1. Немә үчүн Йәһва Өзини аниға охшатқан?

 «АНА өзи емитидиған бовиғини унталамду?» Бу соални Йәһва Худа Йәшая пәйғәмбәрниң заманида қойған. У: «Һәтта улар унтуған болсиму, Мән сени унтуялмаймән»,— дегән (Йәшая 49:15). Адәттә, Йәһва Худа Өзини ана билән селиштурмайду. Лекин бу вәзийәттә У Өзини аниға охшатқан. Йәһва Өз хизмәтчилиригә шунчә бәк йеқин екәнлигини көрситиш үчүн аниниң бовақ билән болған мунасивитигә диққитимизни ағдурған. Көплигән анилар Җасмин қериндишимизға охшаш һис-туйғида болуши мүмкин. У:«Балини емитиватқан чағларда, ана билән балиниң арисида өмүр бойи үзүлмәс риштә пәйда болиду»,— дәп ейтқан.

2. Йәһва Худа һәтта бир балиси Униңдин жирақлишип кәткәнлигини көрүп немини һис қиливатиду?

² У һәтта бир балисиниң вәз хизмитини вә учришишларға беришини тохтатқанлиғини билиду. Һәр жили көплигән хизмәтчиләрниң паалийәтсиз b болуп қелиши, Худаниң қәлбини қанчилик ағритиду, дәңә!

3. Йәһва Худа немини халайду?

³ Паалийәтсиз болуп қалған көплигән қәдирлик қериндашлиримиз җамаәткә қайтиду вә биз уларни иллиқ қарши алимиз. Йәһва Худа халиғандәк, бизму паалийәтсиз болуп қалған барлиқ қериндашларниң қайтип келишини халаймиз (Пет. 1-х. 2:25). Биз уларға қандақ ярдәм берәләймиз? Мошу соалға җавап елиштин авал, бәзибирлири җамаәт учришишлириға вә вәз хизмәткә немә үчүн бармай қалғанлиғини чүшинишимиз керәк.

4. Гайибирлириға иш қандақ тәсир қилған?

⁴ Гайибирлири ишқа бәкму берилип кетиду. Азиядә яшаватқан Хунг c бурадәр: «Мән ишимға бешим билән кирип кәттим. Мән көп пул тапсам, Йәһва Худаға көпирәк хизмәт қилалаймән дәп ахмақ боптимән. Шуңа мән саат-саатлап көп ишләп, бара-бара учришишлардин қелишқа башлидим. Андин тамамән бармайдиған болуп қалдим. Қаримаққа, бу дуния дәл бирәр адәмни Худадин аста-аста жирақлаштуруш үчүн қурулған».

5. Бешиға қийинчилиқ чүшкән бир қериндишимиз немә қилған?

⁵ Бәзи қериндашларниң қийинчилиқлири чечидин тола. Британиядә яшаватқан бәш балиниң аниси Анна мундақ дегән: «Кәнҗә оғлум саламәтлиги бәкму начар туғулған еди. Кейинирәк бир қизим җамаәттин чиқирилған, йәнә бир оғлум психикилиқ кесәлгә дучар болған еди. Мән чүшкүнлүккә чүштимки, һәтта җамаәткә һәм вәз хизмәткә беришни тохтаттим. Шундақ қилип, паалийәтсиз вәз ейтқучи болуп қалдим». Бизниң Анна вә униң аилисигә охшаш қийинчилиқларға дуч кәлгән қериндашларға ичимиз бәкму ағрийду!

6. Колосилиқларға 3:13-айәттики принципқа әмәл қилмайдиғанлар немә үчүн Худа хәлқидин жирақлишип кетиши мүмкин?

⁶ Колосилиқларға 3:13ни оқуң. Худаниң бәзи хизмәтчилири етиқатдашлиридин көңли қалған. Әлчи Паул бәзидә қериндашларға «шикайәт қилишиға асас» болуши мүмкин дәп ейтқан. Бәлким, кимду-бирси бизгә адаләтсизлик қилғанду. Әгәр биз пәхәс болмисақ, адавәт сақлап қелишимиз мүмкин. Адәмниң аччиғи келип, у һәтта аста-аста Йәһва Худа хәлқидин жирақлишип кетиши мүмкин. Җәнубий Америкида яшайдиған Пабло бурадәрниң мисалиға диққәт бөләйли. Бирси униңға қилмиған ишини қилди дәп қара чаплап, у җамаәттики шан-шәрәплик вәзиписидин айрилип қалған. У буниңға қандақ инкас қайтурған? «Мән қаттиқ ғәзәплинип, аста-аста җамаәттин жирақлап кетип қалдим»,— деди Пабло.

