1, 2. а) Йәһва Худа қандақ үч қиммәтбаһа гөһәрни бәргән? ә) Мошу мақалидә немини қараштуримиз?

ЙӘҺВА ХУДА каинаттики әң бай Шәхс вә һәммә нәрсә униңкидур (Тарихнамә 1-язма 29:11, 12). Шундақ болсиму У һәммисигә мәрт. У биз билән роһий гөһәрләрни бөлүшкинигә нәқәдәр миннәтдармиз! Бу гөһәрләрниң бәзилири немә? Уларға 1) Худаниң Падишалиғи, 2) вәзлик хизмитимиз вә 3) Муқәддәс китаптики бебаһа һәқиқәтләр кириду. Лекин пәхәс болмисақ, вақит өткәнсири мошу гөһәрләрниң қанчилик баһалиқ екәнлигини унтуп қелишимиз мүмкин. Әйса Мәсиһ «ғәзнәңлар қәйәрдә болса, жүригиңларму шу йәрдә болиду» дегән, шуңа биз мошу гөһәрләрниң қанчилик баһалиқ екәнлигини унтумай, уларға болған муһәббитимизни ашурушимиз керәк (Луқа 12:34).

² Худа Падишалиғи, вәзлик хизмәт вә һәқиқәт үчүн болған муһәббитимизни һәм миннәтдарлиғимизни қандақ мәһкәм қилиш керәклигини қараштурайли. Мақалини муһакимә қилиш давамида, роһий ғәзнигә болған муһәббитиңизни қандақларчә ашуралайдиғанлиғиңиз һәққидә мулаһизә қилиң.

3. Әйсаниң тәмсилидики адәм бир мәрвайитни сетивелиш үчүн немә қилишқа тәйяр болған? (Мақалиниң бешидики рәсимгә қараң.)

³ Мәтта 13:45, 46ни оқуң. Әйса мәрвайитни елип сатидиған адәм тоғрисида бир тәмсил ейтқан. Бир күни шу адәм бурун көргән мәрвайитларниң һәммисидин қиммәт болған бир мәрвайитни тапқан. У шу мәрвайитқа тәшна болғанлиқтин, уни сетивелиш үчүн һәммә нәрсилирини сетивәткән. Шу киши үчүн мошу мәрвайит қанчилик муһим болғанлиғини тәсәввур қилип көрүңа!

4. Худаниң Падишалиғи үчүн немә қилишқа тәйярмиз?

⁴ Әйсаниң тәмсилидин қандақ савақ алалаймиз? Худаниң Падишалиғи тоғрисидики һәқиқәт қиммәт мәрвайитқа охшаш. Мошу мәрвайитни баһалиған адәмдәк, бизму Худаниң Падишалиғини баһалисақ, униң пухраси болуп, қоли астида қелиш үчүн һәммә нәрсини беришкә тәйяр болимиз (Марк 10:28—30ни оқуң). Келиң, шундақ йол тутқан икки адәмниң мисалини қараштурайли.

5. Худаниң Падишалиғи үчүн Закай немә қилишқа тәйяр болди?

⁵ Закай селиқ жиққучиларниң башлиғи еди. У адәмләрдин пул тартивелиш арқилиқ бай болған (Луқа 19:1—9). Күнләрниң биридә, Закай Әйсаниң Худа Падишалиғи тоғрисидики сөзлирини аңлиған. Аңлиғанлири униңға шунчилик яққанки, у һәтта һаятини тамамән өзгәртишни халиған. У: «Һакимдар, мүлкүмниң йеримини кәмбәғәлләргә тарқитимән, әгәр бирәвдин ялған әйипләр бойичә бир нәрсә тәләп қилип алған болсам, төрт һәссә артуқ қайтуримән»,— деди. Закай адәмләрдин тартивалған пулни қайтуруп, ачкөзлүктин айрилди.

6. Бир аял қандақ өзгиришләрни қилди вә униң шундақ қилишиға немә сәвәп болди?

