«Һәқиқәтни сетивал, уни һәргиз сетивәтмә»
«Һәқиқәтни сетивал вә һечқачан уни сатма. Шундақла даналиқни, тәлиматни һәм әқил-парасәтликни сетивал» (ПӘНД-НӘСИҺӘТЛӘР 23:23).
НАХШИЛАР: 37, 29
1, 2. а) Һаятиңизда әң қиммәтлик нәрсә немә? ә) Биз қандақ һәқиқәтләрни қәдирләймиз вә немә үчүн? (Мақалиниң бешидики рәсимләргә қараң.)
ҺАЯТИҢИЗДА әң қиммәтлик нәрсә немә? Йәһваниң хизмәтчилири болғачқа, биз үчүн әң қиммәтлик нәрсә — Униң билән болған мунасивәт. Бу мунасивәтни биз һечнемигә тегишмәймиз. Шуниң билән, һәқиқәт Йәһва билән дост болушқа пурсәт яритиду, шуңа биз уни қәдирләймиз (Колосилиқларға 1:9, 10).
2 Йәһва Худа — бизниң Улуқ Устазимиз. У Муқәддәс китап арқилиқ бизгә әҗайип һәқиқәтләрни үгитиду. Худа Өз исминиң муһимлиғини чүшәндүрүп, Өзиниң әҗайип есил-пәзиләтлирини ечип бәргән. Йәһва адәмзатни шу қәдәр сөйгәнки, Өзиниң сөйүмлүк Оғлини биз үчүн қурбан қилған. Йәнә У Өз Падишалиғи тоғрисида һәқиқәтниму ейтип бәргән. Шундақла келәчәктә майланған мәсиһийләргә асманда яшаш һәм «башқа қойларға» йәр йүзидики җәннәттә мәңгү яшаш үмүтини әта қилған (Йоһан 10:16). Йәһва бизгә қандақ һаят кәчүрүш керәклигини үгитиду. Бу һәқиқәтләр биз үчүн бебаһа ғәзнә, чүнки улар Яратқучимизға йеқинлишишқа вә мәналиқ һаят кәчүрүшимизгә ярдәм бериду.
3. Йәһва һәқиқәтни үгәткәнлиги үчүн биздин пул сорамду?
3 Йәһва — сехий Худадур. У һәтта биз үчүн Өзиниң сөйүмлүк Оғлини қурбан қилған. Йәһва кимду-бирсиниң һәқиқәтни издәватқанлиғини көргәндә, уни тепишиға ярдәм бериду. Худа һәқиқәтни үгәткәнлиги үчүн биздин һечқачан пул соримайду. Бир күни Симун исимлиқ киши әлчи Петрусқа пул бәрмәкчи болуп, униңдин башқиларниң бешиға қолини қоюп, муқәддәс роһни бериш қабилийитини сетивалмақчи болған. Бирақ Петрус уни әйипләп: «Күмүчиң өзүң билән һалак болсун, чүнки сән Худаниң соғисини пулға сетивелишни ойлаштурдиң»,— дәп ейтқан (Әлчиләр 8:18—20). Ундақта, «һәқиқәтни сетивелиш» дегән немини билдүриду?
«ҺӘҚИҚӘТНИ СЕТИВЕЛИШ» ДЕГӘН НЕМИНИ БИЛДҮРИДУ?
4. Бу мақалидә һәқиқәт тоғрисида немини үгинимиз?
4 Пәнд-нәсиһәтләр 23:23ни оқуң. Муқәддәс китаптики һәқиқәтни үгиниш үчүн күч чиқириш керәк. Буниң үчүн биз бәзи нәрсиләрдин ваз кечишимиз лазим. Биз һәқиқәтни билгәндә, уни «сетивалдуқ» дәп ейтишқа болиду. Әнди қәтъий пәхәс болуп, һәргизму уни «сетивәтмәслигимиз», йәни һәқиқәтни ташлап кәтмәслигимиз керәк. Қандақ қилип Муқәддәс китаптики һәқиқәтни «сетивалимиз»? Униң баһаси қанчә? Мошу соалларниң җаваплири бизгә һәқиқәтни техиму қәдирләшкә вә уни һечқачан ташлимаслиққа ярдәм бериду. Шундақла һәқиқәтниң һаяттики әң қиммәтлик нәрсә екәнлигини чүшинимиз.
5, 6. а) Һәқиқәтни қандақларчә һәқсиз сетивалалаймиз? Чүшәндүрүп бериң. ә) Һәқиқәтниң бизгә қандақ пайдиси бар?
