Джек вә Мари-Лин бирликтә 1988-жилдин тартип толуқ вақитлиқ хизмәт қилип кәлмәктә. Улар һәрхил йеңи вәзийәтләргә тез көнүп кетиду. Улар Гваделупа билән Француз Гвианасида түрлүк вәзипиләрни орунлиған. Һазир Франция филиали бу икки җайларға көрсәтмиләрни йәткүзиду. Келиңлар, әнди Джек вә Мари-Линға бирнәччә соал қояйли.

Силәрни толуқ вақитлиқ хизмәтни башлашқа немә дәвәт қилди?

Мари-Лин: Мениң балилиқ чеғим Гваделупада өткән. Апам билән пат-пат әтидин кәч киргичә вәз қилаттуқ. Апам қизғин вәз ейтқучи болған. Мән адәмләрни яхши көргәнликтин, 1985-жили мәктәпни пүтүргәндин кейин, пионерлиқ хизмәтни башлидим.

Джек: Кичик чеғимда мән вәз хизмәт десә җан беридиған толуқ вақитлиқ вәз ейтқучилар билән арилишаттим. Тәтил вақтида ярдәмчи пионер болуп хизмәт қилип тураттим. Дәм елиш күнлири автобус билән пионерлар вәз қилидиған районға бараттуқ. Биз күн бойи вәз қилип, ахшими деңиз бойиға берип дәм алаттуқ. У күнләр шунчә хошал күнләр өткән еди!

1988-жили Мари-Линға өйләнгәндин кейин, мән өз-өзүмгә: «Бизниң һечбир бағлинип қалған мәсъулийитимиз йоқ, шуңа көпирәк вәз қилишимиз керәк»,— дәп ейттим. Мән Мари-Линға қошулуп, пионер болуп хизмәт қилишини башлидим. Бир жилдин кейин биз пионерлар мәктивини пүтүрүп, мәхсус пионер болуп тәйинләндуқ. Дәсләптә биз Гваделупаниң бирнәччә йеридә хизмәт қилдуқ вә кейинирәк Француз Гвианасиға әвәтилдуқ.

Жиллар давамида силәр түрлүк җайларға әвәтилдиңлар. Йеңи вәзийәткә үгинишиңларға немә ярдәм бәргән?

Мари-Лин: Француз Гвианасидики Бәйтәлдә хизмәт қилған бурадәрләр әң яхши көридиған айитимиз Йәшая 6:8 екәнлигини билгән. Шуңа, улар бизгә телефон қилғанда, чақ-чақ қилип: «Әң яхши көридиған айитиңлар есиңлардиму?»— дәп соратти. Биз хизмитимизниң пат йеқинда өзгиридиғанлиғини чүшинип: «Мана биз, әвәт бизни!»— дәп җавап берәттуқ.

Биз йеңи вәзипимизни илгирики вәзипиләр билән селиштурмаслиққа тиришимиз вә бу бизгә йеңи вәзипимизни қәдирләшкә ярдәм бериду.  Шундақла биз йеңи җамаәттики қериндашлар билән йеқин тонушушқа күч чиқиримиз.

Джек: Илгири бәзи достлиримиз кетишимизни халимай, яхши нийәт билән бизни уларниң қешида қелишқа көндүрмәкчи болған. Лекин бир бурадәр биз Гваделупадин кетиватқанда Әйсаниң Мәтта 13:38дики: «Етиз — бу дуния» дегән сөзлирини есимизгә салди. Шуңа, хизмитимиз өзгәргәндә, мәйли қәйәрдә хизмәт қилайли, охшаш «етизда» әмгәк қиливатқанлиғимизни есимизгә салаттуқ. Чүнки әң муһими биз ярдәм беридиған адәмләр, қәйәрдә хизмәт қилғанлиғимиз әмәс.

Йеңи йәргә көчүп барғанда, йәрлик адәмләрниң бәхитлик яшаватқанлиғини көримиз. Шуңа, бизму уларға охшаш яшашқа тиришимиз. Гәрчә шу йәрдики тамақлар биз үгәнгәндин башқа болсиму, саламәтлигимизгә қарап, йәрликләр немә йесә, шуни йәймиз вә немини ичсә, шуни ичимиз. Биз һәммә вәзипилиримиз тоғрилиқ яхши нәрсиләрни ейтишқа тиришимиз.

