1. Һәммимиз немә қилишимиз керәк?

 БИРӘР жүгүрүш мусабиқисиниң қийин екәнлигини билсиңиз, болупму ағриватқан яки һерип турған болсиңиз, униңға қатнишишни халамсиз? Бәлким, қатнашмайсиз. Лекин әлчи Паул Худаниң һәқиқий хизмәтчилириниң һәммиси мусабиқигә қантишиватқанлиғини ейтқан (Ибр. 12:1). Мәйли яш яки яшанған, күчлүк яки аҗиз болайли, Йәһва Худа беридиған мукапатқа еришиш үчүн, һәммимиз сәвир-тақәт билән ахирғичә жүгүрүшимиз лазим (Мәт. 24:13).

2. Тимотийға 2-хәт 4:7, 8дә ейтилғандәк, Паул немә үчүн сөз әркинлигигә егә болған?

² Паул бу мусабиқини ахириғичә жүгүрүп болғачқа, униң сөз әркинлиги болған (Тимотийға 2-хәт 4:7, 8ни оқуң). Амма Паул нәқ қайси мусабиқә тоғрилиқ гәп башлиған?

3. Паул қандақ мусабиқә һәққидә сөзлигән?

³ Бәзидә Паул тәлим бериш үчүн қедимқи Грекиядә өткүзүлгән оюнларни мисалға кәлтүргән (Кор. 1-х. 9:25—27; Тим. 2-х. 2:5). У бирнәччә қетим мәсиһийләрниң һаятини жүгүрүш мусабиқиси билән селиштурған (Кор. 1-х. 9:24; Гал. 2:2; Флп. 2:16). Инсан өзини Йәһва Худаға беғишлап, чөмдүрүлүштин өткәндә, шу мусабиқигә қатнишишни башлайду (Пет. 1-х. 3:21). Йәһва Худа униңға мәңгү һаят мукапитини бәргәндә, адәм пәллигә йетиду (Мәт. 25:31—34, 46; Тим. 2-х. 4:8).

4. Бу мақалидә немини көрүп чиқимиз?

⁴ Узунға жүгүрүш мусабиқиси билән Худа хизмәтчилириниң һаяти арисида көп охшашлиқлар бар. Шуларниң үчини көрүп чиқайли. Биринчиси, биз тоғра йол билән жүгүрүшимиз керәк. Иккинчиси, көзүмизни ахирқи пәллигә тикишимиз  лазим. Үчинчиси, йолда дуч келидиған қийинчилиқларни йеңишимиз зөрүр.

5. Биз қандақ йолда жүгүрүшимиз керәк вә немә үчүн?

⁵ Жүгүрүш мусабисиқигә қатнашқучи мукапатқа еришиш үчүн мусабиқә уюштурғучилар бәлгүләп бәргән мәхсус йолда жүгүрүши керәк. Шуниңға охшаш, мәңгү һаят мукапитиға егә болушни халисақ, биз Худа хизмәтчилириниң йоли билән, йәни һаят йоли билән жүгүрүшимиз лазим (Әлч. 20:24; Пет. 1-х. 2:21). Амма Шәйтан вә униңға әгәшкәнләр бизниң башқа йолни таллишимизни, йәни «улар билән биллә» жүгүрүшимизни халайду (Пет. 1-х. 4:4). Улар биз таллиған йолни заңлиқ қилип, бизни уларниң йоли яхширақ вә әркинлик бериду дәп ишәндүрмәкчи. Бирақ уларниң сөзлири ялғандур (Пет. 2-х. 2:19).

6. Брайанниң мисалидин қандақ савақ алдиңиз?