5 Бирәр нәрсигә һәқсиз еришмәкчи болсиңизму, буниң үчүн күч чиқириш керәк. Пәнд-нәсиһәтләр 23:23тики «сетивелиш» дегән ибраний сөз «еришиш» дегән мәнаға егә. Бу иккила сөз адәмниң өзи үчүн қиммәтлик дәп һесаплайдиған нәрсигә егә болуш үчүн күч чиқириш яки бир нәрсидин ваз кечиш керәклигини билдүриду. Һәқиқәтни қандақ сетивелишқа болидиғанлиғини чүшиниш үчүн, бир дуканда бананларни һәқсиз бериватқанлиғини тәсәввур қилиң. Бу бананлар дәстиханда өзидин-өзи пәйда болиду дәп күтүшкә боламду? Әлвәттә, яқ. Биз өзүмиз дуканға берип, уларни елип келишимиз керәк. Гәрчә бу бананлар һәқсиз болсиму, уларға еришиш үчүн күч чиқиришқа тоғра келиду. Дәл шуниңға охшаш, һәқиқәтни билиш үчүн бизгә пулниң кериги йоқ, бирақ униңға еришиш үчүн, чоқум күч чиқиришимиз керәк.
6 Йәшая 55:1—3ни оқуң. Бу айәтләр «һәқиқәтни сетивелиш» дегән сөзләрниң мәнасини чүшинишкә ярдәм бериду. Йәһва һәқиқәт сөзини су, сүт вә шарап билән селиштурған. Соғ су адәмниң уссузлуғини қандурғандәк, Худаниң Сөзидики һәқиқәт бизни роһландуриду. Сүт бовақниң өсүп-йетилишигә күч бәргәндәк, Муқәддәс китаптики һәқиқәт бизниң Йәһва билән болған мунасивитимизни күчәйтиду. Шундақла Йәһва һәқиқәтни шарап билән селиштурған. Немә үчүн? Сәвәви Муқәддәс китапта шарап адәмниң көңлини хуш қилидиғанлиғи ейтилған (Зәбур 104:15). Демәк, Йәһва бизгә «шарап сетивелиңлар» дегәндә, Униң көрсәтмилиригә қулақ салсақ, бәхитлик болидиғанлиғимизни ейтқан (Зәбур 19:8). Йәһва бу селиштурмилар арқилиқ һәқиқәтни билишимиз вә уни һаятимизда қоллинишимизниң пайдисини чүшинишимизгә ярдәм бәргән. Һәқиқәтни «сетивелиш» үчүн қандақ бәш нәрсидин ваз кечишимиз керәклигини муһакимә қилайли.
ҺӘҚИҚӘТНИ СЕТИВЕЛИШ ҮЧҮН НЕМИДИН БАШ ТАРТИШ КЕРӘК?
7, 8. а) Һәқиқәтни билишкә немә үчүн вақит чиқириш керәк? ә) Бир аял һаятида қандақ өзгиришләрни қилған вә буниң нәтиҗиси қандақ болған?
7 Вақит. Һәқиқәтни сетивалмақчи болған һәрбир адәм вақит чиқириши керәк. Падишалиқ һәққидики хуш хәвәрни тиңшаш, Муқәддәс китапни вә униңға асасланған әдәбиятларни оқуш, Йәһва гувачилири билән Муқәддәс китапни үгиниш, җамаәт учришишлириға тәйярлиниш вә уларға қатнишиш — һәммиси вақит тәләп қилиду. Буларниң һәммисигә вақит тепиш үчүн анчә муһим әмәс ишлардин баш тартишқа тоғра келиду (Әфәсликләргә 5:15, 16ни оқуң). Муқәддәс китапниң асасий тәлимлирини үгиниш үчүн қанчә вақит керәк? Бу адәмниң өзигә бағлиқ. Йәһваниң даналиғи, йоллири вә һәрикәтлири һәққидики билим чәксиз (Римлиқларға 11:33). «Күзитиш мунариниң» дәсләпки санида һәқиқәт «кичик назук гүл» билән селиштурулған. Бу журналда: «Пәқәт бир һәқиқәт гүлини тепиш йетәрлик әмәс. Әгәр бири йетәрлик болса, башқа гүлләр болматти. Шуңа, бизму бирла һәқиқәт билән қанаәтләнмәй, дайим издәп, көпирәк топлайли»,— дәп йезилған. Шуниң үчүн «Йәһвани қанчилик яхши тонуп билдим?» дәп ойлинип көрәйли. Биз һәтта мәңгү яшисақму, Йәһва тоғрилиқ билим һечқачан түгимәйду. Бүгүнки күндә болса, һәммә вақтимизни пайдилинип, Йәһва тоғрилиқ мүмкинқәдәр көпирәк билим елишимиз муһим. Шундақ қилған бир қериндашниң мисалини көрүп чиқайли.
