1. Йәһва немә қилишимизға йол қойиду?

 ЙӘҺВА һаят йолумизни өзүмизниң таллишимизға йол қойиду. У бизгә яхши қарарларни чиқиришни үгитиду вә биз Униң көңлини хошал қилидиған қарарларни чиқарғанда, утуқлуқ болушимизға ярдәм бериду (Зәб. 119:173). Муқәддәс китаптики дана мәслиһәтләргә қулақ салғанда, биз тоғра қарарларни чиқиримиз (Ибр. 5:14).

2. Қарарни чиқарғандин кейин қандақ қийинчилиққа дуч келишимиз мүмкин?

² Лекин бәзидә яхши қарар чиқарсақму, ишимизни ахириға чиқириш асан әмәс. Бирнәччә мисални көрүп чиқайли. Мәсилән, яш бурадәр Муқәддәс китапни толуқ оқуп чиқишни мәхсәт қилған. Бешида у бирнәччә һәптә оқуп жүрсиму, лекин бирәр сәвәпләр түпәйлидин оқушни тохтатқан. Болмиса, бир қериндаш пионер болуп хизмәт қилишни қарар қилған дәйли. Бирақ у бу хизмәтни башлашни арқиға сүриду. Ақсақаллар кеңиши җамаәттики көпирәк етиқатдашларға тәсәлли бериш үчүн йоқлашни қарар қилиши, амма бирнәччә ай өтүп, бу мәхситигә техи қол йәткүзәлмәслиги мүмкин. Бу вәзийәтләр бир-биригә охшимисиму, ортақ бир йери бар. Мисаллардики кишиләр қарар чиқарсиму, қарариға мас һәрикәт қилмиған. Биринчи әсирдә яшиған Коринттики мәсиһийләрму шундақ қийинчилиққа дуч кәлгән. Һазир улардин қандақ савақ алалайдиғанлиғимизни көрәйли.

3. Коринтлиқлар қандақ қарар қилған лекин кейин немә йүз бәргән?

³ Тәхминән милади 55-жили Коринттики қериндашлар муһим бир қарарни чиқарған. Улар Йерусалим вә Йәһудийәдики етиқатдашларниң қийинчилиқларға дуч келип, пул тәрәптин қийналғанлиғини вә улар үчүн башқа җамаәтләрниң ианә жиғиватқанлиғини аңлиған. Коринтлиқлар меһрибан вә мәрт болғанлиқтин, муһтаҗлиқта болған етиқатдашларға ярдәм беришни қарар қилған. Шуңа улар әлчи Паулдин қандақ ярдәм берәләйдиғанлиғини сориған. Паул уларға пул жиғиш тоғрилиқ көрсәтмиләрни берип, ианә жиғишни Титқа  тапшурған (Кор. 1-х. 16:1; Кор. 2-х. 8:6). Лекин бирнәччә айдин кейин Паул коринтлиқлар жиғмақчи болған пулни техи жиғмиғанлиғини аңлиған. Нәтиҗидә уларниң һәдийәлири башқа җамаәтләрниң ианилири билән биллә Йерусалимға әвәтилиши үчүн өз вақтида тәйяр болмиған (Кор. 2-х. 9:4, 5).

4. Коринтлиқларға 2-хәт 8:7, 10, 11дә йезилғандәк, Паул коринтлиқларни немә қилишқа үндигән?

⁴ Коринтлиқлар яхши қарар чиқарған еди вә Паул уларни күчлүк етиқади вә сәмимий мәртлиги үчүн махтиған. Бирақ Паул уларни башлиған ишлирини ахириғичә йәткүзүшкә үндигән (Коринтлиқларға 2-хәт 8:7, 10, 11ни оқуң). Бу мисалдин көргинимиздәк, һәтта Худаниң садиқ хизмәтчилири үчүнму яхши қарарға мас һәрикәт қилиш қийин болуши мүмкин.

5. Биз қандақ соалларға җавап алимиз?