⁶ Шәйтан дуниясиниң тәсиригә берилгән кишиләр билән жүгүрүшни таллиғанларниң һәммиси узун өтмәй бу йолниң әркинликкә әмәс, қуллуққа елип баридиғанлиғини чүшинип йетиду (Рим. 6:16). Брайанниң мисалини көрүп чиқайли. Ата-аниси уни Худаға хизмәт қилишқа дәвәт қилған. Лекин өсмүрлүк чеғида у бу йолниң өзини бәхитлик қилидиғанлиғиға гуманланған. Брайан Шәйтанниң өлчәмлири бойичә яшайдиған адәмләргә қошулуп жүгүрүшни қарар қилған. «Мән арзу қилған “әркинлик” мени яман нәрсигә хумарлиқ тузиғиға чүширидиғанлиғи ухлисамму чүшүмгә кирмигән еди. Вақит өтүп мән нәшә чекип, һарақкәшликкә берилип, әхлақсиз һаят кәчүрдүм. Бирнәччә жил давамида күчлүгирәк тәсир қилидиған наркотикларни истимал қилип, уларниң қулиға айландим... . Пул тепиш үчүн мән наркотик сетишни башлидим»,— дәп ейтти Брайан. Лекин бәхиткә яриша, кейин у Йәһваниң өлчәмлири бойичә яшашни қарар қилған еди. У һаят тәрзини өзгәртип, 2001-жили чөмдүрүлүш мәрасимидин өткән еди. Һазир у Мәсиһ көрсәткән һаят йолини таллиғанлиғидин интайин хурсән b.

7. Мәтта 7:13, 14кә асасән, қандақ икки йол бар?

⁷ Тоғра йолда жүгүрүшимиз бәк муһим! Шәйтан бизниң «һаятлиққа апиридиған» тар йол билән меңишни тохтитип, бу дуниядики кишиләрниң тәңдин толиси жүридиған кәң йолда меңишимизни халайду. Бу йол һәммигә мәлум вә униң билән меңиш бәк асан. Амма бу йол «һалакәткә апириду» (Мәтта 7:13, 14ни оқуң). Тоғра йолда жүрүшни давамлаштуруш вә шу йолдин чәтнәп кәтмәслик үчүн биз Йәһваға тайинип, униңға бойсунушимиз керәк.

8. Жүгүргүчи путлишип жиқилип кәтсә, немә қилиду?

⁸ Узун йолға жүгүрүш мусабиқидә жүгүргүчиләр путлишип кәтмәслик үчүн көз алдидики йолға қарайду. Бирақ улар байқимастин йенидики жүгүргүчиләргә яки йолдики чоңқур-ойманларға путлишип қелиши мүмкин. Әгәр жиқилип чүшсә, улар қайтидин қопуп, давамлиқ жүгүриду. Улар бар диққитини путлишип кетидиған нәрсиләргә әмәс, пәллигә вә мукапатқа қаритиду.

9. Путлишип жиқилип қалсақ, немә қилишимиз керәк?

⁹ Һаят мусабиқисидә жүгүрүватқанда, биз гәп-сөзлиримиз яки иш-һәрикәтлиримиздә хаталиқ өткүзүп, көп қетим путлишип қелишимиз мүмкин. Яки болмиса, йенимизда жүгүриватқанларниң хаталиқлири көңлүмизгә еғир келиши мүмкин. Бу бизни һәйран қалдурмаслиғи керәк. Чүнки һәммимиз намукәммәл болғачқа вә тар йолда жүгүриватқачқа, бәзидә бир-биримизгә соқулуп кетип қалимиз. Паул бәзидә бир-биримизгә «шикайәт қилишиға асас» болидиғанлиғини чүшәнгән (Кол. 3:13). Лекин путликашаң болидиған нәрсиләргә әмәс, келәчәктә алидиған мукапитимизға көз тикәйли. Путлишип қалсақ, орнимиздин туруп, давамлиқ жүгүрәйли. Әгәр адавәт сақлап, қайта орнимиздин турушни рәт қилсақ, мусабиқиниң ахирқи пәллисигә йәтмәй, мукапатқа еришәлмәймиз. Буниңдин башқа, һаятқа апиридиған тар йол билән жүгүрүшкә тиришиватқан башқа адәмләргиму тосалғулуқ қилишимиз мүмкин.

10. Башқилар үчүн «путликашаң таш» болуп қелиштин қандақ нери болалаймиз?

