1. Йәһва гувачилириниң қийинчилиқларға қаримай, давамлиқ Худаға ибадәт қилишиға немә ярдәм бериду?

 МУҚӘДДӘС КИТАП биз яшаватқан заманда интайин тәс вақитлар келидиғанлиғини ейтиду (Тим. 2-х. 3:1). Йәһва гувачилири бу дунияда һәрбир инсанниң бешиға келидиған қийинчилиқларға дуч келип қалмай, йәнә башқа қаршилиқлар вә зиянкәшликләргә учрайду. Бундақ қийинчилиқларға қаримай, Йәһва Худаға давамлиқ ибадәт қилишимизға немә ярдәм бериду? Буниң муһим бир йоли, Йәһва тирик Худа екәнлигини һәрдайим әстә тутуштур (Йәр. 10:10; Тим. 2-х. 1:12).

2. Немә үчүн Йәһвани тирик Худа дәймиз?

² Йәһва һәқиқий мәвҗут Шәхс. У биз дуч келиватқан барлиқ қийинчилиқларни көриду вә бизгә һәрдайим ярдәм қолини суниду (Тар. 2-яз. 16:9; Зәб. 23:4). Йәһваниң тирик Худа екәнлигини әстә тутсақ, барлиқ қийинчилиқларға бәрдашлиқ берәләймиз. Падиша Давут шундақ қилғанлиғи тоғрисидики мисални көрүп бақайли.

3. Давут падиша «Йәһва мәңгү тириктур» дегәндә, зади немә демәкчи болған?

³ Давут падиша Яратқучи Йәһвани тонуп, Униңға ишәнч бағлиған. Падиша Саул вә башқилар Давутни өлтүрүш үчүн қоғлап жүргәндә, Давут дуада Йәһвадин ярдәм сориған (Зәб. 18:6). Худа Давутниң дуасиға җавап берип, уни қутқузған еди. Шуңа, Давут Йәһвани мәдһийиләп мундақ дегән: «Йәһва мәңгү тириктур!» (Зәб. 18:46) Давут падиша немә демәкчи болған? У Йәһваниң Өз хизмәтчилиригә һәрдайим ярдәм қилидиған мәңгү тирик Худа екәнлигини тәкитлигән. Дәрһәқиқәт, Давут падиша өзи баштин өткүзгән ишлардин Йәһваниң тирик Худа яки һәқиқий мәвҗут Шәхс екәнлигини билгән вә у Йәһвани мәдһийиләп, Униңға хизмәт қилишқа қәтъий бәл бағлашқа ярдәм бәргән (Зәб. 18:28, 29, 49).

4. Йәһваниң тирик Худа екәнлигини әстә тутуш бизни қандақ бәрикәтләргә ериштүриду?

⁴ Йәһва тирик Худадур. Буниңға ишиниш Униңға қизғинлиқ  билән хизмәт қилишқа ярдәм бериду. Биз дуч келидиған синақларға бәрдашлиқ берәләймиз вә Худаға хизмәт қилиш үчүн бар күчимизни чиқиримиз. Йәнә Йәһва Худани дост тутушқа бәл бағлаймиз.

ТИРИК ХУДА СИЗНИ КҮЧЛӘНДҮРИДУ

5. Синақларға дуч кәлгәндә, Худаға ишәнч бағлашқа немә ярдәм бериду? (Филипиликләргә 4:13)

⁵ Йәһваниң тирик Худа вә бизгә һәрдайим ярдәм беридиғанлиғини әстә тутсақ, чоң-кичик барлиқ синақларға бәрдашлиқ берәләймиз. У һәрқандақ қийинчилиқларда бизгә ярдәм берәләйду. Униң қолидин кәлмәйдиған иш йоқтур, чүнки У Һәммигә Қадир Худадур (Филипиликләргә 4:13ни оқуң). Шуңлашқа, биз Яратқучимизға пүтүнләй ишәнч бағлалаймиз. Йәһваниң кичик синақларда бизгә ярдәм бәргәнлигини баштин өткүзгәндә, чоң синақларға бәрдашлиқ беришимизгиму ярдәм беридиғанлиғиға қәтъий ишәнч бағлалаймиз.

6. Давут яш чағлирида баштин өткүзгән қайси вақиәләр униң Худаға болған ишәнчисини күчәйткән?

