23-ТӘТҚИҚ МАҚАЛИСИ
2-НАХША Тәшәккүр, Йәһва!
Йәһва бизни меһман болушқа тәклип қилиду
«Мениң чедирим уларниң арисида болиду вә Мән уларниң Рәбби болу[мән]» (ӘЗӘК. 37:27).
АСАСИЙ ОЙ-ПИКИР
Йәһва бизни чедирида меһман болушқа тәклип қилиду вә У саһибхан сүпитидә меһманлири болған бизгә ғәмхорлуқ қилиду. Буларни чүшинишимизгә бу мақалә ярдәм бериду.
1, 2. Йәһва Худа садиқ хизмәтчилирини қәйәргә тәклип қилиду?
ӘГӘР кимду бири: «Йәһва ким вә Униң билән қандақ мунасивитиңиз бар?»,— дәп сориса, бәлким: «Йәһва мениң Худайим, Атам вә Достум»,— дәп җавап беридиғансиз. Яки башқа нам-унван вә сүпәтләр билән Уни тәсвирләп беридиғансиз. Лекин Йәһвани меһмандост Саһибхан дәп қарамсиз?
2 Йәһва билән Униң садиқ хизмәтчилири арисидики мунасивәтни Давут падиша саһибхан билән униң меһманлири оттурисидики мунасивәт билән селиштурған. У: «Йәһва, ким Сениң чедириңда меһман болиду? Ким муқәддәс теғиңда маканлишип яшалайду?»,— дегән (Зәб. 15:1). Бу айәттин Йәһва Худаниң чедирида Униң меһманлири, йәни достлири болалайдиғанлиғимизни биләләймиз. Худаниң меһмини болуш биз үчүн нәқәдәр зор шан-шәрәп, һә?!
ЙӘҺВА УНИҢ МЕҺМАНЛИРИ БОЛУШИМИЗНИ ХАЛАЙДУ
3. Йәһваниң биринчи меһмини ким вә уларниң арисида қандақ мунасивәт болған?
3 Һәммә нәрсиләр яритилиштин бурун Йәһва Худа ялғуз болған. Мәлум бир пәйттә Йәһва Худа тунҗа Оғлини яритип, саһибхан сүпитидә бу оғлини Өз чедириға меһман болушқа тәклип қилған. Йәһва буниңдин интайин хошал болған. Муқәддәс китап Оғулниң Йәһва Худаниң көңлини сөйүндүргәнлигини ашкарә қилиду. Униң биринчи меһмини болса, һәрдайим Йәһваниң һузурида шатлинатти (Пәнд н. 8:30).
4. Йәһва йәнә кимләрни чедирида меһман болушқа тәклип қилған?
4 Кейин Йәһва башқа пәриштиләрни яратқан вә уларниму меһман болушқа чақирған. Муқәддәс китапта пәриштиләр «Худаниң оғуллири» дәп йезилған вә улар Яратқучи Йәһва билән биллә болғинида шат-хорам болғанлиғи тәсвирләнгән (Аюп 38:7; Дан. 7:10). Интайин узақ бир мәзгил, Йәһва Худаниң достлири пәқәт асманда яшаватқан Худаниң оғуллири аталған пәриштиләр еди. Кейинирәк, Худа инсанларни яратқан вә уларму Униң меһманлири болалиған. Вақит өтүп, Худаниң меһманлири арисида Һанух, Нуһ, Ибраһим вә Аюп қатарлиқ пәйғәмбәрләр болған. Бу садиқ хизмәтчиләр Худаниң достлири дәп аталған. Чүнки улар Йәһва Худаға бойсунған (Ярит. 5:24; 6:9; Аюп 29:4; Йәшая 41:8).
5. Әзәкиял 37:26, 27-айәтләрдики пәйғәмбәрлик сөзләрдин немиләрни биләләймиз?
5 Әсирләр бойи Йәһва давамлиқ Өз достлирини меһман болушқа тәклип қилип кәлмәктә (Әзәкиял 37:26, 27ни оқуң). Мәсилән, Әзәкиял пәйғәмбәрниң бәшарәтлик сөзлиридин көргинимиздәк, Йәһва Худа һәқиқәтән Өз садиқ хизмәтчилири билән йеқин мунасивәттә болушни халайду. Худа шундақ вәдә беридуки, улар билән течлиқ келишимини түзиду. Бу пәйғәмбәрлик сөз асманда яшаш үмүти барлар вә йәрдә яшаш үмүти барлар «бир пада» болуп бирлишип, Худаниң чедирида меһман болидиған бир вақитни көрситиду (Йоһ. 10:16). Бу пәйғәмбәрлик сөз дәл һазирниң өзидиму әмәлгә ешиватиду.
