1. Немә үчүн бәзидә Йәһваниң хизмәтчилири өзлирини ялғуз һис қилиши мүмкин?

 КӨПИНЧИМИЗ бәзидә өзүмизни ялғуз һис қилимиз. Бәзиләр үчүн шундақ һис-туйғулар вақитлиқ болса, башқилар үчүн бу узунға созулиду. Көпчиликниң арисида болсақму, өзүмизни ялғуз һис қилишимиз мүмкин. Бәзиләргә йеңи җамаәткә көнүш қийин болиду. Башқиларниң уруқ-туққанлири билән мунасивити қоюқ болғач, туққанлиридин айрилип, жирақ бир җайға барса, ялғузлуқтин қийнилиду. Бәзиләрниң яхши көргән кишилири өлүп кәткәч, улар билән өткүзгән вақитларни бәк сеғиниду. Йәнә бәзи етиқатчилар болупму, йеқинда һәқиқәтни тонуғанлар, аилә әзалири вә илгирики достлири тәрипидин рәт қилинишқа яки зиянкәшликкә учриғанда, өзлирини ялғуз қалғандәк һис қилиду.

2. Қайси соалларға җавап тапимиз?

² Биз һәққидики һәммә нәрсә Йәһва Худаға бәш қолдәк аян. Өзүмизни ялғуз һис қилғанда, У шуни билиду вә шундақ һис-туйғуларни йеңишимизға ярдәм беришни халайду. Йәһва бизгә қандақ ярдәм бериду? Өзүмизни ялғуз һис қилмаслиқ үчүн немә қилалаймиз? Җамаитимиздә өзини ялғуз һис қилғанларға қандақ ярдәм берәләймиз? Келиңлар, мошу соалларниң җаваплири көрәйли.

3. Йәһва Илияс пәйғәмбәргә ғәмхорлуқ қилғинини қандақ көрсәткән?

³ Йәһва Өзиниң барлиқ хизмәтчилириниң шат-хорам яшишини халайду. У һәрбиримизгә йеқиндур. Биз үмүтсизлинип, роһумиз чүшкәндә, У буни байқайду (Зәб. 145:18, 19). Йәһва Худа Илияс пәйғәмбәрниң һис-туйғулириға көңүл бөлүп, униңға қандақ ярдәм бәргәнлигини көрәйли. Бу садақәтмән киши, исраилларниң тарихидики әң қийин бир заманида  яшиған. Шу вақиттики қарши чиққучилар Йәһваниң хизмәтчилиригә қаттиқ зиянкәшлик көрсәткән, болупму улар Илияс пәйғәмбәрни өлтүрмәкчи болған (Пад. 1-яз. 19:1, 2). Илиясниң көңлини йерим қилған йәнә бир иш болса, у мәнла Йәһваға ялғуз хизмәт қиливатимән, дәп ойлиған (Пад. 1-яз. 19:10). Йәһва униңға ярдәм бериш үчүн дәрһал һәрикәткә келип, бир пәриштисини әвәткән еди. Шу пәриштә униң ялғуз әмәслигини вә Худадин әйминидиған башқа исраилларниңму барлиғиға уни ишәндүргән (Пад. 1-яз. 19:5, 18).

4. Уруқ-туққан яки достлириниң ярдимисиз қалған хизмәтчилиригә Йәһваниң ғәмхорлуқ қилидиғанлиғи, Марк 10:29, 30-айәтләрдә қандақ көрситилгән?