⁶ Бирнәччә жил бурун бир аял Худаниң Падишалиғи тоғрисида хәвәрни аңлиған еди. У лесбиян болған вә гомосексуалистларниң һоқуқи үчүн күрәшкән тәшкилатниң президенти болған. Амма у Муқәддәс китапни тәтқиқ қилип, Худаниң бебаһа Падишалиғи һәққидә билгәндә, һаятини түп йилтизи билән өзгәртиш керәклигини чүшәнгән (Коринтлиқларға 1-хәт 6:9, 10). Йәһваға болған меһир-муһәббити уни шу тәшкилаттин чиқип, лесбиянлик мунасивитини үзүшкә дәвәт қилди. У 2009-жили чөмдүрүлүш мәрасимидин өтүп, келәрки жили пешқәдәм болуп хизмәт қилишни башлиди. Бу аялниң Йәһваға болған меһир-муһәббити әхлақсиз һәрқандақ һәвәсләрдин күчлүгирәк болди (Марк 12:29, 30).

7. Қандақ қилип Худа Падишалиғиға болған меһир-муһәббитимизни мәһкәм сақлалаймиз?

⁷ Худа Падишалиғиниң пухраси болуш үчүн көпинчимизгә һаятимизни пүтүнләй өзгәртишкә тоғра кәлди (Римлиқларға 12:2). Лекин күрәш техи түгимиди. Биз һечнәрсиниң, шу җүмлидин дунияхорлуқ яки әхлақсиз җинсий һәвәсләр кәби нәрсиләрниң, Худаниң Падишалиғиға болған меһир-муһәббитимизни аҗизлаштурушиға йол қоймаслиғимиз керәк (Пәнд-нәсиһәтләр 4:23; Мәтта 5:27—29). Худа Падишалиғиға болған  муһәббитимизни мәһкәм сақлап қелиш үчүн Йәһва бизгә йәнә бир тәңдиши йоқ гөһәрни бәргән.

8. а) Немә сәвәптин Паул хизмитимизни «сапал қачилардики» ғәзнә билән селиштурған? ә) Паул вәзлик хизмәтни яхши көргәнлигини қандақ көрсәтти?

⁸ Әйса бизгә Худа Падишалиғи һәққидики хуш хәвәрни ейтиш вә үгитиш вәзиписини тапшурған (Мәтта 28:19, 20). Әлчи Паул хизмитимизни сапал қачидики ғәзнә билән селиштурған (Коринтлиқларға 2-хәт 4:7; Тимотийға 1-хәт 1:12). Биз мукәммәлсиз болғанлиқтин, шундақ сапал қачиларға охшаймиз. Лекин биз вәз қиливатқан хәвәргә өзүмизниңму, бизни тиңшиғанларниңму һаяти бағлиқ болғанлиқтин, у бебаһа гөһәргә охшайду. Шуңа Паулму: «Буниң барлиғини башқилар билән хуш хәвәрни бөлүшүшкә қиливатимән»,— дегән еди (Коринтлиқларға 1-хәт 9:23). Паул башқиларға Худа Падишалиғи тоғрисида үгитиш үчүн көп тәр төккән (Римлиқларға 1:14, 15; Тимотийға 2-хәт 4:2ни оқуң). Хуш хәвәргә болған муһәббити униңға шәпқәтсиз тәқипләргә қаримастин вәз қилишқа ярдәм бәргән (Салоникилиқларға 1-хәт 2:2). Әлчи Паулниң вәзлик хизмәткә болған муһәббитигә қандақ тәқлит қилалаймиз?

9. Хизмәтни яхши көридиғанлиғимизни қандақ усуллар арқилиқ көрситәләймиз?