¹⁰ Башқилар үчүн «путликашаң таш» болмаслиқниң бир йоли — өзүмизниң дегинимиздә чиң турувалмай, уларниң ой-пикрини нәзәргә елиш (Рим. 14:13, 19—21; Кор. 1-х. 8:9, 13). Шу чағда биз мусабиқидики жүгүргүчиләргә охшимаймиз. Улар бир-бири билән бәслишип, һәрбири өзи үчүн мукапат елишқа интилиду. Улар пәқәт өз бешини ойлайду. Шу сәвәптин улар алға бесиш үчүн һәтта башқиларни иштириветиши мүмкин. Биз болсақ, бир-биримиз билән бәсләшмәймиз (Гал. 5:26; 6:4). Бизниң мәхситимиз — мүмкинқәдәр көпирәк адәмләрниң биз билән бирликтә мусабиқини ахирқи  пәллигичә жүгүрүп чиқип, һаят мукапатиға еришишигә ярдәм бериш. Шуңа, Паулниң: «Пәқәт өз мәнпәәтлириңларға ғәмхорлуқ қилмай, башқиларниңму мәнпәәтлирини ойлаңлар»,— дегән сөзлиригә қулақ селишқа күч чиқиримиз (Флп. 2:4).

11. Жүгүргүчи немигә көз тикиши керәк вә немә үчүн?

¹¹ Жүгүргүчи диққитини пәқәт йолғила әмәс, йетиш керәк пәллигиму қаритиду. У пәллини техи өз көзлири билән көрмисиму, ахирқи пәллигә жүгүрүп, мукапатни еливатқанлиғини тәсәввур қилалайду. Көзини мукапатқа тикиш жүгүргүчигә тохтап қалмай жүгүрүшкә күч бериду.

12. Йәһва бизгә немини беришни халайду?

¹² Хизмәтчилири һаят мусабиқисини ахирқи пәллигичә жүгүрүп чиқса, Йәһва Худа уларға чоқум бир мукапат бериду. Бу — асмандики яки йәрдики мәңгү һаят. Худа Сөзидә бу мукапат тоғрилиқ көп мәлуматлар йезилған. Шуниң үчүн келәчәктики һаятимизниң нәқәдәр гөзәл болидиғанлиғини тәсәввур қилалаймиз. Үмүтимизни һәрқачан ядимизда тутсақ, һечнәрсиниң биз үчүн путликашаң болушиға йол қоймаймиз.

13. Грекиядики жүгүргүчиләрдин бизниң қандақ артуқчилиғимиз бар?

¹³ Грекиядики мусабиқә оюнлириға қатнашқан жүгүргүчиләр қийинчилиқларға дуч кәлгән: улар һерип-чарчиған вә бәдәнлири ағриған. Амма улар пәқәт өзлириниң күчи вә мусабиқидин бурун қилған мәшиққә таянған. Бизму уларға охшаш һаят мусабиқисидә жүгүрүшни үгәндуқ. Лекин бизниң улардин бир артуқчилиқ тәрипимиз бар — биз һеч түгимәйдиған күч мәнбәсидин күч-қувәт алалаймиз. Йәһва Худаға таянсақ, У бизни үгитипла қоймай, бизгә күч беришниму вәдә қилиду (Пет. 1-х. 5:10).

14. Коринтлиқларға 2-хәт 12:9, 10дики сөзләр қандақ қилип қийинчилиқларни йеңишкә ярдәм бериду?

¹⁴ Паул нурғун қийинчилиқларға дуч кәлгән. Башқилар уни хорлиған вә униңға зиянкәшлик қилған. Бу аз кәлгәндәк, бәзидә у өзини аҗиз һис қилған вә униң тенигә санчилған тикәндәк қийинчилиқ билән күрәш қилишқа тоғра кәлгән (Кор. 2-х. 12:7). Буниңға қаримастин, Паул шу қийинчилиқлар түпәйлидин Йәһваға хизмәт қилишни тохтитишниң орниға, уларни Йәһваға тайинишниң пурсити дәп қариған (Коринтлиқларға 2-хәт 12:9, 10ни оқуң). Паулниң көзқариши шундақ болғачқа, Йәһва Худа униңға һәммә қийинчилиқлирини йеңишкә ярдәм бәргән.