Мари-Лин: Биз йәрлик қериндашлардин көп нәрсиләрни үгинимиз. Француз Гвианасиға кәлгән чеғимиз техичә есимдә. Шу күни ямғур худди челәкләп қуйғандәк яққан еди. Шуңа, биз ямғур тохтимиғичә күтүп туримиз дәп ойлиған едуқ. Лекин бир қериндаш маңа: «Барайлиму?»— деди. Мән һаң-таң қелип, униңдин: «Қандақ баримиз?»— дәп соридим. У җававән: «Күнлүгиңизни елиң, биз велосипед билән баримиз»— деди. Шундақ қилип, мән бир қолумда күнлүкни тутуп, иккинчи қолум билән велосипед һайдашни үгәндим. Үгәнмигән болсам, ямғур пәслидә вәз қилалмиған болаттим.

Силәр он бәш қетимдәк көчтиңлар. Көчүмән дәп ойлаватқанларға қандақ нәсиһәт берәттиңлар?

Мари-Лин: Бир йәрдин башқа йәргә көчүш оңай әмәс. Шуңа, әң муһими йеңи җайда вәз хизмәттин қайтип кәлгәндә, «өз өйүмниң хушлиғи пут қолумниң бошлиғи» дәп һис қилғудәк җайни тепиш.

Джек: Адәттә мән йеңи өйгә киргәндә уни сирлаймән. Бәзидә Бәйтәлдики бурадәрләр бизниң бир йәрдә узақ турмайдиғанлиғимизни билгәчкә, маңа: «Джек, бу қетим тамларни сирлимисаңму болиду»,— дәтти.

Мари-Лин нәрсиләрни қачилап орашқа уста. У һәммини коробкиларға селип, уларға «һаҗәтхана», «ятақхана» яки «ашхана» дәп йезип қоятти. Шуңа, биз йеңи өйгә кәлгәндә қайси коробкини қайси бөлмигә елип киришни биләттуқ. У һәрбир  коробкиниң тешиға немә барлиғини йезип қойғанлиқтин, керәк нәрсиләрни чапсан тепивалалаттуқ.

Мари-Лин: Һәммисини яхши орунлаштурушқа көнүп кәткәчкә, биз дәрру вәз хизмитигә киришәләттуқ.

Хизмитиңизни «толуқ мөлчәрдә атқуруш» үчүн ишлириңизни қандақ орунлаштурисиз? (Тим. 2-х. 4:5).

Мари-Лин: Дүшәнбә күни биз дәм елип, җамаәт учришишлириға тәйярлиқ қилимиз. Сешәнбидин йәкшәнбигичә вәз қилимиз.

Джек: Һәр айда бәлгүлүк саат вәз қилишимиз керәк болсиму, биз үчүн бу әң муһим әмәс. Биз үчүн һаятимизда һәммидин әң муһими — вәз қилиш. Өйдин чиқип қайтип кәлгичә учратқан һәммә адәмләргә хуш хәвәрни ейтишқа тиришимиз.

Мари-Лин: Дәм елиш үчүн тәбиәттин һузурлинишқа чиққандиму, һәрқачан өзүм билән варақчиларни алимән. Биз Йәһва гувачилири екәнлигимизни ейтмисақму, бәзи адәмләр йенимизға келип әдәбиятларни сорайду. Шуниң үчүн қандақ кийиниш вә өзүмизни қандақ тутушта бәк еһтиятчан болимиз. Адәмләр шундақ нәрсиләрниму байқайду.

Джек: Шундақла биз үлгилик жүрүш-турушимиз биләнму хошнилиримизға гувалиқ беримиз. Мән өйүмизниң алдидики әхләтләрни вә йопурмақларни жиғип қоюмән. Хошнилиримиз буни байқайду вә бәзидә мениңдин: «Сиздә мән үчүн Муқәддәс китап барму?»— дәп сорайду.