Һәммә вақтимизни пайдилинип, Йәһва тоғрилиқ мүмкинқәдәр көпирәк билим елишимиз муһим
8 Марико a (изаһәткә қараң) исимлиқ япониялик бир яш аял оқушқа чүшүш үчүн Қошма штатлардики Нью-Йорк шәһиригә көчүп барған. Бир күни бир пионер қериндаш униң өйигә келип, хуш хәвәр билән бөлүшкән. Марикониң өз дини болсиму, у Муқәддәс китапни үгинишкә башлиған. Үгиниватқан нәрсилири униңға бәк яққанлиқтин, қериндишимизниң һәптисигә икки қетим келишини сориған. Гәрчә Марико оқуши вә иши билән бәнт болсиму, вақит тепип, җамаәт учришишлириға барған. У һәқиқәт тоғрилиқ көпирәк билиш үчүн оюн-тамашигә азирақ вақит бөлүшкә башлиған. Шундақ өзгиришләрни қилишниң арқисида Марико Йәһваға йеқинлишип, бир жил өтмәй, чөмдүрүлүш мәрасимидин өткән. Кейин йерим жил өтүп, 2006-жили пионерлиқ хизмәтни башлап, та һазирғичә хизмитини давамлаштуриватиду.
9, 10. а) Һәқиқәтни билгәндә, мал-дунияға болған көзқаришимиз қандақ өзгириду? ә) Бир яш аял немидин ваз кечип, һазир у бу қарари һәққидә немә ойлайду?
9 Мал-дуния. Һәқиқәтни билиш үчүн мааши жуқури иштин ваз кечишкә тоғра келиши мүмкин. Мәсилән, Әйса белиқчи болған Петрус билән Әндәрни униң шагирти болушқа чақирғанда, улар ишини ташлап, Әйсаниң кәйнидин маңған (Мәтта 4:18—20). Әлвәттә, бу һәқиқәтни билиш үчүн иштин чиқип кетиш керәк дегәнни билдүрмәйду. Бир адәм өзини вә аилисини тәминләш үчүн ишлиши керәк (Тимотийға 1-хәт 5:8). Амма һәқиқәтни тонуп билгәндин кейин, мал-дунияға болған көзқаришимиз өзгириду. Чүнки биз һаятта неминиң әң муһим екәнлигини чүшәндуқ. Әйса: «Өзүңларға йәрдә ғәзнә топлашни тохтитиңлар... Әксичә, ғәзнини асманда топлаңлар»,— дегән (Мәтта 6:19, 20). Мария исимлиқ яш аял Әйсаниң бу сөзлиригә қулақ салған.
10 Мария кичик чеғидин башлап гольф ойнашни яхши көргән. Чоң синипларда оқуватқанда, у гольфни техиму яхши ойнашни башлиған. Мария бу оюнни бәкму яхши ойниғачқа, уни университетқа һәқсиз оқушқа чақирған еди. Марияниң һаятидики мәхсити кәспий гольфчи болуп, көп пул тепиш болған. Кейин у Муқәддәс китапни үгинишни башлап, алған билимләрни бәкму яхши көргәч, уларни һаятида қоллинишқа һәрикәт қилған. У мундақ дегән: «Мән Муқәддәс китап бойичә һаят кәчүрүшкә тиришқансири, өзүмниң бәкму бәхитлик екәнлигимни һис қилдим». Мария спортқа вә роһий ишларға бирдәк көңүл бөләлмәйдиғанлиғини чүшәнгән (Мәтта 6:24). Шуңа, у өз мәхсәтлиридин ваз кечип, униңдинму яхширақ мәхсәтни қойған еди. Һазир Мария пионер болуп хизмәт қиливатиду. У: «Мән әң хошал вә мәналиқ һаят кәчүриватимән»,— дәйду.
11. Һәқиқәтни билишимиз башқилар билән болған мунасивитимизгә қандақ тәсир қилиши мүмкин?