⁶ Давут падиша баштин өткүзгән икки вақиә униң Йәһва Худаға болған ишәнчисини қандақ күчәйткәнлигини көрүп бақайли. Яш Давут падичилиқ қилип жүргәндә, бир қетим шир, йәнә бир қетим ейиқ дадисиниң падилиридин қойлирини елип кәткән еди. Һәрбир вәзийәттә Давут уларниң арқисидин қоғлап, қойларни еғизидин тартип қайтуруп кәлгән. Бирақ Давут буни өз күчигә тайинип қилғанлиғини ейтмиған. Әксичә, Давут Йәһваниң униңға күч бәргәнлигини чүшәнгән (Сам. 1-яз. 17:34—37). Давут баштин өткән ишларни әстин чиқармиған. У шулар һәққидә давамлиқ чоңқур ойлинип, келәчәктә Худа чоқум Өзигә яр-йөләк болидиғанлиғиға ишәнчиси күчәйгән.

7. Давут диққитини немигә қаратқан вә бу Ғолиятни йеңишиға қандақ ярдәм бәргән?

⁷ Бәлким, Давут исраиллар қошуниниң лагерини зиярәт қилғанда, у техи 20 яшларда болған. У Ғолият исимлиқ филистийәликләрниң палвани Исраил қошунини һақарәт қилғач, җәңчиләрниң бәк қорқуп кәткәнлигини көргән (Сам. 1-яз. 17:10, 11). Исраил җәңчиләр өз диққитини җәң мәйданида турған Ғолиятниң бойиниң егизлигигә вә һақарәтлиригә қаратқач, қорқуп кәткән еди (Сам. 1-яз. 17:24, 25). Амма Давут мошу вәзийәткә башқичә қариған. Давут Ғолиятниң Исраил қошунини һақарәтлигәндә, әслидә тирик Йәһвани һақарәтлигәнлигини билгән (Сам. 1-яз. 17:26). Давут Йәһва Худа тоғрилиқ ойланған. Қойларни беқип жүргәндә, Йәһва Давутқа ярдәм бәргән. Шуңа, Давут бу вәзийәттиму Худаниң өзигә ярдәм берәләйдиғанлиғиға ишәнч қилған. Йәһва Худаниң қоллап-қувәтлишигә ишәнгәч, Давут Ғолиятқа қарши җәңгә чиқип, уни йәңгән (Сам. 1-яз. 17:45—51).

8. Йәһва Худаниң бизгә ярдәм беридиғанлиғиға болған ишәнчимизни немә күчәйтәләйду? (Рәсимгиму қараң.)

⁸ Әгәр биз тирик Худа бизгә ярдәм беришкә тәйяр екәнлигини есимиздә тутсақ, бизму синақларға мувәппәқийәт билән тәқабил туралаймиз (Зәб. 118:6). Йәһва Худаниң өтмүштә қилған ишлири һәққидә чоңқур ойлансақ, Униң бизгә ярдәм берәләйдиғанлиғиға болған ишәнчимизни күчәйтәләймиз. Муқәддәс китаптин Йәһваниң Өз хизмәтчилирини қандақ қутқузғанлиғини оқуп көрүң (Йәшая 37:17, 33—37). Униңдин башқа, jw.org торбетидики хәвәрләрдин бүгүнки күндә Йәһваниң Өз хизмәтчилирини қандақ қоллап-қувәтләйдиғанлиғи һәққидә оқуп көрүң. Шундақла, Йәһва Худаниң һаятиңизда шәхсән сизгә қандақ ярдәм бәргәнлигини есиңизгә елиң. Һаятиңизда худди Давут ейиқ яки шир билән елишқандәк, кишини һаяҗанландуридиған ишни баштин өткүзмигән болсиңиз, бу һәргизму Йәһваниң сизгә ярдәм бәрмигәнлигини билдүрмәйду. Шәк-шүбһисизки, һаятиңизда Йәһваниң сиз үчүн қилған ишлири нурғун. Мәсилән, У сизни дости болушқа тәклип қилди (Йоһ. 6:44). Пәқәт Униң ярдими билән бүгүнки күнгичә һәқиқәт йолида давамлиқ  меңиватсиз. Шуңа, Йәһваниң дуалириңизға қандақ җавап бәргәнлиги, еһтияҗлириңизни өз вақтида қандақ тәминләп келиватқанлиғи яки қийинчилиқларға дуч кәлгәндә сизни қандақ қоллап-қувәтлигәнлигини есиңизгә селиши үчүн ярдәм сораң. Шу баштин өткүзгән ишлар һәққидә чоңқур ойлансиңиз, Йәһва Худаниң сизгә давамлиқ ярдәм беридиғанлиғиға болған ишәнчиңизни күчәйтиду.

