1, 2. Немә үчүн мәсиһийләрниң һәммиси асманда яшаш үчүн тирилиш һәққидә үгиниши керәк?

 ЙӘҺВА ГУВАЧИЛИРИНИҢ көпинчисиниң йәрдә мәңгү яшаш үмити бар. Майланғанларниң йәрдики қалдуқлири асманда яшашқа үмүт бағлайду. Бу майланғанлар өзлириниң асмандики һаяти қандақ болидиғанлиғини билишкә бәкму қизиқиду. Йәрдә яшаш үмүти барларму буниңға қизиқиду. Бу мақалидин, асмандики һаятқа тирилиш йәрдә мәңгү яшаш үмүти барларға бәрикәтләрни әкелидиғанлиғини билимиз. Шуңа, асманда яки йәрдә яшаш үмүтимиз болушидин қәтъийнәзәр, биз асмандики тирилишкә қизиқишимиз керәк.

² Худа биринчи әсирдә, Әйсаниң бәзи шагиртлирини асманда яшаш үмүти һәққидә йезишқа роһландурған. Әлчи Йоһан мундақ дәйду: «Биз әнди Пәрвәрдигарниң балилири, амма қандақ болидиғинимиз техи ениқ әмәс. Биз У қайтип ашкарилиғандила, Униңға охшаш болидиғанлиғимизни билимиз, чүнки Уни Өз қияпитидә көрүмиз» (Йоһ. 1-х. 3:2). Шуңа, майланғанлар асманға роһий тәндә көтирилгәндә, уларниң тени қандақ болидиғанлиғини билмәйду. Лекин улар мукапатқа еришип, Йәһва Худани өз көзлири билән көриду. Муқәддәс китап асманда яшаш үчүн тирилиши тоғрисида тәпсилий чүшәндүрүп бәрмәйду, бирақ әлчи Паул бу һәққидә бәзи мәлуматларни аян қилған. Әйса Мәсиһ «барлиқ һөкүмәтләр вә барлиқ һакимийәтләр һәм күчләрни йоқ қилғанда», майланғанлар униң билән биргә болиду. Шундақла, улар ахирқи дүшмән өлүмни йоқ қилиду. Ахири, Әйса билән майланғанлар өзлирини һәм башқа барлиқ нәрсиләрни Йәһваға беқиндуриду (Кор. 1-х. 15:24—28). Шу чағда қәлбимизниң  қанчилик һаяҗанға толидиғанлиғини тәсәввур қилип көрүңа! b

3. Коринтлиқларға 1-хәт 15:30—32 айәтләрдә йезилғандәк, Паулниң тирилишкә болған ишәнчиси униң немә қилишиға ярдәм бәргән?

³ Паулниң тирилишкә болған ишәнчиси һәрхил қийинчилиқларға бәрдашлиқ беришкә ярдәм бәргән (Коринтлиқларға 1-хәт 15:30—32). У коринтлиқларға һәр күни өлүм ағзида туруватқанлиғини ейтқан. Йәнә у «Әфәстә һайванлар билән» җәң қилғанлиғини ейтқан. Бәлким у Әфәстики мәйданда өзиниң явайи һайванатлар билән челишқанлиғини ейтқан (Кор. 2-х. 1:8; 4:10; 11:23). Йә болмиса, у явайи һайванатларға охшаш дүшмәнлик қилидиған йәһудийлар яки башқа адәмләр һәққидә ейтқан болуши мүмкин (Әлч. 19:26—34; Кор. 1-х. 16:9). Мәйли қандақ болсун, Паул ховуп-хәтәрләргә дуч келишигә қаримастин, келәчәккә иҗабий көзқарашта болған (Кор. 2-х. 4:16—18).

4. Тирилишкә болған үмүтимиз бизни қандақ мустәһкәмләйду? (Муқавидики рәсимгә қараң.)

⁴ Биз бүгүн хәтәрлик вақитта яшаватимиз. Бәзи қериндашлиримиз җинайәтчиләрниң қурбани болуп қалған. Йәнә бәзиләр болса, урушлар болуватқан йәрдә яшап, бехәтәрликни һис қилмайду. Йәнә башқилири болса, бизниң паалийитимиз чәкләнгән яки мәнъий қилинған дөләтләрдә һаятиға вә әркинлигигә тәвәккүл қилип, Йәһва Худаға хизмәт қилиду. Бу қериндашларниң һәммиси Йәһва Худаға ибадәт қилиш үчүн бар күчини чиқирип, бизгә үлгә қалдуриду. Улар һазир һаятидин айрилип қалсиму, Йәһва уларни келәчәктә техиму яхши нәрсиләргә ериштүридиғанлиғини билиду.

