1. Йоһанниң 3-хети 3, 4-айәтләргә асасланғанда, немә бизни хошал қилалайду?

 ӘЛЧИ ЙОҺАН һәқиқәтни үгәткән адәмләрниң Йәһваға давамлиқ садақәтмәнлик билән хизмәт қиливатқанлиғини аңлап, қанчилик хошал болғанлиғини тәсәввур қилиң. Улар нурғун қийинчилиқларни бешидин өткүзгән. Әлчи Йоһан өзиниң балилири кәби көргән қериндашларниң ишәнчисини мустәһкәмләш үчүн тәр төккән. Буниңға охшаш, биз балилиримизниң яки биз һәқиқәтни билишигә ярдәм бәргән адәмләрниң өзини Йәһваға беғишлап, һәқиқәттә тәврәнмәй чиң туруватқанлиғини аңлиғанда, бәк хошал болумиз (Йоһанниң 3-хети 3, 4ни оқуң).

2. Йоһан язған үч хәтниң мәхсити немә?

² Милади 98-жили әлчи Йоһан Әфәс шәһири яки йеқин әтрапида бир җайда яшиған болуши мүмкин. Еһтимал у Патмос аралидики сүргүндин азат болғандин кейин шу йәргә көчкән. Тәхминән шу вақитта Худаниң муқәддәс роһи уни үч хәтни йезишқа дәвәт қилған. Бу хәтләрниң мәхсити — садиқ хизмәтчилириниң Әйсаға болған ишәнчисини күчәйтиш вә һәқиқәттә давамлиқ меңишқа ярдәм бериш.

3. Қандақ соалларға җавап тапимиз?

³ Йоһан ахирқи һаят қалған әлчи болуп, сахта тәлим бәргүчиләрниң җамаәткә қилидиған тәсиридин әнсиригән b (Йоһ. 1-х. 2:18, 19, 26). Бу һәқиқәттин чәтнәп кәткәнләр Худани тонуймиз дәп ейтқан, амма әмәлийәттә улар Йәһваниң буйруқлириға бойсунмиған. Һазир болса, Худаниң роһландуруши билән Йоһанниң бәргән нәсиһәт сөзлирини көримиз. Үч соалға җавап тапайли: Һәқиқәт йолида меңиш немини  билдүриду? Бу йолда меңишқа немә тосалғу болуши мүмкин? Бир-биримизгә һәқиқәттә қелишқа қандақ ярдәм берәләймиз?

4. Йоһанниң 1-хети 2:3—6 вә 2 Йоһан 4, 6-айәтләргә асасән, һәқиқәт йолида меңиш үчүн немә қилишимиз керәк?

⁴ Һәқиқәт йолида меңиш үчүн биз Муқәддәс китаптики һәқиқәтни билишимиз лазим. Буниңдин башқа «биз [Йәһва]ниң әмирлиригә» әмәл қилишимиз керәк, йәни уларға бойсунишимиз керәк (Йоһанниң 1-хети 2:3—6; Йоһанниң 2-хети 4, 6ни оқуң). Әйса Мәсиһ Йәһваға итаәт қилишниң мукәммәл үлгисини қалдурған. Шуңа Йәһваға бойсунушниң муһим бир йоли — Әйсаниң изидин әгишип меңиш (Йоһ. 8:29; Пет. 1-х. 2:21).

5. Биз немигә көз йәткүзүшимиз керәк?