9. Синақларға дуч кәлгинимиздә, немини әстә тутушимиз керәк? (Пәнд-нәсиһәтләр 27:11)

⁹ Йәһвани тирик Худа дәп қараш дуч кәлгән синақларға тоғра көзқарашта болушимизға ярдәм бериду. Биз синақларға дуч кәлгинимиздә, диққитимизни муһим мәсилигә қаратсақ, Йәһвани қоллап-қувәтләп, Шәйтанниң гуманиға җавап беримиз. Шәйтан бизни қийинчилиққа дуч кәлгәндә, чоқум Йәһва Худани ташлап кетиду дәп җар салиду (Аюп 1:10, 11; Пәнд-нәсиһәтләр 27:11ни оқуң). Бирақ синақларда Йәһва Худаға садақәтмәнлигимизни сақлап қалсақ, биз Йәһвани сөйидиғанлиғимизни көрситип, Шәйтанниң ялғанчи екәнлигини испатлаймиз. Бәлким, сиз һазир һөкүмәт тәрипидин қаршилиғиға, ихтисадий қийинчилиқларға, адәмләрниң хуш хәвәргә болған пәрвасизлиғиға яки башқа қийинчилиқларға дуч келиватқансиз. Әгәр шундақ болса, есиңиздә болсунки, дуч кәлгән вәзийәт Йәһва Худаниң көңлини хуш қилишиңиз үчүн пурсәт яритип бериду. Йәнә шуни әстин чиқармаңки, Худа сизниң бәрдашлиқ берәлмәйдиған синақларға дуч келишиңизгә йол қоймайду (Кор. 1-х. 10:13). У чоқум бәрдашлиқ беришиңиз үчүн сизгә күч-қувәт бериду.

ТИРИК ХУДА СИЗНИ МУКАПАТЛАЙДУ

10. Йәһва Худа Өзигә ибадәт қилғучилар үчүн немә қилиду?

¹⁰ Йәһва дайим Өзигә ибадәт қилғучиларни мукапатлайду (Ибр. 11:6). У бүгүнки күндә көңлүмизгә тинч-хатирҗәмлик берип қалмай, келәчәктә бизгә мәңгүлүк һаятни бериду. Биз Йәһваға үмүт бағлалаймизки, У бизни мукапатлашқа тәшна вә шундақ қилишқа қадир. Бизниң буниңға ишәнчимиз камил. Шуңа, Худаниң өтмүштә яшиған хизмәтчилиригә охшаш, бизму пүтүн күчимиз билән Униңға қизғин ибадәт қилимиз. Биринчи әсирдә яшиған Тимотийму шундақ қилған еди (Ибр. 6:10—12).

11. Җамаәттә Тимотийни пүтүн күчи билән җапалиқ хизмәт қилишқа немә дәвәт қилған? (Тимотийға 1-хәт 4:10)

 ¹¹ Тимотийға 1-хәт 4:10ни оқуң. Тимотий Худаниң чоқум өзини мукапатлайдиғанлиғиға күчлүк ишәнч бағлиған. Шуңлашқа, у пүтүн күчи билән Йәһва вә башқилар үчүн җапалиқ хизмәт қилған. У немә иш қилған? Әлчи Паул уни вәз хизмитидә вә җамаәттә тәлим бериш маһарәтлирини ашурушқа дәвәт қилған. Униңдин башқа, әлчи Паул уни һәм яшларға, һәм яшанғанларға яхши үлгә көрситишкә үндигән. Йәнә униңға бәзи қийин вәзипиләр тапшурулған, йәни нәсиһәт елишқа муһтаҗ болған етиқатчиларға наһайити кәскин, амма сөйгү-муһәббәт билән нәсиһәт бериш вәзиписи тапшурулған (Тим. 1-х. 4:11—16; Тим. 2-х. 4:1—5). Гәрчә башқилар Тимотийниң ишлирини көрмигән яки қәдирлимигән болсиму, у Йәһваниң чоқум өзини мукапатлайдиғанлиғиға ишинәлигән (Рим. 2:6, 7).