5. Қандақ натоғра көзқараш бизниң тирилишкә болған ишәнчимизни аҗизлаштуралайду?

⁵ Әлчи Паул қериндашларни бәзиләрниң натоғра көзқаришидин агаһландуруп: «Әгәр өлгәнләр тирилмисә, у чағда “келиңлар, йәп-ичәйли, чүнки әтә өлүп кетимиз“»,— дегән. Кишиләр Йәшая пәйғәмәбәрниң вақтидин башлап аллиқачан шундақ көзқарашта болуп кәлгән. Бәлким Паул исраилларниң көзқариши һәққидә йезилған Йәшая 22:13-айәтни нәқил кәлтүргән. Улар Йәһва Худаға йеқинлишишниң орниға, баяшат турмуш кәчүрүшкә көз тиккән. Демәк «бүгүн һаяттин һузур алайли, чүнки әтә өлүмиз» дегән көзқараш исраилларниң арисида болған, у бүгүнму кәң тарқалған. Мәйли қандақ болмисун, Муқәддәс китапта исраилларниң арисида болған бу натоғра көзқарашниң яман ақивәт елип кәлгәнлиги һәққидә йезилған (Тар. 2-яз. 36:15—20).

6. Тирилишкә болған үмүтимиз достларни таллашқа қандақ тәсир қилиши керәк?

⁶ Ениқки, Йәһва Худаниң өлгәнләрни тирилдүрәләйдиғанлиғини билиш бизниң дост таллишимизға тәсир қилиши лазим. Коринттики қериндашлар тирилишни рәт қилғанлар билән арилишиштин пәхәс болуши керәк еди. Бу биз үчүн савақ: әгәр келәчәктә немә болидиғанлиғи һәққидә ойлимайдиғанлар вә пәқәт көңүл ечишкә қизиқидиғанлар билән қоюқ арилашсақ, улар бизгә яман тәсир қилиду. Бундақ кишиләр билән арилишиш бизниң көзқаришимиз вә яхши адәтлиримизни бузалайду. Шундақ адәмләр бизни, һәтта Худа өч көридиған нәрсиләрни қилишқа башлап кетиши мүмкин. Шуңа Паул: «Һәққаний иш қилип, әқил-һошуңларни тепиңлар һәм гунадин қол үзүңлар»,— дәп қаттиқ агаһландурған (Кор. 1-х. 15:33, 34, ЙД).

7. Коринтлиқларға 1-хәт 15:35—38 айәтләрдә йезилғандәк, тирилиш һәққидә бәзи адәмләр қандақ соал сориши мүмкин?

⁷ Коринтлиқларға 1-хәт 15:35—38ни оқуң. «Тирилиш йоқ» дәп гуман қилған адәмләр адәттә мундақ сориши мүмкин: «Өлгәнләр қандақ тирилиду?» Паулниң җавави һәққидә пухта ойлинишимиз керәк, чүнки бүгүн көплигән адәмләрниң һаятқа вә өлүмгә болған көзқариши һәртүрлүк. Лекин Муқәддәс китап немини үгитиду?

8. Асмандики һаятқа тирилишни чүшинишимизгә немә ярдәм берәләйду?

⁸ Бирси өлгәндә униң тени чирип кетиду. Каинатни йоқлуқтин барлиққа кәлтүргән Яратқучи Худа адәмниму тирилдүрүп, униңға лайиқ тәнни берәләйду (Ярит. 1:1; 2:7). Худаниң адәмни униң өлүмидин авал болған тени билән тирилдүрүшиниң һаҗити йоқлиғини Паул бир мисал билән чүшәндүргән. Өсүмлүкләрниң уруғи яки буғдайниң дени һәққидә ойлап бақайли. Уруқни йәргә тәргәндә, у үнүп йеңи өсүмлүккә айлиниду. Өсүмлүк ушшақ уруқлардин бәк көп пәриқлиниду. Әлчи Паул бу селиштуруш арқилиқ «Яратқучи... Өзи халиған җисимни [тәнни]» беридиғанлиғини көрсәткән.

