1, 2. Анхелитониң үлгисидин көргинимиздәк, һәрбиримиз немә қилишимиз керәк?

 АТА-АНИҢИЗ Йәһва гувачилириму? Шундақ болса, Йәһва билән болған йеқин мунасивәтни улардин мирас қилип алалмайдиғанлиғиңизни унтумаң. Ата-анимиз мәйли Худаға хизмәт қилсун яки қилмисун, һәрбиримиз Йәһва билән шәхсий достлуқ мунасивәтни йетилдүрүшимиз керәк.

² Анхелито исимлиқ бурадәрниң мисалини көрүп чиқайли. У Йәһва гувачилириниң аилисидә чоң болған. У өсмүр чеғида өзини Йәһва Худа билән йеқин һис қилмиған. У мундақ дәйду: «Мән Йәһваға өйдикилирим немә қилса, шуни қилишни халиғанлиқтинла хизмәт қилаттим». Лекин Анхелито Худа Сөзини оқуш, оқуғанлири тоғрилиқ чоңқур ойлиниш вә Йәһваға пат-пат дуа қилиш үчүн вақит чиқиришни қарар қилған. Буниң нәтиҗиси қандақ болған? У йәнә: «Көйүмчан Атам Йәһва тоғрилиқ өзүм чоңқурирақ үгәнсәмла, Униңға йеқинлишишим мүмкин екәнлигини чүшәндим»,— дәйду. Анхелитониң үлгиси биздә мундақ соалларни пәйда қилиши мүмкин: Йәһва Худа тоғрилиқ азирақ бир нәрсини билиш билән Уни йеқиндин тонушниң арисида қандақ пәриқ бар? Йәһвани яхши тонуп билиш үчүн биз немә қилалаймиз?

3. Йәһва Худа тоғрилиқ билиш билән Уни йеқиндин тонушниң арисида қандақ пәриқ бар?

³ Биз Худаниң исми, ейтқан сөзлири яки қилған иш-һәрикәтлирини билсәк, Йәһвани тонуймиз дәп ойлишимиз мүмкин. Амма буни билиш Худани яхши тонуймиз дегәнни билдүрмәйду. Худаниң ейтқан сөзлири вә қилған ишлириниң сәвәвини чүшиниш үчүн, биз авал У вә Униң есил пәзиләтлирини билишимиз керәк. Шундақ қилиш  Униң ой-пикирлиримиз, қарарлиримиз вә иш-һәрикәтлиримиздин рази болған-болмиғанлиғини чүшинишимизгә ярдәм бериду. Йәһва биз үчүн немини ирадә қилғанлиғини чүшәнгәндә, биз Униң ирадисигә мас һәрикәт қилишимиз лазим.

4. Муқәддәс китаптики үлгиләр немини испатлайду?

⁴ Бәзи адәмләр Худаға хизмәт қилғинимиз үчүн бизни заңлиқ қилиши вә биз җамаәт учришишлириға беришни башлиғанда, һәтта бизгә қарши чиқиши мүмкин. Амма биз Йәһваға таянсақ, У бизни әсла ташлимайду. Шундақ қилип, биз Йәһва билән болған достлуқ мунасивитимизниң асасини селишни башлаймиз. Худа билән йеқинирақ тонушуш мүмкинму? Әлвәттә! Муса пәйғәмбәр вә Давут падишаға охшаш намукәммәл инсанларниң үлгилири буни испатлайду. Биз уларниң немә қилғанлирини көрүп чиқип, мону икки соалға җавап тапимиз: Улар Йәһвани қандақ тонуп билгән? Биз уларниң үлгисидин немини үгинәләймиз?

5. Муса пәйғәмбәр немә қилишни таллиған?

⁵ Муса пәйғәмбәр Худаға хизмәт қилишни таллиған. Муса тәхминән 40 яшта болғанда, «пирәвнниң қизиниң оғли дәп атилиштин» ваз кечип, Худаниң хәлқи болған исраиллар билән болушни таллиған (Ибр. 11:24). У жуқури мәнсәптин ваз кәчкән. Муса қул болған Исраил хәлқи тәрәптә туруп, өзини Мисирда худа дәп қаралған қудрәтлик һөкүмран пирәвнниң ғәзиви қозғаш хәтиригә тәвәккәл қилған. Бу Мусаниң күчлүк етиқадини көрсәткән. Муса Йәһва Худаға ишәнч бағлиған. Униң етиқади Йәһва билән болған мәңгү достлуқниң асаси болған еди (Пәнд н. 3:5).

6. Мусаниң үлгисидин қандақ савақ алалаймиз?

