1. Адәм ата вә Һава ана немидин айрилди вә униң ақивети немә болди?

 НЕМӘ яхши, немә яман екәнлигиниң өлчимини ким бәлгүлиши керәк? Адәм ата билән Һава ана яхши билән яманни тонутидиған дәрәқниң мевисини йегәндә, Йәһвани вә Униң өлчәмлирини һөрмәтлимигәнлигини ениқ көрсәтти. Улар неминиң яман, неминиң яхши екәнлигини өзлири қарар қилишни халиған (Ярит. 3:22). Бирақ улар немидин айрилғанлиғини ойлап көрүңа. Улар Йәһва Худа билән болған достлуғидин вә мәңгү яшаш пурситидин айрилған. Адәм ата вә Һава ана әвлатлириға гуна билән өлүмни қалдурди (Рим. 5:12). Уларниң қарари қайғу-һәсрәт елип кәлди.

2, 3. a) Филип униңға вәз қилғанда, эфиопиялик әмәлдар немә қилған? ә) Чөмдүрүлүштин өткәнләр қандақ бәрикәтләргә еришиду вә биз қайси соалларни көрүп чиқимиз?

² Филип эфиопиялик әмәлдарға вәз қилғанда, у Адәм ата вә Һава аниға тамамән охшимайдиған башқичә һәрикәт қилған. Әмәлдар Йәһва Худа билән Әйсаниң униңға қилған барчә яхшилиғи үчүн миннәтдар болғанлиқтин, дәрһал чөмдүрүлүштин өтти (Әлч. 8:34—38). Һаятимизни Худаға беғишлап, шу әмәлдарға охшаш чөмдүрүлгәндә, бизму Йәһва билән Әйсаға һәммә яхшилиғи үчүн миннәтдар екәнлигимизни көрситимиз. Шундақла Йәһва Худаға тайинидиғанлиғимизни көрситимиз вә неминиң яхши, неминиң яман екәнлигигә пәқәт Униң өлчәм бәлгүлиши керәклигини етирап қилимиз.

³ Йәһваға хизмәт қилиштин келидиған бәрикәтләр һәққидә ойлап көрүң. Биринчидин, Адәм ата билән Һава ана айрилған нәрсиләрниң һәммисигә еришәләймиз, мәсилән мәңгү һаят кәчүрәләймиз. Биз Әйса Мәсиһкә ишәнгәнликтин, Худа гуналиримизни кәчүрүп, пак вижданға егә болимиз (Мәт. 20:28; Әлч. 10:43). Буниңдин башқа, биз Йәһваниң хизмәтчилириниң дуниявий чоң аилисиниң әзаси болимиз һәм бизни гөзәл келәчәк күтиду (Йоһ. 10:14—16;  Рим. 8:20, 21). Бу бәрикәтләр һәммигә мәлум болсиму, бәзи адәмләр эфиопиялик кишидәк җасур һәрикәт қилалмайду. Уларға чөмдүрүлүштин өтүшкә немә тосалғулуқ қилиду? Шу тосалғуларни қандақ йеңишкә болиду?

4, 5. Эйвери вә Ханна исимлиқ яшлар қандақ қийинчилиқларға дуч кәлгән?

⁴ Өз-өзигә ишәнмәслик. Эйвери исимлиқ жигитниң ата-аниси — Йәһва гувачилири. Униң дадиси — көйүмчан аилә беши һәм җамаәттә вәзипилирини яхши орунлайдиған ақсақал. Лекин Эйвери чөмдүрүлүштин өтүштин қорқиду. Немә сәвәптин? У мундақ дәйду: «Мән дадамдәк яхши болалмай, униң үзини йәргә қаритиштин қорқаттим». Шуниң билән яш бурадиримиз келәчәктә берилидиған вәзипиләрни орунлаш қолидин кәлмәйду дәп ойлиған. У йәнә: «Маңа көпчилик алдида дуа қилиш, нутуқ ейтиш яки вәзлик учришишни өткүзүшни тапшурамду дәп әнсирәттим»,— дегән.

⁵ 18 яшлиқ Ханна өз-өзигә һәргиз ишәнмигән. У Йәһваға хизмәт қилидиған аилидә чоң болсиму, Йәһваниң өлчәмлири бойичә һаят кәчүрәләйдиғанлиғиға гуманланған. Чүнки Ханна өзи тоғрилиқ төвән пикирдә болған. Бәзидә у өзини шунчилик яман һис қилғанки, һәтта өз-өзини әтәй яриландурған. Бирақ буниңдин өзини техиму начар һис қилған. У мундақ дәйду: «Мән бу қилиғим һәққидә һечкимгә ейтмидим, һәтта ата-анамму һечнәрсә билмәтти. Өзүмни зәхимләндүргәнлигим үчүн, Йәһва Униң хизмәтчиси болушумни халимайду дәп ойлидим».