12. Немә үчүн җамаәттә ақсақаллар пүтүн күчи билән җапалиқ хизмәт қилиду? (Рәсимгиму қараң.)

¹² Бүгүнки күндә ақсақаллар өзлириниң яхши ишлирини Йәһва Худаниң көридиғанлиғиға вә қәдирләйдиғанлиғиға ишәнч қилалайду. Нурғун ақсақаллар қериндашларни илһамландуруш, тәлим бериш вә вәз қилиштәк вәзипиләрдин башқа йәнә қурулуш ишлириға қатнишиду вә тәбиий апәтләргә учриғанларға ярдәм бериду. Башқа ақсақаллар дохтурханилар билән алақилишиш комитетлирида хизмәт қилиду яки бемар етиқатдашларни йоқлайду. Бу хизмәтләрни қиливатқан ақсақаллар җамаәтниң мәлум бир инсанға әмәс, Йәһва Худаға тәвә екәнлигини билиду. Нәтиҗидә улар пүтүн җени билән өз вәзипилирини орунлайду вә өзлириниң қилған ишлирини Йәһва мукапатлайдиғанлиғиға пүтүнләй ишиниду (Кол. 3:23, 24).

13. Йәһва Униңға ибадәт қилиш үчүн көрсәткән тиришчанлиқлиримизға қандақ һис-туйғуда болиду?

¹³ Гәрчә җамаәттә һәммә адәм ақсақал болалмисиму, бирақ һәрбир киши қолидин келишичә Йәһваға хизмәт қилалайду. Яратқучимиз бизниң Униңға чин жүрәктин хизмәттә қилған ишлиримизни бәк қәдирләйду. Гәрчә өзүмиз халиғандәк көп ишларни қилиш қолумиздин  кәлмисиму, дунияниң һәрқайси җай-җайлирида елип бериливатқан вәз хизмити үчүн чин қәлбимиздин хошаллиқ билән бәргән азғина ианә пулимизни Худа интайин қәдирләйду. Уялчақ һис-туйғулирини йеңип, җамаәт жиғилишлирида җавап бериш үчүн қолумизни көтиришкә тиришқанлиғимизни вә бизни рәнҗитип қойған қериндашни кәчүридиғанлиғимизни көргәндә, Йәһва Худа интайин хошал болиду. Бәлким, өзүңиз халиған көп ишларни қилиш қолуңиздин кәлмәйдиғандәк һис қилидиғансиз, шундақтиму сиз қилалайдиған ишларни Йәһваниң наһайити қәдирләйдиғанлиғиға ишиниң. У сизни бәк яхши көриду вә чоқум мукапатлайду (Луқа 21:1—4).

ТИРИК ХУДА БИЛӘН БОЛҒАН ДОСТЛУҚНИ САҚЛАҢ

14. Йәһва Худа билән йеқин дост болуш садақәтмәнлигимизни сақлап қелишқа қандақ ярдәм бериду? (Рәсимгиму қараң.)

¹⁴ Әгәр Йәһва Худа билән болған достлуқ мунасивитимиз мустәһкәм болса, Униңға садақәтмәнлигимизни сақлап қелиш асанирақ болиду. Буни Йүсүпниң үлгисидин көрәләймиз. У Йәһваниң униңға интайин ғәмхорлуқ қилдиғанлиғини билгән вә Яратқучисиниң көңлини рәнҗитип қоюшни халимиған, шуңа, у һәрқандақ әхлақсиз иш қилишни рәт қилған (Ярит. 39:9). Йәһва Худа билән йеқин достлуқ мунасивәтни техиму мустәһкәмләш үчүн дуа қилиш вә Униң Сөзини тәтқиқ қилип оқуш үчүн вақит чиқиришимиз керәк. Шундақ қилсақ, Униң билән болған достлуғимиз барғансири күчийиду. Йәһва Худа билән йеқин дост болсақ, Йүсүпкә охшаш бизму Йәһваниң көңлини рәнҗитидиған ишларни қилиштин өзүмизни елип қачимиз (Яқуп 4:8).

