болуш үчүн немә қилалайдиғанлиғимизни көрүп чиқимиз. Авал хизмитимизни толуқ мөлчәрдә атқуруш немини билдүридиғанлиғини көрүп чиқайли.
4. Хизмитимизни толуқ мөлчәрдә атқуруш дегән немини билдүриду?
4 Аддий бир сөз билән ейтқанда, хизмитимизни толуқ мөлчәрдә атқуруш үчүн вәз хизмитигә вә тәлим беришкә имканийәтниң баричә көпирәк қатнишишимиз керәк. Йәһва Худа үчүн пәқәт қанчә саат хизмәт қилидиғанлиғимиз әмәс, нийитимизму бәк муһим. Биз Йәһва Худани вә адәмләрни яхши көргәнликтин, Йәһваға пүтүн вуҗудимиз билән хизмәт қилимиз b (Марк 12:30, 31; Кол. 3:23). Йәһва Худаға пүтүн вуҗудимиз билән хизмәт қилиш дегән немини билдүриду? Бу бизгә тапшурулған ишни орунлашқа бар күчимизни вә барчә қабилийәтлиримизни беғишлашни билдүриду. Вәз ишини қәдирлисәк, қолумиздин кәлгиничә көпирәк адәмләргә хуш хәвәрни ейтишқа интилимиз.
5, 6. Бириниң вақти қис болсиму, пүтүн вуҗуди билән вәз хизмитини биринчи орунға қоюши мүмкинму? Мисал кәлтүрүң.
5 Гитара челишни яхши көридиған бир жигитни мисалға алайли. У һәр мүмкинчиликтин пайдилинип, гитара чалиду. Лекин күн көрүш үчүн дуканға ишқа орунлишишиға тоғра келиду. Гәрчә униң көп вақти дуканда өтсиму, жигитниң һәммә ойи музыкида. У гитара челиш маһаритини ашуруп, кәспий музыкант болушни арман қилиду. Шуниң үчүн қоли тәгсила, гитарини қолиға алиду.
6 Худди шуниңдәк, вәз хизмитигә өзүңиз халиғандәк көп вақит чиқиралмаслиғиңиз мүмкин. Амма сизниң һәммә ой-хиялиңиз вәз хизмитидә. Сизму хуш хәвәрни адәмләрниң жүригигә йәткүзүш үчүн маһаритиңизни ашурушқа интилисиз. Бирақ вәзипилириңиз шунчә көп болғанлиқтин, вәз хизмитини һаятимда биринчи орунға қоялаймәнму дәп ойлайдиғансиз.
ВӘЗ ХИЗМИТИНИ БИРИНЧИ ОРУНҒА ҚОЮҢ
7, 8. Хизмәтни биринчи орунға қоюшта Әйсадин қандақ үлгә алалаймиз?
7 Хизмәтни биринчи орунға қоюшта Әйса яхши үлгә көрсәтти. Худа Падишалиғи тоғрилиқ ейтиш униң һаятида әң муһим иш болған (Йоһ. 4:34, 35). У имканийәтниң баричә көпирәк вәз қилиш үчүн нәччә йүз километр пиядә йол маңған. У вәз қилишниң һәрбир пурситидин пайдилинип, адәмләр билән уларниң өйлиридә вә башқа йәрләрдә сөзләшкән. Әйсаниң һаятида вәз қилиш биринчи орунда болған.
8 Әйсадин үлгә елип, мәйли қәйәрдә болайли, хуш хәвәрни ейтиш пурситини қолдин бәрмәйли. Буниң үчүн биз өзүмизниң қолайлиқ турмуш шараитимизни қурбан қилишқа тәйяр (Марк 6:31—34; Пет. 1-х. 2:21). Бәзи қериндашлар пионер, ярдәмчи яки мәхсус пионер болуп хизмәт қилиду. Йәнә бәзилири башқа тилни үгиниду яки вәз ейтқучиларға еһтияҗлиқ болған җайларға көчиду. Амма вәз ишиниң тәңдин толисини җамаәттики җакалиғучилар қилиду. Йәһва Худа қолумиздин кәлмигәнни тәләп қилмайду. У бизниң «бәхитлик Худаниң шәрәплик хуш хәвирини» хошаллиқ билән җакалишимизни халайду (Тим. 1-х. 1:11; Қ. шәр. 30:11).