15. Паулдин үлгә алсақ, немини һис қилалаймиз?

¹⁵ Бизму етиқадимиз үчүн заңлиқ яки зиянкәшликкә дуч келишимиз мүмкин. Шундақла саламәтлигимиз начарлишиши яки биз наһайити чарчап кетишимиз мүмкин. Бирақ Паулдин үлгә алсақ, бу қийинчилиқларниң һәммиси Худаниң меһир-шәпқитини һис қилишқа пурсәт яритиду.

16. Саламәтлигиңиз начар болсиму, немә қилалайсиз?

¹⁶ Бәлким, сиз орун тутуп йетип қалған яки мейиплар һарвуси билән жүридиғансиз. Болмиса, путлириңиз ағрип яки көзлириңиз начар көридиғанду. Әгәр шундақ болса, күч-қувити ешип ташқан яшлар билән биллә һаят мусабиқисидә жүгүрәләмсиз? Әлвәттә! Көплигән яшанғанлар вә аҗиз җанлар һаят мусабиқисидә жүгүрмәктә. Улар буни өз күчи билән қилалмайду. Әксинчә, улар җамаәт учришишлирини видео уланмиси арқилиқ көрүп яки телефон арқилиқ тиңшап, Йәһва Худадин күч алалайду. Улар дохтурларға, һәмшириләргә вә уруқ-туққанлириға вәз қилип, шагирт тәйярлаш ишиға қатнишиду.

17. Йәһва Худа мүмкинчилиги чәклик қериндашларға қандақ қарайду?

 ¹⁷ Мүмкинчилигиңиз чәклик болғачқа, көңлиңиз йерим болуп, һаят мусабиқисидә жүгүрүш қолумдин кәлмәйду дәп үмүтсизләнмәң. Йәһва Худа сизни иман-етиқат вә сәвир-тақәт билән жүгүргиниңиз үчүн бәк яхши көриду. Һазир сиз Йәһваниң ярдимигә бурунқиға қариғанда техиму бәк муһтаҗ вә У сизни һечқачан ташлимайду (Зәб. 9:10). Әксинчә, У сизгә техиму йеқин болиду. Саламәтлиги начарлишип, қийинчилиқларға дуч келиватқан бир қериндашниң сөзлиригә диққәт ағдурайли. У мундақ дәйду: «Саламәтлигим начарлашқансири, башқиларға хуш хәвәрни ейтиш пурсәтлиримниң азайғанлиғини чүшәндим. Лекин мениң азирақ болсиму күч чиқарғанлиғимниң өзи Йәһва Худаниң жүригини хурсән қилиду. Буни билиш мени хошал қилиду». Чүшкүнлүккә чүшкән чағда, өзүңизниң ялғуз әмәс екәнлигиңизни унтумаң. Паулниң үлгиси вә мошу сөзлири тоғрилиқ ойлап көрүң: «Қийинчилиқларда һузур [хошаллиқ] тепиватимән. Чүнки мән аҗиз вақтимда күчлүкмән» (Кор. 2-х. 12:10).

18. Бәзиләр қандақ қийинчилиқларға дуч келиши мүмкин?

¹⁸ Һаят мусабиқисидә жүгүрүватқанларниң бәзилири башқа бир қийинчилиққа дуч келиватиду. Улар мүмкин башқилар байқимайдиған яки чүшәнмәйдиған қийинчилиқларға учримақта. Мәсилән, уларға чүшкүнлүк яки ғәм-тәшвишләр билән күрәш қилишқа тоғра келиду. Немә үчүн Йәһваниң бу әзиз хизмәтчилириниң қийинчилиқлири бәк еғир дәп ейтишқа болиду? Чүнки әгәр бирси қолини сундурувалса яки мейиплар һарвусида олтарса, униң қийинчилиғини һәммиси көрүп, униңға ярдәм беришни халайду. Лекин психикилиқ яки һис-туйғу җәһәттин қийинчилиғи бар адәмни һечким қийин әһвалда дәп ойлимаслиғи мүмкин. Улар қолини яки путини сундурувалған адәмгә охшашла азап чәксиму, башқилар уларниң қийинчилиғини көрмигәнликтин, уларға меһир-муһәббәт вә ғәмхорлуқ көрсәтмәслиги мүмкин.