6. Чөмдүрүлүш мәрасимидин өтүш Ванесса үчүн немишкә қийин болған?

⁶ Достларниң тәсири. 22 яшлиқ Ванесса шундақ дегән: «Кичигимдин билидиған бир достум бар еди. Мән униң билән он жилдәк дост болған едим». Амма дости Ванессаниң чөмдүрүлүштин өтүш мәхситигә қарши болған. Бу Ванессаға еғир тәккән. У мундақ дәйду: «Маңа бирси билән дост болуш бәкму қийин. Әгәр достумдин айрилип қалсам, һәргизму башқа дост тапалмаймән дәп әнсирәттим».

7. Макайла дегән қиз немидин қорққан вә немә үчүн?

⁷ Гуна қилип қоюштин қорқуш. Акиси җамаәттин чиқирилғанда, Макайла бәш яшта еди. У акисиниң қилғанлири ата-анисиниң көңлини қанчилик ағритидиғанлиғини һәрдайим көргән. «Чөмдүрүлүштин өткәндин кейин хаталиқ өткүзүп қойсам, җамаәттин чиқирилип, ата-анамниң дәрдигә йәнә бир дәрт қошимән дәп қорқтум»,— дәйду Макайла.

8. Майлс немидин қорққан?

 ⁸ Қаршилиқтин қорқуш. Майлс исимлиқ жигитниң ата-аниси аҗришип кәткән. Атиси билән өгәй аниси Йәһваға хизмәт қилиду, бирақ өз аниси Гувачи әмәс. Майлс мундақ чүшәндүриду: «Мән апам билән 18 жил турдум. Униңға чөмдүрүлмәкчи болғинимни ейтишқа петиналмидим. Сәвәви дадам һәқиқәтни тонуғанда, апамниң қарши болғанлиғини көрдүм. Шуңа Йәһва гувачиси болимән десәм, у маңиму қарши чиқишидин қорққан едим».

9. Йәһваниң чидамлиғи билән меһир-муһәббити тоғрилиқ билиш сизни немә қилишқа үндиши мүмкин?

⁹ Адәм ата билән Һава ана Йәһваға болған чоңқур меһир-муһәббитини риваҗландурмиған, шуңа Униңға хизмәт қилмаслиқни қарар қилди. Шундақ болсиму, Йәһва уларға балилиқ болуп, балилирини өз өлчәмлири бойичә тәрбийә бериши үчүн йетәрлик вақит яшишиға йол қойған. Адәм ата билән Һава ана чиқарған қарарниң ақиветидин уларниң ахмақлиғи ениқ көрүнди. Уларниң тунҗа оғли Қабил әйипсиз иниси Һабилни өлтүрүвәткән еди. Вақит өтүп пүтүн инсанийәтни зораванлиқ вә шәхсийәтчилик чирмавалди (Ярит. 4:8; 6:11—13). Буниңға қаримастин, Йәһва Өзигә хизмәт қилғуси келидиған адәмләрни қутулдуруш үчүн йол ачқан (Йоһ. 6:38—40, 57, 58). Йәһва Худаниң чидамлиғи билән меһир-муһәббити тоғрилиқ көпирәк билгәнсири, Уни техиму көп яхши көридиған болисиз. Бәлким, шу чағда Адәм ата билән Һава ана таллиған йол билән маңмай, әксичә һаятиңизни Йәһваға беғишлиғиңиз келидиғанду.

10. Зәбур 19:7дики сөзләр һәққидә ойлиниш Йәһваға хизмәт қилишимизға қандақ ярдәм берәләйду?

¹⁰ Йәһва Худа тоғрилиқ давамлиқ билим елиң. Йәһвани йеқинирақ тонуп билгәнсири, Униңға хизмәт қилиш қолуңиздин келидиғанлиғиға ишәнчлик болисиз. Жуқурида тилға елинған Эйвери мундақ дегән: «Зәбур 19:7дә (оқуң) йезилған вәдини оқуп вә у тоғрилиқ чоңқур ойлинип, өз-өзүмгә ишинидиған болдум». Йәһва вәдисини қандақ орунлиғанлиғини көргәндә, Эйвериниң Худаға болған меһир-муһәббити техиму  күчәйди. Меһир-муһәббәт бизни өзүмизгә ишәнчлик қилипла қоймай, әң авал Йәһва вә Униң ирадиси тоғрилиқ ойлашқа ярдәм бериду. Ханна болса мундақ дәйду: «Муқәддәс китапни оқуп, издәнгәндә бир нәрсини чүшәндим. Мән өзүмни яриландурғанда, Йәһваниңму жүригини ярилаймән» (Пет. 1-х. 5:7). Ханна билгәнлирини әмәлийәттә қоллинип, Худа Сөзиниң «орунлиғучиси» болди (Яқуп 1:22). Буниң нәтиҗиси қандақ болди? У мундақ дәйду: «Йәһваға итаәт қилишниң пайдисини көргәндә, Уни техиму көп яхши көрүшкә башлидим. Униң ярдимигә муһтаҗ болғанда, У маңа чоқум яр-йөләк болидиғанлиғиға ишәнчим камил». Ханна өзини зәхимләндүрүш адитини ташлиған. У һаятини Йәһваға беғишлап, чөмдүрүлүш мәрасимидин өтти.