9. a) Паулға ишләшкә тоғра кәлсиму, у қандақ қилип хизмәтни биринчи орунға қойған? ә) Әлчиләр 28:16, 30, 31гә асасән Паул вәз хизмитигә қандақ көзқарашта болған?
9 Әлчи Паул хизмәтни һаятида биринчи орунға қоюши билән бизгә яхши үлгә қалдурди. Иккинчи миссионерлиқ сәпиридә Коринт шәһиридә болғанда, пулдин қисилғанлиқтин, Паулға ишләшкә тоғра кәлгән. Бирақ Паул үчүн иш биринчи орунда болмиған. У өз җенини беқип, коринтлиқларға хуш хәвәрни «һәқ тәләп қилмай» җакалаш үчүн ишлигән (Кор. 2-х. 11:7). Паулниң ишлишигә тоғра кәлсиму, у хизмәтни биринчи орунға қойған вә һәр шәнбә күни вәз қилған. Шараити өзгәргән чағда, у вәз хизмитигә униңдинму көпирәк қатнашқан. «Паул Худаниң сөзигә өзини әстаидил беғишлап, Әйсаниң Мәсиһ екәнлигигә йәһудийларға гувалиқ берәтти» (Әлч. 18:3—5; Кор. 2-х. 11:9). Кейин Паул Римда икки жил өйдә қамақта болғинида, хәтләрни язған вә униңға кәлгән адәмләргә гувалиқ бәргән (Әлчиләр 28:16, 30, 31ни оқуң). У һечнәрсиниң хизмәттин муһимирақ болуп кетишигә йол бәрмәсликкә бәл бағлиған. Паул: «Мошундақ хизмәткә еришип, роһумиз чүшмәйду»,— дәп язған (Кор. 2-х. 4:1). Ишимиз көп вақтимизни алсиму, Паулға охшаш Падишалиқ ишини һаятимизда биринчи орунға қоялаймиз.
Хизмитимизни толуқ мөлчәрдә атқурушниң һәрхил усуллири бар (10, 11-абзацларға қараң)
10, 11. Саламәтлигимиз начар болса, хизмәтни қандақ қилип толуқ мөлчәрдә атқуралаймиз?
10 Яшинип қалғансири дуч келиватқан қийинчилиқлар яки саламәтликниң начарлишиши сәвәвидин өйму өй вәз қилалмисақму, хизмәтниң башқа түрлиригә қатнишалаймиз. Биринчи әсирдики мәсиһийләр һәммә йәрдә вәз қилған. Улар өйму өй вә адәмләр көп йәрләрдә вәз қилип, нарәсмий гувалиқ берип, һәқиқәт тоғрисида ейтишниң һечбир пурситини қолдин бәрмигән еди (Әлч. 17:17; 20:20). Әгәр сизгә узақ йол меңиш қийин болса, адәмләр көп өтидиған йәрдә олтирип, өткән-кәчкәнләргә вәз қилсиңиз болиду. Шундақла хәт вә телефон арқилиқ яки нарәсмий гувалиқ берәләйсиз. Көплигән имканийити чәклик қериндашлар хизмәтниң мошу түрлиригә қатнишип хошаллиқ вә қанаәт тапалайду.
11 Саламәтлигиңиз начар болсиму, хизмәтни толуқ мөлчәрдә атқуралайсиз. Әлчи Паул: «Адәттики күчтин ешип чүшидиған күч биздин әмәс, әксичә Худадин»,— дәп ейтқан (Кор. 2-х. 4:7). Паул миссионерлиқ сәпиридә ағрип қалғанда шундақ күчкә муһтаҗ болған. У галатиялиқларға: «Силәргә мәлумки, дәсләп қетим мән силәргә хуш хәвәрни ағрип жүрүп йәткүзгәндим»,— дәп чүшәндүрди (Гал. 4:13). Шуниңға охшаш, саламәтлигиңиз начар болсиму, сиздә дохтурларға вә тиббий хадимларға гувалиқ бериш мүмкинчилигиңиз бар. Чүнки җакалиғучилар дохтурханида ишләйдиғанларниң өйигә вәз қилип барғанда, адәттә көпинчиси ишта болуп қалиду.