15. Исраиллар чөл-баяванда жүргәндә, йүз бәргән ишлардин қандақ савақларни алсақ болиду? (Ибранийларға 3:12)

¹⁵ Йәһваниң тирик Худа екәнлигини унтуған киши Худаға садиқсиз қелиши мүмкин. Исраиллар чөл-баяванда жүргәндә немә болғанлиғини көрүп бақайли. Улар Йәһваниң мәвҗутлиғиға ишәнгән болсиму, лекин Худаниң уларниң еһтияҗлирини тәминләп беришидин гуманлинишқа башлиған. Улар һәтта: «Аримизда зади Йәһва барму яки йоқму?»,— дәп сориған (Чиқ. 17:2, 7). Нәтиҗидә улар Худаға қарши исиян  көтәргән. Биз әшу исраиллардин савақ елип, улардәк итаәтсизлик қилмайли (Ибранийларға 3:12ни оқуң).

16. Немә үчүн иман-етиқадимиз тәвринип қелиши мүмкин?

¹⁶ Бу рәзил дуния Йәһва Худаға садақәтмәнлигимизни сақлап яшишимизға көп тосқунлуқ қилиду. Нурғун кишиләр Худаниң мәвҗут екәнлигини етирап қилмайду. Адәттә Худаниң өлчәм-қаидилиригә сәл қариған кишиләр баяшат турмуш кәчүрүватқандәк көриниду. Бәлким буни көргинимиздә, иман-етиқадимиз тәвринип қалиду. Гәрчә Худаниң барлиғиға ишәнсәкму, Униң бизгә ярдәм беридиғанлиғидин гуманлинишқа башлишимиз мүмкин. Зәбур 73-бапни язған киши дәл шундақ һис қилған. У әтрапидики кишиләрниң Худаниң қанунлириға пәрва қилмай, һузур-һалавәтлик турмуш кәчүрүватқанлиғини көргән. Шуңа, у Худаға хизмәт қилишқа әрзийдиған-әрзимәйдиғанлиғини сорап, Униңдин гуманлинишқа башлиған (Зәб. 73:11—13).

17. Йәһва Худа билән техиму йеқин достлуқ мунасивәттә болушимизға немә ярдәм бериду?

¹⁷ Зәбур язғучисиниң өз көзқаришини өзгәртишкә немә ярдәм бәргән? У Йәһвани унтуп қалған кишиләрниң ақивети һәққидә чоңқур ойланған (Зәб. 73:18, 19, 27). Йәнә у Худаға хизмәт қилип, қандақ бәрикәтләргә еришидиғанлиғи һәққидә чоңқур ойланған (Зәб. 73:24). Бизму Йәһва Худаниң бизгә бәргән бәрикәтлири һәққидә ойлансақ болиду. Йәһваға хизмәт қилмиған болсақ, һаятимиз қандақ болидиғанлиғини тәсәввур қилип көрәйли. Йәһваға ибадәт қилишниң пайдисини унтумисақ, бу Униңға садақәтмәнликни сақлап қелишимизға ярдәм бериду. Униңдин башқа, бизму Зәбур язғучисиға охшаш мону сөзләрни дейәләймиз: «Маңа Яратқучимниң йенида болуш яхшилиқтур!» (Зәб. 73:28)

18. Немә үчүн келәчәккә ишәнч билән қаралаймиз?

¹⁸ Бу ахир заман вақитта, мәйли қандақ синақларға дуч келәйли, биз уларға бәрдашлиқ берәләймиз. Чүнки биз «тирик һәм һәқиқий Илаһниң [Худаниң] қуллири» (Сал. 1-х. 1:9). Худайимиз бизгә ғәмхорлуқ қилип һәрдайим ярдәм қилишқа тәйяр. У өтмүштә яшиған хизмәтчилиригә ғәмхорлуқ қилған вә бүгүнки күндиму давамлиқ биз билән биллидур. Пат йеқинда илгирики һечқачан көрүлүп бақмиған дәһшәтлик чоң балаю апәткә дуч келимиз. Бирақ биз һәргизму ялғуз болуп қалмаймиз, чүнки Йәһва биз билән биллә болиду (Йәшая 41:10). Шуңа һәммимиз җасарәткә толуп: «Йәһва — мениң Ярдәмчимдур, қорқмаймән»,— дәйли (Ибр. 13:5, 6).