Силәр һемишәм жирақ җайлашқан йәрләрдә вәз қилдиңлар. Есиңиздә қалған алаһидә бир вақиәни ейтип берәмсиз?

Джек: Гайанадики бәзи җайларға бериш интайин қийин болған. Бәзидә бир һәптиниң ичидә 600 километрдәк йол меңишимизға тоғра кәлгән. Амазон җаңгалидики Сент-Эли дегән йәргә барғинимиз есимдин чиқмайду. Шу йәргә йетиш үчүн бирнәччә саат һәрқандақ йолда маңалайдиған машинида маңдуқ вә кейин қейиқта үздуқ. Йәрлик турғунларниң көпинчиси алтун издәш билән алдираш еди. Уларниң бәзилири әдәбиятлиримиз үчүн миннәтдарлиғини билдүрүп, ианә сүпитидә тапқан алтунларни берәтти. Ахшими биз тәшкилатимиз чиқарған видеоларни көрситәттуқ. Уларни көрүш үчүн көп адәмләр келәтти.

Мари-Лин: Бирнәччә жил бурун Джекни Камопи йезисида өткүзүлгән Хатириләш мәрасимида нутуқ ейтишни сориған. Шу йезиға йетиш үчүн Ояпок дәриясида қейиқ билән төрт саат үздуқ. Бу унтулмас бир вақиә болған.

Джек: Дәрияниң көпинчә җайлири бәк тейиз болуп, суниң еқими бәк тез вә ташларниң үстидин йеқин өткәчкә, бәк хәтәрлик еди. Бәзидә қейиқниң ташларға соқулуп кетидиғандәк тез кетиватқанлиғини өз көзүңиз билән көрүш кишини бәкму һаяҗанландуратти. Қейиқчи өзиниң немә қиливатқанлиғини яхши биләтти. Лекин бу сәяһәтни биз растинла яқтуруп қалдуқ. Хатириләш мәрасимида пәқәт 6 Йәһва гувачиси болсиму, униңға җәми 50 адәмдәк, шуниң ичидә бәзи америкилиқ индианлар, қатнашти!

Мари-Лин: Йәһва Худаға көпирәк хизмәт қилишни халайдиған яшлар буниңға охшаш вақиәләрни баштин кәчүрәләйду. Шундақ вақитларда сиз Йәһваға пүтүнләй тайинип, етиқадиңиз күчийиду.

Силәр бирнәччә тилларни билисиләр. Уларни үгиниш оңай болдиму?

Джек: Яқ, оңай болмиди. Мән бу тилларни вәз қилиш вә қериндашларға ярдәм бериш үчүн үгәндим. Бир қетим сранан-тонго a тилида техи Муқәддәс китапни оқуш тапшуруғи билән чиқмисамму, Күзитиш мунарини тәтқиқ қилишни өткүзүшүмгә тоғра кәлгән. Мән бир бурадәрдин учришишни қандақ өткүзгәнлигимни соридим. У маңа: «Бәзи сөзләр чүшиниксиз болсиму, амма яхши болди»,— дәп җавап бәрди. Балилар маңа чоң ярдәм берәтти. Чүнки мән сөзләрни хата дегәндә, чоңлар һечнемә демәтти, лекин балилар хаталиғимни түзитәтти. Мән балилардин көп нәрсиләрни үгәндим.

Мари-Лин: Бир районда француз, португал вә сранан-тонго тиллирида сөзләйдиған адәмләргә Муқәддәс китапни үгинишни өткүзәттим. Шу чағда бир қериндаш үгинишни мән үчүн әң қийин тил, португал тилидин башлап, ахирида яхши сөзләйдиған тилда өткүзүшкә мәслиһәт бәргән. Дәсләптә мән бу мәслиһәтниң мәнасини чүшәнмигән едим.

 Бир күни мән авал сранан-тонго вә кейин португал тилида үгинишни өткүздүм. Иккинчи қетим үгинишни башлиғанда, қешимдики қериндаш маңа: «Мари-Лин, мениңчә у сизни чүшәнмәйватиду»,— деди. Мән бразилиялиқ аялға португал тилиниң орниға сранан-тонго тилида сөзләптимән! Әнди шу қериндашниң мәслиһити қанчилик дана екәнлигини чүшәндим.