⁵ Һәқиқәт йолида меңиш үчүн биз Йәһва Худаниң дайим һәқиқәтни ейтидиғанлиғи һәм шундақла Муқәддәс китап арқилиқ ейтқанлириниң һәммиси раст екәнлигигә ишинишимиз керәк. Униңдин башқа биз Әйсаниң вәдә қилинған Мәсиһ екәнлигигә чоқум ишәнч қилишимиз зөрүр. Бүгүнки күнләрдә, көплигән адәмләр Әйсаниң Худа Падишалиғиниң тәйинләнгән Падишаси болғиниға гуман қилиду. Йоһан «көплигән ялғанчиларниң» Йәһва Худа вә Әйса тоғрилиқ һәқиқәтләргә ишәнчи күчлүк болмиған адәмләрни аздурушқа һәрикәт қилидиғанлиғи һәққидә агаһландурған (Йоһ. 2-х. 7—11). Йоһан мундақ дәп язған: «Әйсаниң Мәсиһ екәнлигини рәт қилғучи, шу ялғанчи әмәсму?» (Йоһ. 1-х. 2:22). Алдинип қалмаслиғимизниң бирла йоли — Худаниң Сөзини үгиништур. Буни қилғандила, Йәһва Худа билән Әйсани тонуп, һәқиқәткә еришкәнлигимизгә көз йәткүзимиз (Йоһ. 17:3).

6. Яш мәсиһийләр чүшүп қалидиған бир тузақ қандақ?

⁶ Барлиқ мәсиһийләр инсан пәлсәпәлиридин өзлирини һимайә қилиши керәк (Йоһ. 1-х. 2:26). Болупму, яш етиқатдашлиримиз мошу тузақтин пәхәс болуши лазим. Франциядә яшайдиған 25 яшлиқ Алексия c қериндаш мундақ дәйду: «Мәктәптә үгәнгән тәдриҗий тәрәққият нәзәрийиси вә инсанийәтниң башқа тәлимлири мени гаңгиритип, һәқиқәттин гуманлинишқа сәвәп болди. Шу вақитта бу тәлимләр мени қизиқтуратти. Амма мән муәллимләрниң ейтқанлириниң  һәммисигә ишинипла, Худаға сөзләш пурситини бәрмигәнлигим натоғра дәп ойлидим». Алексия «Һаят — қандақ пәйда болған? Тәдриҗий тәрәққий қилғанму яки яритилғанму?» d намлиқ китапни тәтқиқ қилған. Бирнәччә һәптидин кейин униң бирму гумани қалмиди. Алексия мундақ дәйду: «Мән өзүмгә Муқәддәс китапта һәқиқәт бар екәнлигини испатлидим. Шундақла Униң өлчәмлиригә мас һаят кәчүрүш маңа хошаллиқ вә теч-хатирҗәмлик елип келидиғанлиғини чүшәндим».

7. Биз немидин нери болушимиз керәк вә немә үчүн?

⁷ Яш яки қери болсун, һәммә мәсиһийләр иккиүзлүк һаят кәчүрүштин нери болуши керәк. Йоһан ейтқандәк, һәқиқәт йолида меңип, әхлақсиз һаят кәчүрүш мүмкин әмәс (Йоһ. 1-х. 1:6). Йәһваниң көңлини хошал қилишни халисақ, Униң барлиқ иш-һәрикәтлиримизни көридиғанлиғини әстин чиқармаслиғимиз керәк. Адәмләр бизниң йошурун қилған ишлиримизни көрмисиму, Яратқучи Йәһваға қилғанлиримиз бәш қолдәк аяндур (Ибр. 4:13).

8. Биз чоқум немини рәт қилишимиз лазим?

⁸ Биз дунияниң гунаға нисбәтән көзқаришини рәт қилишимиз керәк. Әлчи Йоһан мундақ дәп язған: «Биз гунасиз, дәп санисақ, ундақта өзүмизни адаштуримиз вә биздә һәқиқәт йоқтур» (Йоһ. 1-х. 1:8). Йоһанниң күнлиридики һәқиқәттин чәтнәп кәткән киши қәстән Худаға қарши гуна йолида маңсиму, йәнила Худаниң дости болуп қалимән, дәп ейтқан. Бүгүнки күндә дәл шундақ көзқарашта болғанларниң арисида яшаватимиз. Нурғун адәмләр Худаға ишинимиз дәйду, амма Худаниң гунаға, болупму җинсий әхлақсизлиққа болған көзқаришини қобул қилмайду. Адәмләр Худаниң нәзәридә гуна дәп саналған иш-һәрикәтни адәмләр бу мениң шәхсий қарарим яки һаят тәрзим, дәп ойлайду.