11. Ванесса яхши достларни тепиш үчүн немә қилди вә биз униңдин қандақ үлгә алсақ болиду?

¹¹ Яхши достларни таллаң. Ванессаниң дости униң Йәһваға хизмәт қилишиға тосалғу болған. Буни чүшәнгәндә, у дости билән мунасивитини үзди. Буниң билән чәклинип қалмай, йәнә у җамаәттә достларни тепиш үчүн күч чиқарған. Униңға Нуһ вә униң аилисиниң үлгиси ярдәм бәргән. «Бу аилә Йәһвани яхши көрмигән адәмләрниң арисида яшиған. Лекин улар бир-бири билән йеқин арилашқан»,— дәйду Ванесса. У чөмдүрүлгәндин кейин, пионер болуп хизмәт қилишни башлиди. Бу униңға пәқәт өзиниң җамаитидә әмәс, башқиму җамаәтләрдин яхши достларни тепишқа ярдәм бәрди. Сизму Йәһва тапшурған ишқа мүмкинқәдәр көпирәк қатнашсиңиз, яхши достларни тапалайсиз (Мәт. 24:14).

12. Адәм ата билән Һава анида қандақ қорқунуч болмиған вә буниң ақивети қандақ болған?

¹² Худадин қорқушни үгиниң. Қорқунучниң бәзи түрлири биз үчүн пайдилиқ болуши мүмкин. Мәсилән, биз Худани рәнҗитиштин қорқушимиз керәк (Зәб. 111:10). Әгәр Адәм ата билән Һава анида шундақ қорқунуч болған болса, улар Йәһвадин үз өрмәтти. Бирақ улар Йәһваға қарши чиққан. Кейин көзлири ечилип, улар өзлириниң гунакар екәнлигини чүшәнгән. Әнди улар балилириға пәқәт гуна вә өлүмни қалдуралатти.  Адәм ата билән Һава ана қандақ әһвалға чүшкәнлигини чүшәнгәндә, ялиңач екәнлигидин уйилип, өзлирини әнҗир йопурмиғи билән йепивалған (Ярит. 3:7, 21).

13, 14. a) Петрусниң 1-хети 3:21гә асасән, немә үчүн өлүмдин қорқмаслиғимиз керәк? ә) Йәһвани яхши көрүшкә қандақ сәвәпләр бар?

¹³ Әлвәттә, биз Йәһвани рәнҗитиштин қорқушимиз керәк, лекин өлүмдин қорқушниң һаҗити йоқ. Йәһва бизниң мәңгү яшишимизға мүмкинчилик бәргән. Гуна қилип қойсақ, амма чин жүрәктин товва қилсақ, Йәһва бизни кәчүрүшкә тәйяр. У бизни Оғлиниң төләм қурбанлиғиға болған етиқадимизниң асасида кәчүриду. Етиқадимизни көрситишниң әң яхши йоли — Худаға өзүмизни беғишлап, чөмдүрүлүштин өтүш (Петрусниң 1-хети 3:21ни оқуң).

¹⁴ Биздә Йәһвани яхши көрүшкә көп сәвәпләр бар. Мәсилән, биз һәр күни хошал болушимиз үчүн, У бизгә әҗайип нәрсиләрни соға қилди. Буниңдин башқа, У бизгә Өзи вә Өз мәхсәтлири тоғрилиқ һәқиқәтни үгитиду (Йоһ. 8:31, 32). Бизгә йол-йоруқ көрситиш вә яр-йөләк болуш үчүн, У җамаәтни тәшкил қилди. Худа һазирниң өзидә жүклиримизни көтәрмәктә вә келәчәктә мукәммәл болуп, мәңгү һаятқа еришиш үмүтини бериду (Зәб. 68:19; Вәһ. 21:3, 4). Йәһва бизгә қилған һәммә яхшилиғи һәққидә ойлиғанда, биз Уни техиму яхши көрүмиз. Йәһваға болған меһир-муһәббәт Уни чоңқур һөрмәтләшкә вә Униң жүригини ағритидиған һәрқандақ иштин нери турушқа дәвәт қилиду.