⁴ Биз Йәһваға хизмәт қилишни таллиғанда, У бәзилиримизниң нурғун қурбанлиқларни беришимизгә тоғра келидиғанлиғини билиду. Йәһваға хизмәт қилмайдиған аилә әзалиримиз яки достлиримизниң ярдимидин айрилип қелишимиз мүмкин. Бәлким, Петрус ғәм-әндишә қилғач, бир қетим Әйсадин шундақ сориған: «Мана, биз һәммә нәрсини ташлап, саңа әгәштуқ. Буниң үчүн бизгә немә берилиду?» (Мәт. 19:27) Әйса меһрибанлиқ билән өз әгәшкүчилириниң чоң бир роһий аилигә еришидиғанлиғини ейтқан (Марк 10:29, 30ни оқуң). Йәһва роһий аилимизниң Беши вә У Өз хизмәтчилирини қоллап-қувәтләйдиғанлиғини вәдә қилиду (Зәб. 9:10). Ялғузлуқ һис-туйғулирини йеңиш үчүн тиришиватқиниңизда, Йәһваниң ярдимигә еришиш үчүн немиләрни қилсиңиз болиду? Бирқанчә йоллирини көрәйли.

5. Диққитиңизни Йәһваниң сизгә ярдәм бериватқанлиғиға ағдурушниң қандақ пайдиси бар?

⁵ Йәһваниң сизгә қандақ ярдәм беридиғанлиғиға диққәт қилиң (Зәбур 55:22). Бу диққитиңизни һәддидин зиядә өзүңизгә қаратмаслиққа ярдәм бериду. Аилисидикиләр Йәһва гувачиси болмиған қериндишимиз Карэл b мундақ дәйду: «Өтмүшни әслисәм вә Йәһваниң синақларда маңа қандақ ярдәм бәргәнлиги һәққидә чоңқур ойлансам, ялғуз әмәслигимни һис қилимән. Бу мени Йәһваниң һәрқачан йенимда болидиғанлиғиға ишәндүриду».

6. Петрусниң 1-хети 5:9, 10-айәтләр, өзлирини ялғуз һис қилғанларға қандақ илһам бериду?

 ⁶ Өзлирини ялғуз һис қилған қериндашларға, Йәһваниң қандақ ярдәм бәргәнлиги һәққидә ойлиниң (Петрусниң 1-хети 5:9, 10ни оқуң). Узун жиллар аилисидин ялғуз гувачи болған бурадиримиз Хироши мундақ дәйду: «Җамаәттә һәммисиниң өзгә яриша қийинчилиқлири барлиғини көрдүм. Амма һәммимиз қолумиздин келишичә тиришип, Йәһваға хизмәт қиливатимиз. Буни көрүш һәқиқәттә ялғуз гувачи болғанларға илһам бериду».

7. Дуа сизгә қандақ ярдәм бериду?

⁷ Дуа қилиң, Муқәддәс китапни оқуң вә учришишларға қатнишиң. Чоқум өзүңизниң һис-туйғулириңизни Йәһваға очуқ ейтип бериң (Пет. 1-х. 5:7). Йәһваға хизмәт қилишни таллап, өзини аилисидикиләрдин айрилип қалғандәк һис қилған яш қериндишимиз Массел шундақ дәйду: «Йәһваға давамлиқ дуа қилиш, ялғузлуқни йеңишкә ярдәм бәргән. У мән үчүн һәқиқий Ата еди. Мән һәр күни дуа қилип, ич-бағримни Униңға төкүп берәттим».

8. Худа Сөзини оқуш вә улар үстидә чоңқур ойлиниш, сизгә қандақ ярдәм бериду?

⁸ Дайим Худа Сөзини оқуң, болупму Йәһваниң сизгә болған меһир-муһәббитини көрситидиған айәтләргә диққәт қилиң. Аилисиниң көңүлгә азар беридиған сөзлиригә бәрдашлиқ бериватқан қериндишимиз Биянка мундақ дәйду: «Муқәддәс китаптики вақиәләрни вә маңа охшаш вәзийәтләргә дуч кәлгән Худа хизмәтчилириниң тәрҗимиһалирини оқуш вә улар үстидә чоңқур ойлиниш, маңа һәқиқәтән ярдәм бериду». Бәзи қериндашлар мәсилән, Зәбур 27:10 вә Йәшая 41:10ға охшаш өзлиригә тәсәлли беридиған айәтләрни ятливалиду. Бәзиләр учришишларға тәйярлиқ қилғанда яки Муқәддәс китапни оқуғанда, авазлиқ нәшри материалларни тиңшайду. Бу уларға өзлирини ялғуз һис қилмаслиғиға ярдәм бериду.