ХУДА БИЗГӘ ҒӘМХОРЛУҚ ҚИЛИДУ
6. Киши Йәһва Худаниң чедирида қандақ меһман болиду вә Униң чедири қәйәрдә җайлашқан?
6 Қедимий заманда чедир дәм елиш, боран-чапқун яки ямғурдин пана тепиш үчүн ишлитилгән. Униңдин башқа, чедирда меһман болған киши саһибханниң ғәмхорлуқ қилишини күткән болатти. Биз Йәһва Худаға өз һаятимизни беғишлиғанда, көчмә мәнада Униң чедириға меһман болушқа кирдуқ (Зәб. 61:4). Йәһваниң чедирида иманимизни күчәйтидиған мол роһий озуқлуқ бар вә башқилар билән бирликтә Униң меһманлири болуп, өз ара достлуқ мунасивәтни орниталаймиз. Дунияниң җай-җайлиридики кишиләр Йәһваниң чедирида Униң меһманлири болалайду. Бәлким, сиз мәхсус конгрессқа қатнишиш үчүн башқа дөләткә барғанда, чоқум Йәһва Худаниң чедирида шат-хорамлиққа чөмгән башқа меһманларни учраттиңиз. Мәйли қәйәрдә яшимайли, Йәһва Худаға садиқ хизмәт қилсақ, Униң меһманлири болалаймиз (Вәһ. 21:3).
7. Немә үчүн өлүп кәткән садиқ хизмәтчиләрни бүгүнки күнгә қәдәр Йәһваниң чедирида меһман боливатиду дәп ейтсақ болиду? (Рәсимгиму қараң.)
7 Ундақта өлүп кәткән садиқ хизмәтчиләрчу? Улар бүгүнки күнгә қәдәр Йәһва Худаниң чедирида меһман болуватамду? Әлвәттә, шундақ десәк болиду! Немә үчүн? Чүнки улар Йәһваниң хатирисидә тириктур. Буни Һәзрити Әйса мундақ чүшәндүргән: «Өлгәнләрниң тирилдүрүлүшини Мусаму тикәнлик чатқал тоғрисида ейтиветип, Йәһвани “Ибраһимниң Худаси, Исһақниң Худаси вә Яқупниң Худаси” дәп көрсәтти. У өлүкләрниң Худаси әмәс, бәлки тирикләрниң Худасидур, чүнки Униң үчүн уларниң барлиғи тириктур» (Луқа 20:37, 38).
Һәтта өлүп кәткән садиқ кишиләрни Худаниң чедирида меһман боливатиду дәп қарашқа болиду (7-абзацқа қараң)
БӘРИКӘТЛИРИМИЗ ВӘ ВӘЗИПИЛИРИМИЗ
8. Йәһваниң чедирида меһман болғанлар қандақ бәрикәтләргә еришиду?
8 Удул мәнадики чедирда кишиләр боран-чапқун яки ямғурдин пана издәйду яки дәм алиду. Худди шуниңдәк, Йәһваниң символлуқ чедири Униң меһманлири үчүн панагаһ болуп, уларниң Яратқучиси билән болған мунасивәтлиригә зиян йәткүзидиған һәрқандақ ишлардин вә үмүтсизликләрдин һимайә қилип қоғдайду. Йәһва Худа билән болған достлуғимизни күчәйтсәк, Шәйтан бизгә әбәдий давам қилидиған зиянкәшликни қилалмайду (Зәб. 31:23; Йоһ. 1-х. 3:8). Йәһва йеңи дунияда Өз садиқ достлирини роһий җәһәттин зиян йәткүзидиған нәрсиләрдин қоғдапла қоймай, өлүмдинму қутқузиду (Вәһ. 21:4).
9. Йәһва Өз меһманлириниң немә қилишини халайду?