9. Яшлар Муқәддәс китапқа асасланған көзқаришиға қәтъий әмәл қилиштин, қандақ пайда мәнпийәткә еришиду?

 ⁹ Болупму, яш етиқатдашларға синипдашлири яки хизмәтдашлири өзлириниң җинсий әхлақсизлиққа болған көзқаришини қобул қилишқа бесим қиливатиду. Александәр шуниңға охшаш вәзийәтни бешидин өткүзгән. У мундақ дәйду: «Мәктәптики бәзи қизлар мени җинсий мунасивәттә болушқа қайил қилмақчи болди. Мениң қиз достум болмиғачқа, улар: “Сиз гомосексуалистму?”— дәп сориған». Әгәр охшаш синаққа дуч кәлсиңиз, есиңиздә болсун, Муқәддәс китапқа асасланған көзқаришиңизға қәтъий әмәл қилғанда, сиз нам-абройиңиз, саламәтлигиңиз, роһий сағламлиғиңиз вә Йәһва билән болған мунасивитиңизни қоғдалайсиз. Һәр қетим езиқтурушларға қарши турсиңиз бара-бара тоғра һәрикәт қилиш оңайирақ болиду. Җинсий әхлақсизлиққа нисбәтән бурмиланған көзқараш Шәйтандин келип чиқидиғанлиғини әстин чиқармаң. Шуңа бу дунияниң дегинини рәт қилип, Шәйтанни йеңәләйсиз (Йоһ. 1-х. 2:14).

10. Йоһанниң 1-хети 1:9-айәт Йәһваға пак виждан билән хизмәт қилишқа қандақ ярдәм бериду?

¹⁰ Биз Худаниң неминиң гуна екәнлигини ениқлаш һоқуқи бар екәнлигини етирап қилимиз. Гуна қилиштин нери турушимиз үчүн биз бар күчимизни чиқиримиз. Әгәр биз хаталиқ өткүзсәк, Йәһваға дуада хаталиғимизни иқрар қилалаймиз (Йоһанниң 1-хети 1:9ни оқуң). Еғир гуна өткүзсәк, Йәһва бизгә ғәмхорлуқ қилиш үчүн тәйинлигән ақсақаллардин ярдәм соралаймиз (Яқуп 5:14—16). Бирақ биз бурунқи өткүзгән гуналиримиз үчүн кечә-күндүз ойлинип, өз гөшимизни йемәслигимиз керәк. Немә үчүн ундақ қилмаслиғимиз керәк? Чүнки бизниң меһрибан Атимиз бизниң гуналиримизни кәчүрүш үчүн Өз Оғлини төләм қурбанлиғиға бәргән. Худа чин жүрәктин товва қилғанларни кәчүримән десә, У чоқум кәчүриду. Шу сәвәптин, Йәһва Худа пак виждан билән  Униңға хизмәт қилишқа имканийәт яритиду (Йоһ. 1-х. 2:1, 2, 12; 3:19, 20).

11. Етиқадимизға зиян йәткүзидиған тәлимләрдин әқлимизни қандақ қоғдалаймиз?

¹¹ Биз һәқиқәттин чәтнәп кәткәнләрниң тәлимлирини рәт қилишимиз керәк. Дәсләпки мәсиһийләрниң җамаитидин башлап, Шәйтан Худаниң садиқ хизмәтчилириниң жүригидә гуманлар пәйда қилиши үчүн көплигән алдамчилардин пайдилинип кәлмәктә. Нәтиҗидә, биз һәқиқәт билән ялғанчилиқ арисидики пәриқни қандақ ениқлашни билишимиз керәк e. Бизниң дүшмәнлиримиз тордин яки иҗтимаий алақә васитилиридин пайдилинип, Йәһва Худаға болған ишәнчимизни вә қериндашларға болған меһир-муһәббитимизни аҗизлаштурушқа тиришмақта. Пәрдә арқисида туруп, бу ялған тәшвиқатни қиливатқан Шәйтан екәнлигини әстин чиқармаң вә уни рәт қилиң (Йоһ. 1-х. 4:1, 6; Вәһ. 12:9).