⁹ Паул һәрбир имканийәтни пайдилинип, адәмләргә хуш хәвәрни ейтиш арқилиқ хизмитини яхши көргәнлигини нәмаян қилған. Бизму Паул билән биринчи әсирдики мәсиһийләргә охшаш өйму өй, җәмийәтлик орунларда вә адәмләр бар һәрқандақ җайда хуш хәвәрни ейтимиз (Әлчиләр 5:42; 20:20). Биз мүмкинқәдәр көпирәк адәмгә вәз қилиш усуллирини издәймиз. Бәлким, ярдәмчи пешқәдәм яки пешқәдәм болуп хизмәт қилсақ болиду. Шундақла биз башқа тилни үгинишимиз, өз мәмликитимизниң башқа җайиға яки һәтта башқа дөләткә көчүп беришимиз мүмкин (Әлчиләр 16:9, 10).

10. Айрин хуш хәвәрни ейтишта көп тәр төкүп, қандақ бәрикәтләргә еришти?

¹⁰ Қошма Штатларда яшайдиған турмушқа чиқмиған Айрин исимлиқ қериндишимиз рус тилида сөзләйдиған адәмләргә вәз қилишни халиған. Шуңа 1993-жили у Нью-Йорк шәһиридики рус топиға өтти. Шу чағда рус топида пәқәт 20дәк җакалиғучи болған. 20 жил өтүп, Айрин мошундақ дәйду: «Мән рус тилида техичә судәк сөзлимәймән». Шундақ болсиму, Йәһва Худа униңға вә башқа җакалиғучиларға мошу тилда вәз қилишқа ярдәм бәргәнлигиниң нәтиҗисидә, бүгүнки күндә Нью-Йорк шәһиридә 6 рус җамаити бар. Айрин билән Муқәддәс китапни тәтқиқ қилған 15 адәм чөмдүрүлүш мәрасимидин өтти. Уларниң бәзилири Бәйтәлдә, башқилири пешқәдәм вә ақсақал болуп хизмәт қилиду. Айрин: «Мән башқа мәхсәтләргә интилсам болатти, бирақ уларниң һечқайсиси маңа шунчилик көп хошаллиқ елип келәлмәтти дәп ойлаймән»,— деди. Айрин хизмитини һәқиқәтән баһалайду!

11. Тәқипләргә қаримай вәз ишини тохтатмисақ, бу қандақ нәтиҗиләргә елип келиду?

 ¹¹ Хизмитимизни баһалисақ, әлчи Паулға охшап, тәқипләргә дуч кәлгәндиму вәз ишини тохтатмаймиз (Әлчиләр 14:19—22). Мәсилән, 1930—1944 жилларда Қошма Штатлардики етиқатдашлиримиз дәһшәтлик тәқипләргә учриған. Лекин буниңға қаримастин, улар вәз ишини тохтатмиди. Һөкүмәт вәкиллири уларниң паалийитини мәнъий қилмақчи болғанда, қериндашлар сотқа әриз қилип, көп сот ишини йәңгән. 1943-жили Норр бурадәр Қошма Штатларниң Алий Сотида қазинилған ғәлибә тоғрисида сөз қилди. Униң ейтишичә, қериндашлар вәз қилишни тохтатқан болса, Сот алдиға беришқа һечбир сәвәп болматти. Шуниңдәк, у дуния йүзидики көп қериндашлар вәз қилишни давамлаштурғанлиғи билән тәқипниң нәтиҗисиз екәнлигини дәлиллиди. Башқа дөләтләрдики қериндашларму шуниңға охшаш сот ишлирини йеңип чиққан. Һәқиқәтән, хизмәткә болған муһәббитимиз тәқипләргә қаримастин вәз қилишқа ярдәм бериду.

12. Немә қилишқа бәл бағлидиңиз?

¹² Хизмитимизни баһалисақ, һесавитимизда қанчә саат тапшурушнила ойлимаймиз. Әксичә, «хуш хәвәр һәққидә асаслиқ гува бериш» үчүн қолумиздин кәлгән һәммә нәрсини қилимиз (Әлчиләр 20:24; Тимотийға 2-хәт 4:5). Лекин башқиларға немә һәққидә үгитимиз? Худа бәргән йәнә бир гөһәр һәққидә ойлап көрәйли.

13, 14. Әйса Мәтта 13:52дә тилған алған «ғәзнә» немә вә биз уни қандақ толдуралаймиз?