⁶ Биз буниңдин қандақ савақ алимиз? Мусаға охшаш, һәрбиримиз муһим бир қарарни чиқиришимиз керәк: Биз Худаға хизмәт қилишни вә Униң хәлқиниң арисида болушни таллаймизму? Бәлким, Худаға хизмәт қилиш үчүн бәзи қурбанлиқларни беришимиз яки Йәһвани тонумайдиғанларниң қаршилиғиға қарши турушқа тәйяр болушимизға тоғра келиду. Лекин әрштики Атимизға таянсақ, У чоқум бизгә яр-йөләк болиду!

7, 8. Муса немини билишни давамлаштурған?

⁷ Муса Йәһваниң хисләтлири тоғрилиқ билим елишни вә Униң ирадисини орунлашни давамлаштурған. Мәсилән, Йәһва Худа униңға Исраил хәлқини Мисирдин елип чиқишни тапшурғанда, Муса өз-өзигә ишәнмәй, дайим өзини налайиқ һис қилғанлиғини ейтқан. Шу чағда Худа униңға ярдәм берип, һәқиқий ич ағритқанлиғини көрсәткән (Чиқ. 4:10—16). Нәтиҗидә, Муса пәйғәмбәр пирәвнгә Худаниң еғир җаза һөкүм хәвирини йәткүзәлигән. Кейин Худа Өз хәлқини азат қилип, пирәвн вә униң әскәрлирини Қизил деңизда йоқ қилғанда, Муса Йәһваниң күч-қудритини көргән (Чиқ. 14:26—31; Зәб. 136:15).

⁸ Исраиллар Мисир қуллуғидин азат болғандин кейин, қайта-қайта налә-пәряд қилған. Шундақ болсиму, Муса Йәһва Худаниң Өзи азат қилған хәлиққә сәвирчанлиқ билән муамилә қилғанлиғини көргән еди (Зәб. 78:40—43). Шундақла Йәһва Худа Мусаниң өтүнүшигә қулақ селип, Исраил хәлқини йоқ қилмаслиқни қарар қилғанда, у Йәһваниң әҗайип кәмтәрлигини көргән (Чиқ. 32:9—14).

9. Ибранийларға 11:27гә асасән, Муса билән Йәһва Худаниң мунасивити қанчилик йеқин болған?

 ⁹ Мисирдин чиққандин кейин Муса билән Йәһва Худаниң арисидики мунасивәт техиму йеқин болған. Муса һәтта асмандики Атисини көргәндәк болған еди (Ибранийларға 11:27ни оқуң). Муқәддәс китапта Муса билән Йәһва Худаниң мунасивитиниң бәкму йеқин болғанлиғи мундақ тәсвирләнгән: «Йәһва Худа болса Муса билән үзму-үз, адәм балиси өз йеқини билән сөзләшкәндәк, сөзлишәтти» (Чиқ. 33:11).

10. Йәһва Худани яхширақ тонуш үчүн немә қилиш керәк?

¹⁰ Биз буниңдин қандақ савақ алимиз? Йәһва Худани яхширақ тонуш үчүн, биз Униң хисләтлири тоғрилиқ билипла қоймай, йәнә Униң ирадисини орунлишимиз керәк. Йәһва Худаниң ирадиси болса «һәрқандақ адәмләрниң қутқузулушини вә һәқиқәтниң тоғра билимигә келишини халайду» (Тим. 1-х. 2:3, 4). Худаниң ирадисини орунлашниң бир йоли — башқиларға Йәһва тоғрилиқ билим бериш.

11. Башқиларға Йәһва тоғрилиқ билим бәргәндә, өзүмиз Уни қандақ яхширақ тонуймиз?

¹¹ Биз башқиларға Йәһва тоғрилиқ билим бәргәндә, өзүмизму Уни яхширақ тоналаймиз. Мәсилән, Йәһва Униң билән дост болушни халайдиған адәмләрни тепишимизға ярдәм бәргәндә, Униң адәмләргә ичи ағридиғанлиғини чүшинимиз (Йоһ. 6:44). Муқәддәс китапни үгиниватқан адәмләр яман адәтлирини ташлап, һаятини өзгәрткәндә, Худа Сөзиниң күчини көрүп йетимиз (Кол. 3:9, 10). Йәһва Худаниң бизни адәмләргә ярдәм бериш үчүн уларға қайта-қайта әвәткәнлигидин Униң сәвирчанлиғини көримиз (Рим. 10:13—15).

12. Чиқиш 33:13тә йезилғандәк, Муса Йәһвадин немини сориған вә немә үчүн?

¹² Муса Йәһва Худа билән болған мунасивитини қәдирлигән. Худа Муса арқилиқ көплигән қудрәтлик ишларни қилған вә Муса Йәһвани яхши тонуған. Шундақ болсиму, у Йәһвани техиму йеқинирақ тонуш үчүн ярдәм сориған (Чиқиш 33:13ни оқуң). Шу чағда Мусаниң йеши 80дин ешип қалған болсиму, у асмандики көйүмчан Атиси тоғрилиқ йәнә көп нәрсиләрни билмәйдиғанлиғини чүшәнгән.