12. Немә үчүн биз үгәнгән һәқиқәтләргә болған ишәнчимизни күчәйтишимиз керәк?

¹² Шәйтанниң һуҗумиға қарши туруш үчүн биз Әйсаға вә Худаниң Өз ирадисини орунлаш үчүн Әйсани қандақ қоллинидиғанлиғиға болған ишәнчимизни күчәйтишимиз лазим. Йәнә Йәһва бүгүнки күндә Өз йол-йоруғини беридиған бирла каналға ишинишимиз керәк (Мәт. 24:45—47). Биз ишәнчимизни Худаниң Сөзини дайим үгиниш арқилиқ мустәһкәмләймиз. Шундақ қилип, ишәнчимиз чоңқур йилтиз тартқан дәрәққә охшаш болиду. Паул Колосилиқлар җамаитигә хәт язғанда шуни ейтмақчи болған. У: «Һәзритимиз Әйса Мәсиһни қобул қилған екәнсиләр, давамлиқ униң билән биллә жүрүңлар,... униңда йилтиз тартип, мустәһкәмлиниңлар вә ишәнчиңларда мәһкәм болуңлар»,— дәп язған (Кол. 2:6, 7, ЙД). Шәйтан вә униң тәсир астида болғанлар ишәнчисини мустәһкәмлигән Худаниң хизмәтчисини тәвритәлмәйду (Йоһ. 2-х. 8, 9).

13. Биз немини күтишимиз керәк вә немә үчүн?

¹³ Дуния бизни өч көридиғанлиғини чүшинишимиз керәк (Йоһ. 1-х. 3:13). Йоһан бизгә «пүткүл дуния Шәйтанниң һөкүми астида» болуватқанлиғини әслитиду (Йоһ. 1-х. 5:19). Мошу зулум дунияниң ахири йеқинлишиватқансири, Шәйтан техиму ғәзәплиниватиду (Вәһ. 12:12). Шәйтан көзгә көрүнмәйдиған йәни җинсий әхлақсизлиққа аздуруш яки һәқиқәттин чәтнәп кәткәнләрниң ялғанчилиқлири арқилиқ һуҗум қилипла қалмай беваситә очуқ рәһимсиз һуҗумларни қиливатиду. Шәйтан өз вақтиниң аз қалғанлиғини билгәчкә, бизгә һуҗум қилип, вәз ишни тохтитишқа вә ишәнчимизни аҗизлаштурушқа тиришиду. Шу сәвәптин, бирнәччә дөләтләрдә бәзи паалийитимизниң чәкләнгәнлиги яки пүтүнләй мәнъий қилинғанлиғи бизни һәйран қалдурмайду. Шундақ болсиму, шу дөләттики қериндашлар синақларға бәрдашлиқ бериватиду. Шуңа Йәһваниң хәлқигә Шәйтан қандақ яманлиқ қилишидин қәтъийнәзәр, биз садақәтмәнлигимизни сақлап қалалаймиз.

14. Қериндашларниң һәқиқәттә чиң турушиға ярдәм беридиған қандақ бир усул бар?