¹³ Йәһва бәргән үчинчи гөһәр — биз биливалған һәқиқәтләр. Йәһва Худа—һәқиқәт Мәнбәсидур (Самуилниң 2-язмиси 7:28; Зәбур 31:5). Сехий Ата  сүпитидә Йәһва биз билән һәқиқәтләрни бөлүшишни халайду. Һәқиқәтни тонуғандин башлап та һазирғичә биз Худа Сөзини, әдәбиятлиримизни оқуш, конгресслар һәм һәптилик учришишларға қатнишиш арқилиқ көплигән һәқиқәтләрни биливалдуқ. Көпирәк һәқиқәтләрни жиғсақ, биздә Әйса ейтқандәк «йеңи һәм кона» һәқиқәтләр «ғәзниси» болиду (Мәтта 13:52ни оқуң). Әгәр һәқиқәтни йошурун ғәзнини издигәндәк издисәк, Йәһва «ғәзнимизни» толдурушқа ярдәм бериду (Пәнд-нәсиһәтләр 2:4—7ни оқуң). Буни қандақ қилалаймиз?

¹⁴ Биз Муқәддәс китапни вә әдәбиятлиримизни дайим оқуп, пухта тәтқиқ қилишимиз лазим. Бу илгири билмигән «йеңи» һәқиқәтләрни биливелишимизға ярдәмлишиду (Йәшуа 1:8, 9; Зәбур 1:2, 3). 1879-жили июльда чиққан «Күзитиш мунари» журналиниң дәсләпки санида һәқиқәт явайи от арисида йошурулған гүл билән селиштурулған. Бундақ гүлни тепиш үчүн адәм уни әстаидил издиши керәк. У бир гүлни тепиши биләнла қанаәтләнмәйду. Бу адәм йәниму көп гүлләрни тепиш үчүн издәшни давамлаштуриду. Шуниңға охшаш, бизму пәқәт бир һәқиқәтни тапқинимиздин қанаәтләнмәймиз.

15. Немишкә бәзи һәқиқәтләрни «кона» дәймиз вә сиз уларниң қайсисини алаһидә баһалайсиз?

¹⁵ Муқәддәс китапни үгинишни башлиғанда, биз бирнәччә әҗайип һәқиқәтни таптуқ. Бу һәқиқәтләрни дәсләп биливалғанлиқтин, уларни «кона» һәқиқәтләр дәп ейтсақ болиду. Уларниң бәзилири немә? Мәсилән, Йәһва бизниң Яратқучимиз екәнлигини вә униң инсанийәткә тегишлик нийити барлиғини биливалдуқ. Шуниң билән, бизни гуна вә өлүмдин қутқузуш үчүн Оғлини төләм қурбанлиғи сүпитидә бәргинини оқуп чүшәндуқ. Шундақла Худа Падишалиғи бизни қийинчилиқлиримиздин азат қилип, тинч һәм бәхитлик мәңгү һаятқа еришидиғанлиғимизни биливалдуқ (Йоһан 3:16; Вәһий 4:11; 21:3, 4).

16. Муқәддәс китаптики һәқиқәтләргә тегишлик чүшәнчимиз өзгәргәндә, немә қилишимиз керәк?

¹⁶ Бәзидә Муқәддәс китаптики қандақту бир бәшарәт яки айәт тоғрилиқ чүшәнчимиз барғансири йоруши мүмкин. Шундақ чағларда мошу өзгириш һәққидә мулаһизә қилиш үчүн вақит бөлүш муһим (Әлчиләр 17:11; Тимотийға 1-хәт 4:15). Биз пәқәт кона вә йеңи чүшәнчә оттурисидики пәриқни көрмәй, йеңи чүшәнчиниң тәпсилатлириғиму диққәт бөлгинимиз зөрүр. Пухта тәтқиқ қилиш йеңи һәқиқәтни ғәзнимизгә селип қойишимизниң капалити болалайду. Бундақ тиришчанлиқниң қандақ пайдисини көримиз?