⁵ Коринтлиқларға охшаш бизгиму чиқарған қарарни әмәлгә ашуруш тәс болуши мүмкин. Немә үчүн? Биз намукәммәл болғачқа, қараримизға мас һәрикәт қилишни кейингә қалдурушимиз мүмкин. Яки болмиса күтүлмигән бир вақиә йүз берип, планлиримизни әмәлгә ашуруш қийин болидиғанду (Вәз 9:11; Рим. 7:18). Өтмүштә қилған қараримизни қайтидин көрүп чиқиш яки уни өзгәртиш керәк болса немә қилалаймиз? Вә башлиған ишлиримизниң ахирини чиқириш үчүн немә қилсақ болиду?

6. Қараримизни қачан өзгәртиш керәк болуши мүмкин?

⁶ Биз бәзи муһим қарарларни, мәсилән Йәһва Худаға хизмәт қилиш яки өмүрлүк җүптимизгә вападарлиқни сақлаш қараримизни, һечқачан өзгәртмәймиз (Мәт. 16:24; 19:6). Вақит өтүп бәзи қарарлиримизни өзгәртишимизгә тоғра келиши мүмкин. Немә үчүн? Чүнки вәзийәтлиримиз өзгириши мүмкин. Әң яхши қарарларни чиқиришимизға қандақ қәдәм басқучлар ярдәм берәләйду?

7. Немә тоғрилиқ дуа қилишимиз керәк вә немә сәвәптин?

⁷ Даналиқ сорап дуа қилиң. Йәһва Худа Яқупни шундақ сөзләрни йезишқа дәвәт қилған: «Әгәр араңларда бирсигә даналиқ йетишмисә, Худадин сорисун, У һәммисигә сехийлиқ билән һәм дақақ қилмай бериду вә у кишигиму берилиду» (Яқуп 1:5). Қандақту бир мәнада, һәммимизгә «даналиқ йетишмәйду». Шу сәвәптин, қарар чиқарғанда яки уни өзгәртишкә тоғра кәлгәндә, Йәһва Худаға тайиниң. Шу чағда У сизниң дана қарарларни чиқиришиңизға ярдәм бериду.

8. Қарарларни чиқириштин авал қандақ издинип көрүшимиз керәк?

⁸ Чоңқур издинип көрүң. Йәһва Худаниң Сөзидин мәслиһәт издәң, Йәһваниң тәшкилати тәминләватқан әдәбиятларни оқуң вә сизгә дана мәслиһәт берәләйдиған адәм билән сөзлишиң (Пәнд н. 20:18). Ишиңизни өзгәртишкә тоғра кәлгәндә, башқа җайға көчүш керәк болғанда яки Йәһва Худаға хизмәт қилишни давамлаштуруш вә җан беқиш үчүн қандақ билим елиш дегәндәк мәсилиләрдә қарар чиқириштин авал пухта издинип көрүш интайин муһим.

9. Қарар чиқириштин авал немә үчүн нийәтлиримизни тәкшүрүшүмиз муһим?

⁹ Өз нийәтлириңизни тәкшүрүң. Йәһва Худа қәлбимизни тәкшүриду, шуңа Униң үчүн нийәтлиримиз бәк муһим (Сам. 1-яз. 16:7). Өзүмизни тәкшүргәндә, нийәтлиримизниң қандақ екәнлигини көримиз. Амма нийәтлиримиз һәқиқәтән жүригимиздин чиққанму яки йәнә башқа сәвәпләр барму, шуни тәкшүрүшүмиз керәк. Әгәр қәлбимиздә немә барлиғини пухта тәкшүрсәк, тоғра иш қилимиз. Бирәр қарарни қилиштики нийитимиз натоғра болса, қийинчилиқлар пәйда болғанда, уни әмәлгә ашуруш қийин болиду. Мәсилән, бир яш бурадәр пионер болуп  хизмәт қилишни халайду дәйли. Бирақ вақит өтүп, у 70 саат өлчимини орунлаш қийин болуп, хошаллиғини йоқитиши мүмкин. Немә үчүн? Бәлким, у Йәһва Худани хурсән қилиш үчүн пионер болушни башлидим дәп ойлиғанду. Лекин әмәлийәттә, у ата-анисиниң яки башқиларниң көңлини хошал қилиш үчүн пионер болуп хизмәт қилишни башлиған болуши мүмкин.

10. Адәмни өзгиришкә немә дәвәт қилиши керәк?