9. Җамаәт учришишлириға қатнишиш сизгә қандақ ярдәм бериду?

⁹ Җамаәт учришишлирини қалдурмай, давамлиқ қатнишиң. Учришишниң мәзмунлири сизгә илһам бериду вә етиқатчилар билән йеқин тонушалайсиз (Ибр. 10:24, 25). Жуқурида тилға алған Массел мундақ дәйду: «Гәрчә мән бәк тартинчақ болсамму, һәрбир учришишқа қатнишишни вә тәйярлиған җавапларни беришни қарар қилдим. Бу җамаәттә өзүмниң бир кишилик орним барлиғини һис қилишимға ярдәм бәрди».

10. Немә үчүн садақәтмән қериндашлар билән дост болуш бәк муһим?

¹⁰ Садақәтмән қериндашлар билән дост болуң. Келип чиқиши вә йеши сиздин пәриқлинидиған қериндашларни дост тутушқа  тиришиң. Улардин көп нәрсиләрни үгинәләйсиз. Муқәддәс китап «яшанғанларда даналиқ» бар, дәп есимизгә салиду (Аюп 12:12). Яшанғанларму садиқ яшлардин көп нәрсиләрни үгинәләйду. Давут Йонатандин яш еди, амма бу уларниң дост болушиға тосқунлуқ қилмиған (Сам. 1-яз. 18:1). Давут билән Йонатан түрлүк қийинчилиқларға қаримай, бир-бириниң Йәһваға хизмәт қилишиға ярдәм бәргән (Сам. 1-яз. 23:16—18). Аилисидә ялғуз гувачи болған қериндишимиз Ирина мундақ дәйду: «Етиқатчи қериндашлиримиз һәқиқәтән биз үчүн роһий ата-ана, ака-ука вә һәдә-сиңиллар болалайду. Йәһва уларни ишлитип, еһтияҗлиримизни қанаәтләндүриду».

11. Йеқин достларни тепиш үчүн чоқум немә қилиш керәк?

¹¹ Болупму тартинчақ болсиңиз, дост тепиш асанға чүшмәйду. Қаршилиқларға қаримай, һәқиқәтни үгәнгән тартинчақ қериндишимиз Ратна шундақ дәйду: «Мән роһий аиләмниң ярдимигә муһтаҗлиғимни етирап қилишим керәк еди». Башқиларға өз һис-туйғулиримизни ейтиш оңай болмаслиғи мүмкин, амма бу йеқин достларни тепишқа йол ачиду. Достлириңиз сизгә илһам берип, қоллап-қувәтләшни халайду. Бирақ уларниң сизгә шундақ ярдәм берәлиши үчүн, өз һис-туйғулириңизни уларға ейтип бериң.

12. Вәз хизмәт яхши достларни тепишиңизға қандақ ярдәм берәләйду?

¹² Дост тепишниң әң яхши усули — җамаәттики қериндашлар билән вәз хизмәткә чиқиш. Карэл йәнә мундақ дәйду: «Мән нурғун яхши достларға вәз хизмәт вә башқа роһий паалийәтләргә қатнишиш арқилиқ ериштим. Йәһва шу достлирим арқилиқ, көп жиллар давамида мени қоллап-қувәтләп кәлди». Йәһваниң садиқ хизмәтчилири билән дост болуш үчүн һәқиқәтән күч чиқиришқа әрзийду. Йәһва шундақ достлар арқилиқ, сизниң ялғузлуқ яки униңға охшаш сәлбий һис-туйғулар билән күрәш қилишиңизға ярдәм берәләйду (Пәнд н. 17:17).

13. Җамаәттики барлиқ кишиләрниң қандақ мәҗбурийити бар?