17, 18. Муқәддәс роһ бизгә қандақ ярдәм бериду?

¹⁷ Әйса пәйғәмбәр Худаниң роһи үгәнгәнлиримизни есимизға чүширишимизгә ярдәм беридиғанлиғини ейтқан (Йоһан 14:25, 26). Бу бизгә вәз қилғинимизда қандақ ярдәмлишиду? Питер исимлиқ бурадәр билән болған вақиәни қараштурайли. У 1970-жили Британиядики Бәйтәлгә  йеңидин кәлгәндә 19да еди. Өйму өй вәз қиливатқанда, Питер оттура яштики сақаллиқ бир кишини учратти. Мошу кишидин у Муқәддәс китапни чүшәнгүси келәмду дәп сориди. Шу киши яһудий дин рәһбири болған екән, яш балиниң униңға Муқәддәс китапни үгәтмәкчи болғиниға бәк һәйран болди. Һелиқи киши Питерни тәкшүрүш үчүн униңға мундақ соал қойди: «Оғлум, ейтип беқиңа, Даниял китави қайси тилда йезилған?» Питер: «Бир қисми арамей тилида йезилған»,— дәп җавап бәрди. «Дин рәһбири җавапни билгинимгә һәйран қалди,— дәп есиға алди Питер,— өзүмму һәйран қалдим! Мән уни қәйәрдин билимән? Өйгә кәлгәндә, алдинқи айларниң “Күзитиш мунари” вә “Ойғиниңлар!” журналлирини қарап чиқтим. Шу чағда Даниял китавиниң арамей тилида йезилғанлиғи тоғрисидики бир мақалини таптим» (Даниял 2:4). Һәқиқәтән, муқәддәс роһ бурун оқуп, ғәзнимизгә селип қойған мәлуматни есимизға елишқа ярдәмлишиду (Луқа 12:11, 12; 21:13—15).

¹⁸ Йәһвадин кәлгән һәқиқәтләрни яхши көрүп, улар үчүн миннәтдар болсақ, ғәзнимизни мошундақ һәқиқәтләр билән толдурушни давамлаштуримиз. Буни қилғансири, башқиларға тәлим беришкә тәйяр болимиз.

19. Немишкә роһий ғәзнимизни қоғдишимиз һаҗәт?

¹⁹ Бу мақалидин роһий ғәзнини баһалаш қанчилик муһим екәнлигини биливалдуқ. Бирақ Шәйтан вә униң дуниясиниң роһий ғәзнимизгә болған меһир-муһәббитимизни совутишиға йол қоймаслиғимиз керәк. Пәхәс болмисақ, тапавити көп ишқа еришиш, баяшатлиқ һаят кәчүрүш яки мал-мүлүк билән махтиништәк арзуларға берилип кетишимиз мүмкин. Әлчи Йоһан мошу дуния билән униң һәвәси өтүп кетидиғанлиғини есимизға салиду (Йоһанниң 1-хети 2:15—17). Шуниң үчүн биз роһий ғәзнимизни һәрдайим қәдирләп, уни қоғдишимиз керәк.

20. Роһий ғәзниңизни қоғдаш үчүн немә қилишқа бәл бағлидиңиз?

²⁰ Худа Падишалиғиға болған меһир-муһәббитимизни совутидиған һәрқандақ нәрсидин ваз кечишкә тәйяр болуң. Қизғинлиқ билән вәз қилишқа бәл бағлаң һәм вәз хизмитигә болған муһәббитиңизни һечқачан йоқатмаң. Муқәддәс китаптики һәқиқәтләрни издәшни тохтатмаң. Шу чағда «асманда түгимәйдиған ғәзнини жиғиңлар, у йәрдә оғри йеқинлашмайду вә күйә йәп кәтмәйду. Сәвәви, ғәзнәңлар қәйәрдә болса, жүригиңларму шу йәрдә болиду» дегән сөзләргә мувапиқ йол тутқан болисиз (Луқа 12:33, 34).