¹⁰ Муқәддәс китапни үгиниватқан киши тамака чекишни тохтатмақчи болди дәйли. Бешида у қаттиқ қийнилиду. Бир-икки һәптә тамака чәкмәй, кейин қайтидин чекишни башлайду. Буниңға қаримастин, ахирида у көзлигән нишаниға йетиду! Йәһваға болған меһир-муһәббити вә Униң көңлини хошал қилиш арзуси шу кишигә яман адитини ташлашқа ярдәм бериду (Кол. 1:10; 3:23).

11. Немә үчүн ениқ мәхсәтләрни қоюш муһим?

¹¹ Ениқ мәхсәтләрни қоюң. Мәхсәтлириңиз ениқ болса, уларға йетиш оңай болиду. Мәсилән, сиз Муқәддәс китапни һәр күни оқушни мәхсәт қилғансиз. Лекин сиз ениқ план түзмисиңиз, мәхситиңизгә йетәлмәслигиңиз мүмкин b. Болмиса, җамаәттики ақсақаллар көпирәк қериндашларни илһамландуруш үчүн уларни йоқлашни қарар қилди дәйли. Амма бираз вақит өтүп, улар бу қарариға мас һәрикәт қилмиди. Мәхситигә қол йәткүзүш үчүн ақсақаллар өзлиридин мундақ соалларни сориса болиду: «Қайси қериндашлар тәсәллигә муһтаҗ? Уларға йолуқуш үчүн ениқ вақит бәлгүлидиқму?»

12. Бәзидә немә қилишимизға тоғра келиши мүмкин вә немә үчүн?

¹² Мүмкинчиликлириңиз чәклик екәнлигини унтумаң. Қилмақчи болған һәммә ишларни қилиш үчүн һечкимниң вақти, күчи яки чамиси йәтмәйду. Шуңа, буни әстә тутуп, әмәлийәтчан яки әқил-парасәтлик болуң. Бәзидә бирәр ишни қилиш қолуңиздин кәлмәйдиғанлиғини чүшәнсиңиз, қарариңизни өзгәртишкә тәйяр болуң (Вәз 3:6). Мәсилән, сиз қарариңизни қайтидин көрүп чиқип, зөрүр өзгәртишни қилғандин кейин, әнди уни әмәлгә ашуралаймән дәп ойлайсиз дәйли. Ундақта, келиңлар, башлиған ишиңизни ахириғичә йәткүзүшкә ярдәм беридиған бәш қәдәмни көрүп чиқайли.

13. Қарариңизға мас һәрикәт қилиш үчүн керәклик күчкә қандақ еришәләйсиз?

¹³ Һәрикәт қилиш үчүн ярдәм сорап дуа қилиң. Йәһва Худа сизгә қарариңизға мас һәрикәт қилиш үчүн күч-қудрәт берәләйду (Флп. 2:13). Шуңа, Униңдин сизгә керәклик күч беридиған муқәддәс роһи һәққидә сораң. Худа дуалириңизға җавап бәрмәйватқандәк көрүнсиму, дуа қилишни тохтатмаң. Әйса ейтқандәк: «Өтүнүшни давамлаштуруңлар — һәм силәргә [муқәддәс роһ] берилиду» (Луқа 11:9, 13).

14. Луқа 14:28дики принцип қарариңизни әмәлгә ашурушиңизға қандақ ярдәм берәләйду?

¹⁴ План түзүң (Луқа 14:28ни оқуң). Башлиған һәрқандақ ишниң айиғини чиқириш үчүн, яхши план керәк. Андин шу планға мас һәрикәт қилиш лазим. Шуниңға охшаш, қарар чиқарғанда, уни әмәлгә ашуруш үчүн нәқ қайси қәдәм басқучларни басмақчи болғанлиғиңизни йезип қоюң. Қийин бир ишни қилиш керәк болса, уни бирнәччә асанирақ ишларға бөлүң. Һәрбир қәдәмдә бир ишни пүтәрсиңиз, сиз немигә қол йәткүзгәнлигиңизни ениқ көрәләйсиз. Паул Коринттики қериндашларни ианә пуллирини у кәлгәндин кейин жиғишниң орниға, «һәптиниң биринчи күнидә» жиғип қоюшқа дәвәт қилған (Кор. 1-х. 16:2). Қийин ишни асанирақ  ишларға бөлүш, сизни бу иш қолуңиздин кәлмәйду дәп ойлаштин сақлайду.