13. Йәһва билән болған достлуқ мунасивитимизни қәдирләйдиғанлиғимизни қандақ көрситимиз?

¹³ Буниңдин қандақ савақ алалаймиз? Йәһваға мәйли қанчә вақит хизмәт қилайли, Униң билән болған мунасивитимизни һәрқачан қәдирлишимиз керәк. Худа билән достлуқ мунасивитимизни қәдирләйдиғанлиғимизни көрситишниң бир йоли — Униңға дуа қилиш.

14. Худани йеқинирақ тонуш үчүн дуа қилиш немишкә шунчилик муһим?

¹⁴ Бирси билән йеқин дост болушни халисиңиз, униң билән пат-пат сөзлишип турисиз. Шуниңға охшаш, Худаға йеқинлишиш үчүн Униңға пат-пат дуа қилиң вә өз һис-туйғулириңиз вә ойлириңизни ейтиштин қорқмаң (Әфәс. 6:18). Түркиядә яшайдиған Криста мундақ дәйду: «Йәһваға ич сиримни төкүп дуа қилғансири вә Униң ярдимини көргәнсири, Униңға болған меһир-муһәббитим вә етиқадим техиму күчийиду. Йәһва дуалиримға җавап бериватқанлиғини көрүш Уни Атам вә Достумдәк көрүшүмгә ярдәм бәргән».

15. Йәһва Худа Давутни қандақ адәм дәп атиған?

¹⁵ Давутниң ата-аниси вә өп-чөрисидики адәмләрниң һәммиси Йәһва Худаға  хизмәт қилатти. Лекин Давут өйидикилири Йәһваға ибадәт қилғанлиқтинла, уларға әгишип Худаға ибадәт қилған әмәс. У өзи Йәһва Худа билән шәхсий мунасивәтни йетилдүргән вә Йәһва уни интайин яхши көргән еди. Йәһваниң Өзи Давутни көңлүмгә яққан адәм дәп атиған (Әлч. 13:22). Давут Йәһва билән шунчилик йеқин мунасивәтни қандақ йетилдүргән?

16. Давут Йәһваниң яратқанлириға қарап немини үгәнгән?

¹⁶ Давут мәвҗудатларға қарап Йәһва Худа тоғрилиқ көпирәк билгән. Яш чеғида Давут атисиниң қой падилирини беқип, көп вақитни далада өткүзгән еди. Бәлким, у шу чағда Йәһва Худа яратқан нәрсиләр тоғрилиқ чоңқур ойлашқа башлиған. Мәсилән, Давут асманға қариғанда, пәқәт сансиз юлтузларнила әмәс, уларни яратқан Яратқучиниң хисләтлирини көргән. Давут мундақ язған: «Асманлар Худаниң шөһритини җакалимақта, Униң қоллириниң паалийәтлири тоғрисида көкләр баян қилмақта» (Зәб. 19:1, 2). Давут инсанларниң қандақ яритилғанлиғи тоғрилиқ ойлиғанда, Йәһва Худаниң қанчилик дана екәнлигини чүшәнгән (Зәб. 139:14). Давут Йәһва яратқан мәвҗудатлар тоғрилиқ мулаһизә қилғанда, өзиниң Худаниң алдида бәкму кичиккинә екәнлигини чүшинип йәткән (Зәб. 139:6).

17. Мәвҗудатлар тоғрилиқ ойлашниң қандақ пайдиси бар?

¹⁷ Буниңдин қандақ савақ алалаймиз? Мәвҗудатларға көңүл қоюң. Йәһва Худа яратқан бу әҗайип каинат бәкму һәйран қаларлиқ, шундақ әмәсму?! Һәр күни Худа яратқан өсүмлүкләр, һайванатлар вә адәмләргә қарап вә шулар һәққидә мулаһизә қилип, Йәһва Худа тоғрилиқ биливалисиз. Шундақ қилсиңиз, һәр күни ғәмхор Атиңиз Йәһва тоғрилиқ көпирәк билимгә еришисиз (Рим. 1:20). Шу чағдила Униңға болған меһир-муһәббитиңиз күндин-күнгә күчийиду.

18. Зәбур 18-баптин көргинимиздәк, Давут немини чүшәнгән?

¹⁸ Давут Йәһва Худа униңға ярдәм бериватқанлиғини билгән. Мәсилән, Давут қойларни ширдин вә ейиқтин қоғдиған чағда, Йәһваниң униңға жиртқуч һайванларни өлтүрүшкә күч бәргәнлигини етирап қилған. Йоған җәңчи Ғолиятни йеңивалған чағдиму, Йәһва Худа униңға яр болғанлиғини ениқ көргән (Сам. 1-яз. 17:37). Шундақла Давут ичи тар Саул падишадин қечип жүргәндә, Йәһва Худа униң җенини сақлап қалғанлиғини чүшәнгән (Зәб. 18, кириш сөз). Давут тәкәббур болған болса, бу нәрсиләрни өз күчүм билән қилдим дәп махтинатти. Лекин Давут кәмтәр болғачқа, Йәһваниң униңға ярдәм қолини сунғанлиғини көргән (Зәб. 138:6).