Силәр билән хизмәтдаш болған қериндашлар силәрни бәк яхши көриду. Улар билән достлишишқа немә ярдәм бәргән?

Джек: Пәнд-нәсиһәтләр 11:25тә: «Ронақ тапар мәртләр»,— дәп йезилған. Башқилар билән вақит өткүзүш вә уларға ярдәм бериш үчүн өзүмизни айиматтуқ. Бәзиләр маңа Ибадәт өйини яхши һаләттә тутуш тоғрилиқ: «Бу ишни вәз ейтқучилар қилсун»,— дәтти. Бирақ мән: «Мәнму вәз ейтқучиғу. Бу ишни қилиш керәк болса, мәнму қатнишишни халаймән»,— дәп җавап бәрдим. Әлвәттә, бәзидә өзүмизни ялғуз қалдурушни халаймиз, бирақ бу башқиларға ярдәм беришимизгә тосалғу болмаслиғи керәк дәп агаһландураттуқ.

Мари-Лин: Биз қериндашларға чин жүрәктин қизиқиш көрситишкә тиришимиз. Шундақ қилип бәзи қериндашларниң балилириға қарап туруш яки уларни мәктәптин елип келишкә ярдәм керәклигини биливалимиз. Шу чағда биз уларға ярдәм бериш үчүн планлиримизни өзгәртәләймиз. Қериндашларға ярдәм беришкә тәйяр болғачқа, улар билән җан дост болуп кәттуқ.

Вәз ейтқучиларға муһтаҗ болған йәрләрдә хизмәт қилип, қандақ бәрикәтләргә ериштиңлар?

Джек: Толуқ вақитлиқ хизмәт қилғанлиғимиз бизни нурғун бәрикәтләргә ериштүрди. Биз пат-пат тәбиәттин һузурлинип, Йәһваниң әҗайип яратмилирини көрүш мүмкинчилигигә егә болдуқ. Қийинчилиқларға дуч кәлсәкму, жүригимиз хатирҗәм, чүнки қәйәрдә болмайли, Йәһва Худаниң хәлқи бизни қоллап-қувәтләйдиғанлиғини билимиз.

Яш чеғимда мән армиягә бармиғанлиғим үчүн Француз Гвианасидики түрмигә ташландим. Күнләрниң бир күнидә шу йәргә миссионер болуп келишим вә түрмидә олтарғанларға хуш хәвәрни ейтидиғанлиғим ухлисам чүшимгә кирмигән еди. Дәрһәқиқәт, Йәһва Худа бизни мол бәрикәтлиди!

Мари-Лин: Башқиларға ярдәм бериш маңа көп хошаллиқ елип келиду. Йәһва Худаға хизмәт қилиш бизни бәхитлик қилиду. Шундақла Джек иккимиз бир-биримизгә техиму йеқин болуп кәттуқ. Бәзидә йолдишим тәсәллигә муһтаҗ бир әр-аялни өйүмизгә чақирайли дегәндә, мән униңға: «Мәнму шундақ ойлавататтим»,— дәймән. Иккимизниң ой-хиялимиз пат-пат бир йәрдин чиқиду.

Джек: Йеқинда маңа мәзи бези раки дәп диагноз қоюлди. Гәрчә аялим буни аңлашни халимисиму, мән униңға мундақ дәймән: «Җеним, әгәр әтә өлүп қалсам, һеч өкүнмәймән. Чүнки узун өмүр сүрмисәмму, мән роһий, әрзийдиған ишлар билән шуғулланғачқа, һаятимға шүкүр-қанаәт қилимән» (Ярит. 25:8).

Мари-Лин: Йәһва Худа бизгә һәтта һечқачан ойлимиған вәзипиләрни тапшурди. Һаятимиз көп яхши ишлар билән толған. Йәһва Худаниң бизгә ярдәм беридиғанлиғиға пүтүнләй ишинип, Йәһваниң тәшкилати һәрқандақ җайға әвәтсә, биз беришқа тәйяр.