15. План түзгәндин кейин, немә қилсиңиз болиду?

¹⁵ Қәғәзгә чүшүрүлгән ениқ планиңиз болса, қарариңизға мас һәрикәт қилиш асанирақ болиду (Кор. 1-х. 14:40). Мәсилән, ақсақаллар кеңиши уларниң һәрбир қарарини, җүмлидин қандақту бир иш кимгә тапшурулғанлиғини вә уни қайси вақитқичә орунлаш керәклигини, йезип қойидиған бир ақсақални таллашқа дәвәт қилиниду. Бу көрсәтмигә риайә қилидиған ақсақалларға қобул қилған қарарлирини әмәлгә ашуруш оңай болиду (Кор. 1-х. 9:26). Бу мәслиһәтни күндилик һаятиңиздиму қоллансиңиз болиду. Мәсилән, вақит җәдвилини түзүп, биринчи новәттә қилиш керәк ишни тизимниң бешиға йезип қоялайсиз. Бу сизгә пәқәт башлиған ишлириңизниң һәммисини пүтүрүшкила әмәс, бәлки аз вақитта көпирәк ишларни қилишиңизғиму ярдәм бериду.

16. Қарарни әмәлгә ашуруш үчүн, немә қилиш керәк вә бу ой-пикир Римлиқларға 12:11дә қандақ тәкитләнгән?

¹⁶ Күч чиқириң. Планиңизға риайә қилиш вә башлиған ишиңизни ахириғичә йәткүзүш үчүн күч чиқириш керәк (Римлиқларға 12:11ни оқуң). Әлчи Паул Тимотийни өзини яхширақ тәлим беришкә беғишлашқа вә бу ишни давамлаштурушқа дәвәт қилған. Бу мәслиһәт башқа роһий мәхсәтләргә қол йәткүзүш үчүнму пайдилиқ (Тим. 1-х. 4:13, 16).

17. Әфәсликләргә 5:15, 16дики сөзләр планлиған ишимизни қилишқа қандақ ярдәм бериду?

¹⁷ Вақтиңизни даналиқ билән ишлитиң (Әфәсликләргә 5:15, 16ни оқуң). Қарариңизни әмәлгә ашурмақчи болған вақитни бәлгүләң вә шу вақитни өзгәртмәң. Ишиңизни башлаш үчүн қолайлиқ вақитни күтмәң, чүнки шу вақит һечқачан кәлмәслиги мүмкин (Вәз 11:4). Анчә муһим әмәс ишларниң муһимирақ ишларни қилишиңиз үчүн керәк вақтиңизни вә күчиңизни елишиға йол қоймаң (Флп. 1:10). Мүмкин болса, һечнәрсә кашила қилмайдиған вақитни таллаң. Башқиларға муһим бир ишиңиз барлиғини ейтип қоюң. Телефониңизни өчүрүп қоюң вә электронлуқ хәтләр билән иҗтимаий торларни ишиңизни қилип болғандин кейин тәкшүрсиңиз болиду c.

18, 19. Қийин болғандиму қарариңизни әмәлгә ашурушқа немә ярдәм берәләйду?

¹⁸ Қарариңизниң нәтиҗисигә көз тикиң. Қарариңизниң нәтиҗисини сәпәрниң мәнзили билән селиштурушқа болиду. Сиз бирәр мәнзилгә йетишни мәхсәт қилсиңиз, йол йепиқ болуп, йөнилишни өзгәртиш керәк болсиму, меңишни давамлаштурисиз. Дәл шуниңға охшаш, диққитимизни қараримизниң нәтиҗисигә қаратсақ, тосалғуларға қаримастин, йолумиздин қайтмаймиз (Гал. 6:9).

¹⁹ Яхши қарарни қилишму, уни әмәлгә ашурушму оңай әмәс. Лекин Йәһва Худаниң ярдими билән сиз даналиқ вә күчкә егә болуп, башлиған ишиңизниң айиғини чиқиралайсиз.