11 Башқилар билән болған мунасивәт. Биз Муқәддәс китаптин үгәнгәнлиримизни әмәлийәттә қоллинишқа башлиғанда, туққанлиримиз вә достлиримиз билән болған мунасивәттә өзгириш болуши мүмкин. Әйса буниң сәвәвини чүшәндүрүп, әгәшкүчилири һәққидә дуа қилғанда мундақ дегән: «Уларни һәқиқитиң билән муқәддәслигинә. Сениң сөзүң һәқиқәттур» (Йоһан 17:17). «Муқәддәсләш» дегән сөз «айрип қоюш» дегәнниму билдүрүши мүмкин. Биз һәқиқәткә мас һаят кәчүрүшни башлиғанда, мошу дунияға мәнсүп болмаймиз. Чүнки биз Муқәддәс китапта йезилған нәрсиләрни орунлаймиз. Биз достлиримиз вә туққанлиримиз билән яхши мунасивәтни сақлашқа тиришсақму, уларниң бизгә болған көзқариши өзгириши мүмкин. Бәзилири һәтта бизгә қарши чиқиду. Бирақ биз буниңға һәйран қалмаймиз, чүнки Әйса: «Адәмниң өйидикилири униң дүшмәнлири болиду»,— дегән (Мәтта 10:36). Лекин һәқиқәт үчүн мәйли немидин ваз кечәйли, униң орниға техиму көп бәрикәтләргә еришимиз (Марк 10:28—30ни оқуң).
12. Аарон исимлиқ киши һәқиқәт үчүн немә қилған?
12 Аарон исимлиқ йәһудий киши Худани исми билән аташқа болмайду дәп ишәнгән. Бирақ у Худа һәққидә билим алғуси кәлгән. Бир күни Йәһва гувачилириниң бири Худаниң исми ибраний тилида үзүк тавушлар билән йезилидиғанлиғи вә уларни созуқ тавушлар билән қошуп тәләппуз қилғанда, «Йәһва» дәп ейтишқа болидиғанлиғини Ааронға чүшәндүрүп бәргән. Буни билгәндә Аарон хошаллиғидин йәһудийларниң ибадәтханисиға берип, диний устазларға Худаниң исми тоғрилиқ һәқиқәтни ейтқанда, улар хошал болиду дәп ойлиған. Бирақ улар Ааронниң үзигә түкүрүп, уни ибадәтханидин қоғлап чиқарған. Ааронниң аилисиму униңға қарши чиққан. Амма у қаршилиқларға қаримастин, Йәһва һәққидә билим елишни тохтатмиған еди. Кейин у Йәһва гувачиси болуп, һаятиниң ахириғичә Йәһваға садиқ хизмәт қилған. Һәқиқәт үчүн бизниңму башқилар билән болған мунасивитимиздә өзгиришләр болуши мүмкин.
13, 14. Һәқиқәтни тонуп билгәндә көзқаришимиз билән иш-һәрикәтлиримизни қандақ өзгәртишимиз керәк? Мисал кәлтүрүң.
13 Напак ойлар билән яман ишлар. Биз һәқиқәтни билип, Худаниң өлчәмлиригә мас һаят кәчүрүшни башлиғанда, көзқаришимиз билән иш-һәрикәтлиримизни өзгәртишкә тәйяр болушимиз керәк. Әлчи Паул мундақ дәп язған: «Сөзгә киридиған балилардәк болуңлар, һәқиқәтни билмигән вақтиңлардики һәвәслириңларға әнди берилмәңлар... барлиқ ишлириңларда муқәддәс болуңлар» (Петрусниң 1-хети 1:14, 15). Қедимий Коринт шәһиридики адәмләрниң көпинчиси әхлақсиз һаят кәчүргән. Шуңа, улар Йәһваниң көз алдида пак болуш үчүн чоң өзгиришләрни қилиши керәк еди (Коринтлиқларға 1-хәт 6:9—11). Бүгүнму һәқиқәтни тонуп билгән адәмләр һаятида чоң өзгиришләрни қилиду. Петрус буни мундақ тәсвирлигән: «Өтмүштә силәр башқа хәлиқләрниң ирадиси бойичә әхлақсиз қилиқларға, шәһванийлиққа, шарапхорлуққа, әйш-ишрәткә, ичәрмәнликкә вә жиркиничлик бутпәрәсликкә берилип яшиғансиләр» (Петрусниң 1-хети 4:3).
14 Девин билән Жасмин нурғун жиллар бойи һарақкәш болған еди. Девин қабилийәтлик бухгалтер болсиму, бирақ һарақни көп ичкәнликтин, бир орунда узақ вақит ишләлмигән. Кишиләр Жасминни зораван вә аччиғи яман аял дәп тонуған. Бир күни Жасмин ичивелип, өйигә мәс келиватқанда, миссионер әр-аял униңға вәз қилған. У улар билән Муқәддәс китапни үгинишкә келишкән. Бир һәптидин кейин шу әр-аял уларниң өйигә кәлгәндә, һәр иккилиси ичивалған екән. Девин билән Жасмин уларниң кәлгәнлигигә һәйран қалған еди. Миссионер әр-аял кейинки қетим кәлгәндә, вәзийәт тамамән башқичә болған. Жасмин билән Девин Муқәддәс китап һәқиқитини тонуп-билишкә тәшна еди. Шуңа улар үгәнгәнлирини дәрһал һаятида қоллинишқа башлиған. Үч ай өтмәйла, улар һарақ ичишни ташлап, некасини қануний һалда рәсмийләштүргән. Уларниң йезисидики адәмләр Девин билән Жасминниң өзгәргәнлигини көрүп, уларму Муқәддәс китапни үгинишни башлиған.