7. Виждан азавини тартиватқан адәм қандақ әһвалға чүшүп қелиши мүмкин?

⁷ Башқа бирлири өтмүштә еғир гуна қилғанлиқтин, виждан азавини тартиши мүмкин. Улар Худа мени яхши көрмәйду дәп ойлиши мүмкин. Шундақ адәм һәтта чин жүригидин товва қилип, кәчүрүмгә еришкән болсиму, өзини Худа хәлқиниң арисида болушқа лайиқ әмәс дәп һис қилиши мүмкин. Франциско исимлиқ бурадәр буни өз бешидин өткүзгән. У: «Мән җинсий әхлақсизлиқ қилғиним үчүн әйипләндим. Бешида җамаәткә берип жүрсәмму, өзүмни лайиқсиз дегән ой-хиялимдин қутулалмидим. Худа хәлқиниң арисида болалмаймән һәм йәнила мени вижданим азаплап, Йәһва мени кәчүрмиди дәп ойлидим. Вақит өтүп мән җамаәт учришиштин вә вәз хизмәттин пүтүнләй қол үздүм». Шундақ вәзийәтләргә дуч келиватқан қериндашларға қандақ қарайсиз? Уларға ичиңиз ағрамду? Әң муһими Йәһва Худа уларға қандақ қарайду?

8. Бурун хизмәт қилған хизмәтчисини Йәһва Худа унтуп қаламду? Чүшәндүрүп бериң.

⁸ Бурун Йәһва Худаға хизмәт қилип, бирақ кейин хәлқидин вақитлиқ жирақлишип қалған хизмәтчилирини У һәргизму унтимайду. Шундақла Худа уларниң әҗир-меһнитини әстин чиқармайду (Ибр. 6:10).  Йәшая пәйғәмбәр Йәһва Өз хәлқигә ғәмхорлуқ қилғанлиғини чирайлиқ тәсвирлигән. У мундақ дәп язған: «Қойчидәк У Өз падисини бақиду. У қозилирини билигигә жиғиду, уларни қучақлап маңиду» (Йәшая 40:11, КТ). Қойларниң бири падидин жирақлишип кәтсә, Улуқ Падичи Йәһва қандақ һис туйғуда болиду? Буни Әйсаниң әгәшкүчилиригә ейтқан сөзлиридин көрүшкә болиду: «Қандақ ойлайсиләр, әгәр бирәр адәмниң 100 қойи болса вә уларниң арисида бири жүтүп кәтсә, у 99ни тағда қалдуруп, адишип қалғанни издәп барматтиму? Шундақла уни тепивалса, растини ейтимәнки, у униңға адашмиған 99дин артуғирақ хошал болиду» (Мәт. 18:12, 13).

9. Яхши падичи қойлириға қандақ қариған? (Муқавидики рәсимгә қараң.)

⁹ Немә үчүн Худани Падичи билән селиштурсақ болиду? Чүнки яхши падичи өз қойлирини интайин яхши бақиду. Мәсилән, Давут қойлирини қоғдаш үчүн шир вә ейиқ билән соқушқан (Сам. 1-яз. 17:34, 35). Яхши қойчи қойниң падидин адишип қалғинини байқайду (Йоһ. 10:3, 14). Мундақ яхши қойчи 99 қойини қорада, йәни қотанда қалдуруп яки башқа падичиға тапшуруп, адишип қалған бир қойни издәшкә кетиду. Әйса бизгә муһим бир һәқиқәтни үгитиши үчүн мошу мисални қолланған. У: «Асмандики Атамму мошу әрзимәсләрниң [кичикләрниң] һалак болушини халимайду»,— дегән (Мәт. 18:14).

10. Әзәкиял 34:11—16 айәтләргә асасән, Йәһва Худа адишип қалған хизмәтчиси үчүн немә қилишни вәдә қилған?