19. Давутниң үлгисидин немини үгинәләймиз?

¹⁹ Биз буниңдин қандақ савақ алимиз? Йәһва Худадин ярдәм сорапла қоймай, Униң бизгә қачан вә қандақ ярдәм бериватқанлиғиниму көрүшимиз керәк. Кәмтәр болсақ, қолумиздин һәммә нәрсә кәлмәйдиғанлиғини вә Йәһва Худа күчимиз йәтмигән нәрсиләрдә ярдәм беридиғанлиғини чүшинимиз. Йәһваниң ярдимини көргәнсири, Униң билән болған мунасивитимиз мустәһкәмлиниду. Йәһваға көп жиллар хизмәт қилип келиватқан Фиджида яшайдиған Исак бурадәр бу сөзләрниң һәқиқәт екәнлигини тәкитлигән. У мундақ дегән: «Ойлап бақсам, Йәһва Худа маңа Муқәддәс китапни үгинишни башлиғандин та һазирғичә, һемишәм  ярдәм берип кәлгән. Йәһва мениң үчүн һәқиқий тирик Худадур».

20. Давутниң Йәһва Худа билән болған мунасивитидин немини үгинәләймиз?

²⁰ Давут Йәһва Худаниң хисләтлирини үлгә қилған. Йәһва бизни Униң хисләтлиридин үлгә елиш қабилийити билән яратқан (Ярит. 1:26). Биз Йәһва Худаниң есил пәзиләтлири тоғрилиқ көпирәк билгәнсири, уларни техиму яхши үлгә қилалаймиз. Давутму асмандики Атисини яхши билгәнликтин, башқилар билән муамилә қилғанда Униңдин үлгә алалиған. Бир мисални көрүп чиқайли. Давутниң Батшеба билән зина қилип вә униң ерини өлтүрүп, Йәһваға қарши гуна қилғиниға қаримастин, Йәһва Худа униңға рәһим-шәпқәт көрсәткән еди (Сам. 2-яз. 11:1—4, 15). Чүнки Давутниң өзиму Йәһвадин үлгә елип, башқиларға меһир-шәпқәт көрсәткән. Давут Йәһва Худа билән яхши мунасивәттә болған, шуңа Исраил хәлқи уни бәк яхши көргән вә Йәһва уни башқа падишалар үчүн үлгә қилған (Пад. 1-яз. 15:11; Пад. 2-яз. 14:1—3).

21. Әфәсликләргә 4:24 вә 5:1гә асасән, «Худани үлгә» қилишниң қандақ пайдиси бар?

²¹ Биз буниңдин қандақ савақ алалаймиз? Биз «Худани үлгә» қилишимиз лазим. Шундақ қилсақ, өзүмизму пайда алимиз вә Йәһва Худа тоғрилиқ көпирәк биливалимиз. Йәһваниң хисләтлирини үлгә қилсақ, биз Униң пәрзәнтлири екәнлигимизни испатлаймиз (Әфәсликләргә 4:24; 5:1ни оқуң).

22, 23. Йәһва тоғрилиқ билгәнлиримизни әмәлийәттә қоллансақ, нәтиҗиси қандақ болиду?

²² Жуқурида көргинимиздәк, Йәһва Өзини яратқан мәвҗудатлири вә Муқәддәс китап арқилиқ тонуштуриду. Муқәддәс китапта Муса вә Давутқа охшаш Худаниң көплигән садақәтмән хизмәтчилири тоғрилиқ йезилған вә биз улардин үлгә алалаймиз. Йәһва Өз тәрипидин һәрикәт қилған вә бизму өз тәрипимиздин һәрикәт қилишимиз, йәни Уни тонуш үчүн көз, қулақ вә қәлбимизни ечишимиз керәк.

²³ Биз Худайимиз Йәһва тоғрилиқ билим елишни һечқачан тохтатмаймиз (Вәз 3:11). Әң муһими, Униң тоғрилиқ қанчилик билишимиз әмәс, билгәнлиримизни қандақ ишлитишимиз. Әгәр билимимизни әмәлийәттә қоллансақ вә асмандики Атимиздин үлгә елишқа тиришсақ, У бизгә давамлиқ йеқинлишиду (Яқуп 4:8). Худа Муқәддәс китап арқилиқ Уни издигәнләрни һечқачан ташлимайдиғанлиғиға ишәндүриду.