9. Коринтлиқларға 1-хәт 15:39—41 айәтләрдә тәнләрниң һәрхил болидиғанлиғи һәққидә немә йезилған?

⁹ Коринтлиқларға 1-хәт 15:39—41ни оқуң. Паул Худаниң һәммә тәнләрни бирхил қилип яратмиғанлиғини тилға алған. Мәсилән, калилар, қушлар вә белиқларниң һәрхил җисманий тени бар. Шундақла у асмандики қуяш билән айниң арисидики пәриқни көримиз вә «бир юлтуз башқа юлтуздин шәрипи билән пәриқлиниду», дәп ейтқан. Бу пәриқни өз көзүмиз билән көрәлмисәкму, алимларниң ейтишичә, чоң, кичик, қизил, ақ вә сериқ бир-биригә охшимайдиған юлтузлар бар. Шундақла Паул: «Асман җисимлири бар һәм йәр җисимлири бар»,— дәп ейтқан. У немә демәкчи болған?  Йәрдә җисманий тәнләр, амма асманда пәриштиләргә охшаш роһий тәнләр бар екәнлиги һәққидә демәкчи болған.

10. Асмандики һаятқа тирилгәнләрниң тени қандақ болиду?

¹⁰ Паулниң кейинки сөзлиригә диққәт қилиң: «Өлгәнләрниң тирилишиму шуниңдәкла. Чирикликтә терилиду — чиримәсликтә тирилиду». Әлвәттә, адәм өлгәндин кейин, тени чирип, топиға айлиниду (Ярит. 3:19). Ундақта у қандақ қилип «чиримәсликтә тирилиду»? Илияс, Елиша вә Әйса адәмләрни йәрдә тирилдүргән. Лекин Паул бу айәтә йәрдики тирилиш тоғрилиқ ейтмиған. Бу йәрдә Паул асманда яшаш үчүн «роһий» тәндә тирилгән адәм һәққидә ейтқан (Кор. 1-х. 15:42—44).

11, 12. Әйса тирилгәндә униңда қандақ өзгиришләр болған вә майланғанлар қандақ охшаш нәрсиләрни баштин кәчүриду?

¹¹ Әйса йәрдә болғанда униңда җисманий тән болған, тирилгәндә у «һаятлиқ беридиған роһ» болуп асманға қайтқан. Буниңға охшаш майланғанларму роһий тәндә яшаш үчүн тирилиду. Паул мундақ чүшәндүргән еди: «Биз топидин яритилғанға охшиғинимиздәк, шундақла кәлгүсидә асмандикигә охшаш болимиз» (Кор. 1-х. 15:45—49).

¹² Паулниң тирилиш тоғрилиқ мулаһизисиниң әң муһим нуқтисиға кәлдуқ. Әң муһими Әйса инсан тенидә тирилмигән. Паул буни ениқ чүшәндүргән: «Гөш вә қандин ибарәт болған тән Худаниң Падишалиғиға мираслиқ қилалмайду» (Кор. 1-х. 15:50, ЙД). Демәк әлчиләр вә башқа майланғанлар чирийдиған гөш һәм қандин ибарәт болған тәндә асманда яшаш үчүн тирилмәйду. Улар қачан тирилиду? Паул бу тирилиш келәчәктә болидиғанлиғини ейтқан. Улар өлгәндин кейин дәрһал тирилмигән. Паул Коринтлиқларға 1-хәтни язғанда, бәзи шагиртлар мәсилән, әлчи Яқуп «өлүм уйқисида» болуп қалған (Әлч. 12:1, 2). Башқа әлчиләр вә башқа майланғанларму техи «өлүм уйқисида» болмиған (Кор. 1-х. 15:6).

13. Мәсиһниң «һазир болуш вақтида» немә болиду?

¹³ Әйса вә Паул тарихтики алаһидә бир вақит, йәни Мәсиһниң һазир болуши тоғрилиқ пәйғәмбәрлик сөзни ейтқан. Бу һазир болуш җәриянидә урушлар, йәр тәврәшләр, жуқумлуқ кесәлликләр вә башқа яман иш-вақиәләр йүз бериду. Биз бу пәйғәмбәрлик сөзләрниң 1914-жилидин башлап әмәлгә ашқанлиғини көрүватимиз. Бу бәшарәтниң йәнә муһим бир қисми келәчәктә орунлиниши керәк. Әйса орнитилған Падишалиқ һәққидики хуш хәвәр «пүткүл йәр йүзи бойичә барлиқ хәлиқләргә гувалиқ үчүн вәз қилиниду, мана шу чағда ахир келиду», дәп ейтқан (Мәт. 24:3, 7—14). Паул Мәсиһниң «һазир болуш вақтида» «өлүм уйқисида» болған майланғанларниң тирилишиниң вақтиму болидиғанлиғи һәққидә ейтқан (Сал. 1-х. 4:14—16; Кор. 1-х. 15:23).