¹³ Җамаитимиздә меһир-муһәббәт вә тинч-аманлиқ болуши үчүн өз һәссимизни қошуш мәҗбурийити бар. Шундила һечким өзини ялғуз һис қилмайду (Йоһ. 13:35). Бизниң гәп-сөз вә иш-һәрикәтлиримиз башқиларға көп илһам берәләйду. Бир қериндишимиз мундақ дәйду: «Мән һәқиқәтни тонуғанда, җамаәт мениң аиләмгә айланған. Уларниң ярдимисиз, мән Йәһва гувачиси болалматтим». Аилисидә һәқиқәттә ялғуз гувачи болған бириниң өзини җамаәттә ялғуз һис қилмаслиққа қандақ ярдәм берәләйсиз?

14. Йеңи кәлгәнләр билән дост болуш үчүн немә қилалайсиз?

¹⁴ Йеңи достларни тепиш үчүн тәшәббускар болуң. Буни җамаәткә йеңи кәлгәнләрни иллиқ қарши елиш билән башлисақ болиду (Рим. 15:7). Бирақ биз пәқәт достанә саламлишипла қоймай, бәлки вақитниң өтүшигә әгишип улар билән йеқин дост болушни халаймиз. Шуңа йеңи кәлгәнләргә қизғин вә сәмимий көңүл бөлүң. Уларни хиҗаләт қилидиған соалларни соримаң. Буниң орниға улар қандақ қийинчилиқларни баштин өткүзгәнлигини чүшинишкә һәрикәт қилиң. Бәзиләр үчүн өз һис-туйғулирини ипадиләш қийин болуши мүмкин. Шуңа уларни сөзләшкә мәҗбурлаштин пәхәс болуң. Әксинчә, пәм-парасәт вә меһрибанлиқ билән соал сораң вә улар өз һис-туйғулирини ейтип бәргәндә, сәвирчанлиқ билән зәң қоюп тиңшаң. Мәсилән, уларниң һәқиқәтни қандақ тонуғанлиғини сорисиңиз болиду.

15. Роһий йетилгән қериндашлар җамаәттики башқа қериндашларға қандақ ярдәм берәләйду?

 ¹⁵ Роһий җәһәттин йетилгән етиқатчилар, болупму ақсақаллар, җамаәт әзалириға көңүл бөлсә, пүткүл җамаәт роһий җәһәттин өсүп йетилиду. Аниси һәқиқәттә чоң қилған Мелисса мундақ дәйду: «Жиллар давамида маңа атамдәк ғәмхорлуқ қилип, көңүл бөлгән бурадәрләргә чәксиз миннәтдармән. Қачанла бири билән параңлишишқа муһтаҗ болғанда, кимгә беришни биләттим». Өзигә Муқәддәс китапни үгәткән бурадәр һәқиқәтни ташлап кәткәндә, Маурисио исимлиқ яш бурадәр өзини ташливетилгәндәк һис қилған. У мундақ дәйду: «Шу қийин вақитта ақсақаллар маңа көңүл бөлүп, көп ярдәм бәрди. Улар пат-пат мән билән муңдишатти, вәз хизмәткә биллә чиқатти, Муқәддәс китаптин тапқан қизиқ ойлири билән бөлүшәтти вә һәтта биллә спорт билән шуғуллинаттуқ». Һазир Мелисса вә Маурисио, һәр иккиси Бәйтәлдә толуқ вақитлиқ хизмәт қиливатиду.

16, 17. Башқиларға ярдәм бериш үчүн йәнә немиләрни қилалаймиз?