¹⁰ Йәһва Худа һәммимизни, һәтта падидин адишип қалған «[кичикләрни]» яхши көриду. Әзәкиял пәйғәмбәр арқилиқ Худа адишип қалған қойларни Өзи издәп тепивелишқа вә Униң билән достлуқ мунасивәтни қайта тикләшкә вәдә бериватиду. Йәнә уларни қандақ қутулдуридиғанлиғини ейтқан. У адишип қалған қойни қутқузуш үчүн қедимки исраиллиқ падичиға охшаш һәрикәт қилған еди (Әзәкиял 34:11—16ни оқуң). Биринчидин, падичи  қойни издәш үчүн бар күчини вә вақтини айимайду. Андин қойини тапқанда, уни қораға яки қотанға қайтуриду. Йәнә әгәр қой яриланған яки ач болса, ғәмхорчан падичи уни қолиға елип, ярилирини теңип сақайтип, қосиғини тойғуздуриду. Худди шуниңдәк, Худаниң падисиға ғәмхорлуқ қилидиған ақсақалларму җамаәттин жирақлишип кәткәнләргә шуниңдәк ярдәм бериши керәк (Пет. 1-х. 5:2, 3). Ақсақаллар уларни издәп, җамаәткә қайтуруп келиш вә Худа билән достлуқ мунасивәтни әслигә кәлтүрүш үчүн меһрибанлиқ билән тегишлик ярдәмни бериду d.

11. Яхши падичи немини чүшиниду?

¹¹ Яхши падичи қойларниң падидин адишип қелиши мүмкинлигини чүшәнгән. Әгәр қой падидин кетип қалса, падичи уни уруп-соқмайду. Қедимда Йәһва Өзидин жирақлишип кәткән хизмәтчилиригә қандақ ярдәм бәргәнлигини һазир көрүп чиқайли.

12. Йәһва Худа Өз хизмәтчиси Юнусқа қандақ муамилә қилған?

¹² Юнус пәйғәмбәр Йәһва Худаға бойсунмай Нинәвәһ шәһиригә бармиған. Буниңға қаримастин, Худа униңдин бирдин үмүтини үзмигән. Меһрибан падичидәк, Йәһва Худа уни қутулдурған вә Униң тапшуриғини орунлашқа күч бәргән (Юнус 2:7; 3:1, 2). Кейинирәк Худа Юнусқа өстүргән қапақ арқилиқ һәрбир адәмниң һаяти қанчилик қиммәт-баһалиқ екәнлигини чүшәндүргән (Юнус 4:10, 11). Бу биз үчүн қандақ савақ? Ақсақаллар паалийәтсиз болғанлардин үмүтини үзмәслиги керәк. Әксинчә, ақсақаллар хизмәтчиниң немә үчүн җамаәттин жирақлишип кәткәнлигини чүшинишкә тиришиду. Хизмәтчи Йәһва Худаға қайтип кәлгәндә, ақсақаллар давамлиқ у кишигә меһир-муһәббити вә ғәмхорлуғини көрситиду.

13. Зәбурниң 73-бабини язғучиниң сөзлиригә қарита Йәһва Худаниң қайтурған инкасидин немини үгинәләймиз?

¹³ Зәбурниң 73-бабиниң язғучи рәзил адәмләрниң гүллиниватқанлиғини көрүп,  көңли йерим болған. У Худаниң ирадисини орунлашниң пайдиси барлиғидин гуманланған (Зәб. 73:12, 13, 16). Йәһва Худа буниңға қандақ инкас қайтурған? Худа бу хизмәтчисини әйиплимигән. Бәлки, Зәбур язғучисиниң шу сөзлири Муқәддәс китапта яздурған еди. Ахирида, Зәбур язғучиси Йәһва Худа билән дост болушниң һаятидики һәрқандақ нәрсиләрдин қәдир-қиммәтлик екәнлигини чүшәнгән (Зәб. 73:23, 24, 26, 28). Буниңдин қандақ савақ алсақ болиду? Ақсақаллар Худаға қилған хизмәтниң пайдиси тоғрилиқ гуманлинишқа башлиған қериндашлар үстидин алдирапла һөкүм чиқармаслиғи керәк. Әксинчә, ақсақаллар қериндашларни әйипләшниң орниға, улар немә үчүн шундақ сөзләрни ейтқан вә һәрикәт қилғанлиғини чүшиниши керәк. Шуниң билән биллә ақсақаллар Муқәддәс китапниң уларниң вәзийитигә мас айәтләрни көрситип тәсәлли вә илһам берәләйду.