19. Мифибошәтниң үлгисидин немини үгинимиз?

¹⁹ Қийинчилиқлириңиз түпәйлидин Йәһва Худаға өзүңиз халиғандәк көп хизмәт қилалмисиңиз яки башқилар сизни чүшәнмәйватқандәк һис қилсиңиз, Мифибошәтниң үлгиси сизгә тәсәлли берәләйду (Сам. 2-яз. 4:4). Уму аҗиз болған вә Давут падишаниң адаләтсиз муамилисигә дуч кәлгән. Мифибошәт буниңға әйиплик болмисиму, яман һис-туйғуларға берилиш яки адавәт сақлашниң орниға, һаятидики яхши нәрсиләргә шүкүр қилған. У Давутниң бурун өзигә көрсәткән меһир-шәпқити үчүн миннәтдар болған (Сам. 2-яз. 9:6—10). Шуңа, Давут униңға  адаләтсиз муамилә қилғанда, Мифибошәт вәзийәткә һәр тәрәптин нәзәр салған. У Давутқа хаталиғи үчүн аччиқланмиған вә буниң үчүн Худани әйиплимигән. Буниң орниға, у Йәһва тәйинлигән падишани қоллаш үчүн немә қилалайдиғанлиғи тоғрилиқ ойлиған (Сам. 2-яз. 16:1—4; 19:24—30). Йәһва Худа бизниң мәнпәитимизни ойлап, Мифибошәтниң әҗайип үлгисини Муқәддәс китапқа яздурған (Рим. 15:4).

20. Ғәм-тәшвиш бәзиләргә қандақ тәсир қилиду, лекин уларниң немигә ишәнчи камил?

²⁰ Қаттиқ ғәм-тәшвиш түпәйлидин бәзи қериндашлар башқиларниң йенида һодуқуп, өзини қойидиған җай тапалмайду. Көпчиликниң арисида болуш улар үчүн бәк қийин болсиму, шу қериндашлар җамаәт учришишлири вә конгрессларға келишни тохтатмайду. Натонуш адәмләр билән сөзлишиш қийин болсиму, улар вәзгә чиқип, адәмләр билән сөзлишиду. Сизму шундақ вәзийәттә болсиңиз, ялғуз әмәслигиңизни унтумаң. Көп адәм сизгә охшаш қийинчилиқларға дуч кәлмәктә. Амма Худа тиришчанлиғиңизни көрүп хошал болиду. Сизниң бәл қоювәтмәй, давамлиқ күрәш қиливатқанлиғиңиз, Униң сизни бәрикәтләп, күч-қувәт бериватқанлиғини испатлайду c (Флп. 4:6, 7; Пет. 1-х. 5:7). Мүмкинчилигиңиз чәклик болғанлиғиға қаримастин Йәһва Худаға хизмәт қиливатқан болсиңиз, Униң жүригини хошал қиливатқанлиғиға ишәнчиңиз камил болсун.

21. Йәһваниң ярдими билән немә қилалаймиз?

²¹ Бәхиткә яриша, адәттики мусабиқә билән Паул тилға алған мусабиқә арисида пәриқ бар. Муқәддәс китап йезилған замандики мусабиқиләрдә пәқәт бир адәм йәңгән. Лекин һаятлиқ мусабиқисидә садақәтмәнлик билән ахирқи пәллигичә жүгүргәнләрниң һәммиси мәңгү һаят мукапитиға еришиду (Йоһ. 3:16). Адәттики мусабиқигә қатнашқанларниң һәммисиниң саламәтлиги яхши болуши керәк еди, әксинчә болғанда мукапатқа еришәлмәтти. Бирақ нурғунлиримизниң саламәтлиги анчә яхши болмисиму, биз сәвир-тақәт билән жүгүрмәктә (Кор. 2-х. 4:16). Йәһва Худаниң ярдими билән мукапатқа еришиш үчүн һаят мусабиқисидә ахирқи пәллигичә жүгүримиз!