АДДИЙ ҺАЯТ КӘЧҮРҮҢ
12. Мәтта 6:22дики сөзләр арқилиқ Әйса немә демәкчи болған?
12 Әйса: «Бәдәнниң чириғи — көз. Шу сәвәптин көзүң аддий болса, пүткүл бәдиниңму йоруқ болиду»,— дәп ейтқан (Мәт. 6:22). Әйса буниң билән немә демәкчи болған? Биз аддий һаят кәчүрүп, бир мәхсәтни көзлишимиз керәклигини ейтқан. Әйса өзиму һаятини хизмәткә беғишлап, әң яхши үлгә қалдурған. Шундақла шагиртлириға Йәһвани вә Униң Падишалиғини һаятида биринчи орунға қоюшни үгәткән. Бизму «авал Падишалиқни һәм Худаниң һәққанийлиғини издәп», вәз хизмитини һаятимизда биринчи орунға қойсақ, Әйсадин үлгә алимиз (Мәт. 6:33).
13. Вәз хизмитигә көпирәк вақит чиқириш үчүн немә қилсақ болиду?
13 Адәмләрниң Йәһва Худа тоғрилиқ билим елишиға вә Уни яхши көрүшни үгинишигә ярдәм бериш үчүн қәйәрдин көпирәк вақит тапалаймиз? Һаятимизни аддийлаштурсақ болиду c. Сиз һәптә ичидә вәз хизмитигә көпирәк вақит чиқириш үчүн иш вақтиңизни қисқарталамсиз? Әгәр оюн-тамашиға көп вақтиңиз кетиватса, қандақту бир өзгәртишләрни қилаламсиз?
14. Бир әр-аял көпирәк вәз қилиш үчүн қандақ өзгәртишләрни қилған?
14 Илайс исимлиқ ақсақал вә униң аялиниң мисалини көрүп чиқайли. У мундақ дәйду: «Биз пионер болуп хизмәт қилалмидуқ, амма өзгәртишләр қилиш керәклигини чүшәндуқ. Шуниң үчүн көпирәк вәз қилишқа мәхсәт қоюп, аста-аста мәхситимизгә йетишкә тириштуқ. Мәсилән, чиқимларни вә дәм елиш билән оюн-тамашиға кетидиған вақитни қисқарттуқ. Униңдин ташқири, башлиқлиримиздин иш вақтимизни өзгәртишкә соридуқ. Нәтиҗидә кәчқурунлиғи вәз қилалайдиған болдуқ, көп адәмләр билән Муқәддәс китапни үгинишни башлидуқ, һәтта бир айда һәптә арилиғида икки қетим вәзгә қатнишалаттуқ. Хошаллиғимиз қин-қинимизға патмиди!»
ВӘЗ ҚИЛИШ ВӘ ТӘЛИМ БЕРИШ МАҺАРИТИҢИЗНИ АШУРУҢ
«Мәсиһий һаятимиз вә хизмитимиз» учришишидики мәслиһәтләрни қоллансақ, вәз хизмитимизни яхшилиталаймиз (15, 16-абзацларға қараң) d
15, 16. Тимотийға 1-хәт 4:13, 15кә асасән вәз қилиш маһаритимизни қандақ өстүрәләймиз? (« Вәз хизмитини толуқ мөлчәрдә атқурушумға ярдәм беридиған мәхсәтләр» намлиқ рамкиға қараң.)
15 Хизмитимизни толуқ мөлчәрдә атқурушниң йәнә бир йоли — вәз қилиш маһаритимизни ашуруш. Бәзиләр кәспий маһаритини ашуруш үчүн көпирәк билим елиш вә қабилийәтлирини ашуруш үчүн давамлиқ түрдә үгиниду. Падишалиқ җакалиғучилириму шундақ қилиду. Вәз хизмитидә техиму маһир болуш үчүн давамлиқ үгинишимиз керәк (Пәнд н. 1:5; Тимотийға 1-хәт 4:13, 15ни оқуң).