15. Биз үчүн әң қийин өзгәртишләрниң бири немә вә немә үчүн шундақ дейишкә болиду?
15 Худаға яқмайдиған урп-адәтләр вә қаидә-йосунлар. Биз үчүн әң қийин өзгәртишләрниң бири — Йәһваға яқмайдиған урп-адәтләр вә қаидә-йосунларға қатнишишни тохтитиш. Йәһваниң бу урп-адәтләргә болған көзқаришини билгәндин кейинму, бәзи адәмләр үчүн улардин ваз кечиш қийин. Улар аилә әзалириниң, хизмәтдашлириниң яки достлириниң бесимидин қорқиду. Сәвәви улар көпчилик үчүн урп-адәтләрниң чоң әһмийәткә егә екәнлигини билиду. Болупму өлүп кәткән уруқ-туққанларға һөрмәт көрситиш билән бағлиқ урп-адәтләр бәк әһмийәтлик екәнлигини чүшиниду (Қанун шәрһи 14:1). Ундақта, керәклик өзгиришләрни қилишимизға немә ярдәм берәләйду? Биз һәқиқәтни билгәндә, һаятини өзгәрткән Йәһваниң қедимқи хизмәтчилири, мәсилән Әфәстики дәсләпки мәсиһийләрдин, үлгә алалаймиз.
16. Әфәстики бәзи адәмләр немидин ваз кечишкә тәйяр болған?
16 Қедимий Әфәс шәһиридә җодигәрлик билән шуғуллиниш кәң тарқалған еди. Бурун сеһиргәрлик қилған адәмләр мәсиһий болғандин кейин немә қилған? Муқәддәс китапта мундақ йезилған: «Сеһир-җодигәрлик билән шуғулланғанларниң интайин нурғуни өз китаплирини жиғип, һәммисиниң көзичә уларни көйдүрүвәтти. Уларниң баһалирини қошқанда, 50000 күмүч тәңгә болуп чиқти. Шундақ қилип, Йәһваниң сөзи қудрәтлик өсүп, ғәлибә қазанди» (Әлчиләр 19:19, 20). Шу садиқ мәсиһийләр қиммәтбаһа китаплиридин ваз кечишкә тәйяр болған вә буниң үчүн Йәһва Худа уларға мол бәрикәт бәргән.
Һәқиқәтни сетивелиш үчүн сиз немидин ваз кәчтиңиз?
17. а) Һәқиқәтни сетивелиш үчүн немиләрдин ваз кәчтуқ? ә) Келәрки мақалидә қандақ соалларниң җававини көрүп чиқимиз?
17 Һәқиқәтни сетивелиш үчүн сиз немидин ваз кәчтиңиз? Һәммимиз вақтимизни қурбан қилдуқ. Бәзилиримиз бай болуш пурситидин баш тарттуқ. Бәзи кишиләр билән болған мунасивитимиз өзгәргән болуши мүмкин. Нурғунлиримиз көзқаришимиз вә иш-һәрикәтлиримизни өзгәрттуқ һәм Йәһваға яқмайдиған урп-адәтләрни ташлидуқ. Биз мәйли қандақ қурбанлиқ берәйли, Муқәддәс китаптики һәқиқәт униңдин нәқәдәр қиммәтбаһа екәнлигигә көзүмиз йәтти. Һәқиқәт һаяттики әң қиммәтбаһа һәдийә, йәни Йәһва билән йеқин мунасивәткә, еришишимизгә йол ачқан. Һәқиқәт йолида меңип, егә болған мол бәрикәтләр һәққидә ойлиғанда, һәқиқәтни сетиветиш һәтта хиялимизғиму кирип чиқмайду. Бәзиләр немә сәвәптин һәқиқәтни сетиветиши мүмкин? Биз шундақ чоң хаталиқни өткүзүштин қандақ нери туралаймиз? Бу соалларниң җававини келәрки мақалидә көрүп чиқимиз.
a Бу мақалидики бәзи исимлар өзгәртилгән.