9 Йәһва Худаниң чедирида меһмини болуш вә Униң билән мәңгү достлуқ мунасивәттә болуш биз үчүн зор шан-шәрәп! Ундақта давамлиқ Йәһва Худаниң меһмини болушни халисақ, немиләрни қилишимиз керәк? Әгәр кимду бири сизни меһманға чақирса, немә қилип саһибханниң көңлини хуш қилалайдиғанлиғиңизни билишни халайсиз. Мәсилән, меһманға барғанда, өй егиси аяқлиримизни селиветип өйгә киришкә тәклип қилиду вә биз шундақ қилимиз. Худди шуниңға охшаш, Йәһваниң чедирида меһман болушни халайдиғанлар өзлиридин немә қилиш тәләп қилинидиғанлиғини билишни халаймиз. Йәһва Худаға болған сөйгү-муһәббәт бизни Уни хурсән қилиш үчүн бар күчимизни чиқиришқа дәвәт қилиду (Кол. 1:10). Әгәр Йәһвани достумиз дәп қарисақ, Уни һөрмитимизгә лайиқ Худайимиз вә Атимиз екәнлигини етирап қилимиз (Зәб. 25:14). Биз буни һечқачан унтумаслиғимиз керәк вә Униңға чоңқур һөрмәт көрситишимиз лазим. Әгәр шундақ қилсақ, Яратқучимизниң көңлини рәнҗитидиған напак иш-һәрикәтләрдин сақлинимиз вә һәрдайим кәмтәрлик билән Худайимиз билән жүрүшни халаймиз (Мика 6:8).
ЙӘҺВА БАРЧӘ ИСРАИЛЛАРНИ ТӘҢ КӨРГӘН
10, 11. Синай чөлидә Йәһва Худа исраилларға қандақ муамилә қилған?
10 Йәһва Өз меһманлирини тәң көриду (Рим. 2:11). Синай чөлидә Худаниң Исраил хәлқигә қилған муамилисидин Униң һәммини тәң көридиған Худа екәнлигини биләләймиз.
11 Йәһва Өз хәлқини Мисирдики қуллуқтин азат қилғандин кейин У муқәддәс чедирида хизмәт қилиш үчүн роһанийларни тәйинлигән. Лавийлар болса шу муқәддәс чедириға мунасивәтлик башқа вәзипиләрни орунлаш үчүн тәйинләнгән еди. Муқәддәс чедирда хизмәт қилғанлар яки униң йенида яшиғанлар башқа адәмләргә қариғанда Йәһва Худаниң ғәмхорлуғини көпирәк һис қилғанму? Яқ! Йәһва Худа һәммини тәң көриду.
12. Синай чөлидә Йәһва исраилларниң һәммисини тәң көргәнлигини қәйәрдин билимиз? (Чиқиш 40:38) (Рәсимгиму қараң.)
12 Мәйли исраиллар қәйәрдә яшиған болсун, қандақ вәзипиләрни орунлиған болсун, чедирда хизмәт қилған яки қилмиған болсун, һәммисиниң Йәһва Худа билән достлуқ мунасивәттә болуп, шат-хорамлиққа еришиш пурсити болған еди. Мәсилән, пүтүн хәлиқ муқәддәс чедирниң үстидә күндүзи булут вә кечиси от түвриги турғанлиғини көрәлигән (Чиқиш 40:38ни оқуң). Булут йөткилишкә башлиғанда, һәтта муқәддәс чедирдин жирақта җайлашқан исраилларму булутниң һәрикәт қилғанлиғини көрүп, өз мал-мүлки вә чедирини жиғип, пүтүн хәлиқ билән бирликтә йолға чиқатти (Сан. 9:15—23). Һәммә исраиллар йолға чиқиш үчүн бәлгү беридиған икки күмүч канайниң җараңлиқ авазини аңлиған (Сан. 10:2). Ениқки, бир кишиниң муқәддәс чедирға йеқин йәргә җайлишиши һәргизму Йәһва Худа билән йеқинирақ мунасивәттә болғанлиғини билдүрмигән. Барчә Исраил хәлқи охшаш Йәһва Худаниң меһмини болалиған вә Униң йол-йоруғиға, һимайисигә еришкән. Худди шуниңдәк, бүгүнки күндә йәр йүзиниң қәйеридә яшишимиздин қәтъийнәзәр, меһир-шәпқәтлик Яратқучимиз Йәһва бизгә ғәмхорлуқ қилиду вә қоғдайду.
Худаниң муқәддәс чедирға мунасивәтлик орунлаштуруши Униң һәммини тәң көридиғанлиғини әкс әттүриду (12-абзацқа қараң)
БҮГҮНКИ КҮНДӘ ЙӘҺВА ХУДА ҺӘММИНИ ТӘҢ КӨРИДУ
13. Бүгүнки күндә Йәһва Худа һәммә инсанларни тәң көридиғанлиғини қандақ көрситиду?