15. Макайла гуна қилип қоюш қорқунучидин қандақ қутулған?

¹⁵ Макайла Йәһваниң кәчүрүмчан екәнлигини чүшәнгәндә, гуна қилип қоюштин қорқмайдиған болди. У мундақ чүшәндүриду: «Һәммимиз камилсиз, әйипсиз адәм йоқ. Шундақ болсиму, Йәһва бизни сөйиду. У бизни төләм қурбанлиғиниң асасида кәчүридиғанлиғини чүшәндим». Макайланиң меһир-муһәббити уни һаятини Йәһваға беғишлап, чөмдүрүлүштин өтүшкә дәвәт қилған.

16. Майлсқа анисиниң қарши турушидин қорқушини йеңишкә немә ярдәм бәргән?

¹⁶ Чөмдүрүлүш мәрасимидин өтүшигә аниси қарши чиқиду дәп қорққан Майлс наһийилик назарәтчидин мәслиһәт сориған. «Униңму аписи Йәһва гувачиси әмәс екән. У дадамниң мәҗбурлиши билән әмәс, өз ихтиярим билән чөмдүрүлүштин өткүм келидиғанлиғини апамға қандақ чүшәндүрүшкә болидиғанлиғи тоғрилиқ ойлинишқа ярдәм бәрди»,— дәп бөлүшти Майлс. Аниси униң чөмдүрүлүштин өтүш қарарини яқтурмиди. Ахирида Майлсқа өйдин кетишкә тоғра кәлди. Бирақ у қараридин қайтмиди. У мундақ дәйду: «Йәһваниң мән үчүн қилған һәммә яхшилиғини билгәндә, жүригим миннәтдарлиққа толди. Әйсаниң төләм қурбанлиғи тоғрилиқ  ойланғанда, Йәһваниң мени қанчилик яхши көридиғанлиғиға көзүм йәтти. Шуниң үчүн һаятимни Йәһваға беғишлап, чөмдүрүлүштин өтүшни қарар қилдим».

17. Һәммимиз немини испатлалаймиз?

¹⁷ Ерәм беғидики дәрәқниң мевисини йегәндә, Һава ана асмандики Атисидин үз өрүп, Униңға қарши чиққан. Адәм атиму униңға қошулуп, Йәһваниң һәммә яхшилиғиниң қәдригә йәтмәй, миннәтдарлиғи йоқ екәнлигини ипадилигән. Һәрбиримиз Адәм ата билән Һава аниға охшимайдиғанлиғимизни испатлалаймиз. Биз Йәһваға һәммә ишлири үчүн миннәтдар. Чөмдүрүлүш мәрасимидин өткәндә, биз пәқәт Йәһваниң немә яхши, немә яман екәнлигигә өлчәм бәлгүләйдиған һоқуқи барлиғини етирап қилғанлиғимизни көрситимиз. Шуниң билән, Атимизни яхши көрүп, Униңға ишинидиғанлиғимизни испатлаймиз.

18. Йәһваға хизмәт қилишта утуқлуқ болуш үчүн немә қилалайсиз?

¹⁸ Биз чөмдүрүлүштин өткәндин кейинму өзүмизниң әмәс, Йәһваниң өлчәмлири бойичә яшашни давамлаштуримиз. Миллионлиған адәмләр бүгүнки күндә шундақ яшаватиду. Худаниң Сөзи Муқәддәс китапни чүшинишкә тиришсиңиз, қериндашлар билән дайим арилашсиңиз вә көйүмчан Атиңиз Йәһва һәққидә башқиларға ейтсиңиз, сизму уларниң қатариға қошулуп, бәхитлик һаят кәчүрәләйсиз (Ибр. 10:24, 25). Қарарларни чиқарғанда Йәһва Худаниң сизгә Муқәддәс китап вә тәшкилат арқилиқ беридиған мәслиһәтлиригә қулақ селиң (Йәшая 30:21). Шу чағда һәммә ишиңизда утуқлуқ болисиз! (Пәнд н. 16:3, 20).

19. Немини тонуп йетиш керәк вә немә үчүн?

¹⁹ Йәһваниң йол-йоруғи бойичә һаят кәчүрүшниң өзүңизгә қанчилик пайдилиқ екәнлигини тонуп йәтсиңиз, Униңға вә Униң өлчәмлиригә болған меһир-муһәббитиңиз техиму ашиду. Шу чағда Шәйтан Йәһваға хизмәт қилмаслиғиңиз үчүн мәйли немә қилсун, қолидин һечнәрсә кәлмәйду. Миң жилдин кейинки һаятиңизни тәсәввур қилип көрүң. Шу чағда сиз чөмдүрүлүштин өткәнлигиңиз һаятиңиздики әң яхши қарар болғанлиғини чүшинип, бәкму хошал болисиз!