14. Мәсиһниң һазир болуш вақтида өлүп кәткән майланғанлар билән немә болиду?

¹⁴ Бүгүн йәрдики һаят йолини аяқлаштуридиған майланғанлар дәрһалла асмандики һаятқа тирилиду. Бу Коринтлиқларға 1-хәт 15:51, 52-айәтләрдә: «Биз һәммимиз өлүм уйқисида ухлап қалмаймиз, лекин һәммимиз өзгиримиз, бир дәқиқидә, көзни бир жумуп ачқичә, ахирқи карнәй челинғанда»,— дегән Паулниң сөзлири билән тәстиқлиниду. Бу сөзлири һазирму орунланмақта. Тирилгәндин кейин Әйсаниң қериндашлири хошаллиққа чөмиду. Улар Әйса билән дайим биллә болиду (Сал. 1-х. 4:17).

15. Көзни бир жумуп ачқичә өзгәртилгәнләрниң қандақ тапшуриғи болиду?

¹⁵ Муқәддәс китапта «көзни бир жумуп ачқичә» өзгәртилгәнләрниң асманда қандақ иш қилидиғанлиғини йезилған. Әйса уларға мундақ дәйду: «Ғәлибә қазиниватқанға вә ишлиримға ахирғичә әмәл қилғанға  мән хәлиқләр үстидин һакимийәт беримән. Мән Атамдин алғандәк, нәқ шундақ һакимийәт беримән — һәм у төмүр калтәк билән башқурғанда, улар сапал қачилардәк чеқилип кетиду» (Вәһ. 2:26, 27). Улар «төмүр калтәк билән хәлиқләрни башқуриду» дегән тапшуруқни орунлаш үчүн қошунниң Сәрдариға әгишиду (Вәһ. 19:11—15).

16. Нурғун адәмләр өлүм үстидин қандақ ғәлибә қазиниду?

¹⁶ Ениқки, майланғанлар өлүмни йеңиду (Кор. 1-х. 15:54—57). Уларниң тирилиши уларға Армагедон урушиға қатнишип йәрдики һәммә рәзилликни йоқ қилишқа имканийәт яритиду. Миллионлиған әр вә аяллар болса, дәһшәтлик балаю апәттин аман қелип йеңи дунияда яшайду (Вәһ. 7:14). Йәрдә аман қалғанлар өлүмниң үстидин йәнә бир ғәлибә қилинғанлиғини, йәни миллиардлиған өлүп кәткәнләрниң тирилишини өз көзи билән көрәләйду. Буниң һәммиси йүз бәргәндә бизниң қанчилик шат-хорамлиққа чөмидиғанлиғимизни тәсәввур қилип көрүңа! (Әлч. 24:15) Йәһва Худаға ахирғичә садиқ болуп қалғанлар Адәм атидин мирас алған өлүм үстидинму ғәлибә қазиниду. Улар мәңгү яшалайду.

17. Коринтлиқларға 1-хәт 15:58-айәт бизни немә қилишқа дәвәт қилиду?

¹⁷ Бүгүнки күндә яшаватқан һәрбир Мәсиһниң әгәшкүчиси Паулниң коринтлиқларға язған тирилиш һәққидики илһам беридиған сөзлиригә миннәтдар болуши керәк. Паул «Пәрвәрдигарниң хизмитидә» қолумиздин кәлгәнниң һәммисини қилиш керәк, дәп нәсиһәт бәргән. Бизниң бу нәсиһәткә қулақ селишимизниң нурғун сәвәплири бар (Коринтлиқларға 1-хәт 15:58ни оқуң). Әгәр биз бу ишни садиқ вә қизғин қилсақ, келәчәктики шат-хорам турмушқа еришишкә үмүт бағлалаймиз. Келәчәктики һаятимизниң қанчилик мәналиқ болидиғанлиғини тәсәввур қилалмаймиз. Бу һаят бизниң Худа үчүн қилған әмгигимиз бекар болмиғанлиғини дәлилләйду.