16 Вәз қилиш маһаритимизни өстүрүш үчүн немә қилсақ болиду? «Һаятимиз вә хизмитимиз» учришишиниң рәиси мәслиһәт бәргәндә диққәтчан болуң. Бу учришишта вәз қилиш маһаритимизни ашурушқа ярдәм беридиған пайдилиқ мәслиһәтләр берилиду. Мәсилән, учришишниң рәиси тапшуруқ билән чиққан қериндашқа мәслиһәт бәргәндә, вәз хизмитимизгә пайдилиқ дәп қариған пикирләрни йезивелишқа болиду. Кейин хизмәткә чиққанда, уларни қоллансақ болиду. Вәз қилиш топиниң назарәтчисидин мәслиһәт соралаймиз, униң билән хизмәткә чиқсақму болиду. Шундақла тәҗрибилик җакалиғучи, пионер яки наһийилик назарәтчи билән вәз қилалаймиз. Тәлим бериш қураллирини яхширақ қоллинишни үгинивалсақ, вәз қилиш вә тәлим бериштин көпирәк хошаллиқ тапимиз.
17. Хизмитимизни толуқ мөлчәрдә атқурушниң нәтиҗиси қандақ болиду?
17 «Худаниң хизмәтдашлири» болуш немә дегән чоң шан-шәрәп! (Кор. 1-х. 3:9). «Муһимирақ нәрсигә көз йәткүзсәк» вә хизмәтни һаятимизда биринчи орунға қойсақ, Йәһваға «хошаллиқ билән хизмәт қилимиз» (Флп. 1:10; Зәб. 100:2). Худаниң хизмәтчиси болғанлиқтин, қандақ қийинчилиқларға дуч келиштин қәтъийнәзәр, хизмитиңизни толуқ мөлчәрдә атқуруш үчүн Йәһва Худа сизгә керәклик күч беридиғанлиғиға гуман қилмаң (Кор. 2-х. 4:1, 7; 6:4). Қанчә вақит хизмәт қилишиңизға қаримай, пүтүн вуҗудиңиз билән хизмәт қилсиңиз, сиздә «хурсән болушқа сәвәп» болиду (Гал. 6:4). Вәз хизмитиңизни толуқ мөлчәрдә атқурсиңиз, Йәһва Худаға вә адәмләргә болған меһир-муһәббитиңизни көрситисиз. Шундақ қилсиңиз, өзүңизни вә сизни тиңшиғанларни қутқузалайсиз (Тим. 1-х. 4:16).
141-НАХША Течлиқ достлирини издәймиз
a Әйса бизгә Падишалиқ һәққидики хуш хәвәрни җакалашқа вә шагиртларни тәйярлашқа буйриған. Бу мақалидә қийинчилиқларға қаримастин, хизмитимизни қандақларчә толуқ мөлчәрдә атқурушқа болидиғанлиғини көрүп чиқимиз. Шундақла, вәз қилиш маһаритимизни өстүрүп, көпирәк хошаллиқ тепиш үчүн немә қилишқа болидиғанлиғини биливалимиз.
b СӨЗ-ИБАРӘ МӘНАСИ: Бизниң хизмитимиз вәз қилиш вә тәлим беришниң һәрқандақ түрлири, ибадәт қилидиған җайларни қуруш, ремонт қилиш, яхши һаләттә тутуш һәм тәбиий апәтләрдин зәрдап чәккәнләргә ярдәм бериш қатарлиқ ишларға қатнишишни өз ичигә алиду (Кор. 2-х. 5:18, 19; 8:4).
c «Күзитиш мунариниң» (рус) 2016-жилниң июль саниниң 10-бетидики «Һаятни аддийлаштуруш усуллири» намлиқ рамкиға қараң.
d СҮРӘТЛӘРДӘ: «Һаятимиз вә хизмитимиз» учришишида қериндишимиз биринчи қайта йолуқуш тапшуруғини орунлаватиду. Кейин учришишниң рәиси бәргән мәслиһәтни «Тәлим бериш» китапчисиға йезиватиду. Учришишта үгәнгәнлирини вәз хизмитидә қоллиниватиду.