¹⁶ Әмәлий ярдәм бериң (Гал. 6:10). Өз аилисидин айрилип, жирақ бир мәмликәттә миссионер болуп хизмәт қиливатқан Лео шундақ дәйду: «Көпинчә вақитларда аддий бир иш-һәрикәт билән көңүл бөлүватқанлиғимизни көрситиләймиз. Бир күни мән қатнаш вақиәсигә учриған едим. Өйгә йетип кәлгәндә, көңлүм техи орниға чүшмигән еди. Бирақ бир әр-аял мени өйигә тамаққа тәклип қилди. Шу күни немә йегиним ядимда йоқ, амма уларниң сөзлиримни көңүл қоюп тиңшиғанлиғи техичә есимдә. Ахирида өзүмни яхширақ һис қилған едим».

¹⁷ Биз һәммимиз қериндашлар билән роһий иш-паалийәтләргә қатнишишни яхши көрүмиз. Җамаәт учришишлири вә районлуқ конгрессларға қатнишип, аңлиған нутуқлардин алған тәсиратлар һәққидә параңлишиш, бизгә зор хошаллиқ беғишлайду. Жуқурида тилға алған Карэл мундақ дәйду: «Мән конгрессларда өзүмни бәк ялғуз һис қилимән. Әтрапимда йүзлигән, һәтта миңлиған адәмләр болсиму, улар өз аилилири билән болғач, болупму шу вақитларда мән өзүмни техиму ялғуз һис қилимән». Башқилар өзиниң өмүрлүк һәмрасидин айрилип қалғандин кейин, тунҗа қетим конгрессқа ялғуз беришни қийин көргән. Шундақ қийинчилиғи бар бирсини тонамсиз? Кейинки қетим шундақ  адәмләрни аилиңиз билән бирликтә конгрессқа биллә беришқа тәклип қилиң.

18. Меһмандостлуқ көрсәткәндә, Коринтлиқларға 2-хәт 6:11—13айәтләрдин қандақ пайдилиналаймиз?

¹⁸ Биллә вақит өткүзүң. Охшимиған қериндашлар билән, болупму өзини ялғуз һис қилғанлар билән вақит өткүзүшкә тиришиң. Биз уларға бағримизни кәң ечишни халаймиз (Коринтлиқларға 2-хәт 6:11—13ни оқуң). Жуқурида тилға алған Мелисса мундақ дәйду: «Қериндашлар өз өйигә биллә вақит өткүзүшкә вә бирликтә сәяһәт қилишқа тәклип қилса, биз дайим хошал болимиз». Җамаитиңиздә кимгә меһмандостлуқни көрситәләйсиз?

19. Болупму қайси вақитларда қериндашлиримиз ярдәмгә муһтаҗ болиду?

¹⁹ Биз етиқатдашлар билән вақит өткүзсәк, уларни хошал қилалаймиз. Болупму, бәзи қериндашларға мәйрәмләр мәзгилләрдә гувачи әмәс уруқ-туққанлири билән биллә болуш бәк қийин болуши мүмкин. Башқилар болса, йеқин кишиси өлүп кәткән күни, бәк азаплинип, қийнилиши мүмкин. Шундақ қийинчилиқларни баштин өткүзиватқан қериндашларни вақит өткүзүшкә тәклип қилсақ, уларға болған ғәмхорлуғимизни көрситимиз (Флп. 2:20).

20. Мәтта 12:48—50 айәтләр бизгә қандақ илһам берәләйду?

²⁰ Бәзидә Худа хизмәтчилириниң өзлирини ялғуз һис қилишиға нурғун сәвәпләр болиду. Амма биз шуни унтумаслиғимиз керәкки, Йәһва шундақ һис-туйғулиримизни толуқ чүшиниду. У еһтияҗлиримизни көпинчә вақитларда қериндашлиримиз арқилиқ қанаәтләндүриду (Мәтта 12:48—50ни оқуң). Йәһваниң шундақ орунлаштуруши үчүн миннәтдарлиғимизни көрситип, қолумиздин кәлгиничә роһий аилимизни давамлиқ қоллап-қувәтләйли! Мәйли өзүмизни бәзидә қанчилик ялғуз һис қилайли, Йәһваниң һәрқачан йенимизда екәнлигини унтумайли!