¹⁴ Қериндашларниң һәқиқәттә чиң турушиға ярдәм бериш үчүн, уларға һисдашлиқ көрситишимиз лазим (Йоһ. 1-х. 3:10, 11, 16—18). Пәқәт һәммә ишлар өз йолида яхши кетиватқандила әмәс, қийинчилиқлар пәйда болғандиму, бир-биримизни яхши көрүшимиз керәк. Мәсилән, йеқинидин айрилип, тәсәллигә вә әмәлий ярдәмгә муһтаҗ болуватқан бирсини биләмсиз? Бәлким, етиқатдашларниң тәбиий апәттин зиянға учриғанлиғини  вә Ибадәт өйлириниң яки өз өйини қайта ясашқа муһтаҗ болуватқанлиғини аңлидиңизму? Биз қериндашларға болған меһир-муһәббитимиз билән һисдашлиғимизни пәқәт сөзлиримиз биләнла әмәс, әң муһими, иш-һәрикәтлиримиз биләнму көрситимиз.

15. Йоһанниң 1-хети 4:7, 8-айәтләргә асасән, биз немә қилишимиз керәк?

¹⁵ Биз бир-биримизгә меһир-муһәббәтни көрситип, асмандики көйүмчан Атимизни үлгә қилимиз (Йоһанниң 1-хети 4:7, 8ни оқуң). Меһир-муһәббәтни көрситишниң муһим йәнә бир усули — бир-биримизни кәчүрүш. Мәсилән, бирси бизни рәнҗитип, кейин кәчүрүм сориди дәйли. Биз уни кәчүрүп, хаталиғини унтуп қалсақ, меһир-муһәббитимизни көрситимиз (Кол. 3:13). Алдо исимлиқ бурадәр һөрмәтләп келиватқан бир бурадәрниң өзи келип чиққан ирқ һәққидә яман гәп қилғанлиғини аңлап, көңли йерим болған. У: «Мән бу бурадәр тоғрилиқ яман нәрсиләрни ойлимаслиқ үчүн пат-пат Йәһва Худаға дуа қилаттим»,— деди. Алдо йәнә бир нәрсини қилған. У әшу бурадәрни вәз хизмәткә чақирған вә улар вәз хизмәттә болғанда, Алдо бу бурадәрниң сөзлири униңға қанчилик еғир кәлгәнлигини чүшәндүргән. У: «Бурадәр униң сөзлири маңа қанчилик еғир кәлгәнлигини аңлиғанда, кәчүрүм сориди. Мән униң авазидин у қанчилик әпсусланғанлиғини чүшәндим. Шуниңдин кейин биз қайта яхши дост болуп кәттуқ»,— деди.

16, 17. Биз немигә қәтъий бәл бағлишимиз керәк?

¹⁶ Әлчи Йоһан етиқатдашларға көйүнүп, уларниң етиқатта чиң турушини халиған. Униң меһир-муһәббити вә ғәмхорлуғи үч хетидә бәргән нәсиһитидин ениқ көриниду. Көйүмчан әлчи Йоһанға охшаш әр вә аялларниң Әйса билән биргә бизниң үстимиздин һөкүмранлиқ қилидиғанлиғини билиш адәмгә қанчилик чоң тәсәлли-һә! (Йоһ. 1-х. 2:27)

¹⁷ Биз көрүп чиққан нәсиһәтни қобул қилайли. Һаятимиздики һәммә саһалирида Худаға бойсунуп, давамлиқ һәқиқәт йолида меңишқа бәл бағлайли. Муқәддәс китапни тәтқиқ қилип, униңға ишәнч бағлаң. Әйсаға болған ишәнчиңизни күчәйтиң. Инсан пәлсәпәсини вә һәқиқәттин чәтнәп кәткәнләрниң сахта тәлимлирини рәт қилиң. Иккиүзлүк һаят кәчүрүш вә гунаға қол тиқишқа үндәйдиғанларниң берилиш бесимиға қарши туруң. Йәһваниң жуқури әхлақ өлчәмлиригә мас һаят кәчүрүң. Бизни рәнҗиткән қериндашларни кәчүрүп, муһтаҗлиқта қалғанларға ярдәм қолумизни сунуп, уларниң һәқиқәттә чиң турушиға ярдәм берәйли. Шундақ қилғандила, дуч кәлгән қийинчилиқлиримизға қаримастин, һәқиқәт йолида меңишни давамлаштуримиз.