14. Илияс пәйғәмбәр немә үчүн Йәһваниң ярдимигә муһтаҗ болған вә У уни қандақ қоллап-қувәтлигән?

¹⁴ Илияс пәйғәмбәр ханиш Изәбәлдин қечип жүргән (Пад. 1-яз. 19:1—3). У мениңдин башқа һечким Худаға хизмәт қилмайду, шуңа бу хизмәтниң пайдиси йоқ дәп ойлиған. Шуңа у чүшкүнлүккә чүшүп, һәтта өлүшни арзу қилған (Пад. 1-яз. 19:4, 10). Йәһва Худа Ильясни әйипләшниң орниға, у ялғуз әмәслигигә вә у Худаниң күчигә тайинип, көп ишларни қилалайдиғанлиғиға ишәндүргән. Пәрвәрдигар униң ғәм-тәшвишлирини зәң қоюп тиңшиған вә униңға йеңи тапшуруқни бәргән (Пад. 1-яз. 19:11—16, 18). Буниңдин қандақ савақ алимиз?  Биз һәммимиз, болупму ақсақаллар Йәһваниң хизмәтчилиригә меһрибанлиқ билән муамилә қилишимиз лазим. Әгәр бирси аччиқлинип гәп қилса яки Йәһва уни һечқачан кәчүрмәйду дәп ейтса, ақсақаллар униң жүрәк сөзлирини зәң қоюп тиңшиши керәк. Кейин улар шундақ адишип қалған қериндашларни Йәһваниң бәкму яхши көридиғанлиғиға ишәндүрүшкә һәрикәт қилиду.

15. Йоһан 6:39-айткә асасән, Әйса Атисиниң қойлириға қандақ көзқарашта болған?

¹⁵ Йәһва падидин жирақлишип кәткәнләргә қандақ көзқарашта болушимизни халайду? Әйса бизгә үлгә қалдурған. У Худаниң көз алдида һәммә хизмәтчилириниң қәдир-қиммәтлик екәнлигини чүшәнгән. Шуңа Әйса у «Исраил өйиниң жүткән» қойлириниң Атиси Йәһваға қайтишиға ярдәм бәргән (Мәт. 15:24; Луқа 19:9, 10). Әйса көйүмчан бир падичи болуп, бирму Йәһваниң қойни йоқутуп қоймаслиқ үчүн қолидин кәлгиничә һәммини қилған (Йоһан 6:39ни оқуң).

16, 17. Җамаәттин жирақлишип кәткәнләргә ақсақаллар қандақ ярдәм бериши лазим? (« Падидин адишип қалған қой қандақ һис-туйғуда болиду?» намлиқ рамкиға қараң.)

¹⁶ Әлчи Паул Әфәстики ақсақалларни Әйсани үлгә қилишқа дәвәт қилған. У: «Аҗизларға қандақ ярдәм қилиш керәклигини вә Һакимдаримиз Әйсаниң: “Елиштин көрә бериш бәхитлигирәк”,— дегән сөзлирини әстә тутушни көрсәттим»,— дәп ейтқан (Әлч. 20:17, 35). Бу айәт, ақсақаллар алаһидә җавапкарлиқни өз бойниға алғанлиғини көрситиду. Испаниядә яшайдиған Сальвадор исимлиқ ақсақал мундақ дегән: «Йәһва Худаниң адишип қалған қойлириға қандақ ғәмхорлуқ қиливатқанлиғини ойлиғинимда, бу мени уларға ярдәм беришкә дәвәт қилиду. Мән Йәһваниң уларға ғәмхорлуқ қилишимни халайдиғанлиғини билимән».

¹⁷ Бу мақалидә тилға елинған қериндашларниң һәммиси Йәһваға қайтип кәлгән. Һазирқи пәйттә, җамаәттин жирақлишип кәткән йәнә нурғун қериндашлар Худаға қайтип келишни халайду. Келәрки мақалидә, Йәһваға қайтип келишни халайдиғанларға қандақ ярдәм берәләйдиғанлиғимиз һәққидә көпирәк муһакимә қилимиз.