13 Бүгүнки күндә Йәһва Худаниң хизмәтчилири арисида бәзиләр Йәһва гувачилириниң Баш идарисигә яки йәрлик Бәйтәлгә йеқин яшайду. Йәнә башқилар шу җайларда хизмәт қилиду. Нәтиҗидә, улар шу йәрләрдики иш-паалийәтләргә қатнишалайду вә йетәкчиликни өз үстигә алған бурадәрләр билән дайим барди-кәлди қилип туралайду. Йәнә башқилар болса районға җавапкар ақсақаллар болуп хизмәт қилиду яки башқа түрдики мәхсус толуқ вақитлиқ хизмәт қилиду. Бирақ көпинчә қериндашларға охшаш, һазирчә сиздә шундақ вәзипиләрни қилиш пурситиңиз яки шараитиңиз болмисиму, охшашла Йәһва Худаниң чедирида Униң қәдирлик меһмини болғанлиғиңизға вә У сизни сөйидиғанлиғиға ишәнчиңиз камил болсун. У чедирида меһман болған һәрбир кишини сөйиду вә шәхсән көңүл бөлүп, барлиқ еһтияҗлиқ нәрсилирини тәминләп бериду (Пет. 1-х. 5:7). Худаниң барлиқ хизмәтчилири роһий озуқлуқ, йол-йоруқ вә Униң һимайисигә еришиду.
14. Йәһва Худаниң һәммә инсанларни тәң көридиғанлиғиниң йәнә бир мисали немә?
14 Йәһва Худаниң һәммә инсанларни тәң көридиғанлиғиниң йәнә бир мисали — У дунияниң җай-җайлиридики кишиләрни өз ана тилида Муқәддәс китап оқуш имканийитигә ериштүрмәктә. Муқәддәс китап әслидә ибраний, арамий вә грек қатарлиқ тилларда йезилған. Бирақ, бу һәргизму Муқәддәс китапни шу тилларда оқуйдиған адәмләр Йәһва Худа билән техиму йеқинирақ мунасивәттә болидиғанлиғини билдүрмәйду (Мәт. 11:25).
15. Худаниң һәммини тәң көридиғанлиғини немә испатлайду? (Рәсимгиму қараң.)
15 Йәһваниң биздин хурсән болуши мәктәпләрдә қанчилик жуқури билим алған яки Муқәддәс китапниң әсли текстни оқулалайдиғанлиғимизға бағлиқ әмәс. Йәһва Худа Өз даналиғини пәқәт жуқури билим алғанларға әмәс, дунияниң һәрқайси җайлирида яшайдиған кишиләргә бериду. Униң Сөзи болған Муқәддәс китап аллиқачан нәччә миң тилға тәрҗимә қилинған еди. Шуңа, һәрбир киши дунияниң қәйеридә яшимисун, Муқәддәс китаптин пайдилиналайду вә Йәһва Худа билән дост болушни үгинәләйду (Тим. 2-х. 3:16, 17).
Муқәддәс китапниң миңлиған тилларға тәрҗимә қилинғанлиғи Йәһваниң һәммә инсанларни тәң көридиған Худа екәнлигини қандақ көрситиду? (15-абзацқа қараң)
ЙӘҺВА ХУДАНИҢ ЧЕДИРИДА ДАВАМЛИҚ МЕҺМАН БОЛУҢ
16. Әлчиләр 10:34, 35-айәтләргә асасланғанда, давамлиқ Йәһваниң меһмини болуп қелиш үчүн немә қилалаймиз?
16 Йәһваниң символлуқ мәнадики чедирида меһман болуш биз үчүн чоң шан-шәрәп! У әң меһрибан, сөйгү-муһәббити чәксиз вә меһмандост саһибханидур. Буниңдин ташқири, У яшиған җай, мәдәнийәт, билим сәвийә, ирқ, қабилийәт, яш вә җинсий җәһәттин пәриқлиқ болушимизға қаримайду, әксичә һәммимизни тәң көрүп қобул қилиду. Амма Йәһва Худа пәқәт Униң өлчәмлири бойичә яшайдиған кишиләрни Өз меһмини сүпитидә қобул қилиду (Әлчиләр 10:34, 35ни оқуң).
17. Йәһва Худаниң меһмини болуши тоғрисидики қошумчә мәлуматни нәдин тапсақ болиду?
17 Зәбур 15:1-айәттә йезилғандәк, Давут мундақ соалларни сориған: «Йәһва, ким Сениң чедириңда меһман болиду? Ким муқәддәс теғиңда маканлишип яшалайду?» Кейинки мақалидә Йәһва бизни қобул қилиши үчүн Униң қайси бәзи өлчәмлиригә мувапиқ болушимиз керәклигини көрүп чиқимиз.
27-НАХША Йәһва